Lun 7 a viz Gouere, niv.199
Sizhun 28 - 2008

Pellgargit ar pennadoù e stumm Word

Evit resev kemennadenn nevez Bremaik bep Lun,
kasit ho chomlec'h da: bremaik@free.fr

Petra oa keleier Bremaik bloaz zo? Klikit amañ!

Evit distreiñ d'ar bajenn degemer

Hañvezh laouen ha plijus deoc'h holl, lennerien ger!

D'al Lun 11 a viz Eost e tistroio Bremaik.

Penaos e vez produet an tredan nukleel ?

Pa vez kemennet deomp e vo savet un eil reaktor nukleel EPR e Frañs, ha pa grog an dud da vezañ nec'hetoc'h-nec'hetañ gant priz ha saotradur an eoul-maen evel mammenn-energiezh, eo mat kaout un nebeud titouroù diwar-benn an doareoù ma vez produet an tredan nukleel.

Ne vo ket kaoz amañ eus an hentenn deknikel evit krouiñ tredan adal uraniom (displeget eo mat war Wikipedia: http://fr.wikipedia.org), met roet e vo kentoc'h un nebeud resisadurioù war mont en-dro ur greizenn.

Beveziñ kalz energiezh a ra an tredan nukleel, evit pinvidikaat an uraniom implijet gantañ, da skouer. Ul lodenn vat eus an tredan krouet gant ur greizenn a servij n'eo ket evit an dud, met evit he mont en-dro dezhi hec’h-unan. Da skouer, e Tricastin [sk.] ez eus 4 reaktor. Ar re-se na’z eont en-dro nemet evit pourveziñ kreizenn Eurodif, a zo e-kichen.

An doareoù da broduiñ a ra ma n'haller ket kemm buan ar c'hementadoù energiezh produet: n'haller ket diskenn anezho pa ziskenn an ezhommoù, pe kreskiñ anezho pa gresk an ezhommoù. Setu e c'hoarvez alies ma vefe kreizennoù o vont en-dro pa ne vez ket ezhomm, pe mareadoù e-lec'h ma ranker prenañ energiezh digant Alamagn (he deus divizet mont e-maez an energiezh nukleel) e-pad ar goañv.

Dre vras e vez lakaet etre 15 hag 20 vloaz evit sevel ur greizenn. Goude-se eo sañset mont en-dro e-pad 25-30 vloaz. Se a oa raktreset er penn kentañ, met bremañ ez eus bet divizet gant EDF lakaat ar c'hreizennoù da vont en-dro e-pad pelloc'h, daoust d'ar pezhioù melloù kudennoù surentez a c'hell sevel neuze pa gosha ur greizenn. Evel-se e lenner war lec'hienn EDF, diwar-benn ar c'hreizennoù, ez int bet "conçues pour fonctionner au moins 40 ans"! Goude-se e vez lakaet e-tro 20 vloaz evit dispenn ar greizenn. Kudennoù a c'hell sevel neuze, evel ma oar mat Breizhiz (pa vezomp kelaouet!) gant kreizenn Brenniliz.

http://lesverts.fr

Koust dispenn ur greizenn, pe hini adaozañ ha merañ al lastez skinoberiant ne vezont ket kontet e-barzh "priz an tredan nukleel" a vez roet deomp. Ma vez ouzhpennet ar c'houstoù-mañ e vez gwelet e koust e gwirionez kalz keroc'h an tredan nukleel eget n'eus forzh peseurt hini all. Da skouer, evit dispennañ kreizenn Marcoule e kousto 6 miliard a €uroioù, da lâret eo an hanter keroc'h eget evit sevel anezhi!

Kudenn ar surentez

An abeg pennañ evit kaout aon rak an tredan nukleel eo hini ar surentez. Soñj hon eus eus gwallzarvoud Tchernobyl. Ar pezh ne ouzomp ket eo e chom c'hoazh an darn vrasañ eus efedoù Tchernobyl da welet, kalzik anezho (krign-bev hag all) n'int ket en em ziskouezet c'hoazh pe neuze n'int ket bet muzuliet, dre ma vez gwasket war ar re a glask muzuliañ efedoù an darzhadenn.

