Lun 29 a viz Mae, niv.102
Sizhun 22 - 2006

Pellgargit ar pennadoù e stumm Word

Petra oa keleier Bremaik bloaz zo? Klikit amañ!

Evit distreiñ d'ar bajenn degemer

Manifestadeg ha Devezh ar brezhoneg

Disadorn, d'an 3 a viz Even ez eus bet roet emgav d'ar Vretoned e Roazhon gant Kuzul Sevenadurel Breizh. Pal an emgav-se zo bodañ ar muiañ ar gwellañ a dud evit diskouez e fell da Vreizhiz e vefe muioc'h a c'halloud gant ar Rannvro, e-keñver deskadurezh (brezhoneg, gallaoueg, istor), mediaoù (skingomz ha skinwel), sevenadur. Pouezañ ivez en-dro war unaniezh velestradurel Breizh ha kresk an demokratelezh lec'hel. Al lugan zo "lakaomp hor sevenadur da vleuniañ er vro".

Disadorn e krogo ivez trede Devezh ar brezhoneg e Karaez. Gellout a raio ar vanifesterien erruout evit ar sonadeg gant Calico, EV, Startijenn ha DJ Blue. D'ar Sul 4 eo e vo kinniget ar muiañ a abadennoù, gant ur vreutadeg diwar-benn plas ar brezhoneg er mediaoù, un oferenn, c'hoariva gant skolajidi Diwan Kemper, c'hoarioù hag abadennoù sport a bep seurt, standoù kevredigezhioù ha sonadegoù adarre (Jean-Luc Roudault, Jakez ar Borgn, Manu Lann Huel, Didier Squiban, Jacques Pellen & Alain Trévarin...). Klozet e vo an devezh gouel evit hor yezh gant ur fest-noz war tachenn Kerampuilh evel-just ! (Skolvan, Termajik...).

Manifestadeg : 2e30 goude-kreisteiz, plasenn Hoche, Roazhon. Evit gouzout hiroc'h : 02 99 87 17 65 (KSB) ksb.ccb@wanadoo.fr.

Devezh ar brezhoneg : adalek 2e goude kreisteiz d'ar Sadorn 3, adalek 10e30 d'ar Sul 4. Tachenn Kerampuilh, Karaez.

War ar maez hep karr-tan

Anat eo d’an holl bremañ : "n’eo ket posupl bevañ war ar maez hep karr-tan ebet". Hag e vez div wetur dre diegezh alies zoken. Padal abaoe kantvedoù e vez bevet war ar maez hep oto ha war an douar patatez-mañ ez eus ur bern tud a vev c’hoazh e mod-se. Petra zo cheñchet neuze? N’eo ket an amzer kaset da veajiñ bemdez hag a zo tost heñvel bremañ c’hoazh ouzh an hini kaset da veajiñ er ragistor, met kentoc’h tizh ar veaj ha an niver a gilometradoù (tost 30 km bemdez). Ha muioc’h-mui a otoioù zo war ar maez : abaoe ar bloavezhioù 70 e vez muioc’h a dud o kuitaat ar c’hêrioù evit a dud o tont da chom di, abalamour m’eo re ger an tachennoù eno, abalamour m’eo re saotret an aer ha peogwir e vez kavet bravoc’h skeudenn ar vuhez war ar maez. Met gant ar mod bevañ-se a implij kalz an otoioù e vez degaset distrujoù ha saotradur ivez (ar saotradur o deus c’hoant an dud da lezel pa’z eont kuit eus ar c’hêrioù...) : flastret e vez gant ar c’hirri muioc’h a loened war an hentoù evit na vez lazhet gant ar chaseourien, kement a vont-dont a brodu gaz efed ti-gwer, diskaret e vez parkoù pe garzhoù evit lakaat bitum an hentoù nevez hag a zifenn ouzh an dour a vont en douar da vagañ ar rouedad-dour dindan, kollet e vez ar “servijoù” er bourc’hioù bihan pa ya an holl dud pelloc’h gant o oto... Ma vefe implijet kirri-tan er bed a-bezh e-giz e-barzh broioù ar C’hornôg e vefe 6 gwezh muioc’h a otoioù war hor planedenn. Un nebeud tud e-giz ar gevredigezh “Cyclâne” a glask cheñch penn d’ar vazh oc’h ijinañ doareoù nevez da vevañ war ar maez hep oto : implijout beloioù pe azened evit mont da brenañ an defaotachoù, adkreizennañ buhez an dud e-lec’h emaint o chom, difenn an otoioù a vont e bourc’hioù zo. Evit poent n’int ket niverus. Met kenderc’hel a raio priz ar petrol da greskiñ...

