|
|
|
|
|
|
|
|
|
|
Lun 9 a viz Even,
niv.195 Pellgargit ar pennadoù e
stumm Word Evit resev kemennadenn
nevez Bremaik bep Lun, Petra oa keleier Bremaik bloaz zo? Klikit amañ! Evit distreiñ d'ar bajenn degemer |
|
|
|
|
|
|
|
|
|
|
|
|
|
|
Ospital Karaez : manifesterien gloazet ha bac'het e Kemper |
|
|
|
Evit ar wech kentañ e
Kemper e oa bet embannet en a-raok e vefe aozet ar vanifestadeg: p'eo erruet
ar c'hantadoù a dud, eus Karaez, Kemper ha tro-dro, e oa gwarezet mat dija
savadur ar Stad gant gwarded-monedus prest d'an emgann. Etre 10 eur 30 ha 5
eur eo bet stanket penn-da-benn kreiz-kêr Kemper: goude ur mintinvezh gant
tennoù greunadennoù-daeraouiñ war ar vanifesterien, evel, da skouer, war ur
strolladig, merc'hed dreist-holl, a oa o tañsal gant ur c'houblad sonerien, ez
eus bet graet un ehan evit lein. A-raok distreiñ d'ar c'hrogad e oa bet
embannet gant Christian Troadeg e oa bet dalc'het 6 anezho gant ar bolis ha ne
vefe ket kuitaet kêr-benn Bro-Gerne a-raok na vefent dieubet, pezh zo erru e
dibenn an devezh. Goude bezañ gouzañvet tennoù ar warded an abardaevezh-pad,
ha pevar eus ar stourmerien bet gloazet, e oa bet embannet gant Maer Karaez e
oa echu evit an ampoent met e tistrofent da lâret o soñj dirak ar prefeti,
bemdez ma vefe ret! Digwener da 6 eur, e Karaez, e oa bodet miliadoù a
dud evit klevet e oa un tamm spi dre ma oa bet divizet gant an Aotrou Perrin,
rener an AHR, asantiñ da zigeriñ en-dro ar servij surjianerezh evit oberatadennoù
bihan pa ne vez ket ret tremen an nozvezh en ospital. Met d'ar mare-se ivez,
ez eus bet bevet un darvoud kriz gant an "dreuzkasadenn" gentañ,
eus Karaez da Gemper. Ur bugelig a oa bet torret e ilin gantañ, hag e oa bet
ret pellgomz da 6 ambulañs evit dont a-benn da gavout unan a oa prest da
gemer anezhañ e karg! D'an 25 a viz Even e vo anavezet disoc'h ar rekour e
lez-varn Roazhon evit nullañ an divizoù serriñ servijoù ospital Karaez. Hoel Louarn |
|
|
|
|
|
Goude bezañ bet o
vanifestiñ e Kemper pe c'hoazh e Kastellin, a-hed ar sizhun, o deus ar
stourmerien a zifenn ospital Karaez aozet ur vanifestadeg vras e Kêr-benn ar
Poc’hêr digwener noz adalek 6 eur, mare m'eo bet serret da vat lod eus
servijoù an ospital publik, a-raok distreiñ da brefeti Penn-ar-Bed disadorn
vintin evit embann sklaer e padfe ar stourm betek an trec'h. 
|
|
|
|
|
|
Dimerc'her tremenet, da 3eur goude
kreisteiz, ur gwallzarvoudig e kreizenn nukleel Krsko, e Slovenia |
|
|
|
Unan eus an darvoudoù
grevusañ eo kudennoù ar benveg-yenaat, peogwir ma n'hall ket ar greizenn
yenaat mont en-dro ken e tomma ar galon betek re, hag e c'hell neuze
degouezhout un deuzadenn. E 1979 ez eo ar memes kudenn a oa bet e kreizenn
Three Miles Island, hag e oa teuzet kalon ar greizenn: kement-mañ en doa
kaset ar Stadoù-Unanet da baouez gant o frogramm nukleel. Evit "Sortir du nucléaire" eo un arouez eus
an arvarioù divent a zo gant an energiezh nukleel. Lavaret a reont ivez eo
savet 54 eus an 58 kreizenn gall evel an hini zo e Slovenia... M.M. |
|
|
|
|
|
Dour a oa tec'het kuit diouzh
ar benveg yenaat, abalamour d'ur junt aet re gozh. Pa'z eo degouezhet ar
gudenn eo bet lakaet ar sistem kemenn europat da vont en-dro, met n'eo ket
bet efedus tamm ebet, ar pezh a ra aon d'an aozadurioù e-karg eus ar surentez
nukleel. Kalz re a amzer a zo bet lakaet gant Slovenia evit kelaouiñ kreizenn
etrebroadel ar surentez nukleel hag ar broioù all, ha da Aostria he deus
lavaret ne oa nemet ur boelladenn...
