Lun 10 a viz Kerzu, niv.171
Sizhun 50 - 2007

Pellgargit ar pennadoù e stumm Word

Evit resev ur gemennadenn bep Lun evit ar Bremaik nevez, kasit ho chomlec'h da: bremaik@free.fr

Petra oa keleier Bremaik warlene? Klikit amañ!
Evit distreiñ d'ar bajenn degemer

Gwallamzer e Breizh

Tud Breizh, Vande ha Mervent Normandi o doa bet da c'houzañv dec’h diwar barrad gwallamzer kentañ ar goañv. E Penn-ar-Bed, er Mor-Bihan hag en Aodoù-an-Arvor e oa bet enrollet gant Météo France ar barradoù avel kreñvañ dec'h, etre 1e ha 4e goude-kreisteiz. Betek 137 km/e e Beg ar Raz hag Enez-Eusa, 133 km/e er Gerveur, 118 km/e e Ploumanac'h, 115 km/e e Penmarc'h, 110 km/e e Sant-Kast-ar-Gwildoù. En Oriant hag e Gwened e oa bet an avel o c'hwezhañ betek 111 ha 107 km/e. Kudennoù bras zo bet war vor. Ur vag lituanian he deus ranket gervel skoazelloù, pa oa war-hed 50 km eus Enez-Vazh, hag ur martolod filipinat zo kouezhet er mor rust nepell diouzh Eusa. N'eo ket bet kavet en-dro gant ar c'harr-nij hag ar viñsaskell a oa bet kaset war al lec'h gant ar Morlu. Meur a vag o deus kollet ul lodenn eus o lestrad (endalc'herioù dreist-holl, ha kamionoù ivez). En douaroù, toennoù zo nijet kuit, troc'het eo bet an tredan (5500 tiegezh e Breizh o doa gouzañvet diwar an diouer a dredan dec'h) ha gwez zo kouezhet. Pomperien Penn-ar-Bed o deus ranket mont 330 gwech war an dachenn, 170 en Aodoù-an-Arvor, 100 er Mor-Bihan hag e-tro 40 gwech el Liger-Atlantel.

Start an traoù e Bali

E Bali ez eus ur c’hendiviz diwar-benn an Endro, ha tommadur an hin dreist-holl. Eno ez eus bodet kannaded eus a bep seurt broioù eus ar bed, hag e vo kemeret divizoù a ranko erlec'hiañ re Kyoto. Diazezet e vo an divizoù war stadadennoù ar GIEC en danevell bet embannet gantañ nevez zo.
Met start eo lakaat an traoù da vont war-raok. Hervez labourioù ar skiantourien e vefe dav digreskiñ ar c'hementadoù gazoù un efed-gor ganto a 50% ac'hann da 2050 evit ma ne bignfe ar wrez nemet eus 2°C. Klask a reer lakaat un emglev tro-dro d'un digresk etre 25 ha 40%. Met ar broioù n'int ket greantelaet a c'houlenn chom hep kaout redioù da zigreskiñ o eztaoladennoù gazoù un efed-gor ganto, dre ma rankont kaout "gwir da greskiñ". Diouzh o zu, n'o deus ket c'hoant ar Stadoù Unanet da gaout redioù sifret hag a harzfe ouzh o ekonomiezh da ziorren. Met broioù all, evel Kanada, a lavar ne sinint netra ma ne vez ket graet kement-all gant ar Stadoù-Unanet : dre ma'z int div vro o keveziñ war dachenn an ekonomiezh, ma vez graet strivoù gant an eil ha ket gant eben e vo dizingal an traoù.
Setu, a-benn ar fin ned a ket tamm ebet an traoù war-raok e Bali. Ankeniet eo an inizi a grog da vezañ beuzet gant ar mor o pignat, ar c'hevredigezhioù a stourm evit an endro, hag Yvo de Boer, sekretour an ONU evit an Endro.

M.M.

Ur gouel evit ar filmoù savet gant pellgomzerioù!

