Lun 17 a viz Mae, niv.286
Sizhun 20 - 2010

Pellgargit ar pennadoù e stumm Word

Evit resev kemennadenn nevez Bremaik bep Lun,
kasit ho chomlec'h da: bremaik@free.fr

Petra oa keleier Bremaik bloaz zo? Klikit amañ !

Evit distreiñ d'ar bajenn degemer

Redadeg 2010: degouezhet e Pondi

Disadorn, d'ar 15 a viz Mae 2010, e echue an eil Redadeg evit ar brezhoneg. Aozet e oa bet gant ar gevredigezh Ar Redadeg a di da di, evit gwerzhañ 1200km, 100€ pep hini, da zegas ar skoazell arc'hant d'ar yezh. Skoazellet e vo ar skolioù Diwan, hag un dornad raktresoù a bep seurt (war dachenn ar sportoù, an embann, ar mediaioù...). Abaoe dilun tremenet (d'an 10 a viz Mae) ez eus bet Bretoned, Euskariz, Kembreiz, ha kantadoù a dud tomm o c'halon ouzh ar yezh, o lakaat da dremen ar vazh-eilañ a zorn da zorn war hentoù ar vro. Etre Roazhon ha Pondi, en ur dremen dre Naoned, Gwened, an Oriant, Kemper, Brest, Montroulez, Gwengamp... Ur gouel bras zo bet disadorn e Pondi evit lidañ degouezh ar Redadeg, gant leun a vugale. Ar vazh-eilañ zo bet douget e-kerzh ar c'hilometrad diwezhañ gant familh David ar Gall, kelenner e skolaj Diwan Gwened, savet gantañ hag e skolidi pozioù kanaouenn ar Redadeg. Graet e vez gant ar brezhoneg en e familh ha kement-se e oa tem Redadeg 2010. Un danvez lakaet war-wel adarre gant ar skrid bet dispaket eus ar vazh-eilañ gant Riwall ar Menn. Lennet (ha skrivet) eo bet gant Goulc'han Kervella dirak an holl rederien hag arvesterien disadorn. 1100km zo bet gwerzhet evit poent. Chom a ra 100 da brenañ neuze!

Evit gouzout hiroc'h: http://ar-redadeg.org

Sellet ouzh skeudenn an Degouezh: klikit amañ

Sinadegoù war Internet evit an endro

Muioc'h-mui e vez implijet Internet gant ar geodedourien evit klask kaout ul levezon war an dibaboù politikel. Alies e vez klevet komz diwar-benn Avaaz, a zo deuet da vezañ ar gumuniezh vrasañ a dud a zo o stourm, pe e vije evit traoù a denn d’an endro, pe war dachennoù all. Da skouer, er mare-mañ, emañ o kinnig ur sinadeg veur evit bountañ war politikerien ar Stadoù Unanet da zilezel an eztennañ eoul-maen er mor, p’en deus degaset ul lanv du war aodoù ar Stadoù Unanet. Sinadegoù all a zo war o lec'hienn: unan a zo evit ma vije paouezet da chaseal balumed. Evit an hini a denn d'ar produoù OGK, ma vije sinet gant 1 milion a dud, e c'hellfe bezañ kinniget ul lezenn da Vodad Europa evit goulenn prouennoù skiantel sirius a-raok aotreañ produoù OGK da vezañ gwerzhet. Er memes mod, ma vije 1 milion a dud o sinañ ar sinadeg a-enep an dreistpakadur, e c'hellfe ul lezenn bezañ kinniget ivez. N'eo ket sur e vije atav gwall efedus ar sinadegoù, met pa c'hellont kas lezennoù da vezañ kinniget, pe pa vez un hanter milion a dud o kinnig anezho, e c'hellont kaout pouez. D'an nebeutañ eo ar pezh a soñj ar re a gemer perzh er re-se, pa c'hellont bezañ dipitet gant hentennoù boutin ar stourm politikel.

