Lun 11 a viz Kerzu, niv.126
Sizhun 50 - 2006

Pellgargit ar pennadoù e stumm Word

Petra oa keleier Bremaik warlene? Klikit amañ!
Evit distreiñ d'ar bajenn degemer

Marv eo an diktatour Pinochet

Dec'h eo marvet Augusto Pinochet, unan eus diktatourien vrudetañ an 20vet kantved, 91 vloaz e oa. Gant skoazell ar Stadoù-Unanet en doa kemeret ar Jeneral Pinochet penn Stad Chile dre an armoù. Dilennet e oa bet d'ar mare-se, en un doare demokratel, ar sokialour Salvador Allende, a oa bet neuze unan eus enebourien gentañ Pinochet, ha skrapet ha lazhet e oa bet gant an diktatour. Gant polis kuzh Pinochet e vefe bet lazhet un 3000 den bennak etre 1973 ha 1988, ouzhpenn 28000 a vefe bet jahinet hag ouzhpenn 200000 Chilead o doa dibabet kuitaat ar vro. Tamallet e oa Augusto Pinochet evit meur a dorfed a-enep Gwirioù Mab-den, met deuet e oa e alvokidi a-benn ma chomfe divarn an diktatour. Setu eñ marv hep bezañ bet barnet evit doareoù euzhus e renad.

Reuz a oa bet dec'h e straedoù Santiago, kêr-benn Chile, etre an dud chomet feal d'ar Jeneral kozh hag e enebourien, a oa deuet niverus war blasenn Palez Moneda e koun putsch 1973. Michelle Bachelet, prezidantez Chile, a oa bet toullbac'het gant tud Pinochet, hag hi merc'h un enebour d'an diktatour bet lazhet er prizon. Devet e vo korf ar Jeneral hag ul lid a vo graet gant an arme hepken dimeurzh, e Skol an Arme e Santiago. Ent-ofisiel he deus kaset Margareth Thatcher, bet kentañ ministrez Bro-Saoz, ur gemennadenn a gengañv.

An nukleel dre gendeuziñ

Komz a reer kalzik eus an nukleel dre gendeuziñ evit produiñ tredan en amzer dazont. Peseurt perzhioù a zo gant hennezh ?
Ur raktres a zo war ar stern evit studiañ an nukleel dre gendeuziñ, ITER e anv. Met hennezh ne brodufe ket tredan, ne vefe nemet un arnodva. Ar pal ? Krouiñ ur reaktadur dre gendeuziñ e-pad... 400 eilenn ! Da lâret eo ne servij nemet da welet daoust hag-eñ eo posupl pe get. D'an nebeutañ ur c'hard eus budjed broadel an enklask a vefe gouestlet d'an dra-se, hag energiezh forzh pegement evit lakaat an dra-se da vont en-dro (500MW evit tizhout ar c'hendeuziñ). Ouzhpenn-se e vo dañjerusoc'h eget ur greizenn nukleel voutin, peogwir e raio gant tritium, un izotop skinoberiant eus an hidrogen, hag emañ raktreset ITER en ul lec'h ma vez krenoù-douar alies. 40 000 tonennad a lastez skinoberiant a vo da skarzhañ en ul lec'h bennak. Ma vefe gouestlet kement a arc'hant d’an energiezhioù propr ha da ITER e vefe krouet muioc'h a labourioù evit ur prantad amzer hiroc'h.

M.M.

Muioc'h a ditouroù :
http://www.sortirdunucleaire.org/index.php?menu=sinformer&sousmenu=themas&soussousmenu=iter&page=index
http://www.sortirdunucleaire.org/index.php?menu=agir&sousmenu=actions&soussousmenu=ITERpetition2005&page=appel

Mergodennoù e Kastell Ruz kêr an Erer Kozh

Er bloaz-mañ c’hoazh e vo Gouel an Erer Kozh o kinnig abadennoù digoust da geñver Gouel Nedeleg. Disadorn eta e vo kinniget "Autrement dit" gant ar gompagnunezh Délit de Façade, un abadenn dic’hortoz leurennet gant Alain Sachs : istor buhez div familh amezeien enebet war pep tachenn. "Ur vojenn a-vremañ saourus, fentus, souezhus ha just" diazezet war hon buhez pemdeziek treuzfurmet e mareoù dreistordinal : dizoloet e vo mergodennoù o vevañ 6 prantad buhez a-dreñv 6 prenestr ar C’hastell Ruz e Straed Vras Karaez.

