|
|
|
|
|
|
|
|
|
|
Lun 31 a viz Eost, niv.250 Pellgargit
ar pennadoù e stumm Word Evit resev kemennadenn nevez Bremaik bep Lun, |
|
|
|
|
|
|
|
|
|
|
|
|
|
|
|
Kemm politikel e Japan |
|
|
|
|
|
|
|
|
|
Abaoe 54 bloaz e oa ar Strollad
Frankizour-Demokratour (kostezenn zehoù) e penn gouarnamant Japan. Korbellet
eo bet e dilennadeg ar gannaded, dec'h, gant Strollad Demokratour Japan
(kreizour). Gantañ ez eus bet tapet 300 sez diwar 480. An diaesterioù
ekonomikel ha sokial o deus broudet Japaniz da cheñch liv o gouarnamant. E
miz Gouere e oa pignet feur an dilabour da 5,7% eus ar boblañs oberiant, pell
zo ne oa ket bet ken gwazh all. Ar wech kentañ e vo da SDJ merañ ar vro.
A-benn pemzektez e lezo Taro Aso e blas a gentañ ministr da Yukio Hatoyama
(skeudenn). Ijinour, 62 vloaz, graet studioù gantañ er Stadoù-Unanet, Yukio
Hatoyama a oa bet ezel da gentañ eus SFD. Gant kamaladed en doa kuitaet ar
strollad bet betek-henn e penn ar vro, e-kreiz ar bloavezhioù 90, evit sevel
SDJ asambles gant sokialourien ha mirourien yaouank. Fellout a ra da SDJ reizhañ
al liammoù a oa betek bremañ etre tud ar gouarnamant, re an arc'hant bras hag
ar burokratourien. Skoazellañ muioc'h ar familhoù, an dud war o leve hag ar
re baourañ zo bet prometet gant SDJ. Ur politikerezh etrebroadel emrenoc'h
e-keñver Stadoù-Unanet Amerika a oa ul lodenn eus ar programm ivez.
|
|
|
|
|
|
Tck Tck : ul luskad evit an hin |
|
|
|
M.M. Sinadeg veur ha titouroù : http://www.copenhague-2009.com/ |
|
|
|
|
|
A-benn 100 devezh bremañ en em gavo kendalc'h
Kopenhagen diwar-benn an hin. Hennezh a stalio ar reolennoù a heulio re Kyoto
en amzer. Ouzh ar stern emañ neuze ar c'hevredigezhioù etrebroadel evit
gwaskañ kement ha ma c'hellont war ar gouarnamantoù a-benn ma kemerfent
divizoù kreñv d'ar mare-se. Ma ne vez ket digresket a-walc'h ar c'hementadoù
CO2 da ezteurel e c'hellfe an disoc'h bezañ mantrus evit ar bed. Er c'hontrol
ez eo ar c'hendalc'h-mañ un degouezh evit degas ur redi a zoujañs er bed
a-bezh. En em vodet int, ha lañset Ultimatom an hin, gant ul luskad-kelaouiñ
anvet Tck tck (tik-tak-tik-tak). Oxfam, Greenpeace, WWF, hag ur bern
kevredigezhioù all, a zo holl strollet evit prientiñ ar c'hendalc'h. Ur bern
oberoù a reont er mare-mañ hag ezhomm o deus eus hon sikour. Ar strollad
etrebroadel Avaaz, a grog da vezañ brudetoc'h-brudetañ gant an oberoù ramzel
a gas da benn, a zo o prientiñ ul luskad bedel bras-kenañ ha trouzus-tre a-benn
an 21 a viz Gwengolo. Hiziv muioc'h evit atav eo poent en em ditouriñ ha
kemer perzh.
