Lun 2 a viz Genver, niv. 81
Sizhun 1 - 2006

Pellgargit ar pennadoù e stumm Word

Bloavezh mat !

Ra vo 2006 ur bloavezh leun a startijenn hag a levenez evit lennerien Bremaik !

Trugarez d'an holl re o deus kaset deomp o respontoù d'ar goulennoù hor boa lakaet e niverenn diwezhañ Bremaik 2005.

Degas a reomp da soñj d'hol lennerien e vez savet ar pennadoù gant tud a-youl vat, a labour ingal bep sizhun evit kinnig pennadoù nevez, abaoe tost daou vloaz.

Ma 'z eus lod ac'hanoc'h dedennet evit kemer perzh er skipailh, en un doare ingal pe get, kasit ur gerig deomp ! Ha mard oc'h dedennet gant an arzoù pe ar sportoù war ar marc'had, e vefe dispar kas keloù deomp...

Mat eo da Vremaik kaout soñjoù hag evezhiadennoù he lennerien a-benn reiñ kalon d'hor skipailh skriverien.

Bloavezh mat ha Yec'hed mat deoc'h !

Bloavezh 2006 : dao dezhi !

Erru eo ar bloaz nevez. Ha gant ar bloaz nevez e vezer kustum d’ober mennozhioù nevez. Petra a c’hellit divizout c’hwi evit ma z’aio un tammig gwelloc’h an endro ? Da gentañ e c’hallit lenn en dro an holl bennadoù “Endro” gant Bremaik evit gwelet war peseurt tachennoù kas ho strivoù, ha strivoù ho familh ! Met marteze goude ur sizhunvezh riboul diehan oc’h re skuizh evit ober kement-se. Neuze evit aesaat penn kentañ ar bloaz deoc’h eo laouen Bremaik o kinnig deoc’h ur roll “mennozhioù nevez” da lakaat da dalvezout e 2006 (hag er bloavezhioù da heul)!

Espern dour

cheñch skarzh-dour pe staliañ “privezioù sec’h” zoken, tapout strinkadennoù e-lec’h kibellat, chom hep lezel an dour da redek pa vezit o skaotañ al listri pe o vroustañ ho tent, pas naetaat ho oto re alies...

Produiñ nebeutoc’h a lastez

dibab ho lastez (gwer, plastik, kartoñs), prenañ ar muiañ ma c’hallit traoù hep gwiskadoù plastik pe goloioù a bep seurt na servijont da netra (prenañ traoù “a-drak” da skouer), kas ur sac’h evit lakaat ho prenadennoù e-lec’h tapout ar sac’h plastik kinniget, implijout paper adaozet (paper-lizhiri, paper-revr...), nac’han ar bruderezh en ho poest-lizhiri.

Beveziñ nebeutoc’h a dredan

prenañ klogorennoù “gremm izel” (basse consommation, low energy), chom hep implijout tommerezh tredan ha ma n’hallit ket cheñch an tommerezh-se, difuiñ gwelloc’h ho ti, lazhañ ar gouloù pa guitait ur sal, lazhañ ar mekanikoù da vat ha pas o lezel war “evezh”, prenañ ur gaoter dre heol evit tommañ an dour (60% eus ar priz prenañ a c’hello bezañ tennet diwar ho tailhoù, tudoù !).

Liorzhañ en un doare propr

chom hep implijout louzoù kimiek ( a lazh ar buzhug, an amprevaned, al laboused..), ober kompost, plantañ traoù liesseurt a c’hello degemer loened, implijout gouennoù kozh.

Tapout nebeutoc’h diwar an natur

debriñ nebeutoc’h a gig ha debriñ kig mat hag eus un orin dereat (kalz saotrusoc’h eo ar produiñ kig evit ar produiñ edeier ha gallout a reer magañ nebeut a dud gant ar c’hig, koadeier Amazonia a zo devet evit desevel chatal), debriñ nebeut tre a besked ha pesked pesketaet en un doare dereat ha naet (da skouer, pas ar pesked eus goueled ar mor ), chom hep prenañ koad ekzotek.

