Lun 10 a viz Meurzh, niv.182
Sizhun 11 - 2008

Pellgargit ar pennadoù e stumm Word

Evit resev kemennadenn nevez Bremaik bep Lun,
kasit ho chomlec'h da: bremaik@free.fr

Petra oa keleier Bremaik bloaz zo? Klikit amañ!

Evit distreiñ d'ar bajenn degemer

Kentañ tro dilennadegoù kêr 2008

Setu echu kentañ tro an dilennadegoù kêr. Gwelet eo bet e Breizh, evel er C'hwec'hkorn, danvez-dilennidi ar gostezenn gleiz o tapout lañs. Neoazh, ne vo kadarnaet al lusk-se nemet goude an eil tro, rak e meur a lec'h n'eo ket anat gant piv ez aio ar maout en eil tro. E meur a gêr eo aet ar maout gant tud zo adalek ar c'hentañ tro. E Naoned da gentañ, gant ar maer Jean-Marc Ayrault, addilennet gant ouzhpenn 55% eus ar mouezhioù. Lannuon, Gwengamp, Lambal, Felger ha Pondi o deus un ti-kêr gant liv ar gostezenn gleiz abaoe dec'h ivez. Gant ar gostezenn-se eo partiet mat ivez evit tiez-kêr Brest, an Oriant, Roazhon ha Sant-Nazer, daoust da bevar strollad bezañ tapet ouzhpenn 10% eus ar votoù er gêr diwezhañ-mañ. Souezhadennoù zo bet ivez evit ar gostezenn zehou: gounezet eo bet ganti Ti-kêr Douarnenez, ha dastumet he deus kalz poentoù war ar gostezenn gleiz e Montroulez ha Landerne. Miret eo bet gant ar gostezenn zehou Landivizio, Gourin, Redon, Dinan, Kastell-Nevez-ar-Faou. Kollet eo bet Pont-'n-Abad er c'hontrol,  E Pempoull ez eus bet tapet kalz lañs gant danvez-dilennad ar gostezenn greizour, koulz hag e Sant-Brieg, gant ar maer Bruno Joncour.

Veolia a saveteo ar blanedenn ?

Un embregerezh a ra war-dro an endro eo. "Un taol-kaer greantel eo an Endro" eo e lugan. Hiziv eo oberiant war dachennoù an dour, an energiezh, al lastez, hag an treuzporzhoù dreist-holl. Un embregerezh bras kenañ eo, alies e vez rebechet dezhañ ober arc'hant diwar kudennoù an endro, met chom hep klask talañ outo da vat, evit ma ne steuzfe ket e vammenn a c'hounidoù. Ret eo ma chomfe saotret an dour evit gallout ober arc'hant o tisaotrañ anezhañ...
Hiziv, goude m'en defe gouarnamant Raffarin digresket a-galz an arc'hant a veze roet gant ar Stad d'ar c'hevredigezhioù, emañ ar re-se o klask mammennoù arc'hant all. Treiñ a reont neuze davet... Veolia! Ur c'hevelerezh a zo savet etre Veolia hag Eaux et Rivières de Bretagne, evit sevel ur programm anvet "Former les futurs utilisateurs de pesticides" (!). Dañjerus eo kement-mañ evit daou abeg: da gentañ, peogwir eo ar Stad a zlefe reiñ arc'hant ha tud evit reizhañ kudennoù an endro, bremañ eo ar c'hevredigezhioù a ra ar pezh a zlefe bezañ graet gant ar Stad. Da eil, peogwir ne ra kement-mañ nemet brasaat galloud Veolia, ha diaes e vo d'ar c'hevredigezhioù embann un ali fall diwar-benn Veolia ma'z eo an embregerezh a ro o arc'hant dezho.

M.M.