|
|
|
|
|
|
"Wake Up, please" e sal ar
C'harter e Kemper |
|
|
|
Ar C'harter, 10 plasenn
Mitterrand, Kemper. Pgz: 02 98 55 55 77. Gweladenn e brezhoneg d'ar Sadorn
5 a viz Gwengolo 2009 da 4e g.k. |
|
|
|
|
|
Boulc'het eo bet bloavezh
nevez diskouezadegoù ar C'harter, kreizenn arzoù a-vremañ Kemper e
penn-kentañ miz Gouere gant "Wake up, please". Kensavet eo bet gant
un daouzek arzour bennak eus ar bed a-bezh. Pal an diskouezadeg zo c'hoari
gant ar seller hag e zoare da welet ar bed. Galvet e vez memor ar gevredigezh,
ar sevenadur pobl hag istor ar Stadoù, o tiskouez war memes tro e vez gwelet,
santet seurt degouezhioù en un doare hiniennel. E doare un huñvre graet dihun
emañ ar gweladenner o vont ha dont etre meizañ traoù dre ur gizidigezh
personel hag ul logik emskiant. Klask a ra an diskouezadeg liammañ boazioù
hag oberoù ar sellerien gant re an arzourien. Dont a ra titl an diskouezadeg,
"Wake up, please" eus film an arzour kanadian Rodney Graham,
Vexation Island. Ennañ e weler ur morlaer stanket war un enezenn. Kollet e anaoudegezh
gantañ, emañ e beroked o c'harmiñ "Dihunit, mar plij! Dihunit, mar
plij!". Sell ar arvesterien zo memes hini hag hini an evn, daoust da se
e lamm garmadennoù ar peroked er-maez eus ar skramm evit gervel an
arvesterien o-unan... ur weladenn vrezhonek a vo kinniget d'ar Sadorn 5 a viz
Gwengolo.
|
|
|
|
|
|
Mell-droad:
Gwengamp lakaet diaes e Teurgn (2-0) |
|
|
|
|
|
|
|
|
|
Evit ar wech kentañ er
c'hampionad nevez ez eus bet kollet ur c'hrogad gant skipailh Gwengamp.
Startijenn a oa gant paotred Treger koulskoude. Er prantad kentañ, e teue
a-benn Thibault Giresse da silañ e vell, resevet div wech war-du Lionel
Mathis war var da seveniñ un dro vrav. Siwazh evito, n'eo ket aet pelloc'h.
Mont-ha-dont a rae ar vell etre tu Gwengamp ha tu Teurgn. Hogen goude an
ehan, e oa kemm er jeu. Renet eo bet ar c'hoari gant ar re c'hlas. Fatih
Atik, entanet, a zeuio a-benn goude un taol-esae kentañ, da blantañ ur pal e
kaoued Gwengampiz (55vet). N'o deus ket roet paotred Teurgn kalz a blas d'ar
Vretoned da c'houde. D'ar 69vet munutenn e sile Olivier Giroud ar vell etre
divhar Stéphane Trévisan. Diskaret, ne soñje ken ar re ruz-ha-du nemet e chom
hep pakañ palioù all. Tachenn Teurgn zo chomet dindan beli he skipailh da
vat. Digwener e c'hello Gwengampiz klask dizipitañ, e-tal paotred Istres.
|
|
|
|
|
|
|
Inglourious Basterds |
|
|
|
Stadoù-Unanet Amerika - 2008 Seveniñ : Quentin Tarantino
E-keit-se emañ al letanant
Aldo Raine o sevel ur strollad soudarded yuzev amerikan evit lazhañ nazied.
Gant sikour ar Saozon hag un aktourez alaman e prientont an "Operation
Kino" a-benn lazhañ Hitler, Goebels ha reoù all. Hag er sal sinema
perc’hennet gant Shosanna e c’hoarvezo an traoù… Skeudennoù brudañ ar film a seblante feuls-tre.
A-benn ar fin, n’eo ket ken spontus-se (evit ur film savet gant
Tarantino). Traoù a zo d’ar film neuze, evel kaozeadennoù hir-tre met
saourus alies. Adkavet e vez doare Tarantino da seveniñ gant disheñvelderioù
memes tra. Tuoù gwellañ ar film a zo e gasting, bamus, ha pegen kreñv eo
karantez ar sinema ennañ. Ur blijadur evit karourien an arz-mañ. Un dra
blijus all: pep tudenn a gaoze e yezh. Ar C’hallaoued a gaoze galleg
etrezo, an Alamaned alamaneg hag all... Na pegen ral eo evit ur film amerikan!
A-benn ar fin, n’eo ket ar strollad "Basterds" an dedennusañ,
met kentoc’h ar reoù all. N’eo ket grevus avat. An hegasusañ?
