Lun 22 a viz Kerzu, niv.219
Sizhun 52 - 2008

Pellgargit ar pennadoù e stumm Word

Evit resev kemennadenn nevez Bremaik bep Lun,
kasit ho chomlec'h da: bremaik@free.fr

Petra oa keleier Bremaik bloaz zo? Klikit amañ!

Evit distreiñ d'ar bajenn degemer

Nedeleg Laouen deoc'h holl!

Distreiñ a ray Bremaik d'ar 5 a viz Genver 2009

An endro e fin ar bloaz

Daou dra dedennus a c’heller notenniñ war dachenn an endro e fin ar bloaz-mañ:

prizioù ar gevier evit ar bloaz 2008, ha levrig Greenpeace evit beveziñ hep OGK.

Da gentañ neuze, ar prizioù Pinocchio zo bet roet evit tri abeg d'an embregerezhioù : d’ar re na daolont ket pled ouzh o implijidi, d’ar re a saotr ha d’ar re a ra van da wareziñ an endro padal ne reont nemet saotrañ anezhañ e gwirionez. Ar priz Gwirioù Denel zo bet roet d'ar strollad Dreyfus a brodu etanol ha sukr e Brazil. Ouzhpenn d’ar c'hoadeier a vez distrujet gant ar strollad-se e vez tamallet dezhañ rediañ tud ar vro da labourat evit netra, ha nevez zo ez eus deuet gantañ ur raktres da zastum sukr gant mekanikoù, ar pezh a lakay 10000 den dilabour... Da Areva eo bet roet ar priz Endro, evit ar fuilhadennoù zo bet e Tricastin e-pad an hañv. Hag ar priz anvet "Greenwashing" (anv evit ar gevier diwar-benn an endro), zo aet gant Areva ivez, evit o lugan "un dazont hep CO2", tra ma vez saotradurioù all forzh pegement gant an nukleel.

Titouroù diwar-benn an holl brizioù hag an abegoù :

http://www.prix-pinocchio.org/nomines.php

An eil tra dedennus eo embannadur ul levrig a renabl ar produoù hep OGK, gant Greenpeace. Gouestlet eo dreist-holl d'ar pezh a vez bevezet e-pad gouelioù ar goañv. Dre ma n’eus ket tu, gant al lezennadur zo bremañ, da c'houzout sklaer ma’z eus produoù OGK pe get e-barzh produoù zo, e vo talvoudus-bras levrig Greenpeace. Ha pa vefe graet strivoù gant un embregerezh evit lakaat produoù hep OGK war ar marc’had, n'hall ket skrivañ kement-se war he fakadurioù !

Gallout a rit gouzout hiroc’h war :

http://www.greenpeace.org

hag al levrig amañ :

http://www.greenpeace.org/

M.M.

Gwiskamantoù ar mojennoù

Etre an 2 a viz Kerzu 2008 hag an 3 a viz Genver 2009 e vo kinniget e Mediaoueg Kastell-Briant un dastumad gwiskamantoù bet treset ha sevenet gant Sylvie Palou, ur gomedianez-arzourez eus Roc'h-an-Argoed. Sot eo-hi gant ar Grennamzer hag an danvez dilhad. "Tudennoù marzhus, kontadennoù ha boudiged Nedeleg" eo anv an dastumad 40 gwiskamant a vo kinniget e Mediaoueg Kastell-Briant. Eno ez eus bet staliet c'hwec'h "leurenn", gant un tem evit pep hini anezho. Tudennoù mojenn an Daol-grenn koulz ha mojennoù klasel all (Gwenn-Erc'h, Luduennig,...) a vo da welet. Tu a vo da gaozeal gant an arzourez war ar plas, d'ar Yaou 4, Sadorn 13, Yaou 18 ha Sadorn 27 a viz Kerzu, etre 3e30 ha 6e goude kreisteiz.

Evit gouzout hiroc'h :