|
|
|
|
|
|
"Abadenn
ar vugale" e Kastellin |
|
|
|
H.L. Mont-tre : 5 euro, digoust
dindan 12 vloaz. Yach-pesk
eo livadurioù Nadège
Tri zra, emezi, a gaver
dreist-holl en taolennoù-se: ar mor, ar yezh, an dud. Ar mor, rak unan eus
perzhioù heverk Breizh eo da Nadège, a blij dezhi ar maezioù a-hed an aodoù! Ar
sevenadur zo kinniget a-dreuz ar sonerezh hag ar yezh, a gaver en taolennoù,
mesket gant ar sonerezh, div zremm bouezus sevenadur an dud e Breizh, a zo
digor o spered, emezi. Pep taolenn zo diwar benn
unan eus an temoù-se ha graet eo gant gerioù, livioù flamm hag un danvez
adaozet all evel traezh, kordenn, kazetenn pe polistiren. M.K. Tavarn "Ar Memes Tra", 18 kae
Emile Zola, e Roazhon. Taolennoù Nadège a c'haller gwelout amañ: |
|
|
|
|
|
Disul e Kastellin e vo
aozet "Abadenn ar vugale": tro ho po da welet dañserien vihan 15
kelc'h keltiek Penn-ar-Bed ar gengevredigezh Kendalc'h da lavaret eo muioc'h
evit 400 bugel gwisket gant dilhad hengounel pep bro a ginnigo krouidigezhioù
ar bloaz. Da un eur hanter e vo un dibunadeg vras ha da ziv eur hanter e vo
dizoloet heuliadoù koroll pep kelc'h ha dañs ar mil. A-hed an endervezh e vo
ivez stalioù-labour: tresadennoù keltiek, broderezh, dantelezh ha
kontadennoù. Ha d'ar 22 a viz Even e vo tro kelc'hioù Kendalc'h 22 d'ober
kemend-all.
Un diskouezadeg
livadurioù zo kinniget en davarn "Ar Memes Tra" e Roazhon
gant Nadège Noisette, studierez war ar brezhoneg gant Sav-Heol.
|
|
|
|
|
|
Federer skarzhet-trumm gant Nadal |
|
|
|
Deuet eo a-benn da gas Federer er-maez goude tri
set hepken, unan eus gourfennoù berrañ Roland-Garros! 6-1, 6-3, 6-0 evit 1e
ha 48mn. An trede gwech e oa evit an daou c'hoarier d'en em gavout
tal-ouzh-tal evit Gourfenn Roland-Garros. Ar wech kentañ e oa da Nadal, 22
vloaz, gounit er mod-se. Deuet a-benn da lakaat Federer, 27 vloaz, d'ober 35
fazi eeun. An dekvet gwech e oa da Federer klask gounit ar
Grand Chelem diwezhañ a vank dezhañ. Ha dont a raio a-benn d'e c'hounit? Gant
Andre Agassi hag Andres Gomez hepken eo aet ar maout goude bezañ bet e-pad
ouzhpenn dek vloaz war tachenn Roland-Garros. Diouzh tu ar merc'hed, eo aet ar maout gant ar
Serbez Ana Ivanovic, bet trec'h war ar Rusianez Dinara Safina 6-4, 6-3. |
|
|
|
|
|
Dec'h e oa lodenn ziwezhañ tournamant tennis
Roland-Garros evit ar baotred. Souezhet eo bet an holl o welet gant peseurt
nerzh eo bet trec'het ar Suis Roger Federer, 1añ c'hoarier ar bed abaoe miz
C'hwevrer 2004 gant ar Spagnol Rafael Nadal (bet 1añ c'hoarier ar bed
araokañ). Un tournamant sebezus a-walc'h en deus graet Nadal: set ebet kollet
gantañ, ha tapet ar C'hib evit ar pevare gwech diouzh renk. Kement hag ar
Svedad Bjorn Borg, gounezet gantañ Kib Roland-Garros bep taol etre 1978 ha
1981.
|
|
|
|
|
|
|
Un conte de Noël |
|
|
|
Frañs
– 2007 Senario
ha seveniñ : Arnaud Desplechin
Ar santimantoù krisañ a c’heller magañ en ur
familh a vez lakaet war wel e Un conte de Noël: kerent ne vagont ket
karantez d’o bugale, ur c’hoar a gasa he breur, ur mab a dag
kement den a zo... ha kement-se en aergelc’h Nedeleg memes tra. Tud a
gar en em gasaat eo a weler aze a-benn ar fin. Ur film liestudennoù a
zalc’h mat eo deuet Desplechin a-benn da seveniñ gant sikour aktored
e-touez ar re wellañ. Un tamm hir eo an abadenn avat ha, daoust ma c’hoarvez
an istor e Roubaix, mouget eo gant un dro-spered parizian (gant ster gwashañ
ar ger). Leun a fougaserezh eo obererezh Desplechin: sellit mat pegen desket
on, pegen barrek on evit filmañ, ha klevet mat ho peus ar bomm sonerezh fin
am eus plantet aze? Gortozit, lakaat a ran an ton kreñvoc’h... Ma, ar
re a c’houzañvo an dra-se o do plijadur gant ar peurrest. Meriadeg Vallerie Kement ha gouzout hiroc’h: http://www.bacfilms.com/site/conte/ |
|
|
|
|
|
|
|
N’en deus ket
gellet Joseph, mab Abel
|
|
|
|
|
|
Les Thugs – 28 a viz Even e
Tremargad |
|
|
|
Er bloaz-mañ e lider 20
vloaz an ti-embann pladennoù amerikan Sub Pop, ya, ya, ti-embann kentañ
Nirvana (sed aze un anv a sacho evezh ar re dindan 25 bloaz). Evit lidañ an
darvoud o deus divizet Les Thugs en em strollañ en-dro, anvet eo o zroiad
No-Reform Tour. En holl, seizh abadenn nemetken er c’hwec’hkorn,
hag en o zouez unan e Tremargad, e sal ar gouelioù, a-benn an 28 a viz Even.