Nebeutoc’h a dreuzdougen

implijout nebeutoc’h ho karr ( ha prenañ ur c’harr a ra gant nebeut a esañs) ha mont gant an tren, ar c’hirri-boutin, war varc’h-houarn, war droad pe “kenweturañ”, prenañ traoù produet an tostañ ma c’hellit eus ho ti (boued ar broduerien vihan en trowardroioù, chom hep prenañ traoù a bellvro), chom hep mont gant ar c’harr-nij evit vakañsiñ.

Chom hep ober gant traoù saotrus pe dañjerus evit ar yec’hed

prenañ muioc’h a voued bio, diwall d’an danvezioù a bep seurt ha zo e gwerzh ha hervez lezenn met dañjerus evit an endro hag ar yec’hed koulskoude (gwernis ha livaj, plastik, kosmetik en o zouez)

.... !

Deoc’h c’hwi da welet petra ho peus c’hoant d’ober, ha da ijinañ traoù all. Ha dreist-holl, kendalc’hit da lenn ar pennad “Endro” e Bremaik !

Diskouezadeg skeudennoù diwar-ben India

Ur rummad skeudennoù graet gant Alain Carayol a vo kinniget betek ar 15 a viz Genver e Skol Diwan Roazhon. En India eo bet kemeret ar skeudennoù. Anavezout a ra mat Alain Carayol ar vro liesseurt-se hag embannet ez eus bet tri levr skeudennoù gantañ c'hoazh. Ouzhpenn 20 beaj zo bet graet gantañ en India abaoe e 25 bloaz. War ur c'hwil-tan e veaj du-hont. Divizet en deus ar skeudenner labourat war danvez India "a-benn kinnig skeudennoù bravoc'h-bravañ, santadurioù kreñv enno. A-bouez bras eo al livioù. Rak livioù zo e pep lec'h ha diaes eo ober ur skeudenn a sacho evezh ar seller hag a lako anezhañ da santout un dra bennak" eme Alain Carayol. Diskouezadegoù skeudennoù a vez graet ingal gant Skol Diwan Roazhon. Unan gant skeudennoù Kurdistan Gael an Ny a oa bet aozet warlene.

Skol Diwan Roazhon, 13 bali Portugal (karter ar Blosne : metro Italie)

Tri levr Alain Carayol, Inde : Malabar & Coromandal, Mère Gange ha Rajasthan, terre des princes, zo bet embannet gant Romain Pages Éditions (24 euro an tamm).

Eil lodenn ar "Volvo Race"

Hiziv e loc'ho seizh skipailh ar Volvo Race, eus Kab Suafrika, war-zu Melbourne, en Aostralia. Ar Volvo Race zo ur redadenn war vor, gant bigi dre lien, ur c'houc'h ganto, dre skipailh ha gant ehanoù. Aet e oa kuit ar rederien-vor eus Vigo (Spagn) evit tizhout Kab Suafrika, el lodenn gentañ.

Dre an inizi Kergelenn e ranko tremen ar rederien ha n'eo ket ar mor hag an amzer eus ar sioulañ er c'horn-hont ! 6100 miltir eo hed an eil lodenn-se eus ar Volvo Race. Padout a raio etre 14 ha 18 devezh.

Aet e oa ar maout gant skipailh Abn Amro I evit al lodenn gentañ. Skipailh ar vag-se zo kaset war-raok gant ar Zelandnevezad Mike Sanderson. En trede plas dre boentoù emañ skipailh Abn Amro II, kaset war-raok gant Sébastien Josse. Staliet e Konk-Kerne emañ.

Where the truth lies
(La vérité nue)

Stadoù-Unanet - 2005

Senario ha seveniñ : Atom Egoyan

Koublad dudiourien vrudetañ ar Stadoù-Unanet e oa Lanny Morris (Kevin Bacon) ha Vince Collins (Colin Firth) e dibenn ar bloavezhioù 50. Enno e oa bet fiziet luskañ an Telethon da skouer. War-nes kregiñ ganti e oant pa oa bet adkavet korf marv noazh ur plac'h yaouank en o c'hambr. Kevrinus eo chomet an torfed-se, met ur gazetennerez anvet Karen O'Connor (Alison Lohman) a glask gouzout ar perag hag ar penaoz eus an afer-se pemzek vloaz diwezhatoc'h.