Betek ar 7 a viz Genver e c'hell pep hini ac'hanoc'h kemer perzh en trede Mobile Film Festival a vo aozet eus an 8 d'an 29 a viz Genver war ar genrouedad. Aes-kenañ eo peogwir eo digor d'an holl doareoù filmoù, ar redioù nemeto a zo sevel ur filmig ur vunutenn gant ho pellgomz hezoug. Evit barn an hini a yelo ar maout gantañ, da lavaret eo 1500 euro, e vo ur strollad tud a-vicher liesseurt: Jan Kounen, filmaozour 99 Francs a vo e brezidant, gantañ e vo ar c'haner Tété, sot gant ar video hag en deus savet filmoù-berr eñ e-unan, an animatour tele Philippe Vandel a ginnig Pif Paf war ar chadenn Paris Première, an aktourezed Leila Bekhti a zo bet gwelet ba' Ali Baba gant Gérard Jugnot ha Geraldine Nakache he deus c'hoariet e Comme t'y es belle ha Kaamelot, ha Paul Desvaux, leurenner c'hoariva en deus savet filmoù-berr ivez. Met ouzhpenn ar film gwellañ a yelo ur priz gantañ peogwir e vo roet 500 euro evit an aktour hag an aktourez varrekañ, ar scenario hag ar plañ-sekañs gwellañ, ha c'hoazh an doare teknikel gwellañ da implij ar benveg ha priz ar sellerien. Ma’z oc'h kurius pe plijet gant seurt filmoù e c'hellit mont d'ober un dro war al lec'hienn www.mobilefilmfestival.com evit gwelet lod anezho, pe c'hoazh evit lakaat hoc’h anv evel-just.

Hoel Louarn

Un trec’h ouzhpenn evit Amdouni

Kampion Europa ar 5000 metr e oa deuet Mourad Amdouni da vezañ en hañv paseet. Gortoz a rae titl kevandirel ar c’hross-kountri, graet eo abaoe dec’h!

Dec’h e tremene kampionad Europa ar c’hross-kountri e Toro (Bro-Spagn). Ur C’horsikad, Mourad Amdouni, anavezet mat gant an atleterien, zo bet trec’h er redadeg Junior dirak Florian Carvalho (US Nemours), ispisialour war an 800 m.

Ha pa oa gortozet paotr Bastia, ne oa ket simpl dont a benn da drec’hiñ, dreist-holl ne oa bet morse ur “Gall” o trec’hiñ araozañ er c’hampionad-se. Ispisialour ar c’hross (daou ditl a gampion Bro-C’hall en deus bet er bloavezhioù tremen) hag ar 5000 metr, (e rekord d’an 12 tro hanter: 13’56”03) n’eo ket echu gant ar paotr yaouank-mañ da souezhañ ac’hanomp. Na Florian Carvalho kennebeut, eil ar bloaz paseet dija a-dreñv Mourad Amdouni e kampionad Bro-C’hall ar c’hross-kountri ha pevare e kampionad Europa an 800 metr gant un amzer a 1’48”95.

M’en doa spi Mourad Amdouni da zont a-benn da bakañ ar vedalenn aour ha fiziañs ennañ, ne soñje Carvalho “nemet” en ur plas e-touez an 10 kentañ. Ouzhpenn an daou-se e c’heller ouzhpennañ Hassan Chahdi, paket gantañ an eizhvet plas! Evel-just, gant disoc’hoù ken mat eo paket ar plas kentañ gant skipailh Bro-C’hall.

Dalc’homp soñj e oa ivez daou Vreizhad o redek: Gwendoline Despres, e redadeg ar merc’hed deuet, a echu d’an 42vet plas pa zegouezh Fabrice Jaouen da 38vet e hini ar baotred. Gant mignoned e skipailh e pign hemañ diwezhañ war trede plas ar podiom.

Kenan an Habask

My Blueberry Nights

Frañs, Hong-Kong – 2006

Senario ha seveniñ : Wong Kar-Wai

Rannet eo bet kalon Elizabeth (Norah Jones) gant he amourouz. Ruzañ a ra he glac’har e tavarn Jeremy (Jude Law, mar plij...) ha mignoniezh a sav etrezo. Mignoniezh ? Danvez un tammig muioc’h eget se zo moarvat. Met Elizabeth a oar he deus ezhomm kavout nerzh en-dro a-raok mont pelloc’h ganti. Kuitaat a ra New-York neuze evit mont da foetañ bro, un digarez evit en em gavout gant tud all koulz ha ganti he-unan.

