30 a viz Mae 2005, niv. 58

"Ya" bihan e Breizh, "Nann" bras e Frañs

Aet e oa ar maout gant an "nann" dec'h (54,57 %), e mouezhiadeg ar c'hwec'hkorn e-keñver an Danvez-Bonreizh evit Unaniezh Europa.

Splann eo an traoù pa vez sellet ouzh kartenn Frañs : e tost an holl departamantoù ez a ar maout gant an "nann". War-bouez Pariz, Lyon hag un darn eus Elzas ha Savoa... Ha Breizh. N'eus nemet Aodoù-an-Arvor a vefe aet a-du gant an "nann" er vro (53,28 %). Met n'eo ket splann-tre trec'h ar "ya" war Breizh a-bezh. War-dro 50,95 % eus ar Vretoned o defe mouezhiet evit an Danvez-Bonreizh. Gant Il-ha-Gwilen eo splannoc'h an traoù gant 53,81 % eus ar mouezhioù oc’h embann "ya".

Er c'hêrioù e vefe bet votet kentoc'h evit ar "ya", e Ankiniz, ar Baol, Brest, Felger, Gwened, Gwengamp, Kastell-Briant, Kastellin, Kemper, Naoned, an Oriant, Pondi, Roazhon, Sant-Brieg, Sant-Maloù... War ar maezioù e vefe bet lâret "nann" gant ar voterien dreist-holl.

Disklêriet en deus prezidant ar Republik gall, Jacques Chirac, e vefe kemeret divizoù gantañ a-benn cheñch politikerezh ar vro. Ur gouarnamant nevez a vo anvet gantañ e-kerzh ar sizhun moarvat.

Ur galv a-benn saveteiñ an natur

Ingal e vez graet diskleriadennoù ha promesaoù brav gant pennoù bras ar politikerezh da geñver penaos merañ an endro en un doare padus. Siwazh, ankounac’haet e vezont evit lod anezhe ha chom a reont didalvoud peurliesañ.

Er mare-mañ e Bro C’hall ez eus dilañs gant ar politikerezhioù a-benn saveteiñ an natur ha war gement tachenn zo : takadoù diwallet, al labour-douar, an energiezhioù padus, an takadoù gleb, an spesadoù tremeniat, Natura 2000, metoù ar mor, al loened preizh bras, stad ar skoaziadoù a vez roet d’ar c’hevredigezhioù a zifenn an natur.

Emañ ar gelaouenn “Terre Sauvage” o paouezsevel ur galv a-benn sachañ evezh an holl re zo e penn Bro-C’hall ha reiñ ul lañs nevez da warez an natur. E-touez ar sinerien gentañ e kaver Yann-Artus Bertrand, al luc’hskeudenner brudet en deus graet poltriji eus an Douar eus ur c’harr-nij, pe Alain Dugrain-Dubourg, prezidant an LPO.

Evit gouzout hiroc’h :

http://www.terre-sauvage.com/

takadoù diwallet : zones protégées

takadoù gleb : zones humides

tremeniat : migrateur

LPO : Ligue Protectrice des Oiseaux

"Brezhoneg o c'hoarzhin" dimeurzh,
Devezh ar brezhoneg disul

Kinniget e vo gant ar strollad Pik Achu, a vod "fallañ komedianed ar vro", an abadenn "Brezhoneg o c'hoarzhin" dimeurzh, e Karaez. Da 8 eur 30 noz e vo tu da welet war al leurenn Glenmor un abadenn fent e brezhoneg, "evit un dornad kakahouet" eme ar skritell ! Gant ar strollad komedianed yaouank Pik Achu e vez klasket ober fent gant ar pezh a ra bedig-bed ar vrezhonegerien hag ar stourm evit ar yezh... N'eo ket fentus a-walc'h bed ar brezhoneg d'o meno, ha kinnig a reont doareoù dezho o-unan, fin pe gros, dic'hortoz pe anatoc'h, evit lakaat an dud da c'hoarzhin gant ar brezhoneg.

E-ser roll abadennoù eil Devezh ar brezhoneg emañ an arvest-se. Disul e vo an devezh gouel, war tachenn Kerampuilh e Karaez, aozet gant "Dazont ar Yezh".

Evit gouzout hiroc'h :

Pôle Art, pgz : 06 14 64 35 27 pe 06 62 41 34 30. http://www.poleart.net. http://www.devezh.com.

Mell-droad

Setu echu kampionadoù mell-droad R1 hag R2. Evit ar 4e gwech da-heul, Lyon, ar skipailh gourdonet gant ar Breizhad Paul Le Guen, zo kampion Frañs. Met, anavezet eo, Breizhiz zo beajerien, ha Paul ar Gwenn, a vo e lec’h all er bloaz a zeu. Gérard Houllier zo bet anvet gourdoner nevez an Olympique Lyonnais.

