Lun 9 a viz Du, niv.260
Sizhun 46 - 2009

Pellgargit ar pennadoù e stumm Word

Evit resev kemennadenn nevez Bremaik bep Lun,
kasit ho chomlec'h da: bremaik@free.fr

Petra oa keleier Bremaik bloaz zo? Klikit amañ !

Evit distreiñ d'ar bajenn degemer

Diskar moger Berlin 20 vloaz zo

D'an 9 a viz Du 1989 e o bet test ar bed a-bezh eus ur bobl oc’h unaniñ en-dro: Alamaned ar Reter ha re ar C'hornog a oa o tremen dreist ar voger a ranne ar gêr e daou abaoe 1961. Arouez ar "brezel yen" hag ar bloc'had soviedel a oa frailhet da vat goude an emgav alaman-se. Lidet e vo hiziv war an ton bras 20 vloaz an degouezh istorel-mañ evit Alamagn, Europa hag ar Bed. 100000 den zo gortozet e Dor Brandenburg. E-touez ar pennoù bras pedet emañ Gordon Brown, kentañ ministr saoz, Hillary Clinton, sekretourez-Stad ar Stadoù Unanet, Dmitri Medvedev, prezidant Rusia, Nicolas Sarkozy, prezidant Frañs, met ivez tud brudet ar "brezel yen", Mikhaïl Gorbatchev, gouarnour soviedel kozh, ha Lech Wałęsa, enepkomunour brudet. Kentañ ministr Alamagn, Angela Merkel, zo bet desavet en RDA (Republik Demokratel Alamagn). Mont a raio hi hiziv e post-harz kozh Bornholmer Strasse, unan eus ar re gentañ bet digoret 20 vloaz zo, pa oa miliadoù a Alamaned en-dro d'ar voger.

Div bajennad zo gouestlet d'an danvez-mañ e niv. miz Du Bremañ.

N'eo ket prest an traoù evit Kopenhagen

A-benn ur miz bremañ e vo dalc'het kendalc'h Kopenhagen, e-lec'h ma vo kemeret an divizoù a erlec'hio ar re a oa bet kemeret e Kyoto. Abaoe pell e vez klevet kaoz eus ar c'hendalc'h-se, ar c'hevredigezhioù o stourm evit an endro da skouer a wel anezhañ evel ur mare pouezus-tre evit ma ne bignfe ket re an hin. En em brientiñ a ra ar broioù, met diouzh ar pezh a vez gwelet, n'eus ket kalz outo prest da gemer un hent frank evit an hin. Renket int bet gant Greenpeace, diouzh ar strivoù int prest d'ober, ha gwelet e vez eo gant Sina hag Indez emañ ar plas gwellañ. Pell emañ broioù Europa diouzh ar palioù a vije ret lakaat, hag e-touez ar re-se eo Bro-C'hall an hini bellañ. Pelloc'h c'hoazh emañ ar Stadoù-Unanet. War daou boent e sav kudennoù gant ar broioù-se: da gentañ, ne roont ket sifroù resis eus ar feur digreskiñ int prest da dizhout, pe n'o deus ket c'hoant e vije redius ar re a vo roet, ha da eil, ne embannont ket pegement e vijent gouest da reiñ evit sikour ar broioù paour da vont war-zu un emdroadur hep saotradur. Gant kement-se eo posupl ne vije kemeret diviz ebet e Kopenhagen a-benn ar fin, hag e vije ret neuze daleañ mare an divizoù.

M.M.

Sellet ouzh renkadur Greenpeace:
http://www.greenpeace.fr/

Max Relouzat e Ti ar Vro Kemper, e miz Du

A-hed miz Du e vo kinniget e Ti ar Vro Kemper un diskouezadeg gant Max Relouzat. Un arzour bet desket kizellañ drezañ e-unan eo, o tont eus Martinik. Abaoe e 10 vloaz emañ o labourat war ar c’hoad. Entanet eo da vat gant se. Tro en doa bet d'ober anaoudegezh gant Aimé Césaire e 1955. Ar gejadenn-se a zo bet peadra evitañ da zispakañ e arz er c'hizellañ. Deskard kalvezer eo bet, gant e vestr Robert Julienne Cafice, lesanvet "le berger du bois" (mêsaer ar c'hoad). Kizelladennoù gant koad robin, derv, koad-pin Douglas ha reoù all c'hoazh, a vez krouet gant Max Relouzat, awenet gant an natur hag arouezioù ar vuhez.

