Meurzh 10 a viz Ebrel, niv.140
Sizhun 15 - 2007

Pellgargit ar pennadoù e stumm Word

Petra oa keleier Bremaik bloaz zo? Klikit amañ!
Evit distreiñ d'ar bajenn degemer

Un den yaouank gloazet gant un tenn:

ur poliser-kêr eus Loudieg tamallet

Dec'h eo bet tamallet ur poliser-kêr eus Loudieg, 38 vloaz, evit "feulster mennet gant un arm gant unan bennak fiziet ennañ ur beli publik". Gloazet e oa bet ur paotr a 17 vloaz en nozvezh etre digwener ha disadorn. Gwelet e oa bet ur strollad tud yaouank gant poliserien a oa o troiata e kêr Loudieg. Soñjal ar rae d'ar gargidi e oa an dud yaouank o klask laerezh ur skouter. Aet int d'o gwelet hag un tabut feuls en defe kroget neuze. Skoet e vefe bet gant unan eus ar boliserien (a rank chom hep labourat e-pad daou zevezh). An eil poliser en defe lavaret d'an dud yaouank paouez. Tennet en deus gant e arm. Unan eus ar baotred yaouank zo bet gloazet d'e skoaz. Kaset e oa bet da ospital Pondi lec'h m'emañ c'hoazh hiziv. Anavezet e oa war a seblant gant servijoù polis ar gêr. Tamallet ar poliser, chom a raio dieub dindan evezh. N'en deus ket ar gwir ken da gaout un arm ha da droiata e kêr. Gant archerien Loudieg eo bet boulc'het un enklask. Loudieg zo unan eus an nebeud kêrioù a ro aotre da gaout armoù d'o foliserien. Gant an afer-se e sav tabud war stummadur ar boliserien-kêr hag implij an armoù koulz.

Ar produioù OGK 4:

alergiezhioù ha mirout roud

Perak eo ken pouezus e vefe kelaouet an dud ma'z eus produoù OGK e-barzh o voued ?
Pal an teknologiezhioù kemm genoù a zo treuzborzhañ ur gen eus ur spesad d'unan all. Evel-mañ e c'heller kavout gen ur pesk e-barzh ur sivienn, pe hini ur pemoc'h en un domatezenn. Ar genoù-mañ a ro urzhioù evit krouiñ proteinoù arbennik d'ober un dra bennak. Er produoù O Genoù Kemmet e kaver neuze proteinoù o tont eus spesadoù na vezer ket boaz da zebriñ, lod na anavezer ket, h.a. Ha posupl eo e vefe tud zo klañv gant ar proteinoù-mañ? Meur a riskl a zo : n'ouzer ket re vat penaos ez eont holl en-dro en hon korf. Unan eus ar c'hudennoù pennañ a denn ouzh an alergiezhioù. Ma vez merzet un alergiezh goude bezañ debret produoù OGK, n'eo ket diaes neuze diouganiñ a belec'h e teu ar gudenn. Posupl eo neuze tennañ ar re-se ouzh ar stalioù, da skouer. Met, ma n'eo ket skrivet sklaer war ar pakadoù boued, e vo dibosupl neuze gouzout, hag e kendalc'ho ar produoù OGK da vezañ gwerzhet, da reiñ alergiezhioù d'an dud, hep ma c'hallfer gouzout pere a ra petra.

M.M.

Gouel ar bannoù-treset e Perroz-Gireg

D'ar 14 ha d'ar 15 a viz Ebrel e vo aozet Gouel ar Bannoù-treset e Perroz-Gireg. An holl doareoù bannoù-treset a vo kinniget gant ar BT gwirvouder, avañtur, fent hag ar mangaioù japanat. Un tregont arzour bennak a zo pedet ha Willy Lambil a vo enoret er bloaz-mañ. Hemañ en doa savet "Sandy hag Hoppy" e 1959 a oa bet embannet e-barzh Spirou ha kendalc'het gant "Les tuniques bleues" e 1972 pa oa marv an tresour Louis Salvérius. Krouet en deus ivez an dudenn "Pauvre Lampil" e 1973 a ginnig buhez pemdeziek un tresour bannoù-treset.

Evit ar BT gwirvouder e vo degemeret, e-mesk lod all, Steve Cuzor, skrivagner ha tresour, a orin deus Roazhon, hag an dresourien Olivier Berlion ha Jaap de Boer, anavezet ivez dindan an anv Obi Yamoto evit ar mangaioù. Evit ar fent eo bet pedet André Bibeur-Lu, Guillaume Bouzard, Eric Cartier, Philippe Larbier hag André Lamorthe. En anv an Heroic Fantasy e vo tu kejañ gant Didier Crisse, Manu Grey ha Nicolas Mitric hag Algesiras, Jenny, Patricia Lyfoung ha Philippe Ogaki da geñver ar mangaioù. An dud yaouank a c'hello daremprediñ Emile Bravo, Cécile Brosseau, Tatiana Domas, Loïc Jouannigot, Guillaume Le Goupil, Julien Neel ha Yoann. Anv deus mediaoù a vo ivez gant an dresourien kazetennoù Gérard Clam, André Morvan, Tassuad ha Loïc Schwartz.