M.M.

An eoul-maen er mor : https://secure.avaaz.org

Ar balumed : https://secure.avaaz.org

An dreistpakadur : www.overpacking.eu

Arz Gigi Le Merdy diskouezet e kreizenn Yezhoù ha Sevenadur

Abaoe an 10 a viz Mae, ha betek ar Gwener 21, e kinnig Yezhoù ha Sevenadur ha Kreizenn Dafar Sevenadurel Keltiek (KDSK) ober anaoudegezh gant oberenn an arzourez Gigi Le Merdy. Ganet eo bet e Pondi, hag emañ o vevañ bremañ e Naoned. Plijet eo-hi gant an arz keltiek kozh, ha labourat a ra ingal diwar tresoù, stummoù, hag arouezioù a gaver er pezhioù arz kozh bet krouet a-hed ar c'hantvedoù gant Kelted, hag o mojennoù. Tonioù soutil ha berus livioù ar mor, pe red tanav an aer, pe c'hoazh tresoù fonnus enlivadurioù al levrioù kozh, a vo kavet en he labourioù savet diwar teknikoù liesseurt. Hervez an arzourien n'eus tamm enklask istorel ebet gant he labour: tennañ a ra he awen diwar ar pezh a c'hell gwelet hep klask adober pe chom feal d'an arz kelt istorel. Ouzhpenn arlivioù kelt a gaver en he labour gant poltredoù, tresoù difetis, livadurioù eoul war danvezioù liesseurt...

Evit klokaat diskouezadeg Gigi Le Merdy, e kinnig KDSK ivez un diskouezadeg levrioù diwar-benn an Arz keltiek: ar gweadegoù, ar "mandala", hag all.

Degemer e Yezhoù ha Sevenadur, etre 10e-12e ha 14e-19e.

Pgz : 02 40 85 27 22.

Evit gouzout hiroc'h: yezhou44@yahoo.fr

Graet tro ar bed war vag gant Jessica Watson

210 devezh war vor, hec'h-unan-penn, eo bet an Aostralianez Jessica Watson, 16 vloaz. D'an 18 a viz Here 2009 he doa kuitaet porzh Sydney (s.o. Bremañ niv.343) war ur vag dre lien 10,23 metr, Ella's Pink Lady. 23000 milmor he deus treizhet neuze, hep arsav na skoazell ebet, gant ur miz lañs e-keñver ar pezh a oa bet raktreset ganti. Degemeret eo bet en-dro e porzh Sydney disadorn, d'ar 15 a viz Mae 2010, gant he zud ha kentañ ministr Aostralia, Kevin Rudd. Ar vartolodez yaouankañ o vezañ graet tro ar bed eo bremañ Jessica Watson. Daoust da se, ne vo ket anavezet he rekord gant Kevre Etrebroadel ar Bageal dre lien, rak 18 vloaz e ranker bezañ da vihanañ. Kelaouet he deus an dud dre Internet, gant ur blog, ma kinnige ingal skeudennoù ha filmoùigoù. Disklêriet he deus ar vageerez yaouank e felle dezhi reiñ c'hoant d'ar muiañ ar gwellañ a dud yaouank dre ar bed da vont war vor.

Evit gouzout hiroc'h:

