Lun 10 a viz Ebrel, niv.95
Sizhun 15 - 2006

Pellgargit ar pennadoù e stumm Word

Petra oa keleier Bremaik bloaz zo? Klikit amañ!
Evit distreiñ d'ar bajenn degemer

 

 

 

 

 

 

 

 

 

 

 

 

Echu gant ar CPE

 

 

N'eus ket ken eus ar Gevrat Implij Kentañ (CPE). Echu eo, divizet eo bet er beure-mañ. Eizhvet meneg lezenn an "ingalder a chañs" zo bet kemmet da vat, n'eus ket anv ken eus ar GIK ennañ. Lakaet e vo en e blas peadra da skoazellañ ar re dindan 26 vloaz o deus ar muiañ a ziaesterioù da gavout ul labour. Un danvez-lezenn a ranke sevel prezidanted an UMP er Vodadenn Vroadel hag er Sened, Bernard Accoyer ha Josselin de Rohan. Disklêriet en deus ar C'hentañ Ministr Dominique de Villepin e oa dipitet ne vefe ket bet komprenet e raktres gant an holl.

Evit ar sindikalourien hag ar studierien o deus stourmet a-enep ar GIK e-pad daouzek sizhunvezh ez eo un trec'h splann. D'an 28 a viz Meurzh ha d'ar 4 a viz Ebrel e oa deuet a-benn an daouzek sindikad da lakaat tri milion a dud da zibunañ evit ma vefe torret ar GIK. En em vodañ a raio dileuridi ar sindikadoù goude-merenn, evit prederiañ war al labour da gas war-raok er sizhunioù da zont. Disac'het e vo an holl skolioù-meur hiziv neuze, sañset.

 

 

 

 

 

 

 

 

Pask e Cherbourg a-enep an E.P.R

 

 

Ugent vloaz goude gwalenn spontus Tchernobyl (e miz Ebrel 1986) ez eus bet lakaet war ar stern gant Bro-C’hall ur raktres kreizenn nukleel nevez e kêr Flamanville e Normandi, diwar an teknologiezh E.P.R. Hervez an aozadurioù a gas an nukleel war-raok eo ret reiñ lañs d’ar raktres-se : war goshaat ez a an holl greizennoù nukleel ha dav eo studiañ teknologiezhioù nevez a-benn neveziñ anezho a-raok 2010, bevezet e vo muioc’h-mui a dredan hag ezhomm ez eus eus an nukleel evit stourm ouzh an efed ti-gwer. Un dielfennadur a vez taget taer gant ar c’hevredigezhioù a-enep an nukleel.

Da gentañ a c’hello ar c’hreizennoù a zo bremañ padout aes betek 2025 pe diwezhatoc’h c’hoazh hag an EPR n’eo ken met stumm arnevez un teknologiezh kozh. Neuze e vo diamzeriet buan-tre ar c’hreizennoù-se a-fed surentez hag efedusted. Da eil, ret eo stourm a-benn ma vo dispignet nebeutoc’h a dredan e-lec’h broudañ an dud d’ober gantañ a-giz ma ra EDF (muioc’h-mui a dommerezioù tredan a vez implijet da skouer). Ha da drede, n’eo ket renket tamm ebet afer al lastez skinoberiant hag a zo ken gwazh hag an efed ti-gwer. Ouzhpenn se e rebechont an doareoù kevrinus ha luziet a ren war an dachenn-se ken ma vez start d’ar sitoaianed sevel o mouezh pe bezañ titouret. Abalamour da se e vo aozet ur vanifestadeg vras a-enep raktres Flamanville d’ar Sadorn 15 a viz Ebrel e Cherbourg.

Morwena Audic

Kement ha goût hiroc’h : http://wwwsortirdunucleaire.org

 

 

 

 

 

 

 

 

Skeudennoù Breizh en 19vet kantved

 

 

Kinniget e vo gant Mirdi ar Faoued ouzhpenn 130 luc'hskeudenn ha skeudenn, bet graet e-kerzh an 19vet kantved, e Breizh. Mont war roudoù istor al luc'hskeudenniñ hag ar piktorelezh e Breizh eo pal an diskouezadeg. Tu vo da welet labourioù luc'hskeudennerien gentañ ar vro koulz hag ur rummad skeudennoù "touristel" brudet-tre e fin an 19vet kantved. Displegañ a reer en diskouezadeg diaesterioù teknikel al luc'hskeudennerien hag o freder arzel ivez. Labourioù luc'hskeudennerien zo a vo lakaet en a-raok, en o zouez Adolphe Victor Piriou.

Diskouezadeg kinniget etre ar 1añ a viz Ebrel hag an 8 a viz Mae 2006.

 

Mirdi ar Faoued, 1 straed Kemper 56320 Ar Faoued. Pgz : 02 97 23 15 27. Digor bemdez etre 10e ha 12e hag etre 14e hag 18e.  musee.du.faouet@wanadoo.fr.

