Lun 11 a viz Kerzu, niv.126
Sizhun 51 - 2006

Nedeleg laouen da lennerien Bremaik !
Distreiñ a raio Bremaik e 2007
d'al Lun 8 a viz Genver

Pellgargit ar pennadoù e stumm Word

Petra oa keleier Bremaik warlene? Klikit amañ!
Evit distreiñ d'ar bajenn degemer

Kentañ WebNoz

D'an 18 a viz Kerzu 2006, da 8 eur 30 noz rik, e oa bet skignet un abadenn vrezhonek war-eeun war ar Genrouedad. He anv ? Webnoz. Roet ez eus bet lañs d'ar raktres-se gant ar c'helaouenner Lionel Buanig, asambles gant VO Productions ha gant skoazell Kuzul-rannvro Breizh, Kuzulioù-departamant ar vro ha kumunioù zo. Ur c'hendiviz diwar-benn "peseurt amzer da zont evit ar brezhoneg" zo bet kaset war-raok. Bodet e oa en-dro da Lionel Buanig dilennidi, arzourien, brezhonegerien kozh ha yaouank, evit tabutal, e-pad div eur, e Lise Diwan Karaez. Ar c'hanerezed Nolwenn Korbell ha Gwennyn zo bet tu da glevet. Filmet dirak tud d’an trede Lun eus ar miz en ul lec'h disheñvel, WebNoz a vo ur benveg nevez evit ar vrezhonegerien eus ar Bed. Tu zo da gas evezhiadennoù ha goulennoù d'an dud pedet e-kerzh an abadenn. Ur wech filmet, e vez tu da welet anezho adarre ur miz pad, ha kinniget e vez fichennoù pedagogel da bellgargañ evit skoazellañ ar re zo o kregiñ gant ar yezh.

Gant WebNoz e ro lañs ivez Lionel Buanig d'e lec'hienn nevez : www.brezhoweb.com.

War www.armortv.fr ha www.surlapace.tv e c'hellot gwelet WebNoz ivez.

Gouleier evit Nedeleg ?

Tabut a sav da vare Nedeleg etre ar re a stailh gouleier forzh pegement e kêr ha war o ziez da vare Nedeleg, hag an ekologourien a lavar eo foraniñ tredan. Petra soñjal neuze ? Ma ne vez ket bevezet kement-se a dredan gant pep klogorenn (war 12V e vezont luget peurliesañ), ez eus un niver bras-spontus anezho ! Marteze e vefe sot kondaoniñ penn-da-benn ar gouleier lakaet da Nedeleg : kollet e vefe un tamm eus ar burzhud ! Met traoù a zo d'ober evit implijout nebeutoc'h a dredan. Klogorennoù nevez a zo bet savet, reoù DEL (diodes électroluminescentes). Beveziñ a reont etre 90% ha 95% nebeutoc'h a dredan eget ar re gozh, padout a reont 7 gwech pelloc'h, ne vezont ket savet gant danvezioù saotrus, ha tommañ a reont kalz nebeutoc'h. Posupl eo lugañ anezho war ur benveg evit dibab an eurvezhioù enaouiñ, evit ma ne vefe goulou nemet etre 6e ha 10e noz, ha ket e-pad an holl devezh. Posupl eo ivez kaout gouloù hep tredan: gallout a reer implijout 

goulaouennoù-koar, a ro un tamm muioc'h a vurzhud en devezhioù-se...

M.M.

Dremmoù rouez Azia kinniget en Abati Daoulaz

Evit ar re na vefent ket bet c’hoazh en Abati Daoulaz da weladenniñ an diskouezadeg vras ziwezhañ e chom c’hoazh un nebeud devezhioù. Betek ar 7 a viz Genver e vo kinniget "Visages des dieux, visages des hommes, masques d’Asie". An dastumad-mañ, diazezet war arzoù ar maskloù eus Azia, dre o liesseurtegezh hag o istor, zo bet ijinet gant Jacques ha Sylvie Pimpaneau gant sikour Michel Le Bris.