Ouzhpenn kejañ ganto ha lakaat sinañ o levrioù e vo kinniget diskouezadegoù. "Ar vuhez e glas" gant Willy Lambil, "Beaj mor en amzer dremenet" gant Tramp, "Quintett" gant Franck Giroud ha "La côte de granit ose" gant tresadennoù lankon an arzourien pedet.

Hoel Louarn

Mont-tre: 3,5 euro un devezh, 5 euro an dibenn-sizhun, digoust dindan 6 vloaz.

Evit gouzout hiroc'h: www.bdperros.com

Aet ar maout gant un Arc'hentinad

e redadeg mirc'hi-houarn Koln

Laouen bras eo ar reder arc'hentinat Juan Jose Haedo, perzhiad er skipailh danat CSC. Ar c'hentañ gwech eo evitañ tapout ar maout en ur redadeg aozet en Europa. Dec'h e oa bet aozet 92vet Tro Koln (kornôg Alamagn) war varc'h-houarn. 203,2 km a oa d'ober, hag e-pad ur pennad bras e oa skipailhoù ar sprinterien aostralian hag italian Graeme Brown hag Alessandro Petacchi e penn ar jeu. Ne chome ken nemet 300 metrad a-raok al linenn pal p'eo bet souezhet Petacchi gant Brown, ha tapet hemañ d'e dro gant an Arc'hentinad. E 4e 50' 09" eo bet graet an hent tro-dro da gêr Koln gant Juan Jose Haedo.

300

Stadoù-Unanet Amerika - 2006

Seveniñ : Zack Snyder

Emgann an d-Termopiled eo a vez taolennet er film-mañ. Un emgann a dremenas e 480 kent J.K. Leonidas, e-penn ur bagad 300 Sparsiad, a glaskas talañ ouzh Xerxes hag an arme persian.

Labourioù Frank Miller a zedenn kalz Hollywood er mare-mañ (Sin City). Ur “romant grafel” eo er penn kentañ. Kalzig trouz en deus graet ar film, ne oa ket tu da chom neptu sañset: pe dreist ar skeudennoù pe spontus danvez ar film. Met n’eo ket ken eeun an traoù. Evel-just ez eo brav skeudennoù ar film, met n’int ket sin ur sinema arnevez: hegasus eo zoken a-wechoù an oabl orañjez hag ar santad gwelet ur Gladiator un tammig lu. Dic’houzañvus eo ardoù Leonidas (Gerard Butler), souezhus bras Xerxes an tiran doare drag-queen gant mouezh Dark Vador... Implij ar vouezh off a zo iskis a-walc’h ha tudenn ar rouanez (moarvat an hini dedennusañ en istor) a seblant bezañ savet evit ma vefe un tammig melo er film ha lakaat an nebeud merc’hed er sal da leñvañ goude kement a wad skuilhet. Frankizour betek-re e tason lod komzoù ha lavarennoù. Ur film leun a sioù neuze, paour a-walc’h ha difrom penn-da-benn.

G.L.

Kement ha gouzout hiroc’h : wwws.warnerbros.fr/300

Bastet

Disoñjal, e-pad ur pennadig, strolladoù ar Stadoù-Unanet, Bro-Saoz pe Alamagn ha distreiñ da Vreizh. Bastet, neuze, pe unan eus ar strolladoù doare indie (evel Calibistrixe pe Frigo) a gaver kostez Kemper. Bastet pe pevar den, ur bezañs kreñv war al leurenn, tonioù eeun a denn d’ur seurt folk klañv/siferniet, pe d’ur rock evel ma oar Amerikaned zo ober (Grandaddy, Spoon, The Black Heart Procession…): prantadoù sioul, re all stegnoc’h. Ma: gouzout a reont sevel kanaouennoù, petra! Ma n’och ket sur, selaout The Hunter, Olympia pe c’hoazh New Mike.

E Bro-Gemper just a-walc’h, ez eus bet tu da welout anezho meur a wech er mizioù tremenet : e-pad gouel les Hivernautes, en tavarnioù er Vro-Vigoudenn, ha n’eus ket ken pell-se o deus gounezet taol-lañs an Erer Yaouank e Pont-'n-Abad.

Penn-kentañ ar berzh? Posupl-tre, dre ma vo tu gwelout anezho ivez e-pad gouel Rock’n Solex e Roazhon e miz Mae, pe c’hoazh er Run ar Puñs e Kastellin.

O fladenn gentañ (pa ne oa nemet tri den er strollad) a c’haller kavout e Leclerc sevenadurel Kemper. Un tanva eus o zonioù, un ton sonet live e-pad Les Hivernautes ha deizadioù o abadennoù a gaver ivez war o fajennad Myspace.

R.M.

www.myspace.com/bastetmusic

Kiwi farset

4 c’hiwienn – 1/2 benn sitroñs – 50 g kig krank – 50 g chevr – 2 loaiad vras maionez – pep hag holen - paprika

Tennit beg ar c’hiwi ha goulloit pep frouezhenn. Troc’hit bouedenn pep frouezhenn a-dammoù. Bruzunit ar c’hig krank, troc’hit ar chevr a-dammoù bihan. Gwaskit an hanter sitroñsenn. Meskit mat an holl aozennoù asambles. Ouzhpennit ar maionez gant paprika. Gwarnisit ar c’hiwi goullonderet gant an aozad. Lakit er yenerez a-raok servijout.

Mari Lubrano