Evit gouzout hiroc'h :
www.fondation.veolia.com Veolia diwar-benn ar c’hevelerezh
www.eauxglacees.com ali war ar c’hevelerezh
www.leclebard.org Veolia rafle la mise à Rennes
http://blog.mondediplo.net Les bonnes fortunes de Veolia
www.eauxglacees.com/Pour-le-Figaro-Suez-et-Veolia  Veolia et Suez, plus grands prédateurs financiers de la planète

"Taolennoù" e Ti ar Vro Kemper

Adalek disadorn ha betek an 30 a viz Ebrel e vo kinniget an diskouezadeg "Taolennoù" gant al livour Mikael Jestin e Ti ar Vro Kemper: "Kroget em eus da livañ darvoudoù ha tres an dud chomet bev em memor ha ne livan nemet war goad. Plijout a ra din implij prenn kozh, derv pe gistin, en deus bevet un dra bennak: tammoù armelioù kozh ha gweleoù-kloz, dorioù bufedoù pe pennoù-gwele kizellet" emezañ. An "Taolennoù" a oa livadurioù relijiel, graet evit diskouez da boblañs Bro-Leon er 17vet kantved ar perzhioù mat a gase d’ar baradoz hag an techoù fall a gase d’an ifern. "Ur bugaleaj e Bro-Leon er bloavezhioù 50 a verk ac’hanout" a zispleg Mikael Jestin. "An oferennoù, leurennet, a bade pell spontus. Ha me, ar fri stanket ouzh ar gwerennoù livet, o huñvreal muioc’h eget o pediñ. Moarvat emaomp pell eus taolennoù an Tad Maner pe re Mikael an Nobletz: an diaoul a zo e pep lec’h met mont a ra tamm-ha-tamm an danvez kristen da get evit mojennerezh Breizh". Gant pep taolenn e vo kavet ur skrid teiryezhek (brezhoneg, saozneg ha galleg) a zispleg soñj an arzour, gant kalz a fent a-wechoù.

Hoel Louarn

Rugbi: skipailh Frañs az aio da Gembre

Dec'h e oa bet aozet 4e devezh tournamant rugbi "ar c'hwec'h broad". Ur c'hrogad a oa er Stade de France, etre skipailh ar C'hwec'hkorn hag hini Italia. Daoust da strivoù an Italianed, ez eo aet ar maout gant ar C'hallaoued 25-13. Mont a raio neuze ar XV de France da Gêrdiz a-benn disadorn, evit klask mirout an titl a Gampion. Start e vo evit "ar re c'hlas". Rankout a raint dastum 20 poent lañs war ar skipailh Kembreiz. Ar re-mañ zo bet efedus adarre, bet trec'h adarre, war Iwerzhon en taol-mañ, 16-12. Evit ar C'hallaoued eo bet kemm-digemm an doare da c'hoari a-enep an Italianed. Start eo dezho gounit tachenn e-kerzh ar c'hrogadoù gant argadoù eeun, abaoe meur a abadenn. Ar gudenn-se a oa ganto c'hoazh p'o deus c'hoariet gant Iwerzhoniz, ha dreist-holl gant ar Saozon. E-kerzh krogad dec'h eo bet gwelet ivez ne oa ket eus an efedusañ-tout ar C'hallaoued gant o zaolioù-treid. Aet eo ganto Trofe Garibaldi (a vez gounezet gant unan eus an div vroad "latin" er c'hampionad-se), met start-tre e vo dezho derc'hel penn a-enep da Gembreiz leun a startijenn.

There Will Be Blood

Stadoù-Unanet – 2007

Senario ha seveniñ : Paul Thomas Anderson

Diwar oberenn Upton Sinclair

Paotr an tireoul eo Daniel Plainview (Daniel Day-Lewis) en deus kroget da c’hounit an danvez-se e-unan e dibenn an 19vet kantved. Berzh en deus graet en e vicher c’hoazh p’en em gav gant e "vab" H.W. (Dillon Freasier) e Little Boston e Kalifornia e 1911. Dont a ra eno evit sellet ouzh un duchenn difrouezh ma c’hwezfe al leur tireoul. El lec’h didro-se e kavo Plainview peadra da cheñch e vuhez koulz ha hini ar gêriadenn. Eli Sunday (Paul Dano), ur paotr yaouank eus ar vro a ouio tennañ splet eus an degouezh dibar-se ivez evit sevel e iliz dezhañ.