Hiziv an deiz, n'eo ket suroc'h stad an traoù eget e 1986. Daou wallzarvoud grevus-kenañ a zo degouezhet e Sveden e 2006, ha darbet eo bet deomp bevañ un eil Tchernobyl. E miz Even 2007 ez eus bet ur grennadenn-zouar e Japan: danvez nukleel a zo tec'het diouzh ar greizenn vrasañ, un tan-gwall a zo savet, ha kudennoù lies all. E Krsko (Slovenia) n'eo ket aet tamm ebet en-dro an aozadur kelaouiñ ha gwareziñ pa 'z eus degouezhet ur gwallzarvoud e miz Even ar bloaz-mañ.

E Frañs ez eus kalzik traoù ne vezomp ket gwarezet diouto: e kreizenn adstummañ al lastez e La Hague e c'hoarvez tro-dro d’ur gwallzarvoud bep bloaz. N'eus gwarezet lec'hienn ebet a-enep d'un dagadenn sponterezh gant ur c'harr-nij, ha pa vefe La Hague pe an EPR nevez war ar stern. N'eo ket gwarezet kennebeut hon c'hreizennoù rak ur grennadenn-zouar: evit 1,9 miliard a euroioù a labourioù a vefe ezhomm, met nac'hañ a ra EDF ober anezho(!).

Evit ar pezh a sell ouzh ar reaktorioù nevez a zo o vezañ savet, n'int ket suroc'h evit ar re all: kavet ez eus bet gant Réseau Sortir du Nucléaire un teuliad a oa chomet kuzh a lavare ne c'hellfe ket an EPR talañ dirak un dagadenn sponterezh. E Finland ez eus bet kemeret dale forzh pegement gant chanter an EPR dre ma ne veze ket doujet ouzh reolennoù surentez hag e veze savet fall ar savadur. Memes tra e Bro-C'hall evit ar chanter a zo kroget: ehanet eo bet ur wech dija. Unan eus an abegoù eo ma vez fiziet ar savadur en embregerezhioù diavaez ha diarbennik evit ma ne goustfe ket re a arc'hant.

An nukleel, energiezh an dazont ?

Unan eus arguzennoù pennañ difennerien an tredan nukleel a zo o tont eus an eoul-maen: mont a ra da hesk, ha saotrañ a ra, setu eo gwelloc'h ober gant tredan nukleel. Petra respont da se?

Da gentañ ez eus ar memes kudenn gant an energiezh nukleel: implijout a ra uraniom evit mont en-dro, hag hennezh a ya da get ivez. Kreskiñ a ra e briz buanoc'h eget hini an eoul-maen. Hervez al lavaroù e chom etre 50 ha 70 vloaz d'ober gant an uraniom zo, ma chom ingal produadur an tredan nukleel. Met ma soñjer erlec'hiañ ar mammennoù energiezh all gant an hini nukleel e vefe dav lieskementiñ an niver a greizennoù hag ar c’hementad a uraniom implijet. Ma tremenfemp eus 2% da 50% a energiezh nukleel er bed, neuze ne chomfe uraniom nemet evit daou vloaz! Evit lod all ez aio kalz buanoc'h an uraniom da hesk eget se:

http://travail-chomage.site.voila.fr

Hentennoù a zo evit ober gant nebeutoc'h a uraniom: ur raktres zo gant "neutronoù prim", a rofe muioc'h a amzer deomp, met ne vo ket prest an deknologiezh a-raok ma vefe steuziet an holl uraniom implijet ganeomp. Enklaskoù all a zo evit implijout thoriom, a zo etre 3 ha 4 gwech muioc'h anezhañ war ar Douar eget a uraniom. Met ne seblant ket bezañ un diskoulm war hirdermen kennebeut. Taolioù-esa a zo ivez evit lakaat e pleustr un tredan nukleel dre gendeuziñ, met kudennoù surentez bras-kenañ a zo da reizhañ, ha ne vo ket prest ar raktres a-raok 100 vloaz bennak d'an nebeutañ (ret e vefe tizhout ur wrez a vefe an hini a zo e-kreiz an heol).