Ti ar Vro Kemper, 3 leurenn Familh Gabaï, 29000 Kemper

Pgz: 02 98 90 70 43

Postel : tiarvro-kemper@wanadoo.fr

Lec'hienn: www.tiarvro.org

R2: derby Naoned-Gwengamp fenoz

Fenoz da 8e45 noz e vo graet an taol-kas war tachenn ar Beaujoire gant an hanter eus ar Vretoned e R2 er bloaz-mañ. P'emañ Naoned e lodenn uhelañ ar renkadur (4e), emañ Gwengamp er penn-izelañ (19vet), war var da ruzañ er rann "National". Daoust da bep tra n'eo ket gwall laouen Kanaried Gernot Rohr: flastret e oant bet en Havr-Nevez ur sizhun zo 0-4, hag e Laval eizhteiz a-raok e oant bet rampo, 0-0. Echuiñ a rae aze ur rummad 11 krogad hep koll gant Naonediz, c'hoant da vat ganto pignat en-dro er R1. Diouzh tu ar re ruz-ha-du eo startoc'h ar jeu, a-galz. Abaoe dek krogad n'eo ket aet ar maout gant Gwengampiz, abaoe an 23 a viz Eost! Argad laoskañ R2 eo evit ar poent hini skipailh EAG, gant 8 pal e 13 match. Prezidant ar c'hleub, Noël Le Graet, zo bet meur a wech o komz dirak ar c'hoarierien ha staff ar skipailh en deizioù-mañ evit ober en doare ma vefe cheñchet penn d'ar vazh gant paotred Gwengamp fenoz.

Michael Jackson's This Is It

Stadoù-Unanet – 2009

Seveniñ : Kenny Ortega

D’an anaon e oa aet Michael Jackson d’ar 25 a viz Even 2009. Ret e oa bezañ aet da vakañsiñ en ur c’halaksienn pell-pell eus amañ evit tremen hebiou d’ar c’heloù-se. War-nes kregiñ gant un droiad-kimiadiñ a-dreuz ar bed e oa neuze. Frammet ez eus bet amañ un dibab eus enrolladennoù ar pleustradegoù da ziskouez petra a oa war e soñj evit sevel an abadenn dudiusañ biskoazh.

Ken divoutin hag an den eo ar stumm film-se rak ne oa ket bet rakwelet e vefe savet un abadenn sinema gant ar bommoù a veze enrollet e-kerzh ar pleustradegoù. Evit dielloù Michael Jackson e-unan e vezent dastumet, sañset; kredabl e vije bet implijet darn da vagañ un DVD bennak ha setu holl. “Sed’aze an diskoulm zo bet kavet gant produerien argant-sec’hedik da walc’hiñ koll an abadenn aet d’ar strad” a lavarfe tud mouzhet zo. Ne gav ket din. Gwelloc’h eo bezañ plijet un disterañ gant oberenn Michael Jackson, evel-just, met ur bam eo gwelet e oa atav un dañsour ken bividik da 50 vloaz ha, dreist-holl, vad a ra e welet en-dro evel un arzour klok ha neket evel talbenn ar c’hazetennoù people.

Meriadeg Vallerie

Evit gouzout hiroc’h :

http://www.thisisit-movie.com/

Miz an teulfilmoù: 10vet!

Er miz-mañ e vo kinniget 10vet festival "Miz an teulfilmoù". Pal ar jeu zo brudañ ar muiañ ar gwellañ sinema an teulfilmoù, en ur ginnig oberennoù a galite, na vezont ket bannet pe skignet gwall alies. Ingal e vez aozet war memes tra kejadennoù etre ar sellerien ha sevenerien ar filmoù. Kalz a abadennoù a vo aozet e miz Du 2009 adarre: 248 abadenn, aozet gant 154 framm, e 133 kumun disheñvel. Temoù disheñvel zo bet dibabet hervez al lec'h. E Penn-ar-Bed hag er Mor-Bihan e vo lakaet en a-raok an teulfilmoù savet er vro pe gant tud eus Breizh (L'autre Mai gant Jacques Willemont, diwar-benn stourm ar vicherourien hag ar studierien e Naoned e 1968, pe O seizh posubl, gant Soazig Daniellou, diwar-benn bachelourien gentañ Diwan zo 30 vloaz hiziv). En Aodoù-an-Arvor eo liesseurted an temoù a zo lakaet en a-raok (Toute l'histoire de mes échecs sexuels gant Chris Waitt). En Il-ha-Gwilen eo ar yaouankiz (Les demoiselles de Nankin gant Camille Ponsin da skouer, diwar-benn div studierez sinaat). El Liger-Atlantel e vo daou dem bennañ, "broioù an Hanternoz" (Un détroit surgit des glaces gant Billy Yves da skouer), ha "sevel traoù a-gevret" (Maison 3E: Ecologique, Economique, Entr'aide gant Patrick Baronnet, da skouer).