Ha pa vefe brav-tre perzh Paul Dano, ar film-mañ zo douget penn-da-benn gant Daniel Day-Lewis. Evit ma vefe talvoudus an abadenn e oa ret-groñs kavout un aktor dispar da enkorfañ Plainview ha kavet eo bet e gwirionez. Ur gwir self-made man eo Plainview, skeudenn an huñvre amerikan. Ha pa dro sot an den-se mezvet m’eo gant e c’halloud o kreskiñ ez eus peadra d’en em soñjal un tamm petra emañ an istor tireoul-se o vouskontañ.

Meriadeg Vallerie

Kement ha gouzout muioc’h : www.therewillbeblood.com

Sascha Funke - Mango

Digorit ar prenestr: degouezhet eo an hañv. Mango eo titl eil pladenn Sascha Funke, ha ken saourus hag ur frouezhenn leun a chug eo.  Pevar bloaz zo n’hor boa ket klevet komz anezhañ (un nebeud single en doa lakaet embann met pladenn glok ebet abaoe Bravo e 2004). Sonerezh elektro diazez a vez graet gantañ, evel al lod brasañ eus sonerien elektro Berlin. Sioul e krog an traoù gant Mango just a-walc’h. Brav son an taboulinoù, evel ma vefent e gwer. An eil ton, We Are Facing the Sun e ditl, a zo leun a luskoù (ur seurt blip blip dizehan a glever) a lakafe ar re varv da hejañ o revr, evel Lotre - Mehr Fleisch. Teñvaloc’h an traoù gant Feather, un ton leun a sonioù dic’hortoz  en em vesk digudenn. Brav-tre ivez Summer Rain, lusket gant trouz ar grilhiged-gwez ha gitaroù.  Diazez da vat an traoù war Double-Checked, hag efedus-kenañ war un dro gant ur vouezh izel-spontus o tont eus ne ouezer ket re pelec’h. Hag heñvel an traoù betek dibenn an navvet kanaouenn. Ur bladenn da selaou dindan ur wech, hep troc’h ebet, a-benn tañva anezhi da vat ha merzout an holl sonioù/trouzioù (naturel pe get) a gaver enni. Pa lavaremp deoc’h e oa degouezhet an hañv.

R.M.

Embannet gant Bpitch Control / PIAS

Muioc’h a ditouroù :

www.bpitchcontrol.de

www.myspace.com/saschafunke

Tiramisu

Evit 6 gwerenn : 500 g marscarpone – 6 vi – 25 cl kafe kreñv – 150 g sukr – 24 gwispid  (boudoirs) flastret – 2 loaiad vras marsala – poultr kakao

Ouzhpennit d’ar melen-vi  ar sukr hag ar mascarpone, basit mat hag echuit gant ar banne marsala. Basañ ar gwenn-vi en erc'h. Meskit tamm-ha-tamm an 2 aozad

Soubit an gwispid e-barzh ar banne kafe.  Pouezit mat an aozad-mañ e foñs pep gwerenn, Lakait a-bep-eil an dienn hag ar gwispid, ha lakait er yenerez 2 eurvezh.

A-raok servij, poultrennit gant ar c’hakao.