Titouroù ouzhpenn a zo amañ:

http://nucleaire-nonmerci.net

Arguzenn ar saotradur ne dalvez ket kalz traoù kennebeut: hervez Global Chance, ma vefe lieskementet dre 3 kementad ar c'hreizennoù nukleel, ne vefe espernet nemet 9% eus ar gazoù efed-gor ganto. Ouzhpenn-se e saotr gant traoù all, ma n'eo ket gant CO2: gant ar wrez da gentañ: 2/3 eus an energiezh produet gant ur reaktor a vez kaset e-maez e stumm gwrez, ha kement-mañ a gemer perzh e-barzh tommadur an hin. Da eil e vez taolet dour tomm ha klor er stêrioù gant ar c'hreizennoù, ha kement-mañ a zismantr penn-da-benn ar vuhez eno. Hag evel-just ez eus al lastez skinoberiant, a chom saotrus-kenañ ha dañjerus e-pad ur badelezh hir-kenañ.

War he zalaroù emañ an energiezh nukleel: a-benn 2015 e vo 41 reaktor nevez, evit 80 o paouez da vont en-dro: digreskiñ a ra e gwirionez niver ar reaktorioù. A-benn 2025 e vo serret 250 reaktor diwar ar 435 a zo, ha savet e vefe e-tro 65-70, diouzh ar pezh a vez embannet gant ar broioù. Er Stadoù-Unanet, da skouer, n'eus reaktor nukleel nevez ebet abaoe 1973. Kendalc'het e vez da implijout reoù kozh, ar pezh a laka kalzik kudennoù surentez da sevel gant ehanoù d’o heul: kement-mañ zo koustet 82 miliard a zollarioù. Abalamour da se e soñj d'an embregerezhioù n'eo ket an energiezh nukleel unan a talvez ar boan.

Hervez "Réseau Sortir du Nucléaire", gant ar c’hementad a arc'hant a vez gouestlet d'an tredan nukleel e Frañs e c'hellfe bezañ krouet 2 wech muioc'h a energiezh ha 12 gwech muioc'h a labour gant an energiezhioù nevez ha propr.

Er bed a-bezh ez a an tredan nukleel d’ober 17% eus an tredan, ha 2% eus an energiezh. E Frañs ez a d’ober 78% eus an tredan, ha 17% eus an energiezh. Da lâret eo, pa'z aio an tredan nukleel da get, ne vo nemet 2% a energiezh da gavout e lec'h all war ar bed. Gant kresk an energiezhoù nevez ha propr, ne vo ket gwall ziaes.

M.M.

Evit gouzout hiroc'h :

www.sortirdunucleaire.org

http://fr.wikipedia.org

www.lemonde.fr (diwallit mat, 4 bajenn a zo)

http://www.criirad.org/

Evit kaout ivez ali unan hag a zo kentoc'h a-du gant an energiezh nukleel:

www.manicore.com

"Un devezh er pennoù-ahel" e Roazhon

Betek an 31 a viz Eost e vez roet tro deoc'h da zizoleiñ an Arktika hag an Antarktika: o loened, o flant hag al labourioù kaset da benn du-se gant ar skiantourien. An daou dezerzh gwenn-mañ, chomet gouez c'hoazh, hag a vez kemmesket alies, a zo daou endro disheñvel-tre. Pal an diskouezadeg-se zo neuze lakaat ar pennoù-ahel da vezañ anavezet evel m'emaint an deiz-a-hiriv en ur lakaat war wel o heñvelderioù hag o disheñvelderioù gant pemp danvez: "90° led", "plant ha loened ar yenijenn", "skorn, erc'h, dour...", "enklaskerien er pennoù-ahel" ha "pobloù an hanternoz bras". Ar c'hinkladur skornet a rivo ac’hanoc’h ha gant sonioù, objedoù bac'het er skorn, panelloù, delwennoù ment gwir al loened, fichennoù deskrivadurioù, benvegoù an inouited, kabanenn ar skiantourien e vo peadra da anavezout sifroù, geografiezh ha sevenadurioù ar pennoù-ahel. Ouzhpenn an diskouezadeg pinvidik-mañ e vo kinniget prezegennoù a bep seurt evit mont donoc'h gant an danvez.

A Veurzh da Sul.

Mont-tre: etre 3 ha 5 euro.