Pal ar grouidigezh-mañ a zo klask un doare da gontañ troet muioc’h gant ar fent, ar marvailh hag ar c’homzoù dibenn : "6 kastellig bihan, 6 arvest ur gomedienn, evel 6 prenestrig war ar bed" eme Alain Sachs a zo bet e-mesk ar re gentañ oc’h implij al plasennoù-kêr evel leurennoù foran. Dedennet eo neuze gant implij ur gwir lec’h bevañ evit dibunañ istorioù : "Un doare eo evidon da ziskouez e c’hell c’hoazh ar mergodennoù kontañ hor c’hevredigezh dre ar flemmgan hag al luadenn. N’eus nemet seurt "pezhioù-c’hoari-straed" a c’hell lâret ar memes istor da sellerien liesseurt, oadoù disheñvel, o kinnig meur a live ha meur a zoare da welet an istor, gant ar memes plijadur evit an holl."

Hoel Louarn

Marvailh: fantastique. Flemmgan: satire. Luadenn: parodie.

"Autrement dit" d’ar Sadorn 16 a viz Kerzu, Park ar C’hastell Ruz, e Karaez. Hag ivez d’ar sul 17 a viz Kerzu da 5 eur e Koc’hu Karaez : "Ecoute ta mère et mange ton short" (abadenn sonerezh rock evit ar vugaligoù) gant ar strollad Ministère Magouille.

Un droiad brezhonek er C'harter : 

posupl eo !

D'ar Sadorn 16 a viz Kerzu e vo tu ober un droiad er C'harter, ur greizenn arzoù a-vremañ e Kemper, a-dreuz an diskouezadeg nevez "16 vloaz ! 200 oberenn diskouezet, distro er C'harter !" gant Annaig Loisel, heñchourez divyezhek.

Fellout a ra d'ar C'harter diskouez e c'haller eskemm war an arzoù a-vremañ dre ar brezhoneg, ha mont da heul al lañs a-du gant ar brezhoneg a zo e Kemper .

Hiviziken e vo un droiad brezhonek da geñver pep diskouezadeg en amzer-da-zont.

Da 4 eur goude-merenn. Priz leun 3€, distaol 1,5€

Titouroù : 02 98 55 55 77.

Laouen neuierezed ar C'hwec'hkorn gant o zroiad e Helsinki

Dec'h e oa bet klozet Kampionad Europa an neuierezh e poull bihan, bet aozet e kêr-benn Finland, Helsinki. Daou rekord europat nevez zo bet tizhet dec'h gant Esther Baron ha Alena Popchanka, a oa o neuial evit skipailh ar C'hwec'hkorn. Gant Baron eo bet graet an amzer wellañ evit an 200 metr kein (2'04"8/100). N'emañ ket re bell ken eus ar rekord bedel, 2'04'08/100, bet graet gant an amerikanez Natalie Coughlin. Popchanka (Belarusadez a-orin) he deus hi graet ar gwellañ amzer war an 200 metr dieub (1'54"25/100). Heuliañ a ra an div blac'h skouer an neuierez hollvrudet Laure Manaudou, tizhet ganti e-kerzh ar C'hampionad-mañ ur rekord bedel (400 metr dieub) ha daou rekord evit ar C'hwec'hkorn (50 ha 100 metr kein).

Gwoemul (The Host)

Korea ar Su – 2006
Senario ha seveniñ : Joon-ho Bong

Saotret eo bet at stêr Han gant skarzhadurioù ur bon stadunanat e Korea ar Su. Un nebeud bloavezhioù goude emañ Hee-bong (Byeon Hie-bong) oc’h ober war-dro e snak e Seoul war vord ar memes stêr gant skoazell e vab diwezhat, Gang-du (Song Kang-Ho), hag e verc’h vihan, Hyun-seo (Ah-sung Ko). Met d’an deiz-se, tra m’emañ ar familh o sellet ouzh kevezadeg ar c’hoar, Nam-joo (Bae Doona), e tiveuz un euzhvil ramzel eus an Han.

