Lun 27 a viz Du, niv.124
Sizhun 48 - 2006

Pellgargit ar pennadoù e stumm Word

Petra oa keleier Bremaik warlene? Klikit amañ!
Evit distreiñ d'ar bajenn degemer

4000 den nec'het o vanifestiñ e Kemperle

Emañ Bro-Gemperle o vevañ ur mare diaes. Met 4000 den (da lavaret un drederenn eus poblañs Kemperle), deuet eus Bro-Gerne ha Bro-Gwened, a oa disadorn e straedoù ar gêr oc’h embann "Kemperle a vevo!" Ret eo gouzout ez eus 2000 post labour en arvar er vro : labouradeg paper Mauduit (staliet er gêr abaoe ouzhpenn kant vloaz), labouradeg Nestlé-Purina, labouradeg Volaven (kig yar-indez)... Stourmerien ar sindikadoù o doa kemeret perzh er vanifestadeg evel-just, asambles gant kenwerzherien Kemperle, serret o stalioù ganto dec'h, nec'het-kenañ evit amzer da zont ar c'horn-bro. Dilennidi a oa e-touez an dibunerien evel-just, ar gannaded Gilbert Le Bris, Loeiz ar Peñseg ha Bernard Poignant, met ivez kumuniezh-kumunioù Bro-Gemperle, Mickael Quernez, ha maered ar vro.

An dilennadegoù hag an endro

Ur c'hementad bras a baper a vo bevezet e-pad an dilennadegoù o tont : 42 milion a c'holoioù-lizher devezh ar vouezhiadeg, ha 270 milion evit kas ar folennoù-emginnig da diez an dud ! Embannet ez eus bet gant modiernva an diabarzh e vefe implijet paper a eil implij evito. War an dachenn-mañ ez eus bet doujet ouzh ar pezh a oa bet goulennet gant Greenpeace, Festival an Avel, hag Alliance pour la planète.
Met an dra-mañ na gemer e kont nemet ul lodenn eus ar paper implijet evit an dilennadegoù : hini ar paper pourvezet gant ar Stad. Ar folennoù-emginnig, da skouer, a vo savet gant pep strollad a ginnig un den. Redioù a zo a-berzh ar Stad evit ma vefe restaolet prizioù seurt mouladurioù, ha lod ouzh ar redioù-mañ a denn ouzh an endro. Da lâret eo emañ ar galloud gant ar Stad da rediañ ar strolladoù politikel d'ober gant paper adaozet evit ma vefe restaolet o arc'hant dezho. Siwazh, n'eo ket bet ken strizh ganto : 50% a baper adaozet a rank mont da sevel ar paper implijet (keidenn ar pezh az a dija da sevel ar paper), hag o tont eus forzh peseurt tiriad, zoken ar re a droc'h koad hep plantañ gwez en-dro... Labour a zo c'hoazh !

M.M.

Krouidigezhioù liesliv evit ar re vihan

Abaoe an 22 a viz Du ha betek an 21 a viz Kerzu emañ ar gevredigezh Très Tôt Théâtre o kinnig darvoudoù niverus tro-dro da arzoù liesseurt evit tud yaouank departamant Penn-ar-Bed : 15 abadenn, en o zouez 10 krouidigezh, evit sellerien bras ha bihan, adalek 8 miz zoken, a vo aozet e 26 kumun disheñvel. Pal ar gouel-mañ a zo en em adkavout, bugale ha tud vras, evit kejañ ouzh arzourien a vremañ ha dizoleiñ arvestoù c’hoariva, dañs, sonerezh pe c’hoazh mergodennoù.