 

 

 

 

 

 

 

 

Mell-droad : an trede plas evit skipailh Roazhon

 

 

Evit 34vet devezh Kevre 1 mell-droad Frañs eo aet skipailh Roazhon da dapout trede plas ar renkad, goude e drec'h war Sochaux (2-1) dec'h, e Stad hent an Oriant, an daou boent bet tapet gant Kim Källström. Chom a ra Lyon (75 poent gant ur c'hrogad dale) ha Bourdel (61 poent gant ur c'hrogad dale ivez) er c'hentañ hag en eil plas, pell dirak skipailh Laszlo Bölöni (56 poent). Mont a raio hep dale skipailh Lyon da vezañ Kampion mell-droad Frañs evit ar pempvet gwech da heul.

Emañ ar re ruz-ha-du o heuliañ un hent n'o deus ket bet tro da welet alies : setu bremañ eizh krogad gounezet diouzh renk. Ma teu a-benn Roazhon da chom en trede plas e vo tu d'ar skipailh kemer perzh en trede tro evit danvez-perzhidi Kevre ar Gampioned.

Naoned zo 14vet e renkad ar C'hevre 1 gant 41 poent ; trec'h eo bet war skipailh Strasbourg (0-1) en dibenn-sizhun-mañ. An Elzasiz zo bremañ e penn izelañ ar renkad gant skipailh Ajaccio ha Metz.

 

 

 

 

 

 

 

 

Serko

 

 

Frañs – 2002

Senario ha seveniñ : Joël Farges

 

Pell-pell diouzh Sant-Petersbourg, war lez ar stêr Amour emañ an Enveked, henvroiz al lec’h, o vevañ asambles gant ar gKozaked o deus touet e vefent leal da Rusia Santel. War zigarez ezhommoù an impalaeriezh e klask trafikerien kaout kezeg bihan an Enveked a zo ken pouezus e kevredigezh ar re-mañ. Gant marc’h glas ur mignon drouklazhet ez ergerzho Dimitri (Alexei Chadov) an 9 000 kilometrad a zo alese da Sant-Petersbourg evit difenn an Enveked dirak Tsar Rusia.

Henvroidi un tres indian warno, ur marc’heger kalonek o vale e-unan, dremmvroioù frank, kement-se a ro da soñjal er western evel-just. Ur western mod ar Reter ; ur seurt "eastern" e vefe neuze evel ma oa bet graet eus Himalaya (1999). Tennañ a ra Serko kalzik d’un teulfilm antropologour ivez, hag aze emañ e vrasañ talvoudegezh. Amzer en deus kemeret Joël Farges da studiañ pobloù ar broioù-se evit gwir. Siwazh tuioù gwan zo gant ar seveniñ ha dreist-holl ez eo torr-penn e vefe bet ken kreñv ar youl d’ober ur film evit an holl hag evit ar vugale da gentañ (ar vouezh-off a zo bugelel betek re).

Meriadeg Vallerie

 

 

 

 

 

 

 

 

The Chalets – Check In

 

 

Embannet gant Setanta/V2

           

Cheñch, a-benn ar fin ! Estreget strolladoù a ra van da seniñ evel e 1950, pe e 1982, a zo. Bez ez eus ivez tud a ra sonerezh evit ar blijadur, hep soñjal emaint degouezhet evit saveteiñ ar rock’n’roll. Gant The Chalets emaomp e bed ar sonerezh pop da vat, levezonet gant strolladoù evel ar B-52s. Tri faotr ha div blac’h eus Iwerzhon, kanaouennoù berr evit kanañ dindan ar strinkerez pe e-barzh ur c’harr gant an doenn digor bras hag ar blev o nijal en avel. Ha diaes eo chom diseblant pa glever Sexy Mistake pe Feel the Machine, rak diazezet eo kanaouenn The Chalets war nebeut a efedoù evit un disoc’h galloudus da vat : taboulinoù doare metronom, gitaroù o vont hag o tont, piano tredan, met na re na re nebeut. Ur bladenn hag ur strollad da zizoloiñ, ha peadra da gaout plijadur gantañ e-pad an nevez-amzer.

R.M.

 

Evit mont pelloc’h : http://www.thechalets.com/

 

 

 

 

 

 

 

 

Steredouriezh : An Tourz

(21-03 / 20-04)

 

 

Ar bloavezh-mañ a vo leun a startijenn ha kempoell war un dro ! Kat e vioc’h da dalañ ouzh degouezhioù diaes. Kalz darempredoù nevez a c’helloc’h skoulmañ. Tabutoù frouezhus a vo !
Ho puhez karantez a vo disheñvel. Da gentañ e vo kalz cheñchamantoù, ha reoù emaoc’h o c’hortoz abaoe pell. Da eil e c’helloc’h stabilaat an traoù da vat ha diskuizhañ un tamm. Marteze e vo tenn an traoù er penn kentañ. Dalc’hit mat, n’ho po ket keuz.
Ho karedig a sikouro ac’hanoc’h kalz. M’emaoc’h hoc’h-unan e c’hellfec’h kejañ ouzh un den a bouez.

Evit a sell al labour, ez it war-raok tamm ha tamm. Ne vo ket kalz skoilhoù war ho hent. Gouest e vioc’h da gas ho raktresoù da vat ! Derc’hel a reoc’h start d’ho mennozhioù. An dud a labour ganeoc’h a vo souezhet ha plijet gant hoc’h emzalc’h. Ouzhpenn-se e vo kinniget an traoù ganeoc’h war an ton dous… Gant se e vo gwelloc’h c’hoazh ho prud el labour.

 

Katell Leon