Evit gouzout hiroc'h: www.espace-sciences.org

Broderezh arzel e Kastellaodren

E Ti an Douristed e Kastellaodren ez eo kinniget "ART EMBROIDERY – Still life", un diskouezadeg bloaziek a ginnig oberennoù savet penn-da-benn gant mekanikoù da wriat pe d'ober broderezh. An temoù dibabet a vez bepred liammet gant al livañ evel an "natur marv" evit ar bloaz-mañ. An arzourien mod nevez-mañ a embann ec'h implijont o mekanikoù evel barroù-livañ hag e cheñchont neudennoù ken alies ha ma vez cheñchet liv gant al livourien. Lakaat war wel an hentenn gumun etre al liverezh hag ar broderezh eo eta pal an aozourien.

Ar weladennerien o do an dibab etre oberennoù bihan-tout pe bras divent, etre an doare "buhez didrouz" mod Cézanne pe Giorgio Morandi pe leun a enkrez pa vez lakaet muioc'h war wel tu marv an danvez. Peadra a vo neuze da zizoleiñ 43 arzour eus 20 bro disheñvel er bed. Ha pep hini anezho a ginnig e oberenn gant un destenn skrivet gantañ evit embann e sell arzour ha reiñ displegadennoù teknikel war e labour.

Digor bemdez betek ar 15 a viz Gwengolo.

Mont-tre: 2 euro, digoust evit ar vugale.

Evit gouzout gouzout hiroc'h: www.cdc-chatelaudren-plouagat.com

Oberennoù Jean Degottex e Kemper

Un dastumad dreistordinal taolennoù awenet gant Breizh a zo gant mirdi an arzoù-kaer e Kemper hag a ziskouez mat pegen dedennet eo bet al livourien gant hor bro, eus ar prantad romantel betek bremañ. En hañv-mañ ha betek an 30 a viz Gwengolo eo oberennoù Jean Degottex a vo diskouezet. Hemañ a oa bet o vakansiñ e Dinarzh, er Pouldu ha war enezennoù Groe hag Eusa met dreist-holl e Porsall e 1954. Ar veaj-se he doa lakaet e livadennoù da emdreiñ trumm. Abaoe ne livas ket ken an natur evel ma oa met gant sinoù kentoc'h. Hag ur wech distro e Pariz en doa André Breton gweladennet e labourva ha lakaet anezhañ da zizoleiñ taolennoù broioù ar Reter-kreiz. Adalek ar mare-se e voe troet penn-da-benn preder al livour war-zu ar sevenadur-mañ hag ar zen dizoloet gantañ a-drugarez da Suzuki. E 1963, goude marv e verc'h en ur gwallzarvoud hag ur prantad dioberenn, e cheñchas e zoare da labourat en ur implij danvez industriel nemetken. Ha goude-se en doa labouret war-eeun war an oberenn. Aet e oa da anaon e 1988 d'an oad a 69 bloaz.

En diskouezadeg-mañ e vo tu da welet 72 taolenn, o tont eus 10 mirdi hag 20 dastumad prevez, hag ur film war an arzour sevenet gant Michelle Porte e 1992.

Digor bemdez etre 10e ha 7e noz.

Mont-tre: etre 2,5 ha 4,5 euro

Evit gouzout hiroc'h: www.musee-beauxarts.quimper.fr

Hoel Louarn

Ur galiri nevez e Sant-Maloù

Gant Françoise Coudrin e oa bet divizet sevel ur stal dic'hortoz: etre ur galiri arz hag ur stal kinklañ an ti eo Border line, e Sant-Maloù. Daou vloaz labour zo bet evit kas da benn raktres Françoise Coudrin, goude bezañ skoulmet liammoù gant arzourien, krouerien, dizagnerien hag artizaned. Kavet e vo er memes lec'h frouezh labour livourien, kizellerien, priourien, ebenourien, gwerourien, tisavuorien, dizagnourien diabarzh, al lod vrasañ anezho o chom e Breizh. Un dibab graet gant merourien ar stal Border line eo. Staliet eo e Sant-Maloù, kêr brudet evit bezañ degemeret leun a arzourien, hag o oberennoù er galirioù niverus zo eno. Stal Border line a vo digor a-hed ar bloaz, pa vez digor ar galirioù all e-kerzh ar mizioù hañv hepken dre vras.