Eus tu skipailhoù Breizh, diaes-tre eo bet evit Naoned dont a-benn da chom er rummad kentañ. Roazhon avat, a echu 4e hag a c’hoario Kib Europa UEFA er bloaz a zeu, ar pezh ne oa ket erruet abaoe 1971. En eil rummad, Gwengamp eo ar skipailh breizhat a zo en em dennet ar gwellañ, oc’h echuiñ 7vet. Brest, war-lerc’h ur bloavezh kentañ en eil rummad, a echu d’un 9vet plas brav a walc’h. An Oriant, eus e du, n’en do ket graet gwelloc’h eget an 10vet plas.

38vet devezh R1

PSG (10vet) 1-0 Roazhon (4e)

Naoned (19vet) 1-0 Metz (14vet)

38vet devezh R2

Nancy (1añ) 1-0 Brest (7vet)

An Oriant (12vet) 2-1 Sedan (4e)

Gwengamp (9vet) 3-1 Grenoble (10vet)

Crimen ferpecto
(Le crime farpait)

Spagn, Italia, Frañs - 2004

Seveniñ : Alex de la Iglesia

Ampart kenañ eo Rafael (Guillermo Toledo). Ul lubaner eus ar re wellañ eo, gouzout a oar diouzh an touellañ evit lakaat an dud da blegañ d’e youl hep gouzout dezho. Ren a ra war rann an dilhad evit ar maouezed en ur gourmarc’had Yeyo’s e Madrid, selloù lugernus e werzherezed paret warnañ. Met kevezerezh zo etre ar c’hilhog-mañ ha Don Antonio (Luis Varela) (e penn rann an dilhad evit an aotrounez) evit dont da vezañ rener an estaj. Mervel a ra Don Antonio dre wallzarvoud e-kerzh un tabut etrezo. Ar pep gwashañ zo da zont evit Rafael...

Sed aze un doare dereat da gas e amzer. Arabat eo kaout c’hoant gwelet ur film soutil met peadra zo amañ da gaout un tamm dudi hep na vefe droch an istor penn-kil-ha-troad. C’hoarzhin a reer a galon ouzh un istor troet-kaer ha pa vefe klasel a-walc’h an abeg. Ul lip-e-bav eo tudenn Rafael ar pabor hag aergelc’h kitsch ar bloavezhioù 80.

Evit gouzout hiroc'h :

http://www.clubcultura.com/clubcine/clubcineastas/delaiglesia/crimenferpecto/sinopsis.htm

Whitey - The Light at the End of the Tunnel is a Train

Embannet gant 1234 Records / Pias

Titl ar bladenn a zo evel ur manifesto. Pell emaomp amañ eus ar sonerezh elektro boutin : Whitey en deus enrollet e bladenn e-unan e Withechapel (reter Londrez), en ur amprestiñ binvioù e vignoned. Dreist eo memestra an tonioù ijinet gant Nathan Whitey : diaes eo chom diseblant pa selaouer In the Limelight pe c’hoazh Leave Them All Behind ha Can’t Go Out, Can’t Stay In, memes ma seblant an tonioù-se bezañ bet savet e foñs ur c’han-skarzh e dibenn un nozvezh du ha diaes. Hag al levezonoù, neuze ? Death in Vegas pa vezont imoret fall, pe ur seurt New Order trist. Tu’ vo da selaou Whitey e Sant Brieg e-pad Art Rock d’ar Sul 5 a viz Even.

Steredouriezh
ar C’hevelled

Ho sin eo sin aer kentañ ar bloavezh. Prederiet e vezit gant kudennoù brud ha skeudenn alies. Kizidik oc’h ouzh mennozhioù nevez ar mare, plijout a ra deoc’h heuliañ ar c’hiz. Micherioù ar c’hehentiñ, ar skeudenniñ hag ar prezegenniñ a vez diouzhoc’h. Gant ho spered korvigellek ha lemm, oc’h kalonekaet gant ar cheñchamantoù. Ne blij ket deoc’h koll hoc’h amzer. Emgar pe brokus e vezit, rak cheñch-dicheñch oc’h : an hanter ac’hanoc’h zo oberiant, an hanter all a sell pizh ouzh an oberoù hag a sav evezhiadennoù !

Betek miz Here, e vo gwall leun ho puhez sokial hag un istor karantez a c’hellfe diwanañ. Souezhadennoù a-leizh a c’hortoz ac’hanoc’h war an dachenn-se, ma’z oc’h dieub. Diwallit memestra, arabat bezañ dirollet ha koll ho skiant-vat. C’hwi hag a vev gant unan all, grit ho mad eus un aergelc’h plijus hag entanet. Evit a sell ouzh al labour e vo skañvoc’h an traoù. Deoc’h-c’hwi da vont war-raok ha da glask ober traoù nevez…ha foll un tamm marteze.