Lun 26 a viz Here, niv.258
Sizhun 44 - 2009

Pellgargit ar pennadoù e stumm Word

Evit resev kemennadenn nevez Bremaik bep Lun,
kasit ho chomlec'h da: bremaik@free.fr

Petra oa keleier Bremaik bloaz zo? Klikit amañ !

Evit distreiñ d'ar bajenn degemer

400 den bodet e Karaez

da zifenn Diwan 

ha gwirioù ar minorelezhioù

Divizet o doa pennoù Diwan ober o mad eus Saloñs levrioù Karaez, ma teu kalz emsaverien pe tud tomm ouzh ar brezhoneg, a-benn diskouez e oant kengred gant an div vanifestadeg bet aozet en deiz a-raok e Baiona hag e Carcasonna.

Goude m'eo bet lakaet ar yezhoù ''bihan'' er Vonreizh c'hall e ranker anzav n'eo ket aet an traoù war-raok, n'eus ken soñjal er pezh a c'hoarvez e Bruz. Distaget ez eus bet prezegennoù e brezhoneg hag e galleg gant Tangi Louarn hag Anna-Vari Chapalain.

E-tro 400 den a zo en em vodet neuze dirak Leurenn Glenmor da c'houlenn ma vefe kemeret e karg gant ar Stad kement skol Diwan a zo adal ar mare m'eo digoret (5 bloaz a ranker gortoz betek-henn), ma vefe kemeret e karg an implijidi nann kelenn, hag evit ma c'hallfe holl familhoù Breizh kaout gwir da zibab an deskadurezh vrezhonek dre soubidigezh e pep lec'h e 5 departamant Breizh.

Met an holl a oar a-walc'h n'eo ket trawalc'h lakaat ur yezh da vezañ kelennet ma n'eus endro ebet er yezh-se er vuhez pemdez, sed ma c'houlenne ivez ar vanifesterien ma vefe postet argant da sevel media e brezhoneg (skinwel, skingomz, kazetennoù) hag ivez obererezhioù (kreizennoù-vakañsoù) da zesachañ ar re yaouank koulz hag ar re vras.

E fin an abadenn eo bet lakaet an arzhig Nabar da gaozeal ouzh ar mikro, da ziskouez ez eo liested ar yezhoù ur binvidigezh a rank bezañ doujet.

R.M.

Kenderc'hel a ra gwask ar bobl evit kendalc'h Kopenhagen

Soñj hon eus holl e vo dalc'het kendalc'h Kopenhagen evit an hin e miz Kerzu a zeu. Abaoe mizioù bremañ emañ ar c'hevredigezhioù etrebroadel o lakaat gwask war ar bolitikourien ar galloud ganto, a-benn ma vije kemeret divizoù kreñv d’ar mare-se, ha n'eo ket mirout an traoù evel m'emaint, ar pezh a vije mantrus evit an endro. 350.org, da skouer, en deus aozet un devezh stourm disadorn tremenet, d'ar 24 a viz Here (skeudenn graet e Bristol, Breizh-Veur). 5200 darvoud a zo bet aozet e-barzh 181 vro: fotoioù ha pennadoù kazetennoù a vez kavet war al lec'hienn. Bras-kenañ eo an niver a dud o deus kemeret perzh ha brud an darvoudoù a zo bet. Avaaz, diouzh e du, a stourm abaoe 2007 gant oberoù o deus un heklev bras er mediaoù. Gant ar spi e vo klevet mouezh ar bobl ha kemeret divizoù bras evit an endro.

M.M.

Evit gouzout hiroc'h:

al luskad  tck tck, gant ur sinadeg: www.copenhague-2009.com

pajenn Avaaz war an danvez: https://secure.avaaz.org/

pajenn darvoudoù disadorn tremenet: www.350.org.

Boulc'het "Tan Miz Du" 2009 !

Gant ar gengevredigezh KLT, a vod kevredigezhioù sevenadurel breizhek bro Montroulez, e vo aozet adarre a-hed ar miz, ar festival "Tan Miz Du". An dekvet bloavezh eo da izili KLT aozañ ar gouel. Miz Du, mare ar bloaz lec'h ma tap teñvalijenn an noz muioc'h a blas evit sklêrijenn an deiz, zo miz ar beilhadegoù neuze. Digarezioù plijus a ro tro da zañsal, kanañ, kontañ... Boulc'het eo bet ar gouel disadorn tremenet. Kenderc'hel a raio betek ar Sul 29 a viz Du! Sed amañ un dibab eus an abadennoù da zont. War lec'hienn KLT e kavoc'h roll klok abadennoù festival "Tan Miz Du".