Evit gouzout hiroc'h:

Border line, 5 straed Santez Marguerite, 35400 Sant-Maloù

Pgz: 02.99.56.27.79

www.border-line-saint-malo.fr

Tro Frañs e Breizh: tremenet e-kichen ti Bernard Hinault

Hiziv, d'al Lun 7 a viz Gouere ez echu troiad marc'hhouarnerien an Tour de France e Breizh. Etre Brest ha Pluveleg e oa disadorn, etre an Alre ha Sant-Brieg disul, hag etre Sant-Maloù ha Naoned hiziv. Al lodenn gentañ a oa bet echuet da gentañ gant Alejandro Valverde. Miret en deus ar roched melen evit an eil lodenn, bet gounezet gant Thor Hushovd. Ar c'hwec'hvet tennad en Tour de France bet gounezet gantañ eo. E 2004 en doa gounezet unan e Kemper. Erruet eo e penn ar redadeg goude 164,5 km. D'an 31vet km eo tremenet ar redadeg dre Gerorgen, lec'h m'emañ Bernard Hinault o chom. Unan eus brudetañ marc'hhouarnerien Breizh hag ar C'hwec'hkron eo, ar c'heodad gall diwezhañ o vezañ bet e palmares an Tour de France (e 1985).

Echuiñ a raio hent Breizh an Tour hiziv, adalek mogerioù-kreñv Sant-Maloù betek kaeoù porzh Naoned, kêr-benn ar vro, evit 208 km a hentoù plaen.

Tro Frañs: Ai'ta war vord an hent

D'ar Sadorn 5, war kumun Plougastell, e oa strollet un tregont stourmer bennak eus Ai'ta. Kevrenn Bro-Leon a oa war ar plas evel-just asambles gant re Gwened ha Treger. "Kazi 180 chadenn [tele] estren a zo e Brest evit deroù redadeg Tro Frañs. Ret eo profitañ eus kement-se evit bezañ klevet gant annezidi Frañs met ivez ar pobloù all. Plijout a ra kement [da Frañs] lâret eo bro gwirioù mad-den. Aze 'maomp hiriv evit diskouez n'eo ket ken anat ha se evit a sell ouzh an doujañs d'ar yezhoù minorelaet" eme dTristan eus Ai'ta Bro-Leon.

Tri ober zo bet aozet gant ar skipailhoù orañjez neuze, ha lakaet e pleustr teknikoù nevez evit bezañ klevet. Awenet eo doareoù ober Ai'ta gant re Greenpeace pe Demo Euskadi da skouer. Staget ez eus bet neuze ur giton 13 metrad war 3, dindan pont Plougastell ha diouzh noz, hep na vefe paket tud Ai'ta gant ar re e-karg eus ar surentez. Skrivet e oa warni "Ya d'ar Brezhoneg, Oui au Breton". Un eil skipailh, kraperien ampart ennañ zo pignet war ar C'hub, roc'h krapat mil-anavezet Plougastell hag a zo e-tal ar pont. Da 30 metrad uhelder o deus kraperien diskennet ur pezh mell giton skrivet warni "Save breton language". Siwazh "re a avel a oa, ar giton zo bet diroget goude ur c'hard eur" eme gKlervia, kraperez en Ai'ta Bro-Leon. Filmet int bet memes-tra gant ar viñs-askell ha tremenet int er skinwel. Bizhier-tan ruz a oa ganto evit bezañ gwelet a-bell. Un trede ober zo bet aozet war vord an hent-tizh goude Pont Plougastell. Un ugent ezel bennak eus Ai'ta a oa aze o terc'hel ur giton skrivet warnañ "Breton, langue officielle". Tu a vo gwelet tud Ai'ta e-kerzh an hañv adarre e-kerzh Douarnenez 2008 ha Gouel an Erer Kozh ha marteze e lec'h all piv a oar!

Evit gouzout hiroc'h:

http://ai.ta.free.fr

Filmoù an hañv

09/07

Peadra a vo er salioù teñval er sizhun-mañ evit gwalc'hiñ c'hoantoù an holl. Ar familhoù, da gentañ, a zlefe kavout dudi da bep oad gant Kung Fu Panda (sevenet gant Mark Osborne, John Stevenson), istor ur panda a striv (war e drañkilite) evit mestroniañ arz ar C'hung Fu gant ar pal dieubiñ e janglenn. Ma, traoù all a vije da saveteiñ e Sina er mare-mañ met arabat plantañ spered fall; dudi eo, tra ken.