Evel an delwennoù en temploù, ar maskloù a zo objedoù sakr rak ganto emañ galloud ar speredoù a ziskouezont. Liammet int gant lidoù relijiel er penn-kentañ, hag o roll a zo lakaat war wel boudoù dreistnatur, doueed, ha loened boemus. Implijet int bremañ evit a bep seurt abadennoù dañs ha c’hoariva.

En Abati Daoulaz ho po tro da gejañ gant ur sevenadur dianav penn-da-benn en tu-mañ eus Europa hag a anavez dreist-holl maskloù Afrika pe Oseania. Dre luc’hskeudennoù ha filmoù e tizolooc’h istorioù ar broioù-se (ar Ramayana en India, istor Panji e Java, istor an 3 rouantelezh e China...). Ur gwir veaj, gant oberennoù arzel kement ha binvioù eus ar vuhez pemdeziek, kinniget dre o implij evit al lidoù, ar c’hoariva pe ar gouelioù.

En holl e vo ho taoulagad o parañ war 400 maskl, un dek bennak a zilhad gouel ha binviji sonerezh, eus 8 bro disheñvel eus Azia (Korea, Indonezia, Tailand, Sri Lanka, Japan, Tibet, Sina hag India).

An dastumad-mañ a lak war wel elfennoù nebeut anavezet ha souezhus eus istor sevenadurel broioù Azia : morse n’eus bet kinniget netra war an danvez-se en Europa, ha dre niver an oberennoù diskouezet hag ar broioù kinniget eo an hini kentañ a-seurt-se er bed !

Hoel Louarn

Ouzhpenn an diskouezadeg e c’hellot kemer perzh e gweladenn ar park ha monumantoù an Abati (digoust gant an diskouezadeg, 1 eurvezh) bep sadorn (betek ar 6 a viz Genver).

Etre 3 ha 6 euro (digoust dindan 10 vloaz)

Bemdez etre 10e30 ha 6e30.

www.abbaye-daoulas.com

Nozvezh Kalanna gant Medisin Molière e Lannarstêr

Evit ar re n’int ket plijet gant ar festoù-noz pe ar fest dre vras e vo kinniget traoù all da gaout plijadur d’an 31 a viz Genver. C’hoariva a vo ivez e-pad nozvezh Kalanna: e Lannarstêr e vo tro da welet Le médecin malgré lui gant Molière, leurennet gant Alain Kowalczyck ha c’hoariet gant ar gompagnunezh "L’Embarcadère": "Evel-just e vez gant pep hini un eñvorenn bennak eus Molière, dre ar skol d’an nebeutañ, met etre ardoù ha farserezh e kaver ur skrid pinvidik e-lec’h ma vez bepred peadra da zizoleiñ …."

Evit en em veñjiñ eus taolioù he gwaz e vo Martine o kinnig anezhañ evel mezeg a-zoare pa glevo ez eus klask war unan eus ar re varrekañ da bareañ Lucinde chomet mut! Gwir vedisin, medisin faos… penaos e raio Geronte, tad ar plac’h yaouank, evit ober an diforc’h? E-lec’h ma n’eo ket deuet a-benn e genseurted e vo kavet gant Sganarelle ur bareadenn vurzhudus en ur gemenn d’an hini glañv tec’hout gant he c’haredig! Trec’h e vo ar garantez met dizoloet e vo ar medisin faos!

Ur pezh-c’hoari bev a ginnig ar c’houblad hag ar vicher medisin dre ar flemmgan gant sell ha fent an Aotrou Molière…

H.L.

Etre 3 hag 11 euro da 9e noz e Théâtre des deux Rivières, e Lannarstêr (02 97 81 37 38 )

Gwener 29, sadorn 30 ha sul 31 a viz Kerzu.

