Lun 22 a viz Meurzh, niv.278
Sizhun 12 - 2010

Evit resev kemennadenn nevez Bremaik bep Lun,
kasit ho chomlec'h da: bremaik@free.fr

Petra oa keleier Bremaik bloaz zo? Klikit amañ !

Evit distreiñ d'ar bajenn degemer

	Echu dilennadegoù-rannvro 2010
	Sed aze klozet ar votoù evit dilenn ar guzulierien-rannvro a labouro er pevar bloaz a zeu. Dedennus eo bet an traoù e Breizh: p'o deus tud al Liger-Atlantel bet tro da welet un emgann-daou klasel PS/UMP (etre Jacques Auxiette ha Christophe Béchu), e oa er pevar departamant all un degouezh n'eus ket bet e lec'h all e Frañs. Un emgann-tri, etre PS (Jean-Yves an Drian), UMP (Bernadette Malgorn) hag Europa Ekologiezh (Guy Hascoët). Sklaer ha fraezh eo bet an traoù diouzh tu al Liger-Atlantel: 61,24% eus ar mouezhioù zo aet gant listennad Jacques Auxiette (hag a vode neuze ivez Europa Ekologiezh), ha 38,76 evit Christophe Béchu. Evit Rannvro Broioù-al-Liger eo un tammig strishoc'h an traoù, daoust m'eo ken anat all (56.39% evit Auxiette ha 43,61 evit Béchu). Diouzh tu Rannvro Breizh eo drast an tuad dehou zo lakaet anat, met ivez an nebeud a dud aet da votiñ. En Aodoù-an-Arvor e kaver ar muiañ a voterien e Breizh (56,90%), heuliet gant Penn-ar-Bed (53,15%), Mor-Bihan (52,51%), Liger-Atlantel (52,27%) hag Il-ha-Gwilen (51,61%). Gant listennad an Drian eo aet ar maout, pell a se: 50,27% eus ar mouezhioù. Pell war-lerc'h e teu danvez-prezidantez tuad ar gouarnamant, Bernadette Malgorn, gant 32,36%. Ar souezhadenn vrasañ a c'hellfe bezañ berzh listennad Europa Ekologiezh Breizh, Guy Hascoët en he fenn, gant 17,37% eus mouezhioù ar Rannvro. A-benn fin ar sizhun e tlefe kargoù ar guzulieren nevez bezañ roet da anavezout.

Plant OGK: galv d'ar stourm

Emañ Bodad Europa, renet gant Jose Manuel Barroso (skeudenn), o paouez aotren gounit plant OGK (o genoù kemmet) en Europa. Abaoe 12 vloaz ne oa ket bet kemeret seurt diviz. Hervez ar studiadennoù ez eus ouzhpenn 60% eus Europiz a-enep ar plant OGK. Dalc'homp soñj eo re dreut c'hoazh ar studiadennoù skiantel evit bezañ gouest da reiñ un ali solut war disoc'hoù gwirion ar plant OGK, war a bep seurt tachennoù: levezon o emled war liested ar boudoù bev, kudennoù liammet ouzh ar berc'hentiezh war boudoù bev, kementadoù louzoù brasaet, efedusted, hag all. Gant an embregerezhioù a gas ar plant OGK war-raok e vez meret ar studiadennoù skiantel ha levezonet an dibaboù war dachenn ar gwir.

Evit talañ ouzh kement-se ez eus bet boulc'het ur raktres gant Avaaz ha stourmerien evit an endro: un destenn lezenn nevez a ro tro da gemm lodennoù eus al lezenn ma vez sammet ar c'hinnig gant ur milion a dud. Setu emeur o klask dastum ur milion a vouezhioù en Europa evit gallout kinnig un destenn-lezenn a lavarfe eo dav gortoz ha kaout trawalc'h a ditouroù war an danvez a-raok kemer un diviz.

M.M.

