17 a viz Mae 2005, niv. 56

Prosez gwalldaol Beslan

Hiziv e krogo prosez ur Tchetchen 24 vloaz, e Vladikavkaz, kêr-benn Osetia an Norzh. Harzet e oa bet d'an 3 a viz Gwengolo 2004. Hervez ar polis e oa bet darbet dezhañ bezañ lazhet gant an dud, ha saveteet e vefe bet gant ar boliserien. Daou zevezh a-raok e oa kroget an traoù : ur skipailhad 32 zen o doa miret 1 128 den e-barzh savadurioù skol vrasañ Beslan.

Ne oa ket deuet a-benn an arme rusian da reizhañ an traoù. 361 den a oa bet lazhet, e-kerzh argad an arme rusian dreist-holl. En o zouez 186 bugel, dek soudard, hag ar skipailh sponterien, war-bouez ar paotr yaouank a vo barnet. An ezel bev nemetañ eus ar skipailh sponterien eo.

Diwar urzhioù ar brezelour tchetchen radikal Chamil Basaiev e vije bet aozet gwalldaol Beslan.

Sichant evel natur miz Mae

Ur c’houlz brav eo an nevezamzer a-benn anaout gwelloc’h an natur. Kit gant ur wenojenn etre div c’harzh, war bevenn ur c’hoad. Kantadoù a vokidi a vo war vord an hent : c’hwervizon, pav-bran, tommheoligoù, pour-bran... Stouit hag e weloc’h amprevaned a-leizh o tennañ gounid eus o sun : balafenned, gwenan, sardon... Dindan o delioù e kavoc’h c’hwiled, merien ha melc’hwed krogennek a-vil-vern. Hag e c’halloc’h klevet violoñs al lammerezed hag ar c’hranked-raden o seniñ e-touez ar geot.

Kanañ a raio al laboused a-bouez-penn evit difenn o zakadoù. An drasked, ar boc’hruziged, ar pinted hag ar pennglaoued a vo foulet o vagañ o re vihan. Ar raned a gano ivez, da serr-noz dreist-holl.

Ha justamant, e-tro serr-noz, pa vo skuilhet o c’hwezh-vat gant ar gwezvoud, ho po muioc’h a chañs da welet loened brasoc’h e-giz ar youc’hed pe al lern. Lent a-walc’h int ha marteze n’halloc’h gwelout nemet roudoù o zreid lezet er fank war o lerc’h pe restachoù o fredoù.

Kit da welet an natur ouez-se a zo just e-kichen ho ti. Gallout a reoc’h gwelet pegen brav eo... ha pegen bresk eo ivez.

C'hoariva brezhonek er sizhun-mañ

E Naoned. Fenoz e vo kinniget deoc’h gant Strollad Ar Vro Bagan "Pezhioù-c’hoari nevez". Tri fezh-c’hoari berr : "E-kichen ar poull", "An Intañvez yaouank" ha "Pebezh nozvezh."

Ar pezhioù-c’hoari a vo diskouezet e sal ar Jamet, kreizenn sokiosevenadurel Bellevue, 25 straed ar Jamet (Tram, linenn 1 : Lore) da 8e30 noz.

Ajañs sevenadurel breizhek al Liger-Atlantel. Pgz : 02 51 84 16 07. acb44@fr.st. www.acb44.fr.st.

E Roazhon. Arc'hoazh e vo kinniget an hevelep abadenn, "Pezhioù-c’hoari nevez", gant Strollad ar Vro Bagan, e Ti Tachenn Veurzh, da 8e30 noz.

Skeudenn Bro Roazhon. Pgz : 02 99 30 06 87. skeudenn@wanadoo.fr. www.skeudenn.ouestfrance.fr.

Tennis

Ur sizhun a-raok na grogfe tournamant Roland-Garros, ar c’hoarierien c’hall en em ziskouez. Amélie Mauresmo, da gentañ, eus ar vegenn abaoe bloaz dija, he doa gounezet tournamant Roma ar sizhun dremenet. Peadra da brientiñ Roland-Garros sioul, hi hag a zo atav o klask gounit he zournamant kentañ eus ar Chelem Bras. Evit dont a-benn ez embreg gant Yannick Noah, ar c’hoarier gall kentañ en deus gounezet an tournamant.

Eus tu ar baotred, e vez klevet un anv aliesoc’h-aliesañ abaoe un nebeud sizhunioù, hini Richard Gasquet, un tennisour yaouank, 18 vloaz dezhañ. Bet eo dija e hanter-gourfennoù tournamant Monte Carlo, hag aet e oa ar sizhun paseet betek gourfenn ar Master Series en Hamburg. An 48vet c’hoarier er bed eo bremañ er renkadur ATP Race, ha gellout a rafe bezañ souezhadenn vras Roland-Garros, daoust dezhañ bezañ chomet hep tremen an dro gentañ er bloavezhioù paseet.