Enep-haroz adarre, met hemañ gant galloudoù dreistordinal. Tu divoutin Hancock [sk.] (sevenet gant Peter Berg ha c'hoariet gant Will Smith) eo bezañ un doare Superman "trash" a glasko gwellaat e skeudenn memes tra (siwazh?).

Ar re n'int ket awenet gant ar steuñvennoù-se a c'hello (gant un tamm chañs) mont en-dro da welet Gentlemen Prefer Blondes/Les Hommes préfèrent les blondes bet sevenet gant Howard Hawks e 1953 gant Jane Russell, Marilyn Monroe hag he "foupoupidou". Ur film eus an dibab, evel-just, hag a ranker bezañ gwelet un deiz bennak.

16/07

Ur film brudet all eo Journey to the Center of the Earth/Voyage au centre de la Terre [sk.]. Distreiñ a ra dindan ur stumm nevez en hañv-mañ... teirmentek, e gwirionez. Klevet a reer ez a ar sinema war an tu-se (war ar stern emañ doare teirmentek teiroberenn orin Star Wars). Met, gant Brendan Fraser war talbenn ar skritell, n'eo ket sur tamm ebet e chomo ar film-mañ en eñvorennoù.

Neuze kement ha derc'hel d'ul live uheloc'h e vo tu mont da welet Hadaka no shima/L'Île nue (sevenet gant Kaneto Shindo) a gont buhez trist ha kalet ur familh gouerien o chom war un enezennig didro e Japan.

Ma, div abadenn disheñvel-mik hep mar.

23/07

Aesoc'h e vo moarvat d'an jazz-karourien tapout krog e-barzh Let's Get Lost [sk.], an teulfilm sevenet gant Bruce Weber diwar-benn Chet Baker, soner trompilh ha kaner gwenn e groc'hen, doare James Dean bed ar sonerezh.

Bremañ, ma n'oc'h ket evit gouzañv mouezh sioul ha flour Chet Baker, kit buan da glevet youc'hadennoù loen gouez The Incredible Hulk/L'Incroyable Hulk azasaet en-dro evit ar sinema gant Louis Leterrier (film-sevener gall) a zeu da-heul Ang Lee (Hulk, 2002). Petra a dalvezfe un hañvezh hep azasadenn comics book ebet?

30/07

Gant fin miz Gouere e tistroio ar sevener Chris Carter gant e aktored David Duchovny ha Gillian Anderson evit The X-Files: I Want to Believe. Istorioù korfoù-marv merc'hed adkavet er skorn. Met lec'h all emañ ar wirionez, a dra-sur.

Gant WALL-E [sk.] (sevenet gant Andrew Stanton) e vefe marteze? Ur paour-kaezh robot chomet e-unan da naetaat un Douar didud. Met un deiz bennak e tifluk ar garantez en e egorlestr. En personel, ne c'hwitin ket da welet babig nevez ar Studioioù Pixar (Toy Story, Ratatouille, etc.).

06/08

Da Sina ez a ar re O'Connells e The Mummy 3/La Momie 3: la tombe de l'empereur dragon sevenet gant Rob Cohen. Dipitus eo bet pevare lodenn troioù-kaer Indiana Jones, petra a dalvezo trede lodenn ur meni Indiana Jones neuze?

Ar re n'o do ket c'hoant kemer ar riskl da c'houzañv Brendan Fraser en aner a c'hello mont da welet The Bank Job/Braquage à l'anglaise [sk.] (sevenet gant Roger Donaldson), istor ur strollad laeron en em gav paket, hep gouzout dezho, en aferioù muntr, prenadur ha feulster. Netra gwall nevez marteze...

Meriadeg Vallerie

Un hañvezh rock

The Subways – All or Nothing – embannet gant U10

Tri bloaz zo e oamp bet plijet gant pladenn gentañ The Subways. E miz Even eo deuet er-maez o eil albom. Produet eo gant Butch Vig (produet gantañ pladennoù Nirvana ha Sonic Youth). Kregiñ a ra an traoù gant Girl and Boys, un ton hep kan. Alright, an trede ton (hag ar single kentañ) a zo efedus, netra da lavarout. Kalifornia ha Shake!Shake! a zo gwelloc’h, muioc’h a startijenn a zo. Mat ivez I Won’t Let You Down ha Turnaround, tremen a ra buan an traoù, n’eus ket amzer da vezañ enoeet. Daou don sioul-tre a zo ivez: Lost Boy ha Strawberry Blonde. N’eo ket kenkoulz hag o fladenn gentañ, met peadra a zo evit ar re a blij dezho ar rock kreñv pe pop-punk evel ma lavarer.

