20 a viz Mezheven 2005, niv. 61

Petra oa keleier Bremaik bloaz zo? Klikit amañ!

Evit distreiñ d'ar bajenn degemer

Manifestadeg a-enep Rannvro "Broioù al Liger"

Hiziv da 2 eur goude kreisteiz e vo aozet ur vanifestadeg gant Breizh Unvan (Cuab), dirak savadur Kuzul-rannvro Broioù al Liger, e Naoned. Un emvod gant an holl guzulierien-rannvro a vo d'an eur-se. Ar wech kentañ eo d'ar gevredigezh gervel a-enep Rannvro Broioù al Liger, eme brezidant Breizh Unvan, Emile Granville. Dre vras e veze goulennet gant ar gevredigezh manifestiñ evit ma vefe unanet Breizh hepken. Ur skipailh dileuridi eus Breizh Unvan a vo degemeret gant tud eus Kuzul-rannvro Broioù al Liger.

Er sizhun dremenet en doa Breizh Unvan kemeret perzh en ur c'hlemm savet a-enep Rannvro Broioù al Liger, peogwir e nac'h breizhadelezh an dud zo o chom el Liger-Atlantel. Meur a gevredigezh vreizhek o deus kemeret perzh er c'hlemm-se. Kaset eo bet da "Bennadurezh veur ar stourm a-enep ar gwallziforc'hioù", krouet gant Jacques Chirac nevez zo.

An delfined tapet er rouedoù

Tri spesad delfined a vez gwelet war aodoù Breizh. Plijout a ra dezhe lammat e-maez an dour ha mont da-heul ar bigi. Ha gant un tamm chañs e c’heller sellet oute pellik a-walc’h.

Siwazh dezhe e vevont diwar ar memes preizhoù hag an draeneged ha pesked all zo klask war o lerc’h. Er memes takadoù ez a ar morviled bihan-se hag ar pesked da chaseal. Abalamour da se eo lakaet fall an delfined gant ar chaluterien a besketa draeneged. Un doare a zegas kalz a zistruj eo ar pesketa gant rouedoù donvor anvet “chalut-boeuf pélagique” : rouedoù donvor 150 m a hirder , 90 m diwar 70 m a zigor dezhe, sachet asambles gant daou chaluter war un dro. Gant an doare-se e vez “rastellet” ar mor ha tapet ur bern loened ouzhpenn an draeneged : baoted mor, rinkined, pesked re vihan pe n’eus ket tu da werzhañ, laboused-mor, delfined hag reoù all c’hoazh. Gallout a reer soñjal e varvfe tro 2 500 a zelfined e mor Breizh e-korf ur bloavezh e rouedoù ar seurt pesketaerezh!

A-benn saveteiñ an delfined hag ur bern loened-mor all eo ret cheñch an doareoù da besketa. E-lec’h implijout seurt rouedoù-stlej e c’haller linennañ an draeneged. An doare-se a zouj ouzh ar bevliesseurted hag ouzh ar mamennoù pesked. Ouzhpenn-se e vez muioc’h a labour evit gant an doare all, pezh a c’hellfe degas muioc’h a implijoù.

A-benn gouzout hiroc’h : http://www.defendonslesoceans.org.

Morvil (ed) : cétacé

Draeneg (ed) : bar

Bevliesseurted : biodiversité

Linennañ (draeneged) : poser des lignes pour pêcher (des bars de ligne)

	Kizelladennoù ramzel e Konk-Kerne
	An 10vet gwech eo e vo aozet ar festival-se gant ar gevredigezh "Bois 7". Dic'hortoz a-walc'h eo an degouezh. War blasenn an Ti-kêr e vo ret da c'hwec'h kizeller labourat pezhioù koad bras (2,5 metrad hirder), tro-dro d'un tem : "avec ou sans filet" er bloaz-mañ. Eizhtez o do evit echuiñ o zamm arz, a vo kizellet ganto dirak selloù an holl war ar blasenn, adalek ar 25 a viz Mezheven. Chom a raio ar c'hizelladennoù koad bras e Konk-Kerne betek ar 15 a viz Gwengolo.