Etre ar 6 hag ar 17 a viz Kerzu e vo "Théâtre à tout âge" e Kemper : e c’hoarivaoù Kerne ha Max Jacob met ivez e Tiez An Holl Penharz, ar Vilin C’hlas hag an Erge Vihan. "Ur vaouez a zo o pourmen deus un daolenn d’unan all, ha ni d’he heul, deus un dremm d’unan all, deus ur vamm d’unan all… Sed aze dremmoù, mouezhioù, korfoù, fromoù ar maouezed diskuliet d’ar sellerien". Istor ur verc’h hag he mamm o koshaat, o koll he eñvor. Maskloù ha mergodennoù "a gaso hon freder war-zu ar marv, an digenvez, an disparti, ar ganedigezhioù, ar c’hozhni… Leonor Canales a gas ac’hanomp e-mesk he eñvorennoù bugaleaj. Ur veaj fentus ha fromus war un dro : pep hini a gavo ul lod deus e istor, gwaz, maouez, tad, mamm pe bugel … rak an abadenn a zeu a-benn da ziskouez gant kizidigezh, hollegezh an darempredoù gant ar mammoù."

H.L.

Un nebeud abadennoù all :

"Hop là, ça tourne !" evit an vitouzed, adalek 8 miz.

"Le remède de Polichinelle" c’hoariva ha mergodennoù, adalek 6 vloaz.

"Animale (Les Naufragées)" dañs a vremañ, adalek 3 bloaz.

"Petit Poucet" c’hoariva gant paper, adalek 6 vloaz.

"Ecoute ta mère et mange ton short" abadenn rock, adalek 5 bloaz.

"Petites illuminations" barzhoniezh da welet, gant sonerezh, adalek 4 vloaz.

"Le garçon aux sabots" c’hoariva evit dañserien hip-hop, adalek 6 vloaz

"Le Roi des Papas" abadenn gant kanaouennoù diroll, adalek 3 bloaz

Evit gouzout hiroc’h : http://www.tres-tot-theatre.com

Gant piv ez aio ar Vell Aour ?

Fenoz eo e vo roet 51vet Mell Aour ar vell-droad etrebroadel gant ur juri 52 gelaouenner europat, dibabet gant ar gelaouenn France Football. Warlene e oa bet loreet ar c'hoarierien vrazilian hollvrudet Ronaldinho Gaucho. Hage emañ eñ adarre e penn al listenn anvioù c'hoarierien a c'hellfe kaout ar Vell Aour. Klevet a reer ivez anvioù an Italian Fabio Cannavaro (Real Madrid), Steven Gerrard (kabiten skipailh Liverpool), bet war ar renk warlene c'hoazh, Miroslav Klose (Werder Bremen) ha Florent Malouda (skipailh Lyon).

Ar Vell Aour a vo roet fenoz e-tro 7e d'unan eus ar c'hoarierien-se moarvat e-kerzh an abadenn "Le Grand Journal" war Canal+, kinniget gant Michel Denisot.

Babel

Stadoù-Unanet – 2005
Seveniñ : Alejandro González Inárritu

Dre guzh e pren ur saver deñved eus Maroko ur fuzuilh. Ur vagerez zo rediet vec’hikan da gas daou vugel stadunanat ganti da eured he mab en tu all d’ar vevenn. Ur c’houblad war var da zispartiañ a ya da veajiñ en estrenvro gant ar spi da gavout ul lañs nevez. Ur grennardez bouzar ha mut eus Japan zo e barr he reveulzi goude marv he mamm. Peseurt liamm a zo etre tout an dud vat-se ?

Kenderc’hel a ra Alejandro González Inárritu gant e hent : kinnig a ra bommoù buhez strewet en egor hag en amzer, ha n’eo nemet tamm ha tamm e vo adsavet steuñvenn an istor e penn an arvestourien. Efedus-tre eo ar sevener evit diskuliañ santadoù tud kollet-mik e red o buhez. Un doare "efed balafenn" a vez pouezet kalz warnañ er film-mañ. Siwazh n’eo ket ken fromus, brav ha kalet ha 21 Grams (2003), film diwezhañ Inárritu : re a dudennoù zo en taol-mañ evit ma vefent kinniget don, kalz a nerzh a vez kollet gant an dra-se moarvat.

