Lun 22 a viz Mae, niv.101
Sizhun 21 - 2006

Pellgargit ar pennadoù e stumm Word

Petra oa keleier Bremaik bloaz zo? Klikit amañ!
Evit distreiñ d'ar bajenn degemer

 

 

 

 

 

 

 

 

 

 

 

 

Montenegro dizalc'h

 

 

Dec'h e oa bet aozet ur referendom e Montenegro, evit goulenn digant an 650 000 annezad daoust hag-eñ e fell dezho chom stag ouzh Serbia pe bezañ dizalc'h. Abaoe 2003 e oa "unanet" Serbia ha Montenegro, an div vro o kaout un emrenerezh bras an eil diouzh eben (gouarnamantoù, parlamantoù...). Tost 90 % eus an dud en oad da vouezhiañ zo bet o votiñ dec'h. 55,5 % o deus lavaret "ya" evit ma vefe dizalc'h Montenegro. Sed un disoc'h a zo plijet da gentañ ministr Montenegro, Milo Djukanovic, a stourm abaoe pell evit ober eus Montenegro ur republik dizalc'h, evel m'eo deuet da vezañ Slovenia, Kroatia, Bosnia ha Makedonia goude brezel Yougoslavia. 3 000 enseller a oa er vro dec'h evit sellet a-dost ouzh an doare da aozañ ar votadeg. N'eus bet evezhiadenn ebet. Diouzh tu Serbia, n'eo ket ken laouen an dud rak gouarnamant Belgrad a oa kentoc'h a-du gant an unaniezh etre an div vro.

 

 

 

 

 

 

 

 

Frouezh ha krign-bev

 

 

Kant gwezh warn-ugent e vez lâret dimp eo ret debriñ frouezh ha legumaj fresk (da nebeutañ pemp pezh bemdez) a-benn gwareziñ hor yec’hed diouzh ar c’hrign-bev. Gant gwir abeg, hag ouzhpenn se, kuit da brenañ re a gig ha da zont lart evel un touseg ! Met peurliesañ e vez disoñjet lâret d’an dud eo leun ar frouezh ha ar legumaj-se a bestisid a gas krign-bev just a-walc’h ! Betek 27 louzaouiñ disheñvel a c’hell bezañ graet war un aval, hag 50% eus ar frouezh, legumaj pe edeier gounezet e Bro-C’hall a vez kavet pestisid enno. Neuze gwalc’hit anezho mat ha dibluskit anezho. Gwelloc’h c’hoazh, debrit legumaj bio prenet pe gounezet en ho jardin, hep louzoù kimiek evel-just!

Morwena Audic

 

Evit goût hiroc’h : http://www.pesticides-non-merci.com/index.html

 

 

 

 

 

 

 

 

Gouel sevenadur Breizh e Kawan

 

 

 Etre ar 16 hag an 28 a viz Mae e vo lidet sevenadur Breizh e Kawan. Kregiñ a raio ar gouel arc'hoazh da noz gant sonadeg Jean-Luc Roudot. Dimerc'her e vo lidet digoradur un diskouezadeg livadurioù, "Entre Paysages", e Ti an Arzoù da 6e30 noz. Peder livourez, Susan Eales, Dominique Odin, Brigitte Morin ha Cécile Roussel (skeudenn) a ginnigo o doareoù da welet maezioù Treger ha Goueloù dre o gwisponioù. En deizioù war-lerc'h e vo kinniget meur a abadenn : sonadegoù, baleadennoù, ur piknik, ur c'hlask-teñzor, kontadennoù, stajoù brezhoneg, festoù-noz... Tu a vo deoc'h kavout roll klok an abadennoù war lec'hienn Kenvodad Al Levrig.

 

Evit gouzout hiroc'h : Ti ar Vro Treger-Goueloù. Pgz : 02 96 49 80 55. http://www.allevrig.com.

 

 

 

 

 

 

 

 

Ur Vreizhadez e Kevre Kampioned Handball

 

 

Gant skipailh melldornerezed Viborg (Danmark) eo aet an trec'h evit Kevre Kampioned Handball 2006. Ar C'hrogad diwezhañ a oa etre merc'hed Viborg ha re Ljubljana (Slovenia). 20-21 eo bet an disoc'h, met skipailh Viborg a oa bet trec'h war hini Ljubljana, 24-22 en droiad krogadoù kentañ. O wareziñ pal Viborg abaoe 2003 emañ ar Vreizhadez Valérie Nikolaz, genidik eus Landivizio. E-barzh palioù skipailh Frañs Kib ar Bed 2003 e oa, pa oa bet trec'h skipailh ar C'hwec'hkorn. Aet e oa da Zanmark evit klask mont pelloc'h e kenstrivadegoù mell-dorn Europa.