	24 eurvezh ar Mañs
	Redadeg kirri 24 eurvezh ar Mañs a oa an dibenn-sizhun paseet. Kerkent ha loc’het, evel boaz, d’ar Sadorn da 4 eur en endervezh, team Pescarolo en deus diskouezet pegen kreñv e oa e-keñver tizh o tapout penn ar redadeg evit ar prototipoù. Met, tapet gant kudennoù mekanik, e vint dibaseet gant an team Audi amerikan. Audi hag a echuo d’ar c’hentañ plas gant, e-touez an tri blenier, Tom Kristensen, bremañ recordman evit an niver a drec’hioù er Mañs gant 7 trec’h e 9 redadeg. Ar rekord paseet a oa dalc’het gant Jacky Icks. Setu penaos ez eus ganet ur vojenn nevez e bed ar c’hirri redek disul da 4 eur endervezh.

The Interpreter (L’Interprète)

Stadoù-Unanet - 2005

Seveniñ : Sydney Pollack

Jubennourez e ti an ABU eo Silvia (Nicole Kidman). Ampart eo war veur a yezh, ar “c’hueg” en o zouez (ur yezh komzet en he bro c’henidik, Su Afrika). Dre zegouezh e klev chuchumuchu tud er yezh-se a ro dezhi da grediñ e vo drouklazhet un diktatour a zeuio da gomz dirak bodadeg veur ar Broadoù Unanet a-benn nebeut. Lakaet eo Silvia e darempred gant ar poliser Keller (Sean Penn). Met disfiz en deus an den-se ouzh ar jubennourez.

Ur film politikerezh faltazi en deus savet Sydney Pollack eta. Daoust m’eo kempennet mat a-walc’h “suspense” an istor, ne c’heller ket lavaret eo gwall zic’hortoz red an darvoudoù. Perzh dedennusañ “The Interpreter” eo darempredoù kizidik ha divoutin ar c’houblad Penn/Kidman kentoc’h.

Evit gouzout muioc'h : http://www.theinterpretermovie.com/

Kraftwerk – Minimum Maximum

Embannet gant EMI/Capitol

Ar re a oa e Roazhon e miz Kerzu 2004 a oar dija. Evit ar re all e vo un dizoloadenn. Ha neuze, petra zo kaoz ? Div bladenn, peogwir ez eus ezhomm : reiñ plas d’ar son, leuskel amzer d’ar c’hanaouennoù da ziorren, d’en em astenn, a lavarfen zoken. Live ? ya, peogwir eo ar wech kentañ da g-Kraftwerk embann ur bladenn live. Hag amañ, peadra da vezañ plijet : 22 ganaouenn enrollet e-pad troiad Kraftwerk er bed a-bezh e 2004, eus Riga da Londrez, eus San Francisco da Vudapest. Kregiñ a ra diouzhtu gant The Man Machine, 8 munutenn. Hag e vo evel-se betek ar fin (Music Non Stop, ouzhpenn 9 munutenn evit echuiñ, n’eus ket da glemm). Hag ivez Trans Europe Express, The Model ha Radioactivity e-touez ur bern re all. Ma fell deoc’h kaout ar skeudennoù ivez, tapit an DVD. Hag un dra all c’hoazh : bevet ar roboted !

Muioc’h a draoù : www.kraftwerk.com.

Crumble mod Bro-Saoz

Danvez : 500 g rubarbez, 500 g sivi, 2 vananezenn, 40 g sukr.

Danvez evit ar bruzun : 120 g bleud, 100 g amann, 100 g sukr, 80 kraoñv-kokoz rasklet, 1 meudad holen.

Troc’hit ar rubarbez hag ar sivi a dammoù, 2 pe 4, diouzh o ment. Didammit ar bananez. Poultrennit ar sukr war an tammoù frouezh ha lakait anezho mesk-ha-mesk en ur plad.

Raktommit ar forn, tommder 6 (180° C).

Fardit ar bruzun dre veskañ an holl zanvezioù gant begoù ho pizied ha dasparzhit ar bruzun war ar frouezh. Lakait da boazhañ er forn e-pad 30 pe 40 munutenn.