Meriadeg Vallerie

Evit gouzout hiroc’h : http://www.paramountvantage.com/babel/

Port Royal – Flares

Embannet gant Resonant

War gartenn ar rock e rankomp bremañ menegiñ ul lec’h nevez : Italia, hag evit bezañ resisoc’h : Genova. Pa selaouer ar bladenn, koulskoude, e vefec’h techet da soñjal e teu Port Royal eus Sveden.

Da lavaret eo e kinnigomp ur seurt sonerezh skañv met leun a zanvez memestra, tonioù a ziorren war hir dermen (10 ton, 77 munutenn e pad ar bladenn, mouezhioù klevet a-bell, trouzioùigoù elektronek), ha lodennet a-wechoù (Flares da skouer, e teir lodenn). Emaint neuze en un tu bennak etre ar post rock, ar shoegaze hag un nebeud traoù all.

N’eus ket pell zo em eus ranket implijout geriaoueg an douaroniezh evit kaozeal diwar-benn pladenn Black Dice, evit pezh a sell ouzh Port Royal ez eo tamm pe damm memestra : kuitaat a reomp tachenn voutin ar rock, anat deoc’h.

Ma selaouit Flares e soñjit e pladennoù ambient Brian Eno pe c’hoazh e pladenn Sigur Ros, met ur seurt Sigur Ros ha n’eo ket randonus. Ur bladenn a glot penn-da-benn gant ar goañv.

R.M.

Muioc’h a ditouroù : http://www.port-royal.it/

10 vloaz an "Nozvezh Velen" en Eliant

D’ar sadorn 2 a viz Kerzu e vo lidet 10vet deiz-ha-bloaz unan deus festoù-noz brudet mat Bro Gerne, an "Nozvezh Velen", lec’h ma vez treuswisket an dañserien. Evel kalz gouelioù ba’r vro e oa ganet houmañ diwar un emgav mignoned izili deus kelc’h keltiek Eliant "Ar Vro Melenig" ha deuet da vezañ un darvoud pouezus a-walc’h evit desachañ kozh ha yaouank deus pep korn bro.

Ul leurennad dreistordinal a vo kinniget eta gant 30 strollad a lakao ar fest da badout etre 5 eur abardaez ha 2 eur vintin ! Enoret e vo bagadoù ar vro gant pemp anezho (Brieg, Penharz, Karreg an tan, Kemper ha Konk-Kerne) ha "bagad" ar pennoù-sardin, ar strollad-kouevr A Bout De Souffle, deus Douarnenez. A bep seurt sonerezhioù liesliv a vo tu klevet gant Tud, Termajik, Storvan, Spoum, Roll ma yar, Melen Zicos, Groove Boys hag Elian Paddy. Ar c’houbladoù sonerien ha kanerien ne vint ket disoñjet peogwir e vezint niverus ivez gant Les Traînes Meurienne, Ebrel-Flatrès, Rivoalen breur ha c’hoar, ar baotred Hénaff ha Morvan ha tud all c’hoazh !

Peadra da zaremprediñ diehan al leurenn goad evit an dañserien galonekañ. 

Seul dreuzwisketoc’h, seul welloc’h !

Hoel Louarn

Kirri-boutin digoust a vo da gas ha degas an dud etre Kemper ha kêrioù all tro-dro, hag Eliant.

Mont-tre : 8 euro

Kirinad legumaj 3 liv

Danvez (evit 10 den) : 500 g pinochez – 500 g kaol-fleur- 500 g karotez – 6 vi – 15 g holen – pebr gwenn - kraoñ-muskadez – 30 cl dienn foetet

Dibluskit al legumaj ha troc’hit ar c’harotez a skejennoù. Poazhit al legumaj unan-hag-unan en dour berv gant holen. Ur wech poazhet, drailhit anezho disparti. Lakait tamm ha tamm 2 vi foetet e-barzh pep yod legumaj hag ingalit an dienn. Lakait pebr ha holen hag ar c’hraoñ-muskadez.