Fabien Barthez troet da Ganari

En dibenn-sizhun-mañ eo bet kadarnaet ar c’heloù gant Rudi Roussillon, prezidant FC Naoned : Fabien Barthez (35 bloaz) a warezo kaoued pal skipailh ar Ganaried adalek krogad kentañ 2007. Hollvrudet, ar gward Fabien Barthez, kampionad Europa hag ar Bed, en doa disklêriet e oa o vont war e leve goude ar c'hrogad kollet a-enep Italia evit Kib ar Bed 2006 d'an 9 a viz Gouere 2006.

En ur saviad diaes emañ paotred an ambrouger Georges Eo er mare-mañ, izel e renkad ar C'hevre 1 (19vet gant 14 poent). Spi en deus Rudi Roussillon e c'hello Barthez degas startijenn evit ma lammfe Naoned eus ar plasoù izelañ d'ar renkad uheloc'h. Ne c'hoario ket Barthez disul e Tolosa, ret eo dezhañ adkregiñ gant ar pleustriñ a-raok mont war an dachenn. E Breizh e chomo e-pad ehan fin ar bloaz da brientiñ e zistro gant ambrouger-korf* skipailh Naoned. Disklêriet en deus Barthez ivez e oa prest da zistreiñ e skipailh etrebroadel ar C'hwec'hkorn.

* préparateur physique

Zwartboek (Black Book)

Izelvroioù, Belgia, Breizh-Veur, Alamagn – 2006

Senario ha seveniñ : Paul Verhoeven

Treiñ a ra fall an traoù evit an ac’huberien nazi. Goude m’eo bet diskaret gant ur vombezenn an ti-feurm ma kuzhe ennañ, e klask Rachel Steinn (Carice Van Houten) tremen da su diac’hub an Izelvroioù gant ur bagad Yuzevien all. Met paket int gant ur strollad soudarded alaman ha n’eus nemet Rachel a chom bev goude al lazhadeg. A-benn ar fin ez a Rachel gant ar Rezistañs a c’houlenn ganti tennañ splet eus he hoal evit spiañ an ofiser Müntze (Sebastian Koch) a zo e penn ar Gestapo.

Distreiñ a ra Verhoeven (bet sevenet filmoù hollywoodian gantañ : Robocop, Total Recall, Basic Instinct) d’e vammvro gant ar film-mañ. Derc’hel a ra ar sevener gant ar boazioù en deus tapet er Stadoù-Unanet e gwirionez : feulster, troioù kaer, skeudennoù flamm, ul lusk herrek hag an arvestoù kas c’hoant o deus graet e vrud. Ar wech kentañ eo moarvat ez eus bet aozet ur produerezh ken bras en Izelvroioù, met daoust ma vez kontet istor ar vro-se en resis (diazezet war darvoudoù gwir), ne vez ket ar santimant dizoleiñ kalz a dra, kement a filmoù zo bet savet diwar-benn an Eil Brezel Bed.

Meriadeg Vallerie

Evit gouzout hiroc’h : www.blackbook-lefilm.com/home.htm

The Departed (Les Infiltrés)

Stadoù-Unanet – 2006
Seveniñ : Martin Scorsese

E Boston e klask ar fliked stourm ouzh galloud ar ‘mafia’ iwerzhonat, renet gant Franck Costello (Jack Nicholson). Billy Costigan (Leonardo DiCaprio) a zo ur poliser kuzh nevez degemeret en o mesk. Eus un tu all Colin Sullivan (Matt Damon) flik trubard, a gas titouroù da Gostello.
Bevañ a reont neuze noz-deiz gant an aon da vezañ kavet ha koll a reont tamm ha tamm o fersonelezh.

Setu remake amerikan ar film hong-kongat Infernal Affairs. Berzh awalc’h en doa graet ar film ha gwir eo e oa kentoc’h plijus. Labour Scorsese a zo dedennusoc’h c’hoazh avat. Feulsoc’h, fentusoc’h, tudennoù nevez (hini ar plac’h yaouank a lak war wel emañ an daou baotr er memes saviad psikologel), un dibenn disheñvel... Ar pezh a cheñch a zegas kalz d’an istor. Deuet eo ar sevener a-benn da reiñ un ene d’ar film lec’hiet e Boston ha labour an aktourien a zo dispar. Un drugar !