Gwall iskis eo ar film-se, gallout a rafec’h mont d’e welet evel un doare istor Godzilla koreat ha chom war-c’horre an istor. Traoù all zo da welet, ha furlukinerezh an tudennoù zo aze evit sachañ evezh an arvestourien war an eil derez zo er film. N’eo ket splann e vefe un diviz war an arvar ekologel na war spouron nukleel Korea an Norzh avat, fraeshoc’h eo ar vurutelladenn sokial. Treset ez eus e Gwoemul (The Host) ur gevredigezh koreat gwanet gant al lezober, mibiliet gant bezañs trevadennek “breur bras” ar Stadoù-Unanet.

Meriadeg Vallerie

Evit gouzout muioc’h : http://www.thehost.fr/

Staj Kan-ha-diskan e Landerne gant Armel An Hejer

Disul e vo aozet ur stal dizoleiñ ar c’han-ha-diskan e Maner Keranden e Landerne, e salioù ar gevredigezh Stumdi. E stumm stalioù-labour e vo kinniget petra eo ar c’han-ha-diskan, un doare da ganañ eus Kreizh-Breizh, desket diazezoù "ar c’han da zañsal" e Breizh, selaouet kanaouennoù bet dastumet, ha desket un nebeud tonioù kan-ha-diskan. N’eo ket ret gouzout brezhoneg evit kemer perzh er staj hag adalek 12 vloaz eo digor d’an holl. Kaset e vo an devezh-mañ da benn gant Armel an Hejer, ur gavoter eus ar c’hentañ, sot gant tonioù Bro-Gwened. Hemañ en deus desket kan-ha-diskan o selaou ar re gozh e Kreiz-Breizh a-raok mont da ganañ gant arzourien vrudet evel Kristen Nikolaz pe Alain Le Clère. Plijet eo gant meskajoù a bep seurt p’eo bet o kemer perzh e "Ledaw", ur gejadenn etre sevenadurioù Breizh, Arabia hag India, pe "Lus", doare Elektro. En deiz a hirio e c’heller klevet anezhañ gant ar strolladoù "Deus’ Ta" hag "Ozan Trio". Armel An Hejer zo ivez kelenner kanaouennoù hengounel hag alies e vez o tisplegañ an danvez ba prezegennoù.

H.L.

Sul 17 a viz Kerzu e Maner Keranden, Landerne.

Izili : 19 euro / Re all : 24 euro (10 euro d’an enskrivadur / priz hep ar pred). Evit gouzout hiroc’h :

Centre Breton d’Art Populaire 02 98 46 05 85 cbap@cegetel.net

Ti Ar Vro Leon 02 98 83 30 41 tiarvroleon@wanadoo.fr

Evit kousket war al lec’h : Ti An Douristed 02 98 46 05 85

Klaxons – Atlantis To Interzone
Embannet gant Kitsuné

Barrad avel kreñv-spontus war hall 9 Palez an diskouezadegoù e Roazhon, digwener tremenet. Deuet e oa at strollad Klaxons da ginnig e donioù, da lavaret eo peadra da lakaat ar re varv da zañsal.

Da c’hortoz an albom a zeuio er-maez e dibenn miz Genver, profitomp evit soubañ en o fladenn gentañ, anvet Atlantis To Interzone. Desket a-walc’h omp : Interzone a laka ac’hanomp da soñjal e William Burroughs hag e Joy Division. Ma, ne zeu ket Klaxons eus Manchester, ha koulskoude e seblantont bezañ desket o c’hentel : gitar boud izel-mat, lusk cheñch-dicheñch, ur piano tredan a son evel un alarm, hag ur ganaouenn a ya buan-tre betek ar fin.

Hervez tud zo e vefe Klaxons e penn un emsav sonerezh nevez anvet New Rave. Anat eo ez eo re abred evit lavarout ha padout a ray ar strollad. Met arabat deomp bezañ begoù figus : lakait ar bladenn da dreiñ, hag e tañsit a-dra sur !

R.M.

Muioc’h a ditouroù :

http://www.myspace.com/klaxons

http://www.klaxons.net/

Penaos fardañ avu lart hoc’h-unan

Avu lart (war-dro 500-600 g)

Tennañ ar gwazhiennoù diouzh an avu. Sasunit gant ul loaiad vihan a holen, pebr, ur banne Porto pe Armagnac. Pakit gant paper "cellophane", goloit anezhañ mat evit ma vefe an avu ar c’hranekañ posupl. Toullit ar cellophane gant un nadoz. Pakit gant ur paper cellophane all, hag gant paper aluminiom. Lakait e-barzh ur barkedig ha goloit pep tra (ar barkedig hag an avu) gant paper alu ur wech all.