http://www.paysdechateaubriant.fr/

Stad Roazhon: 17 krogad didrec'h

Brav ez echuo ar bloavezh 2008 evit paotred Stad Roazhon. 67 poent zo bet dastumet ganto e-kerzh 38 krogad, pemp zo bet kollet ganto hepken. Ha setu 17 abadenn zo ma n'int ket bet trec'het, abaoe ar 17 a viz Eost! 34 foent zo bet dastumet ganto evit poent er bloavezh 2008-2009. Ur prof Nedeleg a-feson o deus bet gwir da gaout neuze: bezañ war podiom ar Rummad 1 e-kerzh ehan ar goañv. Un taol-kaer diwezhañ zo bet gant eil derbi breizhat ar mizvezh, en Oriant. Tra ma oant war-nes bezañ trec'het 1-0 gant ar Pennoù-Merluz e fin al lodenn gentañ, eo deuet a-benn Pagis ha paotred all Guy Lacombe da cheñch penn d'ar vazh en eil prantad ha da guitaat tachenn ar Moustoer gant daou bal ha tri foent ouzhpenn. Prest eo renerien Stad Roazhon da astenn kevrat ar gourdoner Guy Lacombe e-pad daou vloaz. Nec'husoc'h eo ar pezh a glever diwar-benn perc'henn ar c'hleub avat: ar strollad Pinault Printemps Redoute a glasko espern ar muiañ ar gwellañ, bremañ m’emañ gant un enkadenn arc'hant. C'hoarierien a bouez a vo lezet da vont sur a-walc'h e fin ar blaovezh 2008-2009... Dav e vo d'ar c'hleub bezañ aozet mat er mizioù a zeu a-benn derc'hel ar pellañ ar gwellañ e blas e penn uhelañ podiom ar Rummad 1.

Ur pennad-skrid gouestlet da skipailh Stad Roazhon a gavot e-barzh niv. Bremañ miz Genver 2009.

The Day the Earth Stood Still

(Le Jour où la Terre s'arrêta)

Stadoù-Unanet Amerika – 2008

Seveniñ : Scott Derrickson

Skrapet eo Helen Benson (Jennifer Connelly) gant gwazourien ar Gouarnamant o doareoù kevrinus. Un enklaskerez eus ar vegenn eo Helen hag en em gavout a ra gant ur bagad skiantourien veur all da dalañ ouzh un enkadenn spontus: ur c’horf-oabl a gouezho war Manhattan dizale ha ret eo ijinañ diouzhtu-kaer un doare da verañ an deiz war-lerc’h. Met ul lestr eo an draezenn-se e gwirionez, ennañ un den (Keanu Reeves) deuet eus tu all an egor evit saveteiñ an Douar.

Eil doare ur film brudet eus ar bloavezhioù 50 eo The Day the Earth Stood Still. Ur gentel a skouer vat a ya d’ober steuñvenn an istor. "Paouezit da vrezeliñ" a oa danvez ar film orin, da vare an Eil Brezel Bed hag ar spont nukleel. Ar gwallreuz ekologel eo abeg ar senario nevez avat. N’eo ket toull evel-just met kerse eo ne vije ket bet strivet da sevel un istor gwirheñveloc’h. Evel boaz e chom efedoù arbennik troet mat-kenañ. Fentus eo sellet en-dro ouzh doareoù diamzeret-krenn ar film kozh. Unan eus mennozhioù mat doare 2008 eo derc’hel neuz ardivink diskar an ezdouaridi, reiñ a ra dezhañ blaz an iskisted.

Meriadeg Vallerie

Kement ha gouzout hiroc’h :

http://thedaytheearthstoodstillmovie.com/us/

2008, ur c'hilsell

Dre m’emañ ar bloavezh-mañ oc'h echuiñ eo poent teurel ur sell ouzh ar pezh zo bet embannet dindan an 12 miz tremenet.

Evit a sell ouzh ar strolladoù "kozh" n'eus ket bet kalz traoù nevez. Dav e vo gortoz 2009 a-raok dizoleiñ pladenn nevez Depeche Mode ha hini U2. Evel en daou vloavezh tremenet hon eus klevet meur a wech e vefe advodet The Smiths: daoust d'an arc’hant bras a vez kinniget dezho e kendalc'hont da nac'h. Derc’hel a reont da vezañ ur strollad skouer, ouzphenn 20 vloaz goude bezañ bet divodet. E 2008 hon eus bet ar blijadur da glevout e oa distro R.E.M. memes tra, gant ur bladenn a-feson. Brav e oa ivez pladenn ziwezhañ Nick Cave and the Bad Seeds (Dig!!! Lazarus, Dig!!!). Gant o fladenn Only by the Night, The Kings of Leon o deus prouet e oant a-live gant seurt strolladoù.

Bloavezh an trouz eo bet 2008 ivez. Embannet ez eus bet ur c'houfrig da lidañ The Jesus and Mary Chain, hag en hor “best-of” deomp-ni e vo div bladenn trouzus-kenañ: hini Fuck Buttons (skeudenn) ha hini A Place to Bury Strangers. Emichañs e kendalc'ho ar sonerezh-se da vont war-raok e 2009, gant strolladoù evel Glasvegas.

Evit a sell ouzh ar sonerezh elektronek omp bet plijet-bras gant Sool, pladenn ziwezhañ Ellen Allien. War dachenn ar sonerezh elektro-pop e vo roet ar maout da Ladytron hag e bladenn Velocifero.