G.L.

Evit gouzout hiroc’h : www.tfmdistribution.com/thedeparted/

The Clash – The Singles Box Set

Embannet gant Sony / BMG

Soñjit’ ta! An holl bladennoù bihan (45 tro) savet gant The Clash (kerkoulz lavarout unan eus ar 5 strollad punk dedennusañ) lakaet holl asambles er voest-se. Da lavaret 19 pladenn, 66 kanaouenn (ar box set a c’haller prenañ e stumm CD pe vinil), gant ar golo hag all. Evit a sell ouzh an danvez, ho po plijadur o klevout en-dro London Calling, Clash City Rockers pe c’hoazh Hitsville UK. Ouzhpenn da se emañ ivez atersadennoù ar strollad, hag ul levrig 44 fajennad, ennañ testeni sonerien all evel Shane Mac Gowan, Damon Albarn, Bernard Sumner, Ian Brown hag all.

Ouzhpennomp ez eo bet adembannet n’eus ket pell zo niverenn ispisial Les Inrocks diwar-benn ar strollad. Punk not dead !

R.M.

http://www.theclashonline.com/

Laurent Garnier ha Carl Craig – Kings Of Techno

Embannet gant BBE / PIAS

Lakait daou DJ a-feson, brudet er bed a-bezh evit o barregezh da lakaat an dud da zañsal betek… diwezhat-tre. Goulennit ganto sevel ur bladenn warni an tonioù a blij ar muiañ dezho. Garnier a spluj neuze e-barzh istor ar sonerezh e Detroit (kêrbenn ar sonerezh tekno) hag e krog gant… The Stooges. Funkadelic, Carl Craig pe c’hoazh Jeff Mills, a gaver ivez : ur meskaj peurvat a ginnig deomp an DJ gall brudetañ.

Evit a sell ouzh Carl Craig emaomp war douaroù Europa. Hag evit bezañ resisoc’h, Europa ar bloavezhioù 1980, gant tonioù savet gant Yello, Nitzer Ebb, Art of Noise. Div bladenn disheñvel an eil diouzh eben, daou zoare da zizoleiñ (en-dro) tonioù liesseurt.

R.M.

Festoù-deiz ha noz c’hoazh hag adarre da lidañ Kalanna

N’eo ket ar festoù-noz a vanko er vro tro-dro da nozvezh Kalanna. M’ho peus raktreset traoù all evit lidañ deiz-kentañ-ar-bloaz nozvezh an 31 e c’hellot mont da zañsal an derc’hent hag ho po zoken da choaz etre ur fest-noz e Klegereg gant Plantec, IMG, Ampouailh hag Hiks hag unan all e sal ar Babell e Kemper gant ar Sonerien Du ha Follenn.

Ma fell deoc’h tremen eus ar bloaz 2006 d’ar bloaz 2007 en ur zañsal forzh pegement ho po peadra ivez : e Louargad e vo ar gevredigezh Tous à l’asso o kinnig ur fest-noz gant Darhaou, ar Vreudeur Bléjean, Imosima, Menneteau/Le Menn hag Hamon-Martin Quintet.

Ur pred-sonadeg an hini a vo e Frehel, en ti-debriñ La Ribote (Derc’hel en a-raok : 02 96 41 43) gant ar c’houblad dic’hortoz Mac Mennemy/Veillon. O vont da Sant-Tegoneg, ouzhpenn fiñval ho korf a-hed an noz gant Loened Fall, Penn Kalet ha David Pasquet Group (sk. a-zehou), e vo un doare da sikour ar gevredigezh Amnesty International da genderc’hel gant he labour ur bloavezh c’hoazh. Leun ho tivskouarn ho po ivez e sal gouelioù Plonevez-ar-Faou gant Kantreerien, ar Vreudeur Bizouarn ha Le Cam/Le Cam. E Kaodan e vo diroll an nozvezh gant Carré Manchot (sk.a-gleiz), Kanerhog, Plantec, Startijenn, ar Vreudeur Morvan, Bernard Loffet ha Fulup ar Balp. Ouzhpenn ar fest-noz, aozet gant ar gevredigezh Tarzh an Deiz, e vo kinniget deoc’h ur pred Kalanna (46 euro) ha profet soubenn ognon hag ur banne dialkool.