Evit gouzout hiroc'h:

www.moisdudoc.com

www.filmsenbretagne.com

Kinnig a raio ivez skourr Kawan Levraoueg-departamant Aodoù-an-Arvor abadennoù gant teulfilmoù diwar-benn ar sonerezh.
(evit gouzout hiroc'h: 02 96 49 12 06)

Jacno (1957-2009)

Sex, butun ha rock'n'roll. Ur butuner daonet e oa Jacno, sed orin e anv (diwat hini krouer logo ar pakadoù butun Gitanes). Plijout a rae dezhañ sonerezh David Bowie, hini The Who pe c'hoazh hini The Kinks.

Gantañ e voe krouet unan eus ar strolladoù punk kentañ e Frañs e 1976, Stinky Toys e anv. Er memes bloavezh e sonjont er festival punk kentañ aozet er 101 Club e Londrez. Daou albom a lakjont embann e 1977 hag e 1979, a-raok ma vefe divodet ar strollad. Goude-se e kendalc'has Jacno da seniñ ha da ganañ gant Elli Medeiros (hag a oa ivez er Stinky Toys).

E 1980 e reas berzh bras gant un ton eeun-kenañ, savet gant ur c'henaozer nemetken, hag anvet Rectangle, ma klever levezon Kraftwerk. Kenderc'hel a reas da labourat gant Elli Medeiros hag e savjont sonerezh ar film Les nuits de la pleine lune a-raok dispartiañ e 1984. En holl ec'h embannjont pemp albom dindan an anv Elli & Jacno. Etre 1988 ha 2006 ec'h enrollas pemp pladenn e-unan. Er memes mare e labouras ivez gant arzourien all evel Etienne Daho, Les Valentins, Daniel Darc pe Hélène Noguera. Produiñ a rae o fladennoù, pe e save an tonioù.

Un dandy nebeutoc'h.

R.M.

Muioc'h a Jacno :

Plastic Faces gant Stinky Toys :

http://www.dailymotion.com

Birthday Party gant Stinky Toys :

http://vodpod.com

A-youl ar Gwent ha Pirc'hirin ar Mor

kinniget gant Pierrette Kermoal

A-benn disadorn, d'ar 14 a viz Du, da 5e goude-kreisteiz, e kinnigo Pierrette Kermoal daou embannadur nevez gant Aber, e ti l'Encre de Bretagne, e Roazhon.

Da gentañ tout e vo kaoz eus A-youl ar Gwent, ur studienn diwar-benn Barzhonegoù Roparz Hemon. Bed ar barzh a vez displeget gant Pierrette Kermoal en he levr, hag e zodennoù diazez ivez: an avel, an digoradur, an huñvre, hiraezh an harluad hag ivez barzhonegoù Gawain, ha bepred, atersoù ar c’hrouer...

Gant an ti-embann Aber ez eus bet produet nevez zo ur bladenn, Pirc'hirin ar Mor, a vo kinniget gant Pierrette Kermoal ivez. Eizh skrid gant Roparz Hemon zo bet dibabet evit ar CD-mañ, lennet gant Loeiz Gwilhamot, animatour brudet war France Bleu Breizh Izel. Savet ha kempennet en deus ar soner Youenn Manchec tonioù a-ratozh evit klotañ gant ar c'homzoù.

E brezhoneg e vo aozet  ar gaozeadenn.

L'Encre de Bretagne, plasenn Hoche, e Roazhon, da 5e g.k.

Evit gouzout hiroc'h:

www.aber-bzh.info

www.encredebretagne.com

Brezhoneg en Ti-post: votadeg gant Ai'ta!