 

 

 

 

 

 

 

 

4 étoiles

 

 

Frañs – 2005

Senario ha seveniñ : Christian Vincent

 

O paouez resev hêrezh ur voereb gozh emañ Fransou (Isabelle Carré). Petra ober gant 50 000 € ? Dillo e teu he respont d’ar plac’h : he seizh plijadur warn-ugent hep gortoz mui. Ha setu hi en ur palez e Cannes. An aotrou Stéphane (José Garcia) zo en ti ivez ha ne c’hell nemet sachañ evezh Fransou warnañ gant e zoareoù rust ha hoalus war un dro.Ur c’hwib eo Stéphane, evel m’eo dleet, met buan a-walc’h e vo touellet an toueller.

 

Levezon komediennoù amerikan ar bloavezhioù 50 (Kapra, Lubitsch) a samm ar sevener, Christian Vincent. Gwir eo ez anavezer al liv-se e 4 étoiles, met blaz ur film skinwel eus an dibab a glever kentoc’h eget hini sinema cheuc’h an Hollywood kozh (daoust da strivoù Isabelle Carré). N’eus abeg ebet d’ober penn-mouzh dirak ar film-se avat, fent a zo ha douget eo gant ur c’houblad aktourien a-feson. "Un triad aktourien" pa lavarin mat, ken kaer eo tudenn François Cluzet a adkaver amañ evel ma oa e Les apprentis (gant Pierre Salvadori, 1995).

 

Meriadeg Vallerie

 

 

 

 

 

 

 

 

The Black Heart Procession – The Spell

 

 

Embannet gant Touch and Go! / PIAS

Cheñchet o deus, met e gwirionez n’o deus ket cheñchet. Da lavaret eo ez eo heñvel 5vet pladenn ar strollad ouzh ar re gentañ, nemet e klever muioc’h an taboulinoù hag ar gitar tredan. A-hend-all eo rock ar bladenn, met rock gant piano, hag ur seurt rock a laka da soñjal en ur c’habared leun a dasmantoù hag o kouezhañ en e boull war un dro.

Gwir eo n’eo ket gwall laouen sonerezh ar strollad, ha neuze ? N’eus nemet selaou The Spell, To Bring You Back pe c’hoazh The Replacement, hag e komprener e c’haller renkañ The Black Heart Procession en ur rummad a gaver ennañ Tindersticks pe Nick Cave. Ar re a vefe plijet gant sonerezh a seurt-se a c’hallo gwelout The Black Heart Procession war al leurenn a-benn ar Gwener 2 a viz Even e Sant-Brieg, da-geñver Art Rock.

R.M.

 

Muioc’h a ditouroù : http://www.blackheartprocession.com/

 

 

 

 

 

 

 

 

Tartezenn Tatin gant sukrin ha mel lavand

 

 

Danvez : 1 sukrinenn 700 g pas re zarev, 200 g sukr, 100 g mel lavand, plusk un orañjezenn rasklet, plusk ur sitronenn rasklet (gwennit a-grenn 2 wezh*), 1 vazhig vanilha Bourbon, 100 g a doaz feilhennet, 150 g a  doaz sukret, 100 g amann.


Raktommit ar forn e 190 °C.

Troc’hit ar sukrin, skarzhit ar greun, troc’hit a dammoù, tennit ar plusk.

Lakait an tammoù sukrin da veleniñ en ur baelon gant un tammig amann. Poazhit war an daou du. E-giz-se ez aio chug ar sukrin kuit. Mirit a-gostez.

Ouzhpennit ur bannig dour hag ar sukr er baelon. Grit karamel melen. Diskennit ar mel, ar plusk orañjez ha sitron, gant ar pezh a zo e diabarzh ar vazhig vanilha.

Lakait pep tra en ur moull eouliet un nebeudig. Gwiskit gant ar c’haramel (d.l.e. ledit ar c’haramel war ar moull) ha laoskit da yenaat.
War ar meskaj-se, lakait ur gwiskad tammoù sukrin, hag ar vazhig vanilha.

Meskit an daou zoare toaz. Ledit e stumm ur rond, ha goloit ar pezh zo er moull. Lakait da boazhañ er forn e 190°C e-pad 20 pe 30 mn.

Servijit gant dienn Chantilly ha mel, dienn flour vanilhet pe dienn-skorn vanilh.

Katell Leon

 

*Gwennañ : soubañ un tamm boued en dour o virviñ (evit e naetaat, e vlotaat pe aesaat tennañ e blusk)