Abaoe un nebeud bloavezhioù e vez embannet pladennoù levezonet gant ar sonerezh goude-punk. Er bloaz-mañ o deus prouet daou strollad nevez a Vro-Saoz (Foals ha Late of the Pier) e oa Breizhveuriz ar re wellañ evit sevel seurt pladennoù.

Strolladoù all o deus diskouezet e oa tu da sevel pladennoù e-maez reolennoù kenwerzh ar sonerezh, ha d’ober berzh ganto: MGMT ha The Ting Tings.

Ar pep gwellañ e 2008

1 – Foals – Antidotes

2 – Late of the Pier – Fantasy Black Channel

3 – Ladytron – Velocifero

4 – R.E.M. - Accelerate

5 – Fuck Buttons - Street Horrrsing

6 – A Place to Bury Strangers – A Place to Bury Strangers

7 – Ellen Allien – Sool

8 – Kings of Leon – Only by the Night

9 – The Airborne Toxic Event – The Airborne Toxic Event

10 – Handsome Furs – Plague Park

R.M.

Gwenn ha du

perlez ha piramidoù Nedeleg

Perlez wenn

500 g chokolad da choakat – 125 g dienn tanav – 125 cl kirsch – 300 g chokolad (evit goloiñ) – 100 g sukr lindr – 100 g poultr kakao

Dourgibit ar chokolad (40 °) betek ma vo teuzet. Ouzhpennit an dienn mesket gant ar banne kirsch. Lezit 6 eurvezh da galetaat.

Ledit ar ganach etre 2 follenn blastik kegin. Lakait er yenerez e-pad 5 mn ha didammit gant un didammer. Grit bouloùigoù gant ar poultr kakao. Teuzit ar chokolad da c’holoiñ.

Dorn-rollit an trufennoù. Lakait da yenaat un tamm, a-raok adkrogiñ an oberiadenn ha goloiñ pep trufenn gant sukr lindr. Lakait er yenerez a-raok servijout.

Perlez zu

250 g chokolad da chaokat – 150 g dienn tanav – 250 g chokolad da c’holeiñ – 100 g poultr kakao

Dourgibit ar chokolad (40) betek ma vo teuzet.Ouzhpennit an dienn. Lezit 6 eurvezh da galetaat.

Ledit ar ganach etre 2 follenn blastik kegin. Lakait er yenerez e-pad 5 mn ha didammit gant un didammer.

Grit bouloùigoù gant ar poultr kakao.

Teuzit ar chokolad da c’holeiñ (45-60°). Diskennit betek ma vo 27°, adtommit betek ma vo 31°.

Rollit an trufennoù e-barzh ar chokokad teuzet. Lezit er yenerez.

Piramidennoù

200 g toaz alamandez roz – 10 cl kirsch – 200g chokolad da c’holeiñ – etre 20 ha 25 mimoza

Meskit an toaz alamandez gant ar banne kirsch. Ledit war 1 cm tevder. Gant ur gontell, troc’hit a garrezennoù. Stummit piramidennoù. Dourgibit ar chokolad (40°) betek ma vo teuzet. Gant ur fouchetez, soubit pep piramidenn e-barzh ar chokolad teuzet. Lezit anezho war baper parch. Lakait ur mimosa war pep pyramid ha lezit da yenaat.

Mari Lubrano

Lennit Bremañ miz Kerzu!

Brezel padus Kongo, heuliad ar rummad pennadoù diwar-benn Sina, emgav rannvroioù ar Bed e Sant-Maloù diwar-benn kemm an hin, stourm tud Plourae a-enep ur raktres toull-lastez... Anv zo eus an holl draoù-se ha traoù all c'hoazh e-barzh niverenn Bremañ Kerzu 2008.
An teuliad peder fajennad zo gouestlet da zilennadegoù prezidant ar Stadoù-Unanet en niverenn-mañ. Un diverrañ eus an teuliadoù a ranko gouarnamant da zont Barack Obama plediñ ganto a vo kavet e-kreiz an teuliadig. A bep tu, soñjoù un Amerikanez o vevañ e Breizh hag ur Breizhad o vevañ en Amerika diwar-benn an dilennadeg.
Bep miz e kinnig ar gelaouenn Bremañ, abaoe 1980, pennadoù brezhonek a bep seurt, diwar-benn Breizh hag ar bed, kinniget brav, e doare ur magazin.

Embannet gant Skol an Emsav (4,5 euro an tamm)

E gwerzh er stalioù levrioù a ginnig danvez Breizh, pe dre goumanant.

Evit gouzout hiroc'h: www.breman.org