Lun 16 a viz Meurzh, niv.230
Sizhun 12 - 2009

Pellgargit ar pennadoù e stumm Word

Evit resev kemennadenn nevez Bremaik bep Lun,
kasit ho chomlec'h da: bremaik@free.fr

Petra oa keleier Bremaik bloaz zo? Klikit amañ!

Evit distreiñ d'ar bajenn degemer

Devezh manifestiñ a-benn diriaou

Goude devezh stourm sokial bras an 29 a viz Genver, ez eus bet galvet d'un eil devezh harz-labour ha manifestiñ, d'ar Yaou 19 a viz Meurzh gant eizh sindikad eus Frañs (CGT, CFDT, FO, CFTC, CGC, FSU, UNSA ha Solidaires). Hervez ar polis e oa bet 1 milion a dud er straedoù en deiz-se hag ouzhpenn div wech ar sifr-se hervez ar sindikadoù. Klasket eo bet gant ar gouarnamant sioulaat ar c'hlemm war dachenn ar c’hudennoù sokial e-kerzh miz C'hwevrer gant ur yalc'had 2,6 miliard a euroioù skoazell evit an dud dilabour, ar familhoù hag ar re baourañ. Evit ar sindikadoù n'eo ket a-walc'h, hag er sizhunioù tremenet eo aet war drenkaat ar soubenn gant stourmoù all zo padet pell, hag a bad c'hoazh: re an departamantoù ha tiriadoù tramor, re an deskadurezh hag an enklask, re micherourien Sony ha Continental... A dra sur e vo heuliet an harz-labour en SNCF hag en Deskadurezh, met gant kudennoù dic'hoprañ en industriezh hag ar servijoù, e tlefe ar metoù labour prevez bezañ tizhet ivez. Embannet en deus ar gouarnamant c'hoazh ne vefe yalc'had ebet ouzhpenn, peogwir e vefe kreskiñ an dle adarre.

Gwellat brec'hioù ar rodoù avel diwar skouer ar balumed

Awenet eo bet skiantourien zo (sk. Laurens Howle, eus skol-veur Duke) gant barregezhioù ar valum askellek (Megaptera novaeangliae) evit fiñval en dour. Evit lod, ma'z eo ken barrek da fiñval daoust d'he ment ha d'he fouez, eo abalamour d'ar bosoù a gaver war hec'h eskell. A-drugarez d'ar re-se e c'hell chom stabil daoust d'ar redoù-dour bras a vez gant he fiñvoù.
Awenet eo bet lod evit adimplijout ar gavadenn-se. Evit ar c'hirri-nij ez eus taolioù-arnod, met ivez evit ar rodoù-avel. Savet ez eus bet rodoù-avel bosennek o eskell gant an embregerezh WhalePower (nerzh ar valum). Nebeutoc'h a drouz a vez graet gant ar re-se, ha dedennus-tre int ivez peogwir e talc'hont mat zoken pa vez avelioù kreñv, setu n'eo ket dav herzel anezho pa vefe ar prantad dedennusañ evit implijout anezho. Gant ar benveg a zo bet savet ganto evit arnodiñ ez eus bet gounezet 20% a efedusted, met dav e vo c'hoazh ober taolioù-arnod all ha kavout arc'hant evit produiñ kementadoù bras anezho.

M.M.

Ar Basion Vras en Iliz Plougerne

E 1991 e oa bet savet ar Basion Vras gant strollad ar Vro Bagan, c’hoariva ha sonerezh kemmesket enni. Gant misterioù ar Grennamzer, c’hoariva poblek Breizh hag ar c’halvarioù eo bet levezonet ar pezh-c’hoari. Eno e kaver roud eus poanioù kriz ha marv Jezuz Krist.

En Ilizoù e veze c’hoariet er penn-kentañ mister Ginivelezh, Pasion hag Azginivelezh ar salver Jezuz. Goude-se eo bet deuet an traoù da drenkañ gant ar veleien hag ar c’hoarierien; ha deuet ar c’hoariva er-maez eus an ilizoù. C’hoariva ar Grennamzer a oa evel un oferenn vras: milieroù a dud a gemere perzh er Mister.

C’hoant en deus bet Strollad ar Vro Bagan dispenn roudoù c’hoarierien ar misterioù kozh. Bodañ adarre kantadoù a dud da c’hoari (200 amañ). C’hoant diskouez ivez penaos e veze bouetaet an arz breizhek gant arzoù Europa. Evel-se e vo gwelet Jezuz Krist, an ebestel e-touez diaouloù hag erevent ar Grennamzer, komedianed Italia, mojennoù ha kredennoù keltiek... Gant Kristian Desbordes eo bet savet ha kempennet ar sonerezh klevet a-hed an abadenn. Klasket en deus adkavout spered Pasionoù bras an amzer dremenet, met awenet eo bet ivez gant kalvarioù meur Breizh-Izel. Binvioù kouevr, taboulinoù ha binioù bihan a glever, met ar plas kentañ zo bet roet d’al laz-kanañ, abalamour da bouez an destenn skrivet hag ivez da basion ar C’hrist hec’h-unan evel ma’z eo kontet er pezh-mañ. A-drugarez d’al laz-kanañ, niverus-tre ar ganerien ennañ, e santer donder an istor-se ma kaver ennañ war un dro sent ha bourevien, fideled ha treitourien, tud paour ha tud pinvidik, aeled ha diaouled.