Setu Wong Kar-Wai o filmañ ar Stadoù-Unanet gant al livioù flamm eo boas outo. A bep seurt a glever diwar-benn My Blueberry Nights e gwirionez. Tud penn-mouzh a lavar n’eo ket film gwellañ Wong Kar-Wai (daoust hag-eñ ne chom ket ur film fall gantañ ur film dereat-tre avat?), pe c’hoazh n’emañ ket en he aez ar ganerez Norah Jones (ma, daoust da bep tra e hañval ar ganerez-se bezañ un aktorez gwall zonezonet pa seller onest ouzh he ferzh). A-wechoù eo ar vurutellerien o defe da vezañ burutellet o-unan ("Biken ken" a anzave Truffaut goude bezañ paouezet gant ar vicher-se). Ur film-tre eo My Blueberry Nights ha ne c’heller rebech dezhañ nemet bezañ re verr. Gwelloc’h ober e soñj drezañ e-unan atav.

Meriadeg Vallerie

Evit gouzout hiroc’h: www.myblueberrynights-lefilm.com

"Enez Black Mor" bannet en Oriant

En Oriant e vo kinniget, gant Emglev Bro an Oriant, un abadenn sinema brezhonek e Tavarn ar Roue Morvan, plasenn Polig Monjarret. Da 8e30 noz d'ar Yaou 13 a viz Kerzu e vo. Enez Black Mor, ur film bevaat sevenet gant Jean-François Laguionie, zo bet lakaet e brezhoneg gant ar gevredigezh Dizale.

"1803, war aodoù Kerne-Veur. Kid, ur minor 15 vloaz, a zeu a-benn da achap kuit eus ti an emzivaded e-lec’h ma oa bac’het e-giz er galeoù. Ne oar ket peseurt anv gwir zo gantañ ha n’eo perc’henn war tra nemet ur gartenn. War ar gartenn-se, un enezenn, e-lec’h ma vefe un teñzor…"

Digor d'an holl, yaouank, kozh, danvez-brezhoneger pe ampart c'hoazh !

Evit gouzout hiroc'h: pgz 02 97 21 37 05 (Emglev Bro an Oriant)

Burial – Untrue

Penaos ober? Aet eo Massive Attack da netra pe dost, emañ bepred Portishead o labourat war e drede albom… dek vloaz goude an eil. Neuze, gortoz pell gortoz gwell? Koulz selaou Burial (nann, ne ouezer ket re piv eo, un den bennak eus Londrez, setu tout) hag e eil pladenn anvet Untrue. Ha ya, sañset e plij dezhañ sevel e donioù e fin an noz, pa vez kousket an holl dud all. Perak ket?

Keñveriañ gant an daou strollad bet meneget a-us? Evel-just. Amañ emaomp e bed ar sonerezh elektro tomm, diazezet alies-tre war mouezhioù doare sonerezh soul (Archangel, da skouer) ha sonioù boud-boud da vat. Met ouzhpenn a zo: gant Burial e vez mesket dub, 2-step, elektro, R'n'B, hip-hop, dance, ambiant, house. Met just a-walc’h: ken mesket int ken eo dibosupl gwelout penaos int rannet, didroc’het ha peget en-dro.

Brav-eston ivez Dog Shelter, evel pa vefe kroget strolladoù al label 4AD (Dead Can Dance, Cocteau Twins) da implijout binvioù elektronek. Gant UK en em gaver ne ouzer ket re war beseurt planedenn, met unan blijus a-dra-sur. Ar re o defe un tammig aon a c’hallo kregiñ gant Raver, ton diwezhañ ar bladenn, an hini aesañ ivez.

Dav lavarout ar wirionez: n’eo ket bet burzhudus 2007 evit a sell ouzh ar sonerezh rock pe elektro. Da vare best of ar bloaz ez eus chañsoù bras da adkavout Burial war al listenn.

R.M.

