Lun 7 a viz Mae, niv.144
Sizhun 19 - 2007

Pellgargit ar pennadoù e stumm Word

Petra oa keleier Bremaik bloaz zo? Klikit amañ!

Evit distreiñ d'ar bajenn degemer

Ur prezidant zo bet dilennet

An disoc'hoù zo bet sklaer ha fraezh: dilennet eo bet Nicolas Sarkozy evit dont da vezañ 6vet prezidant 5vet Republik Frañs. 53,06% eus ar voterien o deus roet o mouezh dezhañ, p'o deus votet 46,94% anezho evit Ségolène Royal. Kregiñ a raio prezidant da zont ar Republik gant e garg nevez d'ar 16 a viz Mae. E Breizh eo tost ar memes sifroù a gaver... met en tu kontrol. Embannet e oa bet dec'h da noz an votoù breizhat war Agence Bretagne Presse : 52,68% eus ar mouezhioù breton zo aet gant Ségolène Royal, pa ya 47,32% gant Nicolas Sarkozy. Niverus eo bet adarre ar Vretoned o vont da vouezhiañ: 87,25% eus ar Vretoned enskrivet zo bet er burevioù votiñ (83,97% er C'hwec'hkorn). 4,2% o deus votet gwenn (4% er C'hwec'hkorn). Evel en dro gentañ emañ an holl departamantoù eus an tu kleiz war-bouez ar Mor-Bihan, met n'eo ket ken splann an disparti (51,12% evit Sarkozy, 48,88% evit Royal). En Aodoù-an-Arvor he deus graet danvez-prezidantez ar PS ar muiañ a verzh gant 55,53%. Er c'hêrioù o deus votet ar Vretoned kentoc'h evit ar PS, hag e Roazhon e pign an dregantad betek 62,71%. Tu zo da lâret ne glot ket doare mouezhiañ ar Vretoned gant hini ar peurrest eus ar C'hwec'hkorn. Gwelet e vo hag-eñ ez ayo war ar memes hent mouezhiadeg ar gannaded a vo e miz Even.

Dec'h da noz e oa bet tud dilaouen gant dilennadur Sarkozy e penn ar Stad o plantañ reuz e Brest, Naoned ha Roazhon.

Evit gouzout hiroc'h :

www.agencebretagnepresse.com

Europa hag an treloskoù "glas"

E miz Genver 2007 e oa bet kinniget gant Bodad Europa ur strollad oberoù da gas da benn, a-benn lakaat eztaoladennoù gazoù un efed gor ganto da zigreskiñ eus 20% a-benn 2020. Evit se eo dav ober gant 20% a energiezhioù propr d'an nebeutañ, an hanter diouto d'an nebeutañ o vezañ treloskoù "glas".
Met burutelladennoù taer a vez kavet, e metoù an ekologourien, a-enep an treloskoù a reer "glas" anezho. Ur sinadeg a zo bet kinniget zoken evit ma vefe paouezet d'ober ganto.
An holl dud engouestlet e-barzh ar sujed a c'hell reiñ o ali: labourerien ar Stad, embregerezhioù, kevredigezhioù... Pevar goulenn zo savet gant Bodad Europa evit e enklask : penaos sevel ur sistem treloskoù glas a c'hellfe padout pell? Penaos diwall diouzh levezon an treloskoù "glas" war implij an douaroù? Penaos brudañ implij treloskoù "glas" efedusoc'h? Petra ober e mod all evit tizhout 10% a dreloskoù "glas"?
A-raok ar 4 a viz Even eo dav reiñ e ali, m'ho peus un dra bennak da lavarout.

M.M.

Ar sinadeg hag arguzennoù a-enep an treloskoù "glas":
www.moratoire-agro-carburants.com
Evit reiñ un ali diwar-benn an treloskoù "glas" :
TREN-BIOFUELS-CONSULTATION@ec.europa.eu
Lec'hienn an enklask :
ec.europa.eu

C'hoariva ha Video e staj KEAV

E-pad an hañv e kinnigo Kamp Etrekeltiek Ar Vrezhonegerion e 60vet staj. Div sizhunvezh a vo, etre an 8 hag ar 14 a viz Gouere, hag etre ar 15 hag an 21 a viz Gouere, e Skaer.

Nevezinti a vo, gant rummadoù kentelioù war ar c'hoariva hag ar video. Er bloaz-mañ, e-kerzh ar sizhunvezh kentañ, e vo kinniget ur rummad kentelioù c’hoariva brezhonek, gant Bob Simon, komedian a vicher. Kentelioù war implij ar video a vo kinniget e-pad an eil sizhunvezh. Un doare da studiañ hag ober gant ar brezhoneg dre zeskiñ teknikoù diazez. Kaset e vo ar programm resis gant an aozerien d’an dud dedennet.

E diavaez ar c'hentelioù e vez bevet e brezhoneg a-hed ar sizhun. Un doare da vont war-raok buan-tre ha d’en em voazañ d’ober gant ar brezhoneg a-hed an amzer. Evit lakaat e anv eo ret gouzout un tamm brezhoneg eta, bezañ studiet ar yezh e-pad bloaz pe zaou da vihanañ.

Evit gouzout hiroc'h :

K.E.A.V., 22 hent Mouliouen, 29000 Kemper. Pgz: 02 98 95 59 31.

Postel: keav@wanadoo.fr.

www.keav.org

Plijadur o redek daou ha daou !

D’ar Meurzh 1añ a viz Mae e oa aozet e Kemper un darvoud dibar: ur redadeg dre goublad! Pal "Elle et lui" a oa lakaat paotred ha merc’hed da genstrivañ a-gevret ha gant plijadur war un hentad 9600 metr. Tizhet eo bet ar pal gant ar C’hemper Atleterezh, ar c’hleub aozer.