C’hoariet gant Strollad ar Vro Bagan.

Kanet gant Kanerien Kristian Desbordes.

Iliz Plougerne.

Gwener 27 a viz Meurzh (8e30 noz), Sadorn 28 (8e30 noz), ha Sul 29 (4e30 g.k.).

12 € war ar plas (10 € pa vez prenet en a-raok e Ti Touristed Plougerne-Lanniliz-Lesneven). 8 € (studierien, tud dilabour). 5 € (bugale etre 10 ha 16 vloaz).

Mell-droad: derby Naoned-an Oriant

Disadorn noz e oa bet ur c'hrogad etre Bretoned e stad ar Beaujoire. Daoust d'an disoc'h bezañ bet klouar, 1-1, n'eo ket deuet e-maez an daou skipailh eus an dachenn gant ar memes temz-spered. Gwelet eo bet ar Pennoù-Merluz o klask aozañ ur c'hoari fin, goude an dipit e-tal d'ar Barizianed. Diouzh an tu all e veze santet e oa reutaet Naonediz goude pal Guirane N'Daw (25vet munut), ar c'hoarierien o chom stank evit stankañ an hent da Oriantiz. Mont-ha-dont zo bet etre an dachenn hag ar bank evit ar Pennoù-Merluz, ha birvilh en deus roet d'o c'hoari: aliesoc'h e pignent war-zu kaoued-pal Naoned, gant muioc'h a fiziañs enno ivez, met gwanoc'h diouzhtu pa cheñche Naonediz ster an argad war-zu palioù Fabien Audard. Gant Jérémy Morel eo bet sevenet frouezh ar strivoù gant un tenn-kastiz lakaet d'an 78vet munut. Karet o dije ar Pennoù-Merluz dastum muioc'h a boentoù, hag en tu all o dije bet c'hoant ar Ganaried diskouez e oant bepred mistri o zachenn... Lec'h n'o deus gounezet krogad ebet abaoe ar 6 a viz Kerzu! Nec'hus evit paotred Elie Baup.

Milk (Harvey Milk)

Stadoù-Unanet – 2008

Seveniñ : Gus Van Sant

Da zaou-ugent vloaz e teu c’hoant da Harvey Milk (Sean Penn) d’ober un dra bennak talvoudus gant e vuhez. Mont a ra gant e serc’h (James Franco) da vevañ e San Francisco. Diazezañ a reont du-hont ur stal luc’hskeudennerezh heñvelreviat en dizolo. Poent loc’hañ un emsav evit gwirioù an heñvelrevidi eo hag a gaso Milk betek ur gador en ti-kêr. Dre stourm kalet e teuio a-benn an den da lakaat an traoù da vont war-raok.

Anavezet fall eo ar bomm-se eus istor ar gwirioù keodedel er Stadoù-Unanet. Gant ar c’hoant atizañ spered stourm emsaverien nevez eo bet savet Milk. Ger-stur an den a oa “My name is Harvey Milk and I am here to recruit you” (Harvey Milk eo ma anv ha deuet on d’ho engouestlañ), ger-stur ar film eo ivez. Gwir eo e chom c’hoazh hent d’ober er Stadoù-Unanet hag er bed a-bezh. E stadoù stadunanat zo, da skouer, e oa bet aotreet an dimeziñ etre tud eus ar memes rev met cheñchet eo al lezenn ha setu bremañ koubladoù en arvar da vezañ torret o dimeziñ. Kadarnaat a ra Gus Van Sant e ampartiz war ar seveniñ hag e zoug d’an temoù kizidik. Priziet eo bet perzh Sean Penn er film-mañ (Academy Award an aktor gwellañ) daoust ma c’heller en em c’houlenn da vareoù zo ha ne c’hoari ket muioc’h an heñvelreviadezh eget an dudenn hec’h-unan.

Meriadeg Vallerie

Kement ha gouzout hiroc’h:

http://www.filminfocus.com/

Bashung (1947-2009)

"On m'a vu ans le Vercors, sauter à l'élastique". E lamm diwezhañ en deus graet Alain Bashung disadorn.

Mab ur vamm a orin eus Breizh hag un tad berber e oa Bashung. Azalek ar bloavezhioù 1960 e oa kroget da seniñ ha da ganañ, hep ober berzh. Kenderc'hel a reas a-hed ar bloavezhioù 1970, ha berzh a reas a-benn ar fin e 1980 (Gaby, oh Gaby) hag e 1981 (Vertiges de l'amour). E 1982 e krogas da genlabourat gant Serge Gainsbourg, hag asambles e savjont Play Blessures, un bladenn rock da vat, disheñvel diouzh ar pezh a rae a-raok. Div bladenn all a lakaas embann er bloavezhioù 1980: Passé le Rio Grande ha Novice.

