13 a viz Mezheven 2005, niv. 60

Diverket dleoù 18 bro

Divizet e oa disadorn e Londrez gant ar G8, an eizh bro ar muiañ greantelaet er bed, diverkañ dleoù 18 bro. Lod eus broioù paourañ ar bed zo en o zouez. En Afrika emaint dreist-holl : Benin, Burkina Faso, Etiopia, Ghana, Maouritania, Mali, Mozambik, Niger, Ouganda, Rwanda, Senegal, Tanzania, Zambia. Ganto e kaver ivez Bolivia, Guyana, Honduras, Madagaskar ha Nicaragua.

Eizh Ministr an Arc'hant ar G8 o deus divizet diverkañ 32,5 miliard euroioù a zleoù e Bank Afrikat an Diorren, er Bank Bedel hag er Font Moneizel Etrebroadel. Un eil diverk dleoù a c'hellfe bezañ graet gant ar G8 en amzer da zont, evit dek bro all, hag evit un 11 miliard euroioù bennak.

Un nozvezh a viz Even war al lanneier

Erru eo an abardaez, n’eo ket ken tomm an heol hag emañ ar skeud o hiraat. Deut eo ar poent da selaou un nebeud istrogelled o kanañ war al lanneier : ar pinted hag ar breaned melen zo o richanañ a-bouez-penn, o c’hrougousat emañ turzhunelled ar c’hoajoù. O klask muenned emañ ar skouled glas. Tamm-ha-tamm ez a war freskaat hag al laboused a dav a-nebeudoù. Ne chom nemet an drasked sut hag o c’han bamus.

A-greiz-tout p’eo deut serr-noz e vez klevet un drol a fraoñv o tont eus ar gwez-pin. Ur solex kozh zo o paouez loc’hañ e-kreiz al lann ! Tevel a ra hag ul labous iskis a ya da dreiñ tro-dro deoc’h. Goude un nebeud troioù ez a da leuriañ ha da ganañ en-dro : eñ ‘ni eo ar solex ! Adren a vez graet anezhañ. Dre e gan, asambles gant stlakadennoù divaskell a-wezhioù, e verk pelec’h emañ e dachenn dezhañ.

Goude-se, p’eo erruet du-pod an noz ez a da devel. Ha neuze e vez klevet skrijadennoù klemmus o tont eus ar gwez bras : an touded penn-kazh yaouank ’ni eo, aet ’maez eus o neizh. N’int ket kat da chaseal c’hoazh hag emaint o c’hervel o zud a-hed an noz da gaout morzigelled da vegata.

Diouzh ar mintin e tavo tout ar re-se hag e c’hello al laboused-deiz saludiñ an heol hag an devezh nevez.

Evit klevet an adren :

http://www.oiseaux.net/oiseaux/caprimulgiformes/engoulevent.d.europe.html

Adren (-ed) : engoulevent

Brean (-ed) melen (pe plouz kerc'h ): bruant jaune

skoul glas : busard cendré :

drask sut : grive musicienne

muenn (-ed) : campagnol

turzhunell (ed) ar c’hoadoù : tourterelle des bois

toud (-ed) penn-kazh : hibou moyen-duc

morzigell (-ed) : mulot

	Kizelladennoù ramzel e Konk-Kerne
	An 10vet gwech eo e vo aozet ar festival-se gant ar gevredigezh "Bois 7". Dic'hortoz a-walc'h eo an degouezh. War blasenn an Ti-kêr e vo ret da c'hwec'h kizeller labourat pezhioù koad bras (2,5 metrad hirder), tro-dro d'un tem : "avec ou sans filet" er bloaz-mañ. Eizhtez o do evit echuiñ o zamm arz, a vo kizellet ganto dirak selloù an holl war ar blasenn, adalek ar 25 a viz Mezheven. Chom a raio ar c'hizelladennoù koad bras e Konk-Kerne betek ar 15 a viz Gwengolo.

	Marc’hhouarnerezh
	An Dauphiné Libéré eo ar redadeg vras diwezhañ a-raok Tro Frañs Un doare dedennus neuze da welet piv a seblant kreñvoc’h eget ar peurrest eus an druilhad evit klask gouzout en a-raok piv a vo tud kreñv Tro Frañs. Er bloaz-mañ, ar maout zo aet gant un Euskarad eus skipailh Euskaltel, Inigo Landaluze. Evel boaz, Lance Armstrong, eñ hag a redo e Dro Frañs diwezhañ er bloaz-mañ, en deus echuet er plasoù kentañ. Bez eo 4e er bloaz-mañ. Dedennus eo gwelet ar C’holombian Santiago Botero oc’h ober e zistro d’ar marc’h-houarn war-lerc’h e wallzarvoud e Tro Frañs, un nebeud bloavezhioù zo. Eñ a echu d’an eil plas, 11 eilenn hepken war-lerc’h Landaluze. Alexander Vinokourov a echu just a-dreñv Armstrong, er 5vet plas. Gortozomp bremañ gwelet petra raio tout an dud-se war hentoù Tro Frañs, hag a grogo a-benn a-boan ur miz, d’an 2 a viz Gouere.