Mari Lubrano

Brezhoneg en hon sizhuniegoù

Abaoe meur a viz e oa bet kaset war-raok ur c'houlzad sinañ gant ur strollad tud eus Treger-Goueloù evit goulenn ouzh ar c'helaouennoù sizhuniek lakaat brezhoneg en o fajennoù. "Setu, mignoned ar brezhoneg, e vo lakaet ur paouez d'ar pennad sinañ e fin miz Meurzh" eme Strollad kevredigezhioù sevenadur Breizh e Treger-Goueloù, a gas war-raok ar c'houlzad. "Ma n'ho peus ket graet c'hoazh e c'hellit en ober dre internet, ha kasit anezhi d'ho mignoned en-dro deoc'h. Ec'h omp o tostaat ouzh 1000 siner. Seul niverusoc'h e vefomp, seul bounneroc'h hon mouezh. Pratikoù omp, prenet e vez kelaouennoù ganimp gant hon arc'hant! Hag ez eo reizh ez afe ul lodenn d'an nebeutañ eus arc'hant ar vrezhonegerien da embann brezhoneg er c'helaouennoù a brenomp, ha gwashoc'h c'hoazh, en hon c'helaouennoù lec'hel. Setu, bec'h d'ar sinañ c'hoazh e-pad miz Meurzh. E miz Ebrel e vo gwelet paotred ha merc'hed ar c'helaouennoù, ha piv a oar, marteze e vo keloioù mat a-benn miz Mae? Trugarez deoc'h evit ho sikour!"

Klikit amañ evit sinañ ar galv

Mil dremm war TV Breizh

Hag anavezout a rit an abadenn "Mil dremm" a vez kinniget bep sizhun war TV Breizh? War an tele e tremen abred-tre d'ar Sadorn neuze, e-tro 7 eur. Met n'eo ket ur gwall afer a-benn ar fin, peogwir e c'hell an holl re o deus un urzhiataer gant internet mont da sellet ouzh an abadenn pa fell dezho, war lec'hienn ar chadenn. Un abadenn gelaouiñ doare "magazin" eo "Mil dremm". Danvezioù liesseurt a vez diskouezet bep taol, lusket gant pennadoù-kaoz gant brezhonegerien a bep seurt eus ar vro.

Sed amañ petra a vo tu da welet e-barzh abadenn disadorn a zeu:

-An drederenn eus an dud war o retred a rank bevañ gant nebeutoc'h evit ar SMIC, aet eo skipailh Mil Dremm da welet retredidi eus bro Vigoudenn  evit gwelet penaos e vevont
-Degouezhet sivi kentañ ar bloavezh 2008, un tamm tro e ti ur produer eus Plougastell
-Emañ nevezamzer o tostaat e Liorzh Botanikel Kombrid, emañ ar brousgwez e bleuñv dija

Da vezañ gwelet ivez war internet

www.tv-breizh.fr

Lennit Bremañ miz Meurzh!

Niverenn Bremañ miz Meurzh 2008 (niv.317) zo deuet er-maez!

Kerzhadeg en India, Stad an traoù e Pakistan, ur gannadez kurd e Breizh, Prosez Kokopelli, 15 vloaz Produet e Breizh, Mikeal Treger hag e levr Espèce d'Homme!, Ken tuch', skipailh rederien war varc'h-houarn Bretagne-Armor Lux... Anv zo eus an holl draoù se ha ltraoù all c'hoazh e-barzh niverenn Bremañ miz Meurzh 2008.

An teuliad peder fajennad zo gouestlet en niverenn-mañ da oberoù zo eus Kuzul Sevenadurel Breizh a vo e 2008. Boulc'het eo bet gant ar gengevredigezh labour skrivañ un danvez Karta Sevenadurel nevez evit Breizh, an hini gentañ bet sinet e 1977 ha lakaet e pleustr 30 vloaz zo. Etre fin miz Meurzh ha miz Mezheven e vo kinniget Skol-veur ar Yaouankiz gant KSB ivez, hag e miz Gwengolo 2008 e vo roet un emgav d'an holl Vretoned e Naoned, evit festimanif BZH+!

Bep miz e kinnig ar gelaouenn Bremañ, abaoe 1980, pennadoù brezhonek a bep seurt, diwar-benn Breizh hag ar bed, kinniget brav, e doare ur magazin.

Embannet gant Skol an Emsav (4,5 euro an tamm)

E gwerzh er stalioù levrioù a ginnig danvez Breizh, pe dre goumanant.

Evit gouzout hiroc'h: www.breman.org