Kalz a dud a oa bodet war parklec’h Carrefour da zevezh Gouel al labour. 264 koublad o deus kemeret perzh er redadeg, dispar evit un taol kentañ! "Ne oan ket o c’hortoz un taol ken kaer, eme Christophe Falligon pennaozer an abadenn, d’ar muiañ tout e welen 200 koublad o kemer perzh. Dibaseet omp bet gant an darvoudoù!". Plijadur zo bet a-hed ar redadeg o tremen dre hentoù bihan, oc’h heuliañ ar stêr Oded hag o vezañ kalonekaet gant an arvesterien niverus. Ar c’hlasamant ne oa mui nemet un dra a eil renk evit an darn vuiañ. Memestra eo bet prim ar c’houblad trec’hour, -Hasna Taboussi ha Sylvain Gourvelleg eus ar C’hemper Atleterezh- lonket ganto an hed e 36 munutenn. Ur bern prizioù a oa dasparzhet e fin ar striv ha pep hini a gave e lod. "Distreiñ a raimp, plijus eo ar mennozh!" a veze klevet alies ha setu ma ouzhpenne an aozer: "Adaozet e vo ar redadeg er bloaz a zeu …met gwelloc’h!"

Kenan an Habask

Love and other disasters - Love (et ses petits désastres)

Stadoù-Unanet – 2005

Senario ha seveniñ : Alek Keshishian

E metoù gizioù chik ha cheuc’h Londrez e labour Jacks (Brittany Murphy). Tremen a ra hec’h amzer o c’hoari ar bazhvalan evit he mignoned tostañ: Peter (Matthew Rhys), he c’henfeurmer heñvelreviat, ha Talullah (Catherine Tate), un arzourez diroll. Met buhez trivliadel Jacks eo an hini reuzusañ moarvat: ne oar ket troc’hañ gant he dousig-koant bet. D’ar mare-se e teu ul luc’hskeudenner arc’hantinat eus ar re hoalusañ da labourat e skipailh Jacks; eviti n’eus ket da dortal, hemañ eo dres an doare paotr a zere ouzh... Peter.

Adalek ar penn kentañ e tispak fraezh Love gant peseurt doare film eo levezonet: komediennoù romantel saoz (Four Weddings and a Funeral 1994, Notting Hill 1998) hag amerikan (Breakfast at Tiffany's, 1961). Brav a-walc’h e teu gant Alek Keshishian e-skoaz an oberennoù-se: dudius-kaer eo an tudennoù ijinet gantañ, ha Brittany Murphy a zeu a-benn da drelatañ ar c’hamera. Un abadenn fentus ha plijus eo e gwirionez, met gwall dev eo an treuzkomprenoù a ya d’ober steuñvenn an istor siwazh. Love n’eo ket gwirheñvel ha diaes eo en em anavezout ennañ, ar pezh a zo nec’hus memes tra pa embann an tudennoù eo ret talañ ouzh gwirvout an darempredoù karantez.

Meriadeg Vallerie

Evit gouzout muioc’h: www.europacorp.com

Magazine –

Real Life / Secondhand Daylight / The Correct Use of Soap

Adembannet gant Virgin

Abaoe un nebeud bloavezhioù e teu war wel strolladoù a embann bezañ bet levezonet gant ar sonerezh post-punk (1978-82). Tabutal a c’haller evit a sell ouzh o doare(où) da verañ an hêrezh-se. Ha setu ma teu er-maez en-dro pladennoù Magazine, ur strollad bet krouet e 1978 gant Howard Devoto goude m’en dije kuitaet The Buzzcocks. N’emaomp ket neuze e-touez tud yaouank, met gant krouerien an doare seniñ-se.
Gantañ tri soner all: ur gitarour, un tabouliner, ur soner piano tredan ha Barry Adamson (a sono goude-se gant Nick Cave) gant ar gitar boud. Ur skipailh a-feson neuze, evel ma c’haller klevout war o fladenn gentañ, hag adalek he fenn-kentañ: Definitive Gaze a ziskouez da belec’h e fell d’ar strollad mont: mirout nerzh ar sonerezh punk hag elfennoù eus an art rock (Roxy Music, David Bowie). Tonioù all evel The Light Pours Out of Me pe Shot by Both Sides a zo ivez skouerioù eus arz ar strollad. Ken dedennus all eo Secondhand Daylight pe The Correct Use of Soap.

An teir fladenn gentañ bet savet ganto etre 1978 ha 1980 a zo o paouez bezañ adembannet, pep hini anezho gant peder c’hanaouenn ouzhpenn. Un digarez evit splujañ da vat e sonerezh penn-kentañ ar bloavezhioù 1980.

R.M.

Kregin Sant Jakez gant avaloù

Danvez evit pevar den: 12 bouedenn Sant-Jakez – 4 aval – serfilh – 40 g amann disall – 10 g amann damsall – poultr kanell– eoul olivez – pebr hag holen

Dibluskit an avaloù ha troc’hit anezho a-dammoù. Lakait an hanter da goazhañ evit adtapout ar chug. Silit ar chug. Ouzhpennit an amann disall, pebrit hag holenit.

Lakait ar bouedennoù Sant-Jakez da boazhañ en ur baelon, 2 mn a bep tu. En ur baelon all, lakait an avaloù a chom da fritañ e-barzh an amann damsall.

Lakait 3 bouedenn war pep asied (raktommet), diskennit ar chug avaloù warno, lakait an tammoù avaloù tro-dro ha poultrennit gant ar c’hanell hag ar serfilh. Servijit diouzhtu.

Mari Lubrano