11 a viz Ebrel 2005, niv. 51

Adwelet e vo barnidigezh Guillaume Sezneg

Hiziv goude-kreisteiz ez eus bet divizet gant Bodad Adwelet ar C'hondaonidigezhioù e vefe adstudiet barnidigezh Guillaume Sezneg. Kondaonet e oa bet e 1924 d'ar galeoù e Gwiana, evit muntr e vignon Pierre Kemener, kuzulier-departamant Penn-ar-Bed d'ar mare-se. N'eus bet adkavet korf ebet.

Ouzhpenn 50 vloaz zo eo aet Guillaume Sezneg da Anaon, lezet e oa bet da vont e 1947. Abaoe 80 vloaz e stourm ar familh Sezneg evit ma vefe adc’hraet ar prosez, hag advarnet Guillaume Sezneg. Er stourm-se emañ mab-bihan Guillaume, Denis le Her-Sezneg, eñ tost da 60 vloaz hiziv. Savet en deus ul levr, krouet ur gevredigezh, komzet diwar-benn an afer-se d'ar mediaoù... Gouestlet en deus e vuhez e koun e dad-kozh. Un diviz a-bouez-bras evitañ hag e familh a zo bet roet hiziv gant ar Bodad Adwelet. Gant al Lez-varn Adwelet e vo graet war-dro an teuliad. E dibenn an adweladenn e c'hellfe Guillaume Sezneg bezañ lakaet digablus.

REACH

Hervez kont ez eus 100 000 a zanvezioù kimiek gwerzhet en Europa hep na vefe sellet outo a-dost. Evit gwir, evit ar poent e c’heller lakaat e gwerzh forzh peseurt produ kimiek nemet ma vez prouet gant ar galloudoù publik eo dañjerus. N’eo ket brav-brav an disoc’hoù war an ekosistemoù nag an dud : e-korf 20 vloaz eo kresket a 15 % an niver a vugale allergiezhioù gante, 50 % nebeutoc’h a spergelligoù a zo e-barzh sper an Europeaned evit en hini o zadoù, kresket eo an niver a dud tapet gant ar c’hrign-bev a 63 % e Bro-C’hall e-korf 20 vloaz.

Pal al leviadenn europat "REACH" eo gwareziñ gwelloc’h an dud diouzh an danvezioù kimiek. Diwar ar leviadenn-se e vo d’ar broduerien prouiñ eo yac’hus o froduioù a-raok kaout gwir da werzhañ anezhe.

Stourmet e vez ouzh al leviadenn-se gant lobby ar greanterezh kimiek hag ar Stadoù-Unanet. Padal ne gousto ar cheñchamantoù-se nemet 0,05 % eus sifr kengreadur ar greanterezh kimiek. Eus an tu all e vo divent ar gounid e-keñver yec’hed an dud hag gwareziñ an endro.

Evit gouzout hiroc’h : www.chemicalreaction.org.

galloudoù publik : les autorités publiques.

leviadenn europat : directive européenne.

Sifr kengreadur : chiffre d’affaires.

"Kig ha Faltazi"

Strollad c'hoariva Skol an Emsav, Barzhanoff, a ginnigo un abadenn d'ar 16 a viz Ebrel 2005, e Roazhon. E Ti-karter Kêryann da 8e30 e vo tu da welet ar pezh-c'hoari brezhonek nevez krouet gant Barzhanoff, "Kig ha faltazi."

"Loc’het mat e oa an istor avat... Ur dra bennak a oa war ar stern... Peadra da eilpennañ bed ar c’higerezh-moc’h. Ul labouradeg, ur mekanik, tri implijad hag ur stilo Bik : setu elfennoù un embregerezh peurvat.

Met diflukadenn Jacky a blanto reuz e red an darvoudoù. Den ne oar petra an diaoul a c’hoarvezo e-barzh an tachad kloz-se lec’h ma teuio war wel askre pep tudenn tamm ha tamm..."

6 euro, 4 euro evit ar studierien hag an dud dilabour. Digoust evit ar vugale.

Kement ha gouzout hiroc'h :
02 99 38 75 83 (Skol an Emsav). Postel : sae.bzh@wanadoo.fr.

Maraton

N'eo ket ken brudet a Maraton Pariz (redet disul ha gounezet gant ar C’henyan Salim Kipsang). N'eo ket "Maraton an traezh", evel ma vez anvet, ur redadeg a eil renk koulskoude. E-pad 6 devezh, e tommder Sahara Su-Maroko (a c’hell tizhout 45°C) ha war un dachenn diblaen ha leun a bejoù, e vint 800 o klask tizhout al linenn erruout. Evit an 20vet abadenn, bez’ eo tost 245 km a vo da redek a-unan pe a-stroll. Evit ar maraton dreistordinal-se, al lodenn vrasañ eus an dud a red dreist-holl evit an avantur denel bras ha n’eus nemet un 30 bennak anezho zo eno evit gounit. Setu ar pezh a vez anvet ur "sport pal pellañ."