Evit gouzout hiroc'h diwar-benn ar sinadeg:

http://www.avaaz.org

Korriked ar Gurunenn Wenn e Skol Diwan Savenneg

Gant an arzourez Armel ar Sec'h e vo kinniget adalek hiziv, lun 22 a viz Meurzh, betek an 11 a viz Ebrel 2010, en diskouezadeg livadurioù e Skol Diwan Savenneg (Bro-Naoned). Titl an dastumad kinniget zo "Korriked ar Gurunenn Wenn". Un dek pezh bennak zo, warno korriganed alies-mat evel-just, en o bed marvailhus, met ivez bugale o c'hoari, o tañsal...

Tu zo da vont da welet an diskouezadeg e Skol Diwan Savenneg d'al Lun, Meurzh, Yaou, Gwener, etre 9e ha kreisteiz, hag etre 15e ha 16e30. An arzourez a vo war al lec'h d'ar Sadorn 10 ha Sul 11 a viz Ebrel evit eskemm gant ar weladennerien, etre 15e ha 18e.

Evit gouzout hiroc'h:

http://sitekreator.com/ArmelLeSech

Diwan Savenneg, pgz: 02 28 01 17 05

	Trofe Jules Verne: rekord nevez Franck Cammas
	Erruet eo ar vag tric'houc'h Groupama 3 dec'h e porzh Brest, e-tro 9e30 beure. Abaoe an 31 a viz Genver e klaske ar bageer Franck Cammas, asambles gant 9 martolod all, ober tro ar bed, ar buanañ ar gwellañ... An trede gwech e oa evit Cammas klask gounit e blas e-kichen Bruno Peyron, Sir Peter Blake hag Olivier de Kersauson. Deuet eo gantañ, ha brav daoust d'an diaesterioù bet e-kerzh treizh ar Meurvor Atlantel: nebeutoc'h evit 50 devezh o deus lakaet evit ober tro ar bed (48 devezh, 7 eurvezh ha 44 munut). Ur rekord nevez, o wellaat hini Bruno Peyron eus 2 devezh, 8 eurvezh ha 35 munut. Evit ar skipper Franck Cammas ez eus danvez rekordoù nevez evit Trofe Jules Verne. Hervezañ, ma vefe bet plaenoc'h an amzer pa oant o treuziñ ar Meurvor Atlantel, en dije e skipailh gallet tostaat muioc'h c'hoazh eus ar 45 devezh... Sed aze embannet sklaer klaoustre martoloded redadegoù da zont Trofe Jules Verne!

The Men Who Stare at Goats (Les Chèvres du Pentagone)

Stadoù-Unanet – 2009

Seveniñ : Grant Heslov

War an diskar emañ buhez ar c’hazetenner Bob Wilton (Ewan McGregor). Divizout a ra mont war talbenn ar brezel en Irak da brouiñ n’eo ket n’eus forzh piv d’e vet-gwreg. E Koweit, tra ma klask un aotre da dremen an harzoù, e ra anaoudegezh gant Lyn Cassidy (George Clooney) a embann bezañ ezel eus ur rann guzh eus arme ar Stadoù-Unanet enni “brezelourien Jedi”!

Hervez kont eo diazezet steuñvenn ar film droch-se war fedoù gwir ha, souezhus eo, met prest on da grediñ an dra-se. Un abadenn blijus ha farsus eo, enni c’hoarierien a-feson (Jeff Bridges ha Kevin Spacey zo ouzhpenn) o dez plijadur o tiduiñ ac’hanomp. Kouezhañ a ra un tamm al lusk en drederenn diwezhañ, met un taol kaer eo evit ur film kentañ atav.