Disadorn e oa bet aozet gant izili Ai'ta!, ur strollad a stourm evit reiñ muioc'h a blas d'ar brezhoneg er vuhez pemdez, ur votadeg digor d'an holl, dirak nav zi-post eus Breizh. E Lannuon, Bear, Gwengamp, Pondi, An Alre, Gwened, An Oriant, Brest, Lesneven, o deus bet tro an dud da respont d'ar goulenn-mañ: "Daoust ha mat eo deoc'h e vefe divyezhek brezhoneg-galleg an tier-post publik o statud ?". Hervez ar strollad Ai'ta!, e oa bet 791 den o kemer perzh er votadeg-se. 95% diouto o defe respontet "ya". En Oriant e oa bet ar muiañ a dud o kemer perzh, gant 135 voter. 131 den o deus respontet "ya", 1 den en deus respontet "n’ouzon ket" ha 3 zen o deus respontet "nann". Kalz a dud o deus mouezhiet ivez e Gwened (120), Pondi (114), Gwengamp (90), Brest (89) ha Lannuon (84). E Lesneven e oa bet an nebeutañ a dud o vouezhiañ, gant 33 voter (25 den o respont "ya", 4 den "n’ouzon ket" ha 4 den "nann"). Kalonekaet eo bet izili Ai'ta evit kenderc'hel gant koulzadoù evit ma vefe kinniget brezhoneg en tier-post. Ma vefe adaozet gant Ai'ta! seurt votadeg e vefe dedennus gwelet an disoc'hoù e kêrioù bras reter ar vro, evel Naoned ha Roazhon.

Evit gouzout hiroc'h:

http://ai.ta.free.fr/

Lid breizhat an 11 a viz Du

Evel bep bloaz e tougo ar gevredigezh Bemdez bri d’ar miliadoù a dud bet reuziet gant ar "Brezel Bras" (1914-1918). Lakaet eo da bal dezhi kas sevenadur Breizh war-raok ha lakaat da anat reizhwir e ziorren. Diouzh le ar stourmerien gozh deuet ag an talbenn e vo e doare ul lid hep lu, dilifre ha diarm a-benn lidañ ar peoc’h. Lakaet eo bet an emgav d’ar Merc'her 11 a viz Du da 11e30, da-heul al "lidadegoù kefridiel", war dreuzoù uhelenn ar Waremm, diwar-zu straed Sant-Tropetz (e-tal Kuzul an Departamant) e Gwened. Digor d’an holl e vo.

Evit gouzout hiroc'h:

Kevredigezh Bemdez, Ti ar c’hevredigezhioù,
6 straed ar Govuerezh, 56000 Gwened.
Pgz: 06 11 51 43 15.

http://membres.lycos.fr/bemdez/

Deiziataer 2010, brezhoneg-tout!

Goude ur bloavezh ehan en deus Pol Brezhoneg Skol an Emsav embannet un deiziataer hollvrezhonek adarre evit 2010.

Adkavet e vo ar stumm klasel a blije d’an dud. 17cm uhelder ha 9cm ledander, gant ar skrid a-led. En ur golo plastik du ha gwenn e vo kavet an deiziataer, pevar liv penn-da-benn, hag en e gichen ur c’harnedig all hag a c’hallo bezañ miret a vloaz da vloaz, ennañ roll kumunioù Breizh.

Ur benveg talvoudus evit ober gant ar brezhoneg bemdez!

Kasit ur chekenn 12€ da:

Skol an Emsav, 25 straed Pierre Martin, 35000 Roazhon.

Evit gouzout hiroc'h: 02 99 38 75 83 pe sae.bzh@wanadoo.fr

Lennit Bremañ Du 2009!

Moger Berlin diskaret 20 vloaz zo, an darempredoù etre Turkia hag Armenia, manifestadeg Carcassona, 40 vloaz Armor Magazine, reuz ar bezhin glas... Kaoz zo eus an holl draoù-se hag eus traoù all c'hoazh e-barzh niverenn Bremañ miz Du 2009.

An teuliad zo gouestlet er miz-mañ da adframmañ ar strollegezhioù. Ouzhpenn kinnigoù ar gouarnamant graet nevez zo, eo aet maered Naoned ha Roazhon da aozañ ur c'hollok evit startaat al liammoù etre div gêr-benn Breizh.

Ha nevez er miz-mañ, div bajennad bet soñjet a-ratozh evit ar re a grog da lenn brezhoneg: Lennomp! M’ho pez plijadurig o lenn Bremaik, plijadur ho po o lenn Bremañ, sur!

Bep miz, abaoe 1980, e kinnig ar gelaouenn Bremañ pennadoù brezhonek a bep seurt, diwar-benn Breizh hag ar bed, kinniget brav, e doare ur magazin.

Embannet gant Skol an Emsav (4,5€ an tamm)

E gwerzh er stalioù-levrioù a ginnig danvez Breizh, pe dre goumanant.

Evit gouzout hiroc'h: www.breman.org