24 a viz Mae 2004, niv. 14

Evit distreiñ d'ar bajenn degemer

Ul lodenn nevez-savet eus aerborzh Roissy o kouezhañ

Disul veure abred, e oa kouezhet un darn eus toenn un trepas bras (Terminal E2) eus aerborzh Roissy-Charles-de-Gaulle, e bro Bariz. 450 metrad hed eo an trepas hag un 30 metrad bennak zo diskaret. Kavet ez eus bet 4 den marv ha d'an nebeutañ 3 den gloazet. Galvet e oa bet ar polis un nebeud amzer a-raok ar gwallzarvoud, dre ma oa bet merzet gant tud zo e kouezhe poultr diouzh an doenn hag e veze klevet strakadennoù metal.
Savet e oa bet al lodenn nevez-mañ eus an aerborzh a-raok an hañv 2003, bloaz zo pe dost. Un enklask melestradurel hag un enklask lezvarnel zo bet boulc'het evit klask kompren perak eo kouezhet ar savadur nevez-flamm en e boull ha piv a c'hellfe bezañ kiriek. Nicolas Sarkozy ha Jean-Pierre Raffarin zo bet o welet al lec'h dilun diouzh ar beure.

Ar c’hirri zo noazus d’ho yec’hed... ha da hini ar re all

Implij ar c’hirri a c’hell lazhañ, a ouezer abaoe pell. Met alies-kaer e
soñjer en dud marvet dre ur gwallzarvoud ha n’eo ket er re bet lazhet gant saotradur an aer degaset gant ar gweturioù. Diskouez a ra un danevell embannet e penn kentañ miz Mae gant an "Agence Française de Sécurité Sanitaire de l’Environnement" pegen kreñv eo al liamm etre saotradur an aer ha kleñvedoù zo.
Eus ar re noazusañ e vefe ar partikulennoù munut a zeu diwar an otoioù da gentañ-penn (ar re dre Diesel dreist-holl). Penn-kaoz e vefent da 6 % betek 11 % eus ar marvioù dre krign-bev ar skevent e-touez an dud ouzhpenn 30 vloaz ha da 2 % betek 6 % eus ar marvioù dre gleñvedoù ar galon. Pezh a sinifi e varv tro 5 000 a dud ar bloaz ganto !
N’eo ket start mirout ouzh ar miliadoù a dud-se da vervel. Ret eo da bep
hini en em santout kiriek hag ober nebeutoc’h gant e oto. Petra a virfe menegiñ war ar c’hirri "ar c’harr a lazh" e-giz ma vez war ar pakadoù sigaretennoù ?

Kement ha goût hiroc’h : www.afsse.fr

Diskouezadeg William Wegman

Betek an 20 a viz Mezheven 2004
FRAC Breizh
Domani Kergwehenneg 56500 Begnen
Pgz : 02 97 60 44 44

Ganet e 1943 er Massachussets, William Wegman zo Amerikan penn da benn. N’eo ket santelaet an arz evitañ. Ur seurt produ èl ar re arall get e zanvez diazez treuzfurmet e meur a dra eo e oberennoù. Luc’hskeudennour da gentañ, ken anavet eo e gi Man Ray èltañ, peogwir en deus lusc’hskeudennet anezhañ e-pad blezadoù ha blezadoù. An oberennoù kinniget e Kergwehenneg a zo a 1968 betek 2004, a bep seurt int, taolennoù livaj, videoioù, luc’hskeudennoù a ziskouez labour divent William Wegman. Ha mousfent a-leizh a zo en e labour pezh a vank en arz a-vremañ alies.