www.jessicawatson.com.au

Brooklyn's Finest (L'Elite de Brooklyn)
Stadoù-Unanet – 2009 Seveniñ : Antoine Fuqua Difennet d’ar re dindan 12 vloaz Dañjerus eo ar 65vet distrig. War e leve poliser ez aio Eddie (Richard Gere) a-benn seizh devezh, met poazh eo dija... e pep keñver. E brigadenn an dramm emañ Sal (Ethan Hawke) o labourat. War ar pemdez e wel mell pakadoù arc’hant o tremen dindan e fri p’en deus ezhomm groñs dont a-benn da brenañ un ti dereat d’e wreg dougerez. Ur poliser ensilet e metoù ar forbannerezh eo Tango (Don Cheadle) ha goulennet e vez gantañ sevel ur pech d’un den en doa saveteet e vuhez gwechall (Wesley Snipes). “Being righter or wronger” (bezañ reishoc’h pe falloc’h), eno emañ an dalc’h. Gant ar menoz-se e krog ar film ha mont a ra d’ober steuñvenn an abadenn. Kontrol ur film manikean eo Brooklyn’s Finest, ennañ tudennoù kemplezh a dal ouzh kudennoù kornelian: ober traoù fall evit abegoù mat. Garv eo an istor met talvoudus ha skrivet mat eo ivez. Gwall bell diouzh e dudennoù Yann Pabor emañ Richard Gere gant ur perzh a chomo en eñvorennoù ar sellerien. Meriadeg Vallerie Evit gouzout hiroc’h : www.brooklynsfinestthemovie.com

Kentañ Saloñs al levrioù sonerezh en Oriant – 29 ha 30 a viz Mae

A-benn fin ar miz e vo aozet kentañ Saloñs al levrioù sonerezh en Oriant. Ouzhpenn standoù an tiez-embann ha re ar werzherien levrioù e teuio sonerien ha kazetennerien arbennikaet war ar sonerezh (Olivier Cachin, Jean-Eric Perrin, Gilles Verlant...) da gejañ ouzh an dud ha da ginnig oberiantizoù liesseurt.

Evit a sell ouzh Breizh e vo da skouer ur staj seniñ gitar gant Soig Siberil pe c'hoazh ur brezegenn diwar-benn ar sonerezh keltiek.

Ur brezegenn-eskemm a vo ivez diwar-benn Bashung hag unan all diwar-benn rockerien hollvrudet (Elvis, Jimi Hendrix, Kurt Cobain) kaset gant meur a gazetenner, Philippe Manoeuvre en o zouez. Ur brezegenn all a vo aozet diwar-benn oad aour ar sonerezh rock, unan all diwar-benn perzh an teknologiezhioù er sonerezh.

Kaoz a vo ivez eus reggae, eus al liammoù etre sonerezh ha bannoù-treset hag etre sonerezh ha sinema. Peadra a vo ivez evit a sell ouzh ar sonerezh klasel, ar sonerezh gall (Nougaro, Jean Ferrat) ha kinniget e vo ivez kalz traoù d'ar vugale (dizoleiñ binvioù sonerezh, c'hoarioù liesseurt).

R.M.

Fonnus-kenañ eo programm ar saloñs, pep tra a vo kavet el lec'hienn :

www.lesalondulivredemusique.fr

Sekred-kregin: Crumble bananez
	Danvez: 3 bananezenn - 2 aval - 1 sitroñs - 125g bleud - 150g amann - 80g sukr + ul loiad vras - 40g alamandez - 1 meudad holen 1. Peilhat ha troc’hañ an avaloù fin a-walc’h ha lakaat anezho da boazhat gant 25g amann en ur billig e-pad 3 mn. Lakaat ul loiad sukr war c’horre evit o rouzañ . 2. Meskañ en ur plad ar bleud gant 80 g sukr hag ur meudad holen. Lakaat 125 g amann teuzet ha meskañ gros-ha-gros gant ur fourchetezenn. 3. Lakaat an avaloù en ur plad forn amanennet ha lakaat goude ar bananez troc’het e tammoù ha chug ur sitroñs warne. Lakaat an toaz war c’horre hag an alamandez a-us an toaz 4 .Poazhañ e-pad 18mn (200°) en ur forn tommet en a-raok. 5. Debriñ pa vez klouar. Riwanon Pennoù Pentur war Tébéo, TV Roazhon 35 ha Ty Télé Un abadenn vrezhonek nevez, Pennoù Pentur, a vo skignet adalek dimeurzh, 18 a viz Mae, war teir chadenn lec'hel eus ar vro, Tébéo, TV Roazhon 35 ha Ty Télé. Produet eo bet gant Gwengolo Filmoù (renet gant Mikael Baudu) ha Dizale, ha skoazellet gant Kuzul-rannvro Breizh, Kuzul-departamant Penn-ar-Bed, Breizh Punishers ha Gouel an Erer Kozh. Un abadenn evit ar grennarded eo Pennoù Pentur, diazezet war ar c'hoari paintball. Skipailhoù skolajidi ha liseidi eus ar vro a vo tu da welet o "vrezeliñ" gant livaj, war tachennoù kempennet a-ratozh. En tu hont da varregezhioù tennañ, redek ha kuzhat e c'houlenn ar c'hoari ivez digant ar genstriverien diskouez o gouiziegezh hollek hag o barregezhioù arzel. Seizh abadenn 15 mn zo en holl. Daou skipailh a vo gwelet bewech, enno skolidi hentadoù brezhoneg, pep hini o klask kas ar maout gantañ. Gant ar re wellañ e vo gounezet plasoù evit Gouel an Erer Kozh a-bezh, hag gant an eil re wellañ e vo tikedi evit festival "Bout du Monde" e Kraozon. Bep Meurzh da 8e40 noz war Tébéo, TV Roazhon 35 ha Ty Télé, adalek an 18 a viz Mae. Evit gouzout hiroc'h: www.dizale.org Lennit Bremañ Mae 2010 ha niverenn ispisial ar Redadeg ! Disoc'hoù Kan ar Bobl 2010, petra nevez e Honduras, freuz goude an taol-stad, Eugène Perrot bet e-touez stourmerien gentañ Plougoñ 30 vloaz zo, gouel "Les Folies Tapping" gouestlet d'ur benveg sonerezh dibaot, pennad-kaoz gant an aktorez yaouank Tifenn Linéatte, distro Gouel Broadel ar Brezhoneg... Kaoz zo eus an holl draoù-se hag eus traoù all c'hoazh e-barzh niverenn Bremañ miz Mae 2010. An teuliad zo gouestlet er miz-mañ da sonerezh Breizh. Produerien pladennoù eus ar vro zo bodet bremañ er gevredigezh Musiques de Bretagne. Un albom nevez-flamm zo bet savet gant Nolwenn Korbell, Noazh. Diouzh an tu all e kinnig ar strollad Oktopus Kafe Ar vro didu, e bladenn gentañ, gwriziennet don en hengoun. Eil pladenn ar Ramoneurs de Menhirs zo bet lakaet e gwerzh nevez zo, ivez. O albom kentañ en doa graet berzh. Kendalc'het e vo er miz-mañ gant div bajennad "Lennomp!", bet soñjet a-ratozh evit ar re zo o teskiñ brezhoneg. M’ho pez plijadurig o lenn Bremaik, plijadur ho po o lenn Bremañ, sur! Un niverenn all ho po tro da follennata ivez. Evit brudañ ha lidañ an eil Redadeg evit ar brezhoneg, en deus skipailh Bremañ hag aozerien ar Redadeg prientet un niverenn ispisial, enni kartenn an hentad ha roll an abadennoù a-hed ar redadeg, pozioù kanaouenn ar Redadeg, ur pennad-skrid gant preder Lukian Kergoat war ar yezh... Digoust eo! Bep miz, abaoe 1980, e kinnig ar gelaouenn Bremañ pennadoù brezhonek a bep seurt, diwar-benn Breizh hag ar bed, kinniget brav, e doare ur magazin. Embannet gant Skol an Emsav (4,5€ an tamm) E gwerzh er stalioù-levrioù a ginnig danvez Breizh, pe dre goumanant. Koumanantiñ: 50€ evit ur bloaz – 60€ evit an estrenvro – 4€ bep miz dre lamadenn. Evit gouzout hiroc'h: www.breman.org