21 a viz Meurzh 2005, niv. 48

100 000 den e Brusel a-enep kemenn Bolkestein

Ur 100 000 den bennak a oa bet o vanifestiñ e straedoù Brusel disadorn, diwar galv sindikadoù eus meur a stad eus Unaniezh Europa. Frañsizien, Saozon, Belgiz, Alamaned, Italianed, Poloniz, Nederlandiz, Kroated, Portugaliz, Kipreneziz... Deuet e oant holl evit lâret "nann" d'ar c'hemenn europat savet gant Frits Bolkestein, bet ministr en Izelvroioù.

Savet eo bet ar c'hemenn a-benn frankizelaat marc'had ar servijoù en Unaniezh Europa (war ar gwerzhañ tiez ha tachennoù, ar c'huzulioù e-keñver merañ arc'hant, ar ginnigerien labourioù berrbad...). Pal ar c'hemenn zo aesaat ar muiañ ar gwellañ mont-ha-dont an embregerezhioù a ginnig seurt servijoù en Europa, war-bouez ar servijoù publik (an deskadurezh da skouer). Kalz a sindikadoù en Europa zo savet a-enep ar c'hemenn Bolkestein. Hervezo n'eo ket sklaer-tre an destenn war ar reolennoù sokial a rankfe bezañ doujet dezho gant an embregerezhioù : pe re bro orin an embregerezh, pe re ar vro nevez lec'h ma ya da ginnig e servijoù. Embregerezhioù zo a c'hellfe neuze profitañ eus al lezennoù a zo an aesañ evito (nebeutoc'h a gargoù, gwirioù an implijidi gwanoc'h...) hervez ar Stadoù.

Paper adveret

Produiñ paper adveret a lak da dalvoudekaat ar paperachoù kozh a vefe devet mod-all, hep servijout da netra ken. E Bro-C’hall eo ar paper kozh an danvez kentañ implijet gant greanterezh ar paper. 58,2% eus ar paper hag ar c’hartoñs a vez produet diwar baper adaozet. Gant se e c’heller implijout nebeutoc’h a goad : diwar 1 tonennad paper kozh e c’heller produiñ 900 kg paper nevez. Paneve se e vefe bet ret implijout ouzhpenn 2 donennad koad. Produiñ paper adveret a c’houlenn 7 gwezh nebeutoc’h a energiezh hag 20 gwezh nebeutoc’h a zour eget produiñ paper diwar goad. Hag en deiz a hiziv e c’haller kaout a bep seurt traoù diwar baper adveret : paper privezioù, paper prof, goloioù-lizher, kaieroù hag ur bern traoù all...

Met ret eo derc’hel soñj eo ar paper ekologelañ an hini na vez ket graet gantañ : espernit paper, daou du zo d’ar follennoù ! Ha m’ho peus c’hoant da voullañ Bremaik grit war baper adveret !

Kement ha goût hiroc’h : www.ademe.fr

Gouel "Des Petits Riens" en Aodoù-an-Arvor

Kinniget e vo 5vet gouel "Des Petits Riens", aozet gant Ofis-departamant Diorren ar Sevenadur en Aodoù-an-Arvor, etre ar 1añ a viz Ebrel hag ar 1añ a viz Mae 2005. Pal ar festival-se zo kinnig abadennoù a bep seurt er muiañ ar gwellañ a lec'hioù (e ti tud, en ul lise, un iliz, un davarn, un atant...). 53 c’humun eus Aodoù-an-Arvor a gemero perzh er bloaz-mañ. Abadennoù sonerezh, c'hoariva, margodennoù, kontadennoù, diskouezadegoù skeudennoù, arzoù, c'hoarioù a bep seurt, evit ar re vihan pe ar re vras... Strolladoù arzourien bihan a vez dre vras o kinnig an abadennoù, strolladoù na gavont ket leurennoù prest da zegemer anezho. Strolladoù eus ar vro koulz a strolladoù o tont eus a bep lec'h er C'hwec'hkorn.

Prizioù bihan a vez ivez : 5 pe 3 euro peurvuiañ, pa ne vez ket digoust gwezhioù all.

Evit gouzout hiroc'h : ODDC 22, pgz : 02 96 60 86 10. contact@oddc22.com. http://www.oddc22.com.

Atleterezh

E Sant-Galmier, e-kichen Sant-Etienne, e oa bet redet kampionad ar bed ar c’hross country en dibenn-sizhun-mañ. Evel boaz, rederien eus Afrika zo bet trec’h hep poan war ar rederien "wenn". Evel boaz ivez, ez eus bet adkavet rederien eus Etiopia pe Kenya war ar podiom. Hag evel boaz, Kenenisa Bekele, ar reder eus Etiopia, n’en deus ket lezet ar plas kentañ da dremen dre m’en deus gounezet en div redadeg en deus redet, (ar c’hross berr disadorn hag ar c’hross hir disul) ! Da 22 vloaz, an-hini hag a zo dija 8 gwech kampion ar bed ar c’hross ha kampion olimpek 2004 evit an 10 000 m, en deus bet kalon da ziskouez e oa atav an hini kreñvañ, ha pa ne oa ket prientet eus ar gwellañ (e zanvez-pried zo marv e penn-kentañ ar bloaz...).