Mell-droad

36vet devezh R1

Naoned (15vet) 1-3 Lille (2vet)

Lens (9vet) 5-2 Roazhon (5vet)

36vet devezh R2

Angers (19vet) 1-0 Brest (4vet)

An Oriant (13vet) 2-0 Grenoble (10vet)

Gwengamp (8vet) 2-0 Guegnon (12vet)

37vet devezh R1

Roazhon (6vet) – Strasbourg (12vet)

Sochaux (10vet) – Naoned (16vet)

37vet devezh R2

An Havr Nevez (15vet) – Gwengamp (7vet)

Brest (5vet) – An Oriant (11vet)

Kingdom of Heaven

Stadoù-Unanet - 2004

Seveniñ : Ridley Scott

Un heuliad degouezhioù dic’hortoz ha kalet a gas Balian (Orlando Bloom) d’ar groaziadeg. Gant red e droioù-kaer ez erru ar marc’heg nevez en Douar Santel, lec’h m’emañ Roue Jeruzalem o kenstrivañ gant Saladdin, penn ar Sarrazined, evit delc’her ur peoc’h bresk-bresk. Met tud atizet gant o youl-sevel a glask c’hwezhañ war tan ar brezel a bep tu.

Anat eo pouez kudennoù ar Reter Nesañ war an istor-mañ. Kevrinoù an darempredoù beli e diabarzh ur strollad eo dalc’h ar film kentoc’h eget enebiezh an daou strollad. Pell a vezañ soutil eo "Kingdom of Heaven" e gwirionez, daoust da bep tra. Manikean-tre eo a-benn ar fin : ar re jentil zo jentil-kenañ hag ar re zrouk zo drouk-kenañ. Ha kaer en deus Balian komz dizehan eus difenn ar bobl e chom ar bobl-se ezvezant war ar skramm. Brav-eston eo an arvestoù brezel met tanav eo an danvez a zo a-dreñv siwazh.

http://www.kingdomofheavenmovie.com/

	www.allmusic.com
	Ha neuze, soñjal a ra dit e plij ar rock dit ? Tamm ebet ! E gwirionez out dedennet, hep gouzout dit marteze, gant ar British Trad Rock, pe zoken ar sonerezh Emo pe Slowcore. Ha te, ar sonerezh elektronek a blij dit ? Dav dit resisaat da zibab : kentoc’h Big Beat, pe Latin Freestyle pe c’hoazh Ambient Breakbeat. Ha fellout a ra dit gouzout pet pladenn a zo bet embannet gant ar strollad-mañ-strollad ? Neuze eo dav dit teurel ur sell war allmusic.com : evit pep strollad/kaner/kanerez e kavi e/hec’h istor, listenn ar pladennoù embannet gantañ/ganti hag ur pennad barn diwar-benn pep pladenn ivez. Daou dra ret : gouzout saozneg (al lec’hienn a zo e saozneg penn da benn), hag enskrivañ (ur chomlec’h postel a zo trawalc’h). Da ziwall zo memestra : pa groger da lenn pennadoù allmusic.com, ez eus riskl bras da chom da lenn anezho e pad eurvezhioù, ken klok eo an danvez.

Lakait ho prozh-dindan war wel !

Gwregel-kenañ, ar brozhioù-dindan zo bet danvez hunvreal ar baotred e-pad pell, pa oant frammet gant kelc’hioù, karget a zantelezioù hag a vrodelezhioù. Abaoe ur pennad koulskoude, ne hañvale den ebet ken bezañ entanet gant ar pezh-dilhad-mañ, dic’hiziet goude dispac’h ar bragoù (paneve er bloavezhioù 70). Evit an hañvezh 2005 avat, e ra un distro brav ! Gant ur spered romantel, pe heñvel ouzh ar re a vez gwisket gant merc’hed an termaji, e teu da astenn he levezon war neuz ar merc’hed bremañ. He roll pennañ : moanaat dargreiz an den en ur greskiñ krommenn an divgroazell.

Er bloavezhioù 70 e oa bet lakaet ar brozhioù-dindan war wel evit ar wezh kentañ. Gant ar memes awen emañ ar gemenerien hiziv. Reoù dreuzwelus, e kotoñs, e kroched, liv ar safron pe liesliv, e patchwork, e moñselin, pe gwriet evel un tutu, a gavoc’h e gwerzh… Pep hini a c’hello choaz ur pezh-dilhad diouti. Setu ur c’hiz skañv ha fresk da heuliañ e-pad an hañv !