Morwena Audic

Evit goût hiroc’h : http://cyclane.decroissance.info

Gouel c’hoariva Penn-ar-bed

Emgavioù departamant ar c’hoariva a vo aozet gant Ti ar c’hoariva e Brest, etre ar 1^añ hag ar 4 a viz Even, war pevarzek kumun disheñvel e Penn-ar-bed. Kregiñ a raio en Erge-Vras gant ar pezh "Opéra panique" gant Alejandro Jodorowsky hag ar gompagnunezh "Je Savoir Dire". Tro a vo da welet pezhioù-c’hoari a bep seurt, doare drama kement ha komediennoù, evel "Les Autres" gant Jean-Claude Grimberg, c’hoariet gant Mouvance Cazilim hag "American Buffalo" skrivet gant David Mamet ha kinnniget gant "L’entonnoir théâtre" eus Brest. Ne vo ket disoñjet an oberennoù klasel gant pezhioù Molière pe c’hoazh "Fin de partie" gant Samuel Beckett. Krouidigezhioù a-stroll a vo tu da zizoleiñ ivez, da skouer, gant ar strollad "La belle aventure" a c’hoario "Seule dans la ville" e sal ar Stella e Lambezelleg. An dañs a vo perzh eus an abadennoù-se gant "Métamorphoses" savet diwar un destenn gant Kossi Effou ha leurennet gant Bleuduciel. Ha d’ar 4 a viz Even e vo aozet ul leurenn-digor e Kastellin.

Hoel Louarn

Evit gouzout hiroc’h : 02 98 47 33 42

550 kilometr evit Handibreizh

130 marc'hhouarner a-youl vat o deus ruilhet a-hed devezhioù disadorn ha disul evit "tro Breizh" Handibreizh. Un droiad 550 kilometr zo bet graet ganto etre Mêl-Karaez, Ploheg, Monkontour, Kever, Komborn, Ar Peniti, Anast, Gazilieg, Malastred, Pont-Skorf, Pont-Aven, Konk-Kerne, Rosporden... Aozet e vez an degouezh abaoe meur a vloaz gant ar gevredigezh Handibreizh ha gant skoazell an Urapei (Union régionale des amis et parents de personnes handicapées) ha Kevre gall an touristañ war varc'hhouarn. Gant an droiad war varc'hhhouarn-mañ e vez dastumet arc'hant evit gwellaat hag aesaat buhez bugale nammet hag o familhoù.

Evit gouzout hiroc'h : http://www.adapei35.com/agenda/handibreizh2006.htm

Da Vinci Code

Stadoù-Unanet – 2005

Seveniñ : Ron Howard

War lerc’h un torfed eo pedet Robert Langdon (Tom Hanks), ur arbennigour war an arouezioù, gant ar poliser Fache (Jean Reno). Al Louvre eo al lec’h, ha sinoù kevrinus zo e leizh tro-dro d’an den muntret. War Langdon eo lakaet an diskred, ha gant sikour Sophie Neveu (Audrey Tautou) e vevo troioù-kaer o klask diskoulmañ ur gudenn a c’hellfe stroñsañ diazezoù hor sevenadurezh.