Poazhañ en dourgib un eurvezh (130°, er forn bihan). Lakait er yenerez pa vez yen ar meuz.

Doare kinnig : Avu lart war un tamm bara kras

Danvez evit 6 den : 12 tamm bara, 2 aval, 4 loaiad dienn fresk, 1 loaiad vras chug sitroñs, pebr ha holen, alamandez drailhet, tammoù perisilh, 12 delienn endivez

Dibluskit, displuzit ha rasklit 2 aval, meskit gant 4 loaiad vras a zienn fresk, ar chug sitroñs, pebr hag holen. Lakait 12 tamm bara da grazañ. Lakait war-c’horre pep tamm un delienn endivez, un tamm meskaj avaloù gant dienn, un dailhenn avu druz, gant alamandez drailhet, ha pebr. Ha klinkit gant tammoù perisilh.

Mari Lubrano

Ar saezhataer
(23 a viz Du – 21 a viz Kerzu)

Er bloavezh 2007 e vo pouezus-tre evidoc’h dispakañ ho personelezh, dre ar garantez ha dre al liammoù gant ar re all. Mat e vo pep tra ma teuit a-benn da embann sklaer ar pezh hoc’h eus c’hoant da gaout hep leuskel a-gostez ar re a zo kar deoc’h. Seul vuioc’h e vo klasket ganeoc’h kavout ur c’hempouez etre emgarantez ha brokusted, difenn hoc’h interestoù ha doujañs ouzh ezhommoù ar re all, seul vuioc’h e c’hoarzho ar vuhez ouzhoc’h.
War-lerc’h ho po c’hoant da sikour ar re all, muioc’h ha startoc’h. Gallout a rafec’h kemer perzh en obererezhioù sokial pe speredel. Dre ma ne blij ket deoc’h bezañ hoc’h-unan penn, emezelit en ur gevredigezh pe en ur strollad a labour war an dachenn denegour. Kalz a zeskamant hag a levenez a c’hellfec’h tennañ diouzh an emzalc’h-se.

Gwener a vo ganeoc’h. Ma vezit ken hoalus ha ma c’hellit bezañ a-wezhioù ne vanko ket karantez deoc’h. Daoust deoc’h gouestlañ hoc’h amzer d’ho micher ha d’ho familh, klaskit kemer un tammig amzer evit ober war ho tro. Hoc’h amourouz-ez a vo laouen ma teuit a-benn da souezhañ anezhi/añ. Diwallit da chom hep goulenn re rak ne vefec’h ket digarezet bep tro. Ar re a zo o-unan a vo sikouret gant Yaou hag Ouran. Met da ziwall a vo ivez : ne weloc’h ket sklaer bepred. A-raok bezañ re entanet e vo mat deoc’h prederiañ un tamm.

Ne vo ket aes pep tra e bed al labour. Trapoù a vo stignet deoc’h. Skoilhoù a bep seurt a vo war ho hent. Diaes e vo lakaat anezho da gouezhañ peogwir e teuint alies eus youl fall enebourien. Dizoloet e vo ganeoc’h ez eus tud a vag gwarizi en ho keñver. Hag ar re-se a glasko stankañ an hent deoc’h. Bezit dispont koulskoude, rak c’hoari a raio ar planedennoù a-du ganeoc’h. Beajiñ ha diorren hoc’h aferioù a c’helloc’h ober. Hag a-feur ma’z aio ar bloavezh war-raok e vo plaenet an traoù tamm pe damm.

Katell Leon

Deiziataer hollvrezhonek 2007

An deiziataer 2007 zo deuet er-maez ! Kavet e vo er stalioù levrioù breizhek hag e Skol an Emsav, e Roazhon, evel-just. Un doare nevez zo gant deiziataer 2007. Bihanoc'h eo evit mont gwelloc'h er chakodoù hag er seier-dorn. An Deiziataer hollvrezhonek zo ur benveg bepred talvoudus : leun a chomlec'hioù (ouzhpenn 200) hag a ditouroù vo kavet diwar-benn Breizh hag ar brezhoneg, un daolenn kemmadurioù, kodoù-post kumunioù Breizh... 13 euro an tamm.

Skol an Emsav, 25 straed Pierre Martin, 35000 Roazhon:
Pgz: 02 99 38 75 83. sae.bzh@wanadoo.fr.  http://perso.wanadoo.fr/skol.an.emsav.