D'an 28, 29 ha 30 a viz Here: staj teatr-sirk evit bugale 7-11 vloaz e Plegad-Gwerann, Kreizenn an Douron. 

D'ar Gwener 30 a viz Here: lid-digeriñ ar festival, 6e d'abardaez, Lec'h-diskouez Artotia er Manu (Diskouezadegoù: fotoioù Hervé Ronné ha taolennoù Maryvonne Jeanne Garrault). 

D'ar Sadorn 31 a viz Here: sonadeg Gwennyn, Sal ar Roudour e Sant-Martin, 8e30 noz.

Baleadenn gant marvailhoù diwar-benn an Ankoù e Brasparzh aozet gant ADDES.

Evit gouzout hiroc'h :

www.klt.fr

Berzh ar blenier Sébastien Loeb

Aet eo ar maout dec'h, e Kêrdiz, e Kembre, gant ar blenier elzasat Sébastien Loeb, evit rallye Breiz-Veur. Setu-eñ kampion ar bed evit ar c'hwec'hvet gwech! N'eo ket bet dinec'h redadeg diwezhañ ar c'hampionad. Lodennoù elektronek ar Citroën Ca, kensturiet gant Daniel Elena, zo aet a-dreuz en 3de kilometrad. War krabanoù Loeb e oa ar Finlandad Mikko Hirvanen. Hemañ (gant e genseurt Jarmo Lehtinen en e-gichen en o Ford Focus) en deus bet e lod a daolioù-fall siwazh evitañ, evel lamm golo ar c'heflusker a-daol-trumm. Al lañs en doa kroget da gaout war Loeb, zo bet krignet en-dro gant an Elzasad tamm-ha-tamm. Ne oa ket digalonekaet ar Finlandad koulskoude... Met adtapet e oa d'e dro gant an trede skipailh, ar Spagnoliz Sordo ha Marti en ur Citroën C4. Un daouzek ezel bennak eus e fan-club, a oa deuet a-ratozh eus ar C'hwec'hkorn. Saludet o deus Sébastien Loeb ur wech treuzet al linenn-erruout gantañ da vat. Hemañ zo aet diouzthu da adkavout e wreg, e verc'h ha mignoned tost, deuet eus Elzas da heuliañ hentad kaer Loeb e Kembre.

Fame

Stadoù-Unanet – 2008

Seveniñ : Kevin Tancharoen

Stegn eo ar morad tud yaouank a zo war ar renk evit ebarzhiñ New-York City High School of Performing Arts. Miliadoù int met n’eus plas nemet evit un 200 den bennak anezho. Un donezon zo gant ar re-se hag e-kerzh ar pevar bloaz da zont e vint lakaet da bleustriñ war ar c’han, ar sonerezh, ar c’hoariva hag an dañs kement ha dispakañ o barregezhioù da vat.

“Fame! I wanna live forever...” a lavare ar ganaouenn ha tost 30 vloaz goude ar film kentañ e tiskouez Fame bezañ gouest da vevañ pell ma n’eo ket da viken. Un atiz bennak en deus bet brud Fame war ar rummad reality show a gaver leizh ar skrammoù bremañ evit dont da vezañ ur steredenn hep tamm striv ebet. Dre chañs e talc’h ar film-mañ da c’her-stur ar skol wir: ma faot deoc’h dont da vezañ un arzour e rankit paeañ gant c’hwez. Setu n’eo ket Fame 2008 un doare “teen movie” dister met n’eo ket ur bennoberenn kennebeut ha souezhet e vefen ma yafe Oscarioù gant hemañ.

Meriadeg Vallerie

Kement ha gouzout hiroc’h:

www.generationfame.com

Festival les Indisciplinées – etre ar 6 hag an 10 a viz Du

Evit ar pevare gwech e vo aozet festival sonerezh Les Indisciplinées en Oriant e miz Du. Evel ma weler er programm ez eo ar festival un digarez da ginnig doareoù sonerezh liesseurt.

Metal, death metal ha neuze marteze stouvoù divskouarn ivez d'ar Gwener 6 gant Gojira, Entombed, Warkorpse (ur strollad eus Brest) ha Bukowski. Siouloc'h an traoù en deiz war-lerc'h pa zeuio Miossec, Revolver (sonerezh pop), I Come From Pop (sonerezh pop trouzus) ha Wild Beasts (indie pop breizhveuriat).

Rock-blues doare ar bloavezhioù 1970 d'ar Sul 8 gant Izïa, folk-pop gant Diving with Andy hag elektro-jazz gant Caravan Palace. D'al Lun 9 e vo kinniget un abadenn digoust ma vo klevet ar strolladoù a gemer perzh e gourfenn rannvro Printemps de Bourges hag e vo koulz kemer ar stouvoù divskouarn en-dro d'ar Meurzh 10 ma vo kinniget un nozvezh elektro gant Vitalic, Beat Torrent, Molécule, Sheer K, Autokratz, Rebotini, Château Marmont ha We Have Band.