Mell-droad

30vet devezh R1

Naoned (16vet) 0-0 Aiacciu (18vet)

Caen (17vet) 2-2 Roazhon (8vet)

31vet devezh R1

Auxerre (5vet) – Naoned (13vet)

Roazhon (9vet) – Bastia (19vet)

30vet devezh R2

Laval (8vet) 2-1 Brest (5vet)

An Oriant (15vet) 2-1 Clermont Foot (18vet)

Gwengamp (12vet) 3-1 Niort (20vet)

31vet devezh R2

Amiens (15vet) – Gwengamp (12vet)

Créteil (19vet) – An Oriant (13vet)

Brest (6vet) – Sedan (4e)

The life aquatic with Steve Zissou (La vie aquatique)

Stadoù-Unanet - 2003

Senario ha seveniñ : Wes Anderson

Brudet-kenañ eo deuet Steve Zissou (Bill Murray) hag e skipailh da vezañ gant o zeulfilmoù moroniezh. Arabat e vefe d’an harozed mont war an oad avat. Ne ra ket berzh ken oberennoù an "team Zissou" abaoe pell ; n’eo ket dedennet ken an arvestourien gant an istorioù morlenn ha pesked liesliv. Redek war-lerc’h ur morvleiz ramzel a c’hellfe bezañ an doare gwellañ da beurober red micher an den hep bezañ gwelet evel un has-been ken.

Marmouzañ teulfilmoù Cousteau a ra "The life aquatic" ; ar re n’o defe ket komprenet diouzhtu a vo heñchet gant boned ruz ofisiel ar skipailh. Divoutin a-walc’h eo ar stumm film-se ; maget eo gant kened kitsch filmoù moroniezh ar bloavezhioù 60 (an doare da filmañ, an efedoù ispisial kamm, h.a.) ha gant ur fent didouell douget brav gant Bill Murray. Reiñ a ra da soñjal kalz er "Monty Python’s Flying Circus" e gwirionez, ha muioc’h c’hoazh er film "The Rutles" a rae van da gontañ buhez ur strollad rock heñvel-poch ouzh ar Beatles. Setu ar pezh a vank da film Wes Anderson marteze : delc’her spered un teulfilm faos betek ar fin.

Kement ha gouzout muioc'h : http://lifeaquatic.movies.go.com

Interpol – Antics

Embannet gant Labels

Arabat c’hoarzhin. Paotred Interpol o deus savet o endro abaoe o fladenn gentañ, un endro diazezet war ul liv : an du. N’eo ket cheñchet an traoù. Siouloc’h eo Antics eget Turn On The Bright Lights, met ken stignet all. Kregiñ a ra dousig an traoù gant Next Exit, met tarzhañ a ra pep tra e-kreiz ar bladenn gant an ton gwellañ : Slow Hands. Sonerien Interpol a zeu a-benn da neveziñ ar sonerezh post-punk en ur gemer en-dro merkoù dibar ar sonerezh-se : gitar boud kreñv, luskoù gitar tredan prim, hag ur vouezh izel ha boemus war an dro. Ar re a fellfe dezho dizoloiñ ar strollad a c’hallo kregiñ gant o fladenn gentañ, rak aesoc’h eo da selaou memestra.

Interpol a sono live e Naoned d’an 20 a viz Ebrel.

Evit gouzout hiroc’h : http://www.interpolny.com/

Ar c'hiz e Dinarzh

Evit an 12vet bloavezh e tegemero Dinarzh ur festival kemenerien yaouank. D’an 22, 23 ha 24 a viz Ebrel e tremeno an abadenn. Digor e vo ar genstrivadeg d’an danvez kemenerien a-benn gounit ar priz meur. Ret e vo da bep hini anezho kinnig evit ar baotred pe ar merc’hed : 5 dilhad, 1 sae-eured pe un dilhad-eured, dilhad-kouronkañ (gwenn ha glas dre ret), un dilhad evit dibunañ, un dilhad all. Tud vrudet a gemero perzh er juri er bloaz-mañ c’hoazh moarvat. N’eo ket anavezet anv ar prezidant(ez) c’hoazh. Chantal Thomass, Olivier Lapidus, Paco Rabanne pe Lolita Lempicka a oa bet e penn ar bodad-barn en degouezhioù bet. Danvez loreidi a bep korn eus ar bed a zeuio da glask lakaat o labour da vezañ anavezet gant kemenerien veur.

Kement ha gouzout hiroc’h : http://www.festival-dinard.com