Betek Bro Mayenne, e Cossé-Le-Vivien, e vo moaien da zañsal gant ar strolladoù Maen Ruz ha Blauzann.

Ma vo bev lod c’hoazh goude-se, pe prest lod all da genderc’hel gant ar gouel, antronoz e vo ur fest-deiz e Klegereg da 3e enderv en Ti Korn gant Carré Manchot, Florez/Royer, Kerbedig ha Les Carrément chauves! Bec’h dezhi!

H.L.

Ifig-Loup

Setu ur bann treset nevezembannet get Keit Vimp Bev: Troioù kaer Ifig-Loup. Bep miz e vez kavet e-barzh ar gazetenn Louarnig troioù-kaer fentus ur familh Inuit a zo é chom war ar vorskorneg, barzh un iglou, evel rezon. Ifig-Loup eo ar mab henañ, ur c'hrennard desket ha speredek, ur penn bras a vourr lenn ha sevel traoù nevez, ijinet getañ met implijet get e dad a zo ur sort "cobaye", benn ar fin. Mamak, ar vamm, a ra war-dro ar vugale a zo eizh anezho memestra! Un istor war bep pajenn: berr eo, ar pezh a zo mat evit ar vugale a grog da lenn brezhoneg. An albom-se a blijo d'ar vugale war dro 6-12 vloaz. Ha d'ar vugale vras ivez!

Sinet eo an albom se get Letrio (ur moranv moarvat evit an tri den a sav ar bann-treset-se).

Christian Le Meut

46 pajenn, 12 € an tamm

Ket vimp bev, 22 Grand'rue, 29520 Laz. Pgz : 02 98 26 87 12.

Mor Breizh,

gant Philip Plisson ha Patrig Mahé

En diskar amzer-mañ eo bet embannet gant Michel Lafon, Mer de Bretagne, Mor Breizh, zo ur prof eus ar re gaerañ (ha dereat-tre e briz evit ul levr brav ken bras) evit ar re a blij dezho sellet ha lenn ar mor : 300 pajennad a ginnig ur sell karantezus war aodoù Breizh. Peadra da dremen amzer e korn an oaled da santout aergelc’h an disterañ pleg-mor a zo er vro, gant un dibab 100 luc’hskeudenn gant Philip Plisson, meskaj eñvorennoù ha santimantoù livet gant blaz ar mor, ha skridoù Patrig Mahé bet troet e brezhoneg gant Ofis ar Brezhoneg, a gaso al lennerien e spered don mojennoù Mor Breizh.

H.L.

Embannet gant Michel Lafon. 39,90€ an tamm.

Retourné gant Roger Gicquel

Roger Gicquel, bet kazetenner e-pad pell en deus embannet e dibenn ar bloaz-mañ e eil dastumad barzhonegoù, bet gortozet pell gant ar re oa bet plijet gant e hini kentañ peogwir e oa deuet er-maez e 1981. Ur prof dedennus eta da welet penaos eo emdroet pluenn paotr an tele! Retourné a ginnig 37 barzhoneg skrivet gantañ ha kinniget gant tresadennoù hag engravadurioù ur grafour eus an Oriant, Ollivier Fouchard. "Ma mennozh a oa kontañ pezh a oa Breizh gant he daou du: war–un-dro hengounel hag a-vremañ. Hag evit-se ne oa netra gwelloc’h evit engravadurioù Olivier Fouchard". An dimeziñ etre barzhoniezh ha skeudennaouiñ a zo koustet ker d’an ti-embann en deus asantet produiñ al levr-mañ. Rak daoust da vrud ar skrivagner eo bet diaes kavout un embanner prest da zegemer ar raktres kaer-mañ. "Dreist-holl pa’m eus lâret ouzhpenn e felle din kaout liv !" eme ar barzh. "Skol Vreizh eo en deus asantet ar bariadenn". Evit ar grafour eo un taol brav peogwir e kav dezhañ eo "an disoc’h–mañ, war ul levr, kalz kreñvoc’h evit hini un diskouezadeg."

