Lun 5 a viz Meurzh, niv.135
Sizhun 10 - 2007

Pellgargit ar pennadoù e stumm Word

Petra oa keleier Bremaik bloaz zo? Klikit amañ!

Evit distreiñ d'ar bajenn degemer

10^vet bloavezh Ar Skrivadenn !

Disadorn e vo kinniget d'ar vrezhonegerien, evit an dekvet gwech, kemer perzh er Skrivadeg. Savet e 1997 gant izili Emglev Bro an Oriant, ar Skrivadeg zo un degouezh dispar evit bodañ, tro-dro d'ar yezh, tud a bep seurt oadoù, micherioù hag all. Ne vez ket kinniget alies traoù a c'hellfe dedennañ koulz ar re gozh hag ar re vihan ha lec'h ma c'hell an holl ober gant ar brezhoneg a-hed an deiz, evit ar blijadur. Un nevezinti a bouez er bloaz-mañ: Tregeriz a gemero perzh ivez gant un abadenn aozet e Plouha.

Er bloaz-mañ e vo kinniget un destenn gant Padrig an Habask, evel warlene, evit lodenn gentañ ar Skrivadeg. Pemp live a vo kinniget, hag e lec'hioù zo e vo tu d'an dud deuet a heuilh kentelioù noz lakaat o anv er rann a glot gant o live: CE/oadourien live 1, CM/oadourien live 2, Skolaj/oadourien live 3, Lise/oadourien live 4 ha Brezhonegerien ampart. Ar re wellañ a c'hello mont da Gemper d'an 19 a viz Mae evit kemer perzh er Gourfenn.

Ar skrivadeg a vo aozet d'an 10 a viz Meurzh e:

Brest (02.98.80.26.71), Kemper (02.98.90.70.43), Kraozon (02.98.27.53.20), Lannarstêr (02.97.21.37.05), Montroulez (02.98.63.98.79), Naoned (02.40.20.39.74), an Ospital-Kamfroud (02.98.81.90.08), Plouha (02.96.22.49.79), Roazhon (02.99.38.75.83)

Kinnig-lezenn war ar c'hirri-tan saotrus e Suis

Posupl eo e vefe lakaet ar c'hirri saotrusañ e-maez lezenn e bro-Suis. Un destenn a zo bet savet gant Yaouankizoù Glas Bro-Suis, gant sikour kevredigezhioù all, ha goude bezañ bet goulennet o ali digant kelennerien war ar gwir hag ijinourien war an treuzdougen, evit ma vefe nac'het ar c'hirri-tan re saotrus, pