Meurzh 6 a viz Mezheven, niv.103
Sizhun 23 - 2006

Pellgargit ar pennadoù e stumm Word

Petra oa keleier Bremaik bloaz zo? Klikit amañ!

Evit distreiñ d'ar bajenn degemer

Niverusoc'h evit m'eo bet embannet er mediaoù bras

Ouzhpenn 5000 den a oa bet o tibunañ e straedoù Roazhon disadorn goude-kreisteiz. Tost da 7000 den a oa sur a-walc'h, daoust da se eo bet kemennet e oa etre 1500 ha 3000 den hepken er skinwel hag er c'helaouennoù... war bouez France Bleu Breizh Izel en deus graet anv eus 6000 den. Da grediñ ne vez ket kontet e memes doare an dud deuet da vanifestiñ evit goulenn muioc'h a c'halloud gant Breizh hag ar re all.

Dindan an heol kras e oa bet Bretoned, Okitaned, Euskariz, Korsikiz, Berbered, Galiziz neuze o vale asambles hag o c'houlenn ma vefe tu da zivizout ar pezh zo da gas war-raok e-keñver deskadurezh, politikerezh yezh, politikerezh sevenadur, merañ ar mediaoù... en ur vro unvan evel-just : niverus e oa deuet tud al Liger-Atlantel.

Ret eo bremañ gwelet penaos kenderc'hel gant ar stourm-se evit ma vefe komprenet gant ar muiañ ar gwellañ a dud e Breizh. Doareoù all, a sachfe muioc'h evezh ar mediaoù, a vo mat kavout a-raok marteze an dilennadegoù a vo er mizioù da zont.

Ar maerl, koural eus Breizh

Maerl pe lithothamnium, a c’heller kavout e lenn-vor Brest. Ur seurt koural mod Breizh eo: graet eo diwar daou vezhin mesk-ha-mesk (lithomammion corallioide ha phymatholithon calcareum), a dap maen-raz enno. Ur bern spesoù plant ha loened a ya da vevañ enno, e-giz e-barzh ar c’houral : teureug-mor, kresteneged, stered-mor pe pesked deuet da zozviñ. Da lâret eo ez eo un ekosistem eus ar re binvidikañ. Met tra ma vez ur bern tud o huchal pa vez distrujet bodoù koural, ne vez lâret seurt gant den pa vez distrujet maerl.

Abaoe kantvedoù e vez implijet maerl evit temzañ douaroù re drenk. Pezh n’eo ket gwall reizh hiziv an deiz eo e vez rastellet gant bigi bras-spontus a zastum pep tra. Ha dre ma kresk ar maerl goustad-tre, e-tro 0,3 pe 0,5 mm ar bloaz, e vez start dezhañ en em staliañ en-dro, hag evit ar plant hag al loened a vev ennañ eo heñvel. Gallout a rafed chom da brederiañ war an ezhomm a vefe anezhañ : silañ an dour da evañ, gwellaat an douaroù, gwellaat ar produioù-kened pe me oar, pa vez teknikoù all evit ober kement-se.

Morwena Audic

Kresteneg : crustacé

Kement ha gouzout hiroc’h : Terre Sauvage niv.217, miz Even 2006

Gouel c’hoariva Penn-ar-bed

Emgavioù departamant ar c’hoariva a vo aozet gant Ti ar c’hoariva e Brest, etre ar 1añ hag ar 4 a viz Even, war pevarzek kumun disheñvel e Penn-ar-bed. Kregiñ a raio en Erge-Vras gant ar pezh "Opéra panique" gant Alejandro Jodorowsky hag ar gompagnunezh "Je Savoir Dire". Tro a vo da welet pezhioù-c’hoari a bep seurt, doare drama kement ha komediennoù, evel "Les Autres" gant Jean-Claude Grimberg, c’hoariet gant Mouvance Cazilim hag "American Buffalo" skrivet gant David Mamet ha kinnniget gant "L’entonnoir théâtre" eus Brest. Ne vo ket disoñjet an oberennoù klasel, gant pezhioù Molière pe c’hoazh "Fin de partie" gant Samuel Beckett. Krouidigezhioù a-stroll a vo tu da zizoleiñ ivez, da skouer, gant ar strollad "La belle aventure" a c’hoario "Seule dans la ville" e sal ar Stella e Lambezelleg. An dañs a vo lod eus an abadennoù-se gant "Métamorphoses" savet diwar un destenn gant Kossi Effou ha leurennet gant Bleuduciel. Ha d’ar 4 a viz Even e vo aozet ul leurenn-digor e Kastellin.

Hoel Louarn

Evit gouzout hiroc’h : 02 98 47 33 42

Roland Garros : Clijsters hag Hingis

Hiziv e c'hoario ar Velgiadez Kim Clijsters a-enep ar Suisez Martina Hingis evit ar c'hrogadoù kard gourfenn. Gwech ebet n'o deus bet gounezet na gant an eil na gant eben e Roland-Garros ha c'hoant bras o deus dont a-benn, dreist-holl bremañ m'eo bet embannet gant Clijsters e paouezfe gant ar c'henstrivadegoù etrebroadel e 2007. An div c'hoarierez zo bet efedus ha mennet-kenañ er c'hrogadoù diwezhañ hag un abadenn dennis galet a vo etre ar Velgiadez hag ar Suisez.