N’eus nemet 250 tiked. R.M. Muioc’h a rock’n’roll: http://www.lesthugs.fr |
|
|
|
|
|
Ne oant ket ken kentelius
ha Berurier Noir, ne soñje ket dezho bezañ barzhed, evel ma soñje da Noir
Desir. O tont e oant eus Añjer, ur gêr n’eo ket gwall vrudet war
gartenn ar rock. Met ma! Er bloavezhioù 1980 ha 1990 ne oa nemet ur strollad
rock a-feson er c’hwec’hkorn, hag anvet e oa ar strollad-se Les
Thugs. Pevar den gwisket e du, kanaouenn ebet e galleg, pep tra e saozneg
(peadra da lakaat ur ministr ar sevenadur bennak da sodiñ), tonioù pop e
gwirionez, met sonet da 200km/e. Etre 1986 ha 1999 o deus lakaet embann eizh
pladenn beurvat, en o zouez Still Angry / Still Hungry, Strike
ha Nineteen Something. Ar re o deus gwelet anezho war al
leurenn a oar perak eo pouezus kaout stouvoù divskouarn. Pa voe aozet ar
bladenn Virus 100 da enoriñ Dead Kennedys e voe Les Thugs ar strollad diavaez
Amerika nemetañ a sonas warni. Sed aze evit a sell ouzh ar fedoù.
|
|
|
|
|
|
Divskouarn, bugaligoù ha Gilbert
Dalgalian |
|
|
|
Evit gouzout hiroc'h: Lennit Bremañ miz Even!
An
teuliad peder fajennad zo gouestlet en niverenn-mañ da 30vet deiz-ha-bloaz
skolioù Diwan ha berzh ar Redadeg. Pozioù kanaouennoù bet savet evit an
degouezh, pennadoù-kaoz, skeudennoù hag ur sell war al levrioù embannet evit
lidañ an deiz-ha-bloaz... Teir fajennad ispisial a gaver ivez, gouestlet da
zarvoudoù 1968, savet gant Lukian Kergoat. Heuliad ar pennad a vo tu da lenn
e niverenn Gouere-Eost Bremañ. Bep miz e
kinnig ar gelaouenn Bremañ, abaoe 1980, pennadoù brezhonek a bep
seurt, diwar-benn Breizh hag ar bed, kinniget brav, e doare ur magazin. Embannet
gant Skol an Emsav (4,5 euro an tamm) E
gwerzh er stalioù levrioù a ginnig danvez Breizh, pe dre goumanant. Evit
gouzout hiroc'h: www.breman.org |
|
|
|
|
|
E-kerzh
miz Mae e oa bet aozet gant ar gevredigezh Divskouarn ur rummad prezegennoù
diwar-benn ar c'hinnig brezhoneg d'ar vugale vihan a-raok ar skol. Arc'hoazh,
d'an 10 a viz Even, da 6e noz, e vo aozet ur gaozeadenn adarre, e Brest, e ti
Europa. Pedet eo bet Divskouarn gant ar gevredigezh Eskemm da gaozeal diwar-benn:
"brezhoneg ha bugaligoù, kejadenn gant Divskouarn, kinnig ha
testenioù". E galleg e vo ar gaozeadenn. Un emvod kelaouiñ evit a vo
graet ivez en Oriant, kenaozet eo an abadenn-se gant Emglev bro an Oriant,
d'ar 16 a viz Even e Ti ar C'hevredigezhioù, 12 straed Colbert. Diwezhatoc'h
e-kerzh ar miz-mañ e vo un abadenn all kinniget gant ar gevredigezh
Divskouarn, Ti ar Vro ha klasoù divyezhek bro Lesneven. Dont a raio ar
c'helenner Gilbert Dalgalian, yezhoniour arbennigour war deskiñ abred ar
yezhoù, da zisplegañ ur brezegenn d'ar Meurzh 24 a viz Even, da 8e30 noz e ti
degemer Lesneven. Peadra da anavezout gwelloc'h petra a c'hell degas d'ur
bugel deskiñ meur a yezh pa vez yaouank-tout.