Kement a gouzout hiroc’h : http://www.art-kerguehennec.com

Judo

Kampionad Europa ar judo zo bet dalc’het e Bukarest en dibenn-sizhun paseet. Un deiziad pouezus e oa evit ar sportourien peogwir e oa plasoù da c’hounit evit ar c’hoarioù olimpek. Skipailh Frañs, a veze sellet outañ evel ouzh unan kreñv, n’eo ket bet d’al live gortozet. Ar wech kentañ eo ne vo ket ur judoka gall e pep rummad. Da skouer n’eo ket deuet a-benn Amina Abdellatif da dapout an trede plas evit mont d’ar c’hoarioù olimpek. A-benn ar fin n’eo nemet teir medalenn arem a vo bet gounezet gant Frederique Jossinet (dindan 48 kg), Benjamin Darbelet (dindan 66 kg) ha Ghislain Lemaire (dindan 100 kg). Droug ebet evito avat p’en deus servijet ar c’hampionad-se da brientiñ ar c’hoarioù olimpek dreist-holl.

Troy (Troie)

Stadoù-Unanet (2004)
Seveniñ : Wolgang Petersen

Skrapet eo bet Helena, rouanez Sparta, gant Paris, priñs Troia. Ne c’hortoze ket Agamemnon abeg gwelloc’h evit mont da vrezeliñ a-benn ledanaat e rouantelezh. Evel-se e krog seziz kêr Droia gant ar C’hresianed. Met disoc’hoù an Ilias a zo stag ouzh imor ampartañ brezelour an henamzer, Akileus.
Pell zo ne oa ket bet savet ur peplum gant studioioù Hollywood ha merzout a reer ez eus bet graet araokadennoù da-geñver an efedoù ispisial e korf keit amzer (blaz ar paper-kaot a zo gant ar c’hinkladur a-wechoù avat). Nebeut a dra zo da gavout er film-mañ diwar-benn gwirionded an abegoù a gas d’ar brezel ; un diuadenn veur e chom muioc’h evit traoù-all.

Kement ha gouzout muioc’h : http://www.troie-lefilm.com

Korriganed, gant Civiello ha Mosdi

Iwerzhon, er bloavezh mil eus hon amzervezh. Luaine, ur plac’hig kalonek, a glask saveteiñ he mamm, skrapet gant Balor, mestr ar c’hañv hag ar reustl. Resev a ra sikour ar gorriganed, ur bobl gwasket gant Balor ivez. Evit dont a benn eus o stourm ez eont da glask sikour digant pobl meur an Tuatha Dé Danann…
Splujet e vezer gant ar rummad bandennoù-treset-se en ur bed levezonet-tre gant ar geltiegezh. Tresadennoù kaer ha kreñv Civiello, daoust dezho bezañ a-wechoù luziet ha dipitus, a gemer perzh penn-da-benn e krouidigezh un aergelc’h teñval ha marzhus war un dro, leun a strobinellerezh hag a (wall)-huñvreoù. Div niverenn a zo deuet er-maez en heuliad : "Bugale an noz" ha "Kadourien an deñvalijenn".

Ul lec’hienn gouestlet da Civiello : http://home.tiscali.be/benjamindehalu/index.htm

Brizhilli gant rubarbez

Evit 6 den. Prientiñ : 15 mn Poazhañ : 40 mn
Danvez : 6 brezhell bihan – 500 gramm a rubarbez – 100 gramm a amann – 2 loaiad vras a vleud – 20 gramm a sukr -  25 kantilitrad a zienn flour – sivolez – holen – pebr.

Dibluskit ar rubarbez ha troc’hit anezho a dammoù. Lakait 40 gramm a amann da deuziñ en ur gastelodenn. Pa vez spoumus, lakait an tammoù rubarbez da boazhañ, o veskañ anezho, e-pad 3 pe 4 munutenn. Goloit ha laoskit da boazhañ e-pad 15 mn. Ouzhpennit neuze an dienn, ar sukr, holen ha pebr, meskit ha dalc’hit da boazhañ e-pad 15 mn. Soubit ar pesked er bleud. Lakait holen ha pebr. Lakait ar peurrest eus an amann da deuziñ en ur baelon dibeg. Lakait ar brizhilli da boazhañ er baelon, 5 mun. a bep tu. Diskargit ar pesked en asiedoù ha rannit ar flastrenn rubarbez. Servijit gant sivolez troc'het munut war-c’horre an asiedadoù.

Ma n’eo ket mare ar rubarbez e c’hellit heuliañ ar memes sekred-kegin oc'h implijout avaloù trenkik e-lec’h ar rubarbez.