Meriadeg Vallerie

Evit gouzout hiroc’h :

http://www.leschevresdupentagone.com/

Emgavioù Sinema Europa 2010 e Gwened

D'ar Merc'her 31 a viz Meurzh e krogo 9vet Emgavioù Sinema Europa Gwened, betek ar 6 a viz Ebrel 2010. Tem gouel ar bloaz-mañ zo: "Petra nevez er Reter abaoe 20 vloaz?". Enoret e vo neuze da gentañ-penn filmoù Rusia. Oberennoù sevenerien zo a vo lakaet war wel, pe e vefent brudet mat pe yaouank-flamm, en o zouez Alexandre Sokourov, Karen Chakhnazarov, Andrei Konchalovsky, Andrei Zviaguintsev, Igor Minaiev, Valeria Gaï Guermanika... Enor a vo roet en un doare ispisial d'ar sevener Pavel Lounguine, gant un dibab tri film renet gantañ. Meur a rumm zo en dibab filmoù kinniget: "remziad sevenerien nevez" Rusia, "sell merc'hed Rusia", "ur sell gall war ar vro"... Lod anezho n'int bet bannet pe skignet gwech ebet e Frañs. Ur sine-sonadeg a vo kinniget gant un dibab filmoù mut. Un dibab filmoù eus Romania a vo ivez. Ouzhpenn an tem pennañ, e tegemer Emgavioù Gwened kenstrivadegoù filmoù, evit teulfilmoù ha filmoù-berr, hag ivez abadennoù a-ratozh evit ar skolioù.

Evit gouzout hiroc'h:

http://cinecran.org

Gweltaz Adeux: emañ e bladenn o tont!

Roet en deus da c'houzout nevez zo ar soner ha kaner Gweltaz Adeux (brudet evit bezañ bet unan eus izili ar strollad rock EV) e oa o peurlipat e albom kentañ war e anv dezhañ e-unan. "Ehan" a vo titl ar bladenn. Echuet en deus da enrollañ an tonioù gant e sonerien, Nico Guérin (gitar-boud) ha Ray (taboulinoù). Chom a ra neuze da songemmeskañ pep tra, ar pezh a vo peurechuet a-benn fin ar miz. A-benn kaout un tañva eus labour Gweltaz Adeux a-raok gellet dispakañ ar CD ha magañ ho lenner-pladennoù, e kinnig ar c'haner daou don war e lec'hienn Internet, Kelc'hioù du ha kelc'hioù glas ha N'out ket mat, emezi.

Evit gouzout hiroc'h :

http://gweltaz-adeux.com/

http://www.myspace.com/gweltazadeux

Teñzorig sonerezh The Goonies adkavet

Bedig an embann sonerezh filmoù (amerikan dreist-holl) zo leun a virvilh abaoe bloaz. Distanket eo bet ar c’hudennoù gwirioù evit kalz anezho. P'emañ koulskoude marc'had ar pladennoù war ziskar, n'eus james bet kement-all a bladennoù sonerezh film embannet (alies mat d'un niver bihan). Goude sonerezh Back To The Future diboultrennet gant an embanner Intrada, emañ Varèse Sarabande o paouez diskoachañ e gavadenn nevez: sonerezh orin The Goonies gant Dave Grusin, bet moullet 5000 CD anezhañ. Hemañ zo brudet-mat e metoù an jazz, dreist-holl. Labouret en deus meur a wech gant Sidney Pollack (The Yakuza, Three Days Of The Condor, The Firm) da skouer. E 1985 e oa bet goulennet digantañ sevel sonerezh The Goonies, sevenet gant Richard Donner (Superman, Lethal Weapon) ha produet gant Steven Spielberg. Kontañ a ra troioù-kaer ur vandennad bugale o vont da glask teñzor ur morlaer, a vefe bet kuzhet un tu bennak war an aod... Daoust da berzh ar film (e video hag en tele e-touez bugale ar bloavezhioù 80 ha 90) ne oa ket bet embannet e sonerezh. Darlammat a ra en un doare skañv ha laouen al laz-seniñ (asambles gant kenaozerioù), hag e oar bezañ melkonius pe meurdezus pa vez ret. Pedet e vo Dave Grusin da festival sonerezh film Úbeda (Andalouzia), e miz Gouere 2010, da ren ul laz-seniñ evit kinnig e sonerezh, hag e-touez an dibab tonioù e vo lod diwar The Goonies.