En ur girin amanennet, lakait ar yod karotez, ar yod kaol-fleur e kreiz, hag ar yod pinochez war-c’horre (gellout a reer lezel ar girinad da galetaat er yenerez).

Poazhit en dourgib er forn (150°) un eurvezh. Divoullit, ha troc’hit a dammoù. Servijit gant kig pe besked.

Mari Lubrano

Ar saezhataer

(23 a viz Du – 21 a viz Kerzu)

Er bloavezh 2007 e vo pouezus-tre evidoc’h dispakañ ho personelezh, dre ar garantez ha dre al liammoù gant ar re all. Mat e vo pep tra ma teuit a-benn da embann sklaer ar pezh hoc’h eus c’hoant da gaout hep leuskel a-gostez ar re a zo kar deoc’h. Seul vuioc’h e vo klasket ganeoc’h kavout ur c’hempouez etre emgarantez ha brokusted, difenn hoc’h interestoù ha doujañs ouzh ezhommoù ar re all, seul vuioc’h e c’hoarzho ar vuhez ouzhoc’h.
War-lerc’h ho po c’hoant da sikour ar re all, muioc’h ha startoc’h. Gallout a rafec’h kemer perzh en obererezhioù sokial pe speredel. Dre ma ne blij ket deoc’h bezañ hoc’h-unan penn, emezelit en ur gevredigezh pe en ur strollad a labour war an dachenn denegour. Kalz a zeskamant hag a levenez a c’hellfec’h tennañ diwar an emzalc’h-se.

Gwener a vo ganeoc’h. Ma vezit ken hoalus hag e c’hellit bezañ a-wezhioù ne vanko ket karantez deoc’h. Daoust deoc’h gouestlañ hoc’h amzer d’ho micher ha d’ho familh, klaskit kemer un tammig amzer evit ober war ho tro. Hoc’h amourouz-ez a vo laouen ma teuit a-benn da souezhañ anezhi/añ. Diwallit da chom hep goulenn re rak ne vefec’h ket digarezet bep tro. Ar re a zo o-unan a vo sikouret gant Yaou hag Ouran. Met da ziwall a vo ivez : ne weloc’h ket sklaer bepred. A-raok bezañ re entanet e vo mat deoc’h prederiañ un tamm.

Ne vo ket aes pep tra e bed al labour. Trapoù a vo stignet deoc’h. Skoilhoù a bep seurt a vo war ho hent. Diaes e vo lakaat anezho da gouezhañ peogwir e teuint alies eus youl fall enebourien. Dizoloet e vo ganeoc’h ez eus tud a vag gwarizi en ho keñver. Hag ar re-se a glasko stankañ an hent deoc’h. Bezit dispont koulskoude, rak c’hoari a raio ar planedennoù a-du ganeoc’h. Beajiñ ha diorren hoc’h aferioù a c’helloc’h ober. Hag a-feur ma’z aio ar bloavezh war-raok e vo plaenet an traoù tamm pe damm.

Katell Leon

Deiziataer hollvrezhonek 2007

An deiziataer 2007 zo deuet er-maez ! Kavet e vo er stalioù levrioù breizhek hag e Skol an Emsav, e Roazhon, evel-just. Un doare nevez zo gant deiziataer 2007. Bihanoc'h eo evit mont gwelloc'h er chakodoù hag er seier-dorn. An Deiziataer hollvrezhonek zo ur benveg bepred talvoudus : leun a chomlec'hioù (ouzhpenn 200) hag a ditouroù vo kavet diwar-benn Breizh hag ar brezhoneg, un daolenn kemmadurioù, kodoù-post kumunioù Breizh... 13 euro an tamm.

Skol an Emsav, 25 straed Pierre Martin, 35000 Roazhon:
Pgz: 02 99 38 75 83. sae.bzh@wanadoo.fr.  http://perso.wanadoo.fr/skol.an.emsav.