C'hoariet o doa war memes tachenn e kard gourfenn Open Aostralia e penn-kentañ rummad kenstrivadegoù ar bloaz-mañ. Aet e oa ar maout gant Kim Clijsters, gant poan. E krogad diwezhañ-tout Roland-Garros o doa gellet erruout div wech, e 2001 ha 2003 evit Clijsters, hag e 1997 ha 1999 evit Martina Hingis.

Marie-Antoinette

Stadoù-Unanet – 2005

Senario ha seveniñ : Sofia Coppola

D’ur vro estren e kaser ur grennardez pemzek vloaz da zimeziñ gant ur paotr ken yaouank all n’he deus gwelet nemet ur skeudenn anezhañ. Eus an eil devezh d’egile eo rediet ar plac’h da zilezel an holl dud hag an holl draoù he deus bevet ganto betek-henn. Emichañs e kavo du-hont peadra da frealziñ pe da abuziñ he spered da nebeutañ. E 1770 e c’hoarvez an istor, Marie-Antoinette eo anv ar plac’h yaouank, ha danvez Roue Frañs eo he danvez pried.

Trede film Sofia Coppola eo Marie-Antoinette ha splann eo ez eus ul liamm etre an tri film-se dre o zem : trivliadennoù kalon krennardezed. Istor ur grennardez anvet Marie-Antoinette he deus bet c’hoant Coppola kontañ an taol-mañ da ziskouez pegen distag diouzh an amzer eo ar stad a grennardez. Ar reizhded istorel n’emañ ket e-kreiz an dodenn neuze ; an dibab ober gant sonerezh rock a arouez an dra-se. Arvestoù brav a zeu gant an dibab arzel-mañ (arvest ar bal da skouer), met gwelloc’h zo bet graet war an dachenn-se gant filmoù Baz Luhrmann peurgetket (adwelit Moulin Rouge, 2001). Marie-Antoinette n’eo ket didalvez, met poent eo da Sofia Coppola kontañ traoù disheñvel bremañ.

Meriadeg Vallerie

Evit gouzout hiroc’h :

http://www.marieantoinette-lefilm.com/accueil.html

"Bemdez c'houloù" Nolwenn Korbell

Gouzout mat a raemp holl ne oa ket echu. Kelaouet oamp bet gant he fladenn gentañ. Gwall hiraezhus eo Nolwenn Korbell, en he c'hoazez war diri golo ar bladenn... met ur wech lakaet ar bladenn da dreiñ, pebezh abadenn ! Gwashat ma kan brav !

Hejet-dihejet oc'h war hentoù tosellek, traezhek, loarek ha me oar... Bommoù c'hwek o frond saourus ha padus. Avelioù glas o luskellat d'ar bleiz, d¹an noz ha d'an dud. Mein prizius ha bokedoù roz a-hed ar veaj. Olole, olole ! Ar pep kaerañ a zo ar c'hanaouennoù savet ganti (Termaji, Dal, Valsenn Trefrin, Yannig ha Mai...). Bemdez c'houloù ? Un disparadenn a bladenn. Nolwenn Korbell ? Ur steredenn a blac'h.

A.K.

Kig-yar gant mel ha sitroñs

Danvezioù : 1 penn-yar 1,5 kg, troc’het en 8 tamm (an divorzhed hag ar gwennoù troc’het e daou, hag an divaskell) – ur penn sitroñs – 4 c’harotezenn – 2 gourjetezenn – 8 irvinenn vihan nevez – 2 ivin kignen – ½ boked koriandrez – 2 loaiad vras mel tin – 1 loaiad vras eoul olivez – 1 loaiad vihan a gurkuma – holen

Raktommit ar forn e 200 °C (tommder 6-7).

Meskit ar mel, ar c’hurkuma hag an eoul olivez. Ouzhpennit 3 meudad holen. Goloit ar c’hig-yar gant an aozenn-mañ ha lakait a-gostez. Tennit kroc’hen ar sitroñs gant un diblusker ha mirit ar plusk. Troc’hit e 8 skejenn. Gwennit anezho e-pad 1 vunutenn en dour o virviñ. Sec’hit ha mirit a-gostez.

Dibluskit ar c’harotez ha troc’hit anezho e daou diouzh o hed. Miñsit anezho met ket re vunut. Gwalc’hit ar c’hourjetez ha troc’hit anezho er memes mod. Dibluskit an 8 irvinenn ha troc’hit anezho e 2.

En ur baelon dispeg, lakait ar tammoù kig-yar da fritañ war bep tu ha mirit anezho a-gostez. Er memes paelon, lakait da fritañ an tammoù sitroñs, ar c’hignen hag al legumaj. Holenit. Gwiskit foñs ur gokelenn ganto en ur gregiñ gant ar sitroñs. Ouzhpennit an tammoù kig-yar (nemet ar gwennoù) ha lakait da boazhañ er forn er gokelenn c’holoet, e-pad 30 mn.

Tennit al legumaj, nemet ar sitroñs. Ouzhpennit ar gwennoù kig-yar hag adlakait ar gokelennad er forn un 20 mn bennak, hep tog.

Kempennit ar c’hig-yar hag al legumaj en ur plad. Blazit ar chug-poazhañ gant ar c’horiandrez. Goloit gant ar chug-mañ. Kinklit gant pluskigoù sitroñs koñfitet.

Evit konfizañ pluskigoù ar sitroñs : troc’hit plusk ar sitroñs e lavnennigoù, gwennit anezho en dour o virviñ. Koñfizit anezho en ul loaiad vel, war an tan bihan-bihan, e-pad 15-20 mn.

Katell Leon