Muioc’h a Subways :

http://www.thesubways.net/

http://www.myspace.com/thesubways

Un hañvezh elektro

Ellen Allien – Sool – embannet gant Bpitch Control

Penaos kaozeal diwar-benn pladenn nevez Ellen Allien? En ur mod, n’eus netra da lavarout. Divizet he deus sevel ur bladenn tekno bihanañ. Evit en ober he deus labouret gant AGF, ur sonerez alaman brudet just a-walc’h evit he labour war ar sonerezh idm-elektronika. Einsteigen (pignat e-barzh ar c’harr/an tren, en alamaneg) eo titl ar ganaouenn gentañ: ha gwir eo, pedet omp da veajiñ gant Ellen Allien. A-hed ar bladenn, luskoù kentoc’h dous, trouzioùigoù liesseurt, mouezhioù chuchumuchu. E-touez an tonioù gwellañ emañ Caress ha Sprung. Brav-eston ivez an ton anvet Frieda, diwar-benn mamm Ellen Allien. Un ton nemetken, Its e ditl, a c’hallfe kaout e blas en un toull-noz. Ur bladenn diaes er penn-kentañ, met brav-tre, da selaou meur a wech er sioulder a-raok bezañ plijet ganti. Met evel bewech ma’z embann Ellen Allien ur bladenn, ez eus chañsoù bras e vefe honnezh e-barzh best of ar bloaz.

Muioc’h a Ellen Allien :

http://www.myspace.com/ellenallienbpc

http://www.bpitchcontrol.de/

Un hañvezh Muxtape

Met penaos e raemp, a-raok ma vefe eus an MP3? Tapout a raemp kasedigoù, tonioù liesseurt a lakaemp warno, listenn an tonioù a savemp aketus, ha reiñ a raemp anezho d’hor mignoned. Hiziv an deiz, lezenn an iPod? hag evit ar re n’eus iPod ebet ganto? Ma, krouet eo bet Muxtape. Diazezet eo al lec’hienn war mennozh ar c’hasedigoù a aozemp (mixtape, e saozneg) pa oamp yaouank. Ar mont en-dro neuze. Dav eo bezañ enskrivet (digoust eo) ha goude-se e c’hallit aozañ un dastumad 12 kanaouenn d’ar muiañ (10Mo d’ar muiañ, mp3 dre ret). Ha goude-se, kopiañ chomlec’h ar bajenn ho peus krouet ha skignañ d’ho mignoned evit ma c’hallfent selaou ho muxtape deoc’h. Hag evit ma c’hallfent, int ivez, krouiñ an dastumad a blij dezho. Eeun-tre eo al lec’hienn hag aes-kenañ da implijout, an nevezinti a vez kinniget war blog muxtape.

Muoic’h a vMuxtape :

http://muxtape.com/

http://muxtape.tumblr.com/

R.M.

Debriñ e ti Mari Glazioù (Piknikañ)

Fardañ ar piknik evit 6 den

Alumenn-vioù gant louzoù-kegin

Fouetit 6 vi gant 1 loaiad vras eoul, 2 biñsad holen, ½ boked stragon, 1 boked serfilh diskolpet. Fardit 3 alumenn-vioù vihan an eil goude eben en ur billig eouliet. Diskargit war pep hini ur skejenn morzhed-hoc'h, roullit ha goloit anezho e-barzh ur film plastik kegin. Servijit yen, troc’het a dammoù.

Taboule glas

Meskit 200g kouskous gant chug ur suraval, 20 cl a zour ha 4 loaid vras eoul. Lakait un eurvezh er yenerez hag ouzhpennit un ½ kokombrezenn, 1 c’hourjetezenn ha kalon un achenn skourr, pep tra troc’het e karrezioù bihan.