Er bloavezhioù 1990 e teuas da vezañ unan eus kanerien vrudetañ Frañs, hag un heuliad pladennoù peurvat a lakaas embann etre 1991 ha dibenn e vuhez: Osez Joséphine (gant an ton Madame rêve), Chatterton ha Fantaise Militaire. Unan eus ar re nemeto a oueze ober sonerezh rock e Frañs e oa, ha pouezus (ha fentus war-un-dro) e oa komzoù e ganaouennoù.

A-hed ar bloavezhioù 2000 en doe tro da labourat gant Dominique A, Noir Désir, Brigitte Fontaine pe c'hoazh Dionysos. Evit lod brasañ an dud en doa kemeret plas Gainsbourg a-fet levezon ha pouez en istor ar rock gall.

L'Imprudence, Le Cantique des cantiques ha Bleu pétrole (2008) a voe e bladennoù diwezhañ.

"J'crains plus rien" a gane war an ton anvet Angora.

R.M.

La Chanson du dimanche... e brezhoneg!

Dec'h e oa bet diskuliet gant lec'hienn internet Ouest-France, ur ganaouennig nevez gant Alec ha Clément, daou soner-ha-kaner "La chanson du dimanche". Ha n'eo ket n'eus forzh peseurt kanaouennig zo bet kinniget: "Super-pouvoir d'achat" unan eus ar re vrudetañ bet savet ganto evit poent (gwelet ouzhpenn 800000 gwech war dailymotion). Deuet eo da vezañ an diskan "Donnez donnez-moi, le pouvoir d'achat": "Roit roit din, ar galloud prenañ", gant skoazell Ofis ar Brezhoneg. Nag Alec na Clément ne gaozeont brezhoneg evel-just, desket o deus dre an eñvor ha buan-ha-buan, ar c'homzoù brezhoneg. N'eo ket anat bepred kompren pep tra, dre ma n'int ket ken asur ha da gustum, hogen strakus eo ar mennozh ha ken fentus all evit ar vrezhonegerien! Deuet e oa an daou istrogell eus Pariz da Garaez digwener tremenet evit festival "Les Vieilles Charrues remettent le son". Ur bladenn a vo lakaet e gwerzh d'an 23 a viz Meurzh.

Evit selaou "kanaouenn ar Sul", da 3.5km eus Karaez:
http://www.ouest-france.fr/

Avaloù Calvados

Toaz sablek : 250 g bleud – 150 g amann – 70 g sukr – 1 vi

Gwarnisadur : 600 g avaloù – 175 g sukr – 1 dl calvados – 100 g laezh – 1 vi – 2 melen vi – 100 g chokolad – 250 dienn fresk tanav

Bruzunit an amann hag an toaz. Mezit un toaz gant ar sukr hag ar vi.

Troc’hit an avaloù e kuboù. Lakait anezho da garameliñ gant 100 g sukr en ur baelon. Dilindrit gant ar banne Calvados. Lezit da yenaat.

Fardit ur flanez gant ar banne laezh, ar vi ha 35 g sukr. Diskargit an avaloù war an dartezenn, ha da heul ar flanez. Lakait er forn 30 mn 200° (th.6/7).

Meskit an 2 velen-vi, dourgibit anezho (betek gwennañ). Dourgibit ar chokolad. Savit da erc'h an dienn. Meskit ar melen-vi gant ar chokolad. Ouzhpennit tamm-ha-tamm an dienn savet da erc’h.

Pa vo yen an dartezenn, goloit gant ar skañvadell chokolad. Lakait 2 eurvezh er yenerez da nebeutañ.

Mari Lubrano

Lennit Bremañ miz Meurzh

Reuz sokial ha politikel an Antilhez gall, Bonreizh nevez Bolivia, Dilennadegoù ar gannaded en Israel, Sina ha Gwirioù Mab-den, Galv Pariz evit "Breizh en he fezh", ar Skrivadeg... Kaoz zo eus an holl draoù-se ha traoù all c'hoazh e-barzh niverenn Bremañ Meurzh 2009.

An teuliad peder fajennad zo gouestlet d'ar produiñ tredan. Embannet en deus Nicolas Sarkozy e vefe savet un eil, hag un trede marteze zoken, kreizenn EPR e Frañs. Petra soñjal eus an hent kemeret gant ar Stad c'hall a ro ar plas pennañ d'an nukleel evit produiñ gremm? Gouzout hiroc’h diwar-benn an  nukleel hag an tredan krouet diwar teknologiezhioù a denn splet eus nerzh ar mor a vo tu d‘ober o lenn teuliad ar miz.
Bep miz, abaoe 1980, e kinnig ar gelaouenn Bremañ pennadoù brezhonek a bep seurt, diwar-benn Breizh hag ar bed, kinniget brav, e doare ur magazin.

Embannet gant Skol an Emsav (4,5 euro an tamm)

E gwerzh er stalioù-levrioù a ginnig danvez Breizh, pe dre goumanant.

Evit gouzout hiroc'h: www.breman.org