Mell-droad

32vet devezh R1

Tolosa (6vet) 0-2 Roazhon (8vet)

Naoned (15vet) 2-2 Lyon (1añ)

33vet devezh R1

Bourdel (12vet) – Naoned (16vet)

Roazhon (5vet) – St-Etienne (9vet)

32vet devezh R2

Chateauroux (6vet) 1–2 Brest (4e)

Gwengamp (12vet) 3–1 Clermont Foot (18vet)

An Oriant (14vet) 3–1 Reims (15vet)

33vet devezh R2

Créteil (17vet) – Gwengamp (11vet)

Brest (4e) – Montpelhier (5vet)

Le Mans (3e) – An Oriant (13vet)

Million Dollar Baby

Stadoù-Unanet - 2004

Seveniñ : Clint Eastwood

Oscar ar film gwellañ

Oscar ar seveniñ da gClint Eastwood

Oscar an aktourez wellañ gant ur pennroll da Hilary Swank

Oscar an aktour gwellañ gant un eilroll da vMorgan Freeman

Golden globe ar sevener gwellañ da gClint Eastwood

Golden globe an aktourez wellañ da Hilary Swank

N’eus tra ebet gant Maggie (Hilary Swank) nemet ur youl divent. Fellout a ra dezhi e vefe graet war he zro gant Frankie (Clint Eastwood), an embreger nemetañ a c’hello – d’he soñj – kas anezhi da gampionez boks. Hag ur youl divent a ranko Maggie kaout e gwirionez evit lakaat an den kozh-se da reiñ skoaz dezhi.

"Tough ain’t enough" (kalet n’eo ket a-walc’h), setu ar pezh a vez embannet gant Frankie/Eastwood en e gomzoù koulz ha war e voger. Denel-kenañ eo en e greiz avat, hag ar memes tra eo gant ar film en e-bezh. Heñvel-tre ouzh Clint Eastwood e-unan eo moarvat : un deneridigezh dispar gwisket gant ur maskl dir. N’eus nemet familh Maggie a c’heller kaout keuz n’eo ket ken soutil hag ar peurrest eus "Million Dollar Baby."

Evit gouzout muioc'h : http://milliondollarbabymovie.warnerbros.com/home.html

The Fall – The Real New Fall LP (Formerly Country on the Click)

Embannet gant Action Records

Piv ? The Fall. Da lavaret eo Mark E. Smith, ar c’haner, hag e sonerien (int a zo skarzhet ha degemeret hervez imor Smith). Abaoe pegeit ? 25 bloaz. Pelec’h ? Manchester (evel-just, eme tud’ zo).

Hag ar sonerezh, neuze ? Evel boaz. P’emañ an holl o prederiañ war "distro ar rock", The Fall a ra rock da vat. Tonioù savet war nebeut-tre a notennoù, mouezh ar c’haner o tremen dre a bep seurt siloù hag e zistagadur ispisial (evit ur wech e c’haller kompren un nebeud gerioù), luskoù prim. Ar re a zo plijet gant ar vell-droad a vo laouen gant "Theme from Sparta FC", ar re a zo o chom war ar maez hag a gav hir o amzer a gano "I hate the countryside so much" war "Contraflow", hag an holl a zañso diroll en ur selaou "Open the Boxoctosis #2") ; Distro ar rock, neuze ?

Ne oa ket aet kuit.

Evit gouzout hiroc'h : http://www.visi.com/fall/

Tartezenn Tatin gant abrikez

Danvez :
250 g toaz bresk, 12 abrikezenn na vefent ket re zarev, 50 g amann, 1 loaiad vras a eoul olivez, 25 g kraoñ aval-pin krazet, 2 velen-vi, 50 g sukr, 15 cl dienn fresk.

Raktommit ar forn e 120 derez (tommder 4)

Digorit pep abrikezenn e daou, lamit ar mein. Lakait an amann hag an eoul da dommañ en ur baelon. Lakait an tammoù abrikez da veleniñ a bep tu e-pad div vunutenn. Arabat dezho dont da vezañ blot. Lakait anezho a-gostez war baper-splu. Basit ar melenoù-vi gant ar sukr hag an dienn fresk. E foñs ar moull-tartez, pozit an hanterennoù abrikez, an diavaez war an houarn. Lakait warno ar c’hraoñ pin krazet ha bannit an dienn. Pozit an toaz bresk war-c’horre en ur deurel evezh d’e begañ mat ouzh bord ar moull. Lakait da boazhañ er forn e-pad 10 munutenn. Goude, kreskit an tommder betek 6 / 180° ha laoskit 20 munutenn da boazhañ c’hoazh.