Un tañva (son ha video) eus kement arzour pedet a zo war lec'hienn ar festival. Holl sonadegoù etre 18 ha 25 euro.

R.M.

Sal Cosmao du Manoir, an Oriant.

Muioc'h a Indisciplinées :

www.lesindisciplinees.com

www.myspace.com/lesindisciplinees

Priz ar butun : +6% pe +10%?

Diriaou tremenet en deus ministr gall ar budjed, Eric Woerth, disklêriet e kreskfe priz ar sigaretennoù eus 6%. Klotañ a rafe ar c'hinnig-mañ gant ur "Steuñv Krign-bev"a vo lakaet e pleustr gant ar prezidant Nicolas Sarkozy er mizioù da zont. Hervez pennoù Ofis gall diarbenn efedoù ar butunat (OFT), ne vefe ket kreñv a-walc'h ar c'hresk-mañ evit bezañ efedus. Hervezo e vefe bet bevezet 2,8% muioc’h e-kerzh 8 mizvezh kentañ 2009 keñveriet gant an hevelep mare warlene. Koazhet o deus an taolioù-arnod evit klask paouez da vutunat eus 21% ivez. Kinniget e oa bet gant Akademiezh vroadel ar medisinerezh, kreskiñ priz ar butun eus 10% bep bloaz. Evit an aozadur eo an doare efedusañ da vroudañ ar vutunerien da glask chom a-sav gant ar pleg-mañ. Goude kresk ar prizioù e 2003 ha 2004 e vefe bet 1,5 milion a dud nebeutoc'h o vutunat e Frañs. Rediañ ar merkoù butun da ginnig pakadoù sigaretennoù hollheñvel, hep logo ebet a zo un ober all bet kinniget gant an Akademiezh. Ar soñj embann skeudennoù strakus eus efedoù ar butunat war yec'hed an dud a oa bet embannet. E miz Genver he doa Ministrez c'hall ar Yec'hed, Roselyne Bachelot, lavaret e kasfe kendivizoù war-raok a-benn aotren embann seurt skeudennoù war ar pakadoù sigaretennoù adalek fin ar bloaz.

Deiziataer 2010, brezhoneg-tout!

Goude ur bloavezh ehan en deus Pol Brezhoneg Skol an Emsav embannet un deiziataer hollvrezhonek adarre evit 2010.

Adkavet e vo ar stumm klasel a blije d’an dud. 17cm uhelder ha 9cm ledander, gant ar skrid a-led. En ur golo plastik du ha gwenn e vo kavet an deiziataer, pevar liv penn-da-benn, hag en e gichen ur c’harnedig all hag a c’hallo bezañ miret a vloaz da vloaz, ennañ roll kumunioù Breizh .

Ur benveg talvoudus evit ober gant ar brezhoneg bemdez!

Kasit ur chekenn 12€ da:

Skol an Emsav, 25 straed Pierre Martin, 35000 Roazhon.

Evit gouzout hiroc'h: 02 99 38 75 83 pe sae.bzh@wanadoo.fr

Lennit Bremañ Here 2009!

Stad an traoù en Afghanistan da heul an dilennadegoù, cheñchamant liv gouarnamant Japan goude 50 vloaz, stourm al laezh, lid 2009 Kolier an Erminig, ar strollad Gimol Dru Band... Kaoz zo eus an holl draoù-se hag eus traoù all c'hoazh e-barzh niverenn Bremañ Here 2009.

An teuliad zo gouestlet er miz-mañ d'an distro-skol. Un emgav eo bep bloaz evit gwelet penaos e ya an traoù er c'helenn brezhonek. P'eo seder a-walc'h renerezh Diwan gant daou lec'hiad nevez krouet er bloaz-mañ, eo splann evit tud Div Yezh ez eus lec'hioù zo e Breizh lec'h ma n'eus youl ebet evit kas war-raok an hentad. Nec'het-kenañ eo ivez renerien Dihun, a gav dezho ne vez ket prientet tamm ebet an dazont gant an Deskadurezh Katolik. 

Bep miz, abaoe 1980, e kinnig ar gelaouenn Bremañ pennadoù brezhonek a bep seurt, diwar-benn Breizh hag ar bed, kinniget brav, e doare ur magazin.

Embannet gant Skol an Emsav (4,5€ an tamm)

E gwerzh er stalioù-levrioù a ginnig danvez Breizh, pe dre goumanant.

Evit gouzout hiroc'h: www.breman.org