Frazenn ziwezhañ ar film, a c’haller kavout fentus, met a ziskouez ivez
pegen pounner e c’hall bezañ "QT" pa fell dezhañ bezañ... G.L. |
|
|
|
|
|
|
|
E 1941, en un tu bennak war
ar maez e Frañs, e vez drouklazhet ar familh yuzev Dreyfus gant ar
c’horonal Hans Landa. Shosanna, ar verc’h a zeu a-benn da
dec’hout.
|
|
|
|
|
|
Scopitone #8 e Naoned etre ar 16 hag an 20 a viz Gwengolo |
|
|
|
Ma n'ho pefe ket bet
trawalc'h e vo ken dedennus all programm ar Sadorn: Tim Exile, Vitalic, Beat
Torrent, Brodinski, We Have Band, Simian Mobile Disco ha Who Made Who e-touez
re all. D'ar Mercher 16 ha d'ar Sul
20 e vo ivez filmoù evit ar vugale. R.M. Abadennoù zo a zo digoust,
ar re all etre 6,50 ha 23 euro. Muioc'h a Scopitone: |
|
|
|
|
|
N'ho peus ket bet tro da
vont da Astropolis e Brest e miz Eost? N'eo ket grevus-tre, dreist-holl
m'emaoc'h o chom e su Breizh: damheñvel ouzh programm festival Brest eo hini
Scopitone. Ouzhpenn sonerezh elektronek e vo kinniget arzoù ar gweled (Fred
Viola, International Dance Party, Sound Delta...) bemdez eus ar Merc'her 16
d'ar Sadorn 20 el lec'h anvet Friche Numérique, hag ivez e kastell duged
Breizh (staliadurioù ha taolioù-kaer). Azalek ar Merc'her e krogo ivez ar
sonadegoù hag an taolioù-kaer (Fred Viola en-dro, data, Chinese Man...) e
meur a lec'h: er sinema Katorza pe en Olympic. D'ar Yaou 17 menegomp sonadeg
Sebastien Schuller e sal Paul Fort. Ha sonerezh elektronek eus an dibab d'ar
Gwener 18: Naive New Beaters, Laurent Garnier, Sexy Sushi, Fearz, Boys Noize.
|
|
|
|
|
|
Prederiañ ha kaozeal e brezhoneg, e
Brest |
|
|
|
D'an 8 a
viz Gwengolo : "Tu zo kelenn forzh petra dre ar brezhoneg, jedoniezh,
prederouriezh, h.a.?" (gant Jakez ar Borgn, kelenner war ar
jedoniezh) D'an 6 a
viz Here : "Bez’ ez eus un dra bennak evel ur mousfent breizhek pe
vrezhonek?" (gant Herve Lossec, konter istorioù fentus) D'an 2 a
viz Du: "Kristianelezh Breizh a zo ganti ul liv roman pe
geltiek?" (gant Job an Irien, beleg) D'ar 1añ
a viz Kerzu: "Bretoned veur dre ar Bed, a-hed ar c'hantvedoù" (gant
Bernez an Nail, embanner)
Goude ur bloavezh sabatek en deus Pol Brezhoneg Skol
an Emsav embannet un deiziataer hollvrezhonek adarre evit 2010. Adkavet e vo ar stumm klasel a blije d’an dud.
17cm uhelder ha 9cm ledander, gant ar skrid a-led. En ur golo plastik du
ha gwenn e vo kavet an deiziataer, pevar liv penn-da-benn, hag en e
gichen ur c’harnedig all hag a c’hallo bezañ miret a vloaz
da vloaz, ennañ roll kumunioù Breizh hag ar chomlec'hioù merket gant an dud. Ur benveg talvoudus evit ober gant ar brezhoneg
bemdez! Kasit ur chekenn 12€ da: Skol an Emsav, 25 straed Pierre Martin, 35000
Roazhon. Evit gouzout hiroc'h: 02 99 38 75 83 pe
sae.bzh@wanadoo.fr Lennit Bremañ Gouere hag Eost 2009
An teuliad peder fajennad zo gouestlet en hañv-mañ da
vevañ e arz. Krouiñ dilhad (Christelle Kerbaul, Stered), ijinañ dizagnoù
dic'hortoz (Qlonee), pe fardañ bravigoù personelaet (Mevena), kavet e vo aze
pennadoù-kaoz gant krouerien o deus divizet obet gant o arz war ar pemdez
evel micher da vat pe evel dudi. Bep miz, abaoe 1980, e kinnig ar gelaouenn Bremañ
pennadoù brezhonek a bep seurt, diwar-benn Breizh hag ar bed, kinniget brav,
e doare ur magazin. Embannet
gant Skol an Emsav (4,5 euro an tamm) E
gwerzh er stalioù-levrioù a ginnig danvez Breizh, pe dre goumanant. Evit
gouzout hiroc'h: www.breman.org |
|
|
|
|
|