Trouz zo bet e Landerne gant azasadenn levr Dan Brown, e-giz ma lavarer e galleg. Kalz a drouz evit netra a lavarfen-me. Un doare c’hoari klask ar roudenn (jeu de piste) a arvester e-pad 2 eurvezh 32 (hep kontañ un hanter eurvezh bruderezh), met n’eo ket ken kevrinus hag e rankfe bezañ evit dedennañ ar spered. N’eo ket gwall soutil ar film dreist-holl, ha diaes eo teurel kred war troioù-kaer an tudennoù koulz ha war danvez an istor. Ur c’hoari klask ar roudenn a ya dreist ar roudenn sañset met ne laosko roud ebet e danevelloù ar sinema.

Meriadeg Vallerie

Evit gouzout hiroc’h : http://www.davincicode-lefilm.fr/

Astropolis 12

Etre an 3 hag ar 6 a viz Eost e Brest

Daou abeg a oa evit mont d’ar Vauban d’ar 24 a viz Mae. Da gentañ abadenn The Wedding Present, unan eus strolladoù karetañ John Peel. Dreist eo bet an abadenn. Da heul ez eus bet kinniget programm Astropolis gant ar skipailh a ra war-dro. Brudet eo Astropolis evit bezañ e-touez ar gouelioù gwellañ gouestlet d’ar sonerezh elektronek.

Diposupl eo menegiñ an holl strolladoù/arzourien pedet er bloaz-mañ, setu memestra un nebeud anvioù a rankfe reiñ c’hoant deoc’h mont d’ober un tamm tro betek maner Keroual : T. Raumschmiere, Ellen Allien + Apparat (da zont bremaik, amañ, ur renta-kont eus o fladenn), The Infadels, Final Fantasy, hag evit an nozvezh diwezhañ : Vitalic, Tiga, Erol Alkan ha Birdy Nam Nam. A bep seurt traoù a vo ivez er Passerelle (kreizenn arzoù a vremañ), film ar Beastie Boys a vo tu da welout ivez, hep disoñjal ar Mix’ n ‘ Boules war blasenn Guérin, hag an Astroboum (digoust) evit ar vugale.

R.M.

Muioc’h a ditouroù : www.astropolis.org

Kafe kult'

E-barzh unan eus tiez koshañ Naoned (15^vet kantved), bet Ofis an Touristerezh gwezhall, e kaver un davarn-preti eus ar re vravañ. Kinklet-kaer eo : treustoù koad lakaet war-wel, karelligoù gwer-livet ouzh ar prenistri… Ar c’hontouer koad kizellet zo dibar ivez. Livioù tomm a gaver ha koad-tout eo an arrebeuri ! Ouzhpenn-se e vez degemeret diskouezadegoù livadurioù alies. An degemer zo plijus ha simpl. Hegarat eo ar perc’henn (ha drol un tamm ivez). Ur roll-meuzioù 17 € a c’heller kaout da verenn ha da goan (un digor-pred + ur meuz pe ur meuz + un dibenn-pred). An doare keginañ zo soutil hag awenet. Meskañ a ra produioù ar vro gant temzoù ha legumaj dic’hortoz. Da dañva dre ret : al lipouzerezh avu-druz (un tamm avu poazhet lakaet war un tamm bara-mel – graet ganto – gant ur soubilh diwar mel hag ur bern temzoù all, ur voem…), kig-konikl miñset, koñfizet er Muskadig ha kleret gant limaioù (servijet gant yod patatez dous, hag ur bern legumaj all miñset…). Ouzhpenn, ar gwin kinniget zo eus ar c’hentañ. Ma ’pez tro da dremen dre al lec’h-mañ, grit ! Sonadegoù a vez ivez ha didjeoù ur wezh ar sizhun.

Katell Leon

Evit gouzout hiroc’h : www.lecult.com