H.L.

Retourné, dastumad barzhonegoù gant Roger Gicquel, Skol Vreizh, 20€

Boued-polikan

Yalc’hadoù eog

Evit 6 den :

Didroc’hit 6 kelc’h e-barzh 3 skejenn eog mogedet. Drailhit ar peurrest. Meskit an tammoù gant 150 g kig krank, 1 chalotezenn drailhet, 1 banneig sitroñs, 2 loaiad vras eoul olivez. Ingalit ar farz-mañ war ar c’helc'hioù eog mogedet. Gronnit ar farz gant an eog mogedet. Stagit ar yalc’hoù stummet evel-se gant brienennoù kraksivolez.

Istr an heol

Meskit 2 chalotezenn drailhet, 2 domatezenn disblusket, 1 ivinenn kignen, 1 boked bazilik diskolpet, 20 cl eoul olivez, pebr.

Digorit an istr, dispegit ar c’hig istrenn, ha gwarnisit pep istrenn gant ar meskaj.

Mari Lubrano

Planedennoù 2007

An tourz (21/03 – 19/04)

Evit tennañ gounit eus ar bloavezh-mañ e vo ret deoc’h harpañ ouzh ahel an Aerouant. Evit ho sin e vo liammet gant ar studioù, ar preder hag ar beajoù… Dreist-holl n’en em santit ket kablus o vezañ eürus hag en ho pleud. Grit ho mad eus pep tra, mod-all ho po kudennoù da vat!

An tarv (20/04 – 20/05)

Ahel an Aerouant en devez ul levezon vras war ho sin. Kemer a reoc’h divizoù bras evit lakaat ho puhez da cheñch. Talvezout a raint war an holl dachennoù, met kaoz a vo eus ho puhez kalon da gentañ. Ur ger stur evit ar bloavezh: grit ho mad eus hoc’h amzer!

Ar c’hevelled (21/05 – 21/06)

Ho pet pasianted! Cheñchamantoù bras a vo evidoc’h, met ne vint ket graet trumm. Poan ho po da badout hag en arvar emaoc’h da lakaat pep tra da vezañ c’hwitet dre re a vall. Klaskit chom e peoc’h.

Ar c’hrank (22/06 – 22/07)

Pasianted ivez! Tarzhañ ne zegaso mann ebet deoc’h. Un emzalc’h doujus ha spis a zereo kalz gwelloc’h. Diwallit diouzh hoc’h anien, neuze. Ha savit an traoù a zeiz da zeiz hep klask mont re bell en un tenn.

Al leon (23/07 – 22/08)

Kavout ur c’hempouez etre ho puhez sokial ha prevez a vo diaester ar bloavezh. Leun a levenez e vo an div dachenn-mañ… Ne vo nemet un diskoulm: klask merañ hoc’h implij-amzer eus an doare sederañ posupl.

Ar werc’hez (23/08 - 22/09)

Gwarezet e vioc’h a-fet yec’hed. Hag ezhomm ho po startijenn evit ober ho mad eus an holl chañsoù a zegouzeho war ho hent. Ma taolit evezh ouzhoc’h e vioc’h gouest d’ober pep tra. Diwallit memes tra: chomit hep emellout en aferioù ar re all, mod-all e kousto ker deoc’h.

Ar balañsoù (23/09 – 23/10)

Penaos bihanaat efedoù fall ar planedennoù ha kreskiñ o levezon vat? Teurel evezh ouzh ar re all, diehan, e vo ar respont. Gwelout a reoc’h un tammig re vras kement evit ar garantez hag evit al labour. Diwallit da vezañ dipitet a-benn ar fin.