Diwar ur romant gant Rupert Holmes diazezet war un darvoud gwir (bet c'hoarvezet gant Dean Martin ha Jerry Lewis) eo savet Where the truth lies. Ur polar cheuc'h ha lufrus en deus sevenet Atom Egoyan aze. Klasel-tre eo steuñvenn an istor e gwirionez (daoust m'eo diaes he heuliañ da vareoù zo) met n'emañ ket aze kalonenn ar film forzh penaos. Ar blijadur hag ar friantiz eo abegoù pennañ Where the truth lies a zo douget gant kened Alison Lohman. Met estreget bezañ brav eston eo Lohman, a-drugarez d'un dudenn venel ha kreñv, eus ar re a vez kavet re nebeut er sinema a vremañ.

http://www.wherethetruthliesfilm.com/

Best of 2005

The Arcade Fire – Funeral

Embannet gant Rough Trade

2005, bloavezh Kanada ? Posupl. Al lod brasañ eus ar strolladoù nevez ha dedennus war un dro a zo o tont eus ar vro-se. Ar souezhadenn vravañ a zo deuet gant The Arcade Fire hag o fladenn Funeral : tonioù brav, nerzhus ha sioul, trist met chikaner, a bep seurt binvioù implijet. Ar sonerezh indie nevesaet, petra. Gourc’hemennoù.

Ellen Allien – Thrills

Embannet gant Bpitch Control

Pa lavarer Berlin e soñjer er sonerezh elektro. Evit ar bladenn-mañ ez eo distro Ellen Allien d’an diazezoù : sonioù vintage, luskoù brezidik, ton ebet evit dañsal war-bouez an hini diwezhañ, ha neuze ? Kalz gwelloc’h evit pladenn ziwezhañ Daft Punk da nebeutañ.

Black Dice – Broken Ear Record

Embannet gant DFA

Ranket em boa dilezel geriaoueg voutin ar rock evit sevel ur pennad diwar-benn ar bladenn-se. Amañ eo un afer all, a denn d’an douaroniezh, an douar o krenañ, menezioù-tan o skopañ maen-teuz, traoù evel-se. Ur bladenn diaes da selaou, met ur seurt diazez, un tamm maen lakaet e-kreiz un dachenn a-benn sevel ur savadur a vo c’hoazh war-sav a-benn 200 vloaz.

Ladytron – Witching Hour

Embannet gant Rykodisc

Elektro-pop ? Un dra bennak evel-se. Ha c’hoazh : kregiñ a ra an traoù war an ton bras : High Rise, pe sonerezh o tegas deomp skeudennoù bannlevioù ur gêr, forzh pelec’h er bed. Gant Destroy Everything You Touch eo kentoc’h taolioù kontell roet d’an Europop ha gant Sugar (e-kreiz ar bladenn) en em gaver gant kanaouenn efedusañ ar bloavezh. Gant o zrede pladenn eo deuet a-benn sonerien Ladytron da sevel ur bennoberenn.

Whitey – The Light at the End of the Tunnel is a Train

Embannet gant PIAS

Ur priz evit Whitey, na vefe nemet evit titl e bladenn. Evit ar peurrest : sonerezh elektro nerzhus, Whitey e-unan evit an holl vinvioù, hag eñ o tont eus reter Londrez, pe marteze e rankfemp lavarout : eus un toull bennak dindan an douar e reter Londrez. Ma n’eo ket gwall laouen an holl donioù savet gantañ, int efedus ha liesseurt.

Bervadennoù

Ret eo ober hor mad eus ar goañvezh kriz-mañ evit fardañ evajoù tomm a-zoare !

Te an enderv

Meur a seurt te frondus a vez kavet e pep lec’h. Met ne dalvez ket ne c’heller ket fardañ traoù all. Setu ur rekipe o tont eus rannvro ar C’hachmir en India : meskit ul loaiad vras a zeliennoù te glas hag un tamm kannel. Ouzhpennit peder greunenn gardamom ha daou pe dri speg safron. Diskennit dour tomm ha laoskit da soubañ.

D’ober huñvreoù brav
Diskennit div loaiad vras a zourenn bleuñv-orañjez en un hanter litrad a zour o virviñ. Ouzhpennit div loaiad vras a sukr rouz. Pa grog da virviñ adarre, tennit diwar an tan. Goloit ha laoskit da soubañ un nebeud munutennoù a-raok saourañ.