Evit gouzout hiroc'h:

http://www.varesesarabande.com/

Skol Diwan Sant-Brieg: ur blog evit eskemm gant o zud

Klasad Yann-Varc'h Thorel, skolaer e skol Diwan Sant-Brieg, en deus bremañ e vlog bet savet a-raok ehanoù Nedeleg: bikblog.primblog.fr. Nebeut-ha-nebeut, sizhun goude sizhun, ez eo krog ar skolidi da zeskiñ ober gantañ. "Gant hennezh e c'hallomp mont en tu-all da amva ar skol ha reiñ da lenn hon skridoù en diavaez", a zispleg ar skolaer.

Gallout a ra ar vugale embann pezh a reont er c'hlas, reiñ ditour diwar-benn buhez ar skol, e kerc'henn o zud dreist-holl. "Ul liamm a skoulmomp evel-se gant o zud, ha tro o devez c'hoazh da lenn un tamm brezhoneg asambles er gêr ha da eskemm."

A-hed ar sizhun e c'hell ar vugale pleustriñ war ar skrivañ ha war galvezerezhioù ar c'hehentiñ hag ar c'helaouiñ, dindan evezh ar skolaer a-raok embann.

"A-c'hiz-all e teu da vezañ ur gwir venveg da vroudañ ar skolidi da vont war-raok gant plijadur", eme o skolaer c'hoazh.

Paol Illien

Irvin gant olivez

Danvez: 1 c’hilo irvin bihan – 5 loaiad eoul – 1 ognonenn – 50g kig-sall mogedet – 50g olivez du diveinet – un tamm pimant ruz – holen

Gwalc’hiñ an irvin ha lakaat anezho da boazhañ en dour berv sall e-pad 10 mn. Dizourañ ha mirout 1 tasad eus an dourenn.

Drailhañ an ognonenn hag ar c’hig sall. Lakaat an eoul da dommañ en ur billig ha poazhañ an drailhenn gant un tamm pimant ruz. Lakaat a-gostez.

Lakaat neuze an irvin troc’het a dammoùigoù er billig, lezel da boazhañ ur pennadig hag ouzhpennañ dourenn gwech an amzer hervez an ezhomm.

Pa vez poazh lakaat an olivez du.

En ur plad tomm lakaat an irvin hag an olivez hag ar c’hig drailhet war c’horre.

Notenn: koulz lavarout n’eus forzh peseurt kig drailhet pe restachoù kig a zo mat.

Riwanon

Lennit Bremañ Meurzh 2010 !

Stourm difeuls kêriadenniz Bil'in e Palestina, dilennadeg prezidant Togo, steuñv gouarnamant Frañs e-keñver ar bezhin glas, Emgavioù Dizagn breizh en Oriant... Kaoz zo eus an holl draoù-se hag eus traoù all c'hoazh e-barzh niverenn Bremañ miz Meurzh 2010.

An teuliad zo gouestlet er miz-mañ d'an dilennadegoù-rannvro. Pevar bloaz en do ar c'huzul nevez evit kas war-raok e raktresoù. Goulennet ez eus bet ouzh an 11 listenn war ar renk e Rannvro Breizh reiñ o c'hinnigoù e-keñver labour hag armerzh, endro ha diorren padus, yezh ha sevenadur, hag an adunvanidigezh.

Kendalc'het e vo er miz-mañ gant div bajennad "Lennomp!", bet soñjet a-ratozh evit ar re zo o teskiñ brezhoneg. M’ho pez plijadurig o lenn Bremaik, plijadur ho po o lenn Bremañ, sur!

Bep miz, abaoe 1980, e kinnig ar gelaouenn Bremañ pennadoù brezhonek a bep seurt, diwar-benn Breizh hag ar bed, kinniget brav, e doare ur magazin.

Embannet gant Skol an Emsav

(4,5€ an tamm – 50€ evit ur bloaz – 60€ evit an estrenvro – 4€ bep miz dre lamadenn)

E gwerzh er stalioù-levrioù a ginnig danvez Breizh, pe dre goumanant.

Evit gouzout hiroc'h: www.breman.org