Ar skorpion (24/10 – 22/11)

Evidoc’h e vo liammet levezon ahel an Aerouant gant tachennoù ar yec’hed hag ar servij. Deoc’h-c’hwi da vezañ dous ganeoc’h hoc’h-unan ha da voumounañ ar re all. Ho prokusted a c’hounezo kalonoù deoc’h. Daoust da se e vioc’h techet da vouzañ un tamm. Met petra a vank deoc’h?

Ar saezhataer (23/11 – 21/12)

Tachennoù pouezus ar bloavezh a vo ar garantez, ar re all hag ar fed embann piv oc’h da vat. Pep tra a yelo mat ma teuoc’h a-benn da gavout ho plas deoc’h ha gouzout ar pezh hoc’h eus c’hoant da gaout da vat. Prest e vioc’h da sikour tud all ha d’en em ouestlañ d’un oberenn sokial pe speredel.

Ar c’havr (22/12 – 20/01)

Ar familh hag ar vicher a vo lakaet war-wel gant ahel an Aerouant. Ma chom hoc’h evezh war an daou dra-mañ e teuoc’h a-benn da gaout disoc’hoù eus ar c’hentañ! Kredit difenn ho sav-poent hep tagañ ar re all evel-just ha priziet e vo hoc’h alioù.

Ar skuilher-dour (21/01 – 18/02)

Ur bloavezh stourm! C’hwi a soñje deoc’h e chomfec’h trankil er gêr er bloaz-mañ? Ne vo ket e giz-se. Ret e vo deoc’h kemer divizioù, en em zifenn, fiñval ha cheñch. Ret e vo derc’hel mat. Tachennoù an arc’hant hag ar familh a vo gwarezet.

Ar pesked (19/02 – 20/03)

Aesoc’h e vo an traoù deoc’h. Un nebeud diaesterioù a c’hellfe c’hoarvezout en ho puhez kalon pe en ho labour. Met ne c’hoarvezo netra grevus, bez’ e vo un doare da vont war-raok. Arabat deoc’h en em santout re gablus ma rit fazioù. Ho youl da eeunaat an traoù a vo a-walc’h evit bezañ digarezet.

Katell Leon

Ur prof na gavit ket?

Kit da welet war klask.com!

Abaoe penn-kentañ miz Kerzu emañ Klask.com en-linenn. Petra eo Klask.com emezit-hu? Amazon.com ar brezhoneg a c'hellfed ober eus al lec'hienn-mañ. Bannoù-treset, levrioù, pladennoù sonerezh, DVDioù, c'hoarioù, geriadurioù... En holl, e kaver traoù kinniget gant ouzhpenn 30 embanner (An Here en o zouez) hag a c'heller pourchas dre gartenn-vank pe dre chekenn. An holl draoù nevez a gaver war Klask.com: albom nevez-flamm Gaston gant Yoran Embanner a c’heller tapout eno!

www.klask.com

Deiziataer hollvrezhonek 2007

An deiziataer 2007 zo deuet er-maez ! Kavet e vo er stalioù levrioù breizhek hag e Skol an Emsav, e Roazhon, evel-just. Un doare nevez zo gant deiziataer 2007. Bihanoc'h eo evit mont gwelloc'h er chakodoù hag er seier-dorn. An Deiziataer hollvrezhonek zo ur benveg bepred talvoudus : leun a chomlec'hioù (ouzhpenn 200) hag a ditouroù vo kavet diwar-benn Breizh hag ar brezhoneg, un daolenn kemmadurioù, kodoù-post kumunioù Breizh... 13 euro an tamm.

Skol an Emsav, 25 straed Pierre Martin, 35000 Roazhon:
Pgz: 02 99 38 75 83. sae.bzh@wanadoo.fr.  http://perso.wanadoo.fr/skol.an.emsav.