Sin City

Stadoù-Unanet - 2005

Senario ha seveniñ : Robert Rodriguez ha Frank Miller

Difennet d’ar re dindan 12 vloaz

Kêr an holl sioù hag an holl bec’hedoù eo Sin City. N’eus forzh petra a c’hell c’hoarvezout en ul lec’h a seurt-se. Ul loen mut a c’hell dispakañ kalon ur marc’heg kadarn evit veñjiñ marv e vestrez, gisti ar c’harter tomm a c’hell sevel ouzh ur poliser aet brein, h.a.

Un nebeud istorioù kriz douget gant aktored a-feson (Bruce Willis, Clive Owen, Benicio del Toro, Elijah Wood) a ya d’ober Sin City. Kalite an azasañ eo perzh dibarañ ar film-se. Ar wech kentañ eo gwelet ur "film-bannoù treset" e-giz ma c’helle Orson Welles sevel "filmoù-c’hoariva" da skouer. Doujet eo bet da arz Miller en ur lakaat er skeudennoù kement a zu hag a wenn evel ma ra en e albomoù. Feuls-kenañ eo ar bed-se, met daoust d’an istorioù hañvalout bezañ simpl e verzer tamm-ha-tamm e talvez ar Yin hag ar Yang evit spered an tudennoù kement hag evit doare ar film.

Evit gouzout muioc'h :

http://www.sincity-lefilm.com/

http://hem.passagen.se/fm4/sincity.html (evit ar bannoù-treset)

Papa

Frañs - 2004

Senario ha seveniñ : Maurice Barthélémy

Emañ Louis (Martin Combes) war hent ar vakañsoù e-barzh oto e dadig (Alain Chabat). Ha pa ne zeu ket a-benn da bellgomz da vammig e chom tadig en imor vat... dalc’hmat.

Petra a c’hoarvezo war an hent-se? Tra ebet pe dost. Nemet e teuio dousik war wel ar pezh a chom war spered an tudennoù. Goude RRRrrrr !!! e c’hellfed tec’hel dirak film nevez unan eus ar re Robin des Bois. Ur fazi bras e vefe avat. Gant nebeudigoù e kont ar film-mañ un drama a-benn ar fin, met en ober a ra en un doare soutil ha plaen, hep tamm pathos ebet. Ken eeun hag ar vuhez eo.

Evit gouzout muioc'h : http://www.papa-lefilm.com/

Ellen Allien – Thrills

Embannet gant Bpitch Control/Pias

Daou vloaz’ zo e oamp bet plijet gant Berlinette. Pladenn nevez Ellen Allien a zo ken mat all, met disheñvel penn da benn. Ma oa diazezet Berlinette war sonioù nevez flamm, he deus divizet Ellen Allien implijout mekanikoù kozh evit enrollañ Thrills. N’eus nemet selaou sonioù boud ar bladenn d’ober : kreñv evel da vare penn kentañ ar sonerezh elektronek. Dre vras eo teñvaloc’h ivez ar bladenn nevez : war-bouez an ton diwezhañ (Magma), n’eus ket kalz tra a c’hallo lakaat an dud da fiñval war an dancefloor. Gwelloc’h eo chom er gêr da selaou ar bladenn, ha klask kavout en-dro al levezonoù liesseurt he deus implijet an Alamanez : krautrock amañ, transe ahont. Aze ho po peadra da badout, rak gwall stank eo ar bladenn. Ha forzh penaos, n’eo ket difennet deoc’h (c’hoazh), lakaat ar son da bignat ha dañsal hoc’h-unan en ho saloñs leun a arrebeuri Ikea.

Evit gouzout hiroc’h :

http://www.bpitchcontrol.de/artist/1

Maskloù

Setu pevar maskl graet diwar broduioù naturel ha simpl-tre da fardañ.

Evit an holl seurtoù kroc’hen

Maskl diwar bri-gwenn, mel ha laezh

Meskit 3 loaiad vihan a bri-gwenn, 3 loaiad vihan a laezh hag ul loaiad vihan a vel betek ma teufe an toaz da vezañ lintr. Lakait ar maskl-mañ ouzh ho tremm e-pad 20 munutenn. Lamit gant dour klouar ha ledit ho tourenn tonik.

Evit ar re zo ur c’hroc’hen druz dezho

Maskl diwar vi, sitron hag eoul olivez

Basit ur melen-vi, chug un hanter penn-sitron hag ul loaiad vihan a eoul olivez. Lakait ar maskl-mañ ouzh ho tremm e-pad 20 munutenn. Lamit gant dour klouar ha ledit ho tourenn tonik.

Evit ar re zo ur c’hroc’hen sec’h dezho

Maskl diwar vi hag alamandez dous

Basit ur melen-vi gant 2 loaiad vihan a eoul alamandez dous. Lakait ar maskl-mañ ouzh ho tremm e-pad ur c’hardeur. Lamit gant dour klouar ha ledit ho tourenn tonik.

Evit ar re zo ur c’hroc’hen etre

Maskl diwar sitron, mel ha vi

Meskit ur melen-vi gant 2 loaiad vihan a vel hag ul loaiad vihan a chug-sitron. Lakait ar maskl-mañ ouzh ho tremm e-pad ur c’hardeur. Lamit gant dour klouar ha ledit ho tourenn tonik.