Embannet gant Hyperdub

Muioc’h a ditouroù :

www.myspace.com/burialuk

www.hyperdub.net/burial.html

Tanavennoù garlized gant bier

8 tanavenn garlized – 4 galetezenn gwinizh-du – 25 cl bier – 20 cl dienn fresk – 50 g amann sall – 2 chalotezenn – 1 loaiad vras sezv mod kozh – 3 loaiad vras saourenn besked – hugennoù roz - 1 loaiad vras kraksivolez miñset

Raktommit ar forn (therm 7 / 210°). Troc’hit 8 tric'horn (war-dro 10 cm) e-barzh ar galetez, amannenit. Lakait anezho en ur blad da rostañ 10 mn betek ma vo bruskennet ar galetez;

Lakait da rollvirviñ ar saourenn besked ha 50 cl a-zour. Pebrit hag holenit. Ouzhpennit an tanavennoù garlized roullet ha strapennet gant ur spegig koad. Lezit da rollvirviñ 3 mn, ha tennit diwar dan.

War dan kreñv, lakait ar banne bier da goazhañ gant ar c’halotez drailhet. Diskargit an dienn ha degasit d'ar berv, ouzhpennit ar sezv, pebr hag holen, hag an hugenn roz. Raktommit war dan bihan.

Aozit war pep asied un tric’horn galetez bruskennet, 2 danevenn garlized, pallennit gant ar soubilh, hag echuit gant un tric’horn galetez, strewit gant kraksivolez ha servijit diouzhtu.

Deiziataer 2008 !

Deuet eo er-maez deiziataer 2008 ha poent bras notenniñ emgavioù ar bloaz a zeu! Gant ur golo plastik glas e liv (warlene ne oa ket bet...), deiziataer 2008, e 4 liv penn-da-benn, a ginnig pep sizhunvezh war div bajenn (stumm "italia"). Kinniget eo pep pajenn en un doare pleustrek-kenañ evit merañ e amzer hag e notennoù personnel. Adkavet e vo, evel-just, un dro-lavar evit pep sizhun, peadra da binvikaat e vrezhoneg hep striv ebet! Ur bern titouroù all a gavot ivez en deiziataer : ar vakañsoù-skol dre dakad, taolenn ar c'hemmadurioù, deiziadur 2009, roll an 200 kevredigezh pe aozadur brasañ o plediñ gant ar brezhoneg pe ar yezhoù bihanniver. Gant e stumm bihan (15x9 sm) e c'hellot e lakaat aes en ho sac'h pe en ho chupenn.

E gwerzh 12 euro (mizoù-post profet) dre lizher gant Skol an Emsav, 25 straed Pierre Martin, 35000 Roazhon. Pgz : 02 99 38 75 83.

sae.bzh@wanadoo.fr
Pe er stalioù a ginnig danvez Breizh.

Gouzout muioc’h hag urzh-prenañ

Lennit Bremañ miz Kerzu !

Niv. 314 Bremañ zo nevez-deuet er-maez!

Berzh nec'hus an tuad broadelour pellañ e Suis, ober anaoudegezh gant pobl ha yezh Republik Mari El, ur pennad-kaoz gant ur pesketour eus ar Gelveneg, labour ar gevredigezh Aprem Jazz e Bro-Gemper, berzh ar c'hross-country e Breizh gant redadegoù ar goañv... Kaoz zo diwar-benn tout-se ha leun a draoù all c'hoazh e-barzh niverenn Bremañ miz Kerzu 2007.

Teuliad peder fajennad an niverenn nevez zo bet gouestlet d'an diouer a eoul-maen. Un danvez prizius eo ar petrol. Ekonomiezh ha doare bevañ Kornôgiz zo diazezet war an danvez du... Peseurt efedoù a weler c'hoazh hiziv eus an diouer-se, peseurt diskoulmoù e-keñver energiezh a vefe tu da gavout ? Kinnig a ra Bremañ un toullad elfennoù evit magañ ar preder war ar gudenn-se evit hon amzer da zont.

Bep miz e kinnig ar gelaouenn Bremañ, abaoe 1980,  pennadoù brezhonek a bep seurt, diwar-benn Breizh hag ar bed, kinniget brav, doare magazin.

Embannet gant Skol an Emsav (4,5 euro an tamm)

E gwerzh er stalioù levrioù a ginnig danvez Breizh, pe dre goumanant.

Evit gouzout hiroc'h: www.breman.org