Pan-Bagnat

Digerit 6 baraenn vihan. Strimpit ar minvig gant ur banne eoul olivez. Gwarnisit gant mesclun, 3 vi poazh-kalet, 3 zomatezenn troc’het a-skejennoù, 1 penn-ognon hag ur penn fanouilh –mor skejennet, 12 genougamm hiliennet, 1 voestad toun naturel hag 12 olivezenn zu.

Dip gant ricotta

Meskit 150 g ricotta gant 150 g fourmaj-laezh, 2 loaiad vras suraval hag un ivin kignen flastret. Pebrit hag holennit. Frondit gant koriandrez ha bent.. sasunit gant pimant Espelette. Soubit krizaj e-barzh ar meskaj.

Muffin gant flamboez

Basit 1 vi gant ur fourchetez en ur bezel hag ouzhpennit tamm-ha-tamm 125 g amann teuz, 10 cl laezh, 180 g belud, 1 sachad goell kimiek, 90 g sukr, arabat labourat an toaz re. Ouzhpennit ar flamboez. Rannit e-barzh moulloù-gwestell bihan. Lakait er forn 20 mn (th 6 / 180°).

Mari Lubrano

Pik BZH: mont a ra war-raok

Pell zo bremañ ez eus bet kaoz eus krouidigezh un astenn e.bzh evit al lec'hiennoù internet. Aet an traoù war-raok gant goulenn Kuzul-rannvro Breizh ouzh ar gevredigezh Breizh Diawel studiañ an doare da gas ar raktres da benn. Ur gevredigezh zo bet krouet a-ratozh evit brudañ ha kas war-raok al labour evit prientiñ an teuliad a vefe ret kinnig d'an ICANN, an aozadur etrebroadel a ver an astennoù Internet. Koust ar goulenn a vefe e-tro 300000 euro en holl, evit an teuliad kinnig hag ar skipailh brudañ ha merañ. Un astenn zo bet krouet c'hoazh evit Katalonia (.cat), ha re all zo war ar stern (.cym evit Kembre, .sco evit Skos, .gal evit Galiza...). Un astenn a seurt-se zo bet ur benveg dedennus-tre e Katalonia: servijet en deus da vrudañ ar vro er bed a-bezh, ha broudet en deus leun a embregerezhioù (33% ouzhpenn) ha tud eus ar vro d'ober gant Internet.

Evit gouzout hiroc'h:

www.pointbzh.com

Brudadeg nevez ar c'helenn

Ur skritell nevez a vo evit brudadeg ar c'helenn brezhoneg evit an dud deuet, savet gant Ofis ar Brezhoneg ha DAO (Deskiñ d'an oadourien). Roet e vo lañs d'ar c'houlzad a-benn miz Eost ha betek miz Here, un tamm pep lec'h e Breizh, gant skoazell ar c'hevredigezhioù, an tiez-kêr hag ar c'huzulioù-departamant. Sed aze ar skritell nevez-flamm!

Evit gouzout hiroc'h:

http://dao.free.fr

www.ofis-bzh.org

Lennit Bremañ an hañv!

Doare dilenn ar prezidant er Stadoù-Unanet, beaj daou falc'her OGK en Chiapas, stourm tud Kreiz Breizh evit ospital Karaez, Skolaj Diwan Liger-Atlantel... Anv zo eus an holl draoù-se ha traoù all c'hoazh e-barzh niverenn Bremañ Gouere-Eost 2008.

An teuliad peder fajennad zo gouestlet en niverenn-mañ d'an danvez-lezenn a denn d’an arzourien amatour. Rankout a raio marteze an amatourien bezañ paeet evel tud a-vicher evit kemer perzh en abadennoù da baeañ. Festivalioù bras ha bihan ar vro a c'hellfe bezañ en arvar bras neuze... Peder fajennad ispisial a gaver ivez, gouestlet da zarvoudoù Mae 1968, savet gant Lukian Kergoat. Heuliad al lodenn bet embannet e-barzh niv. Miz Even Bremañ eo.

Bep miz e kinnig ar gelaouenn Bremañ, abaoe 1980, pennadoù brezhonek a bep seurt, diwar-benn Breizh hag ar bed, kinniget war baper lufrus, e doare ur magazin.

Embannet gant Skol an Emsav (7 euro an tamm)

E gwerzh er stalioù levrioù a ginnig danvez Breizh, pe dre goumanant.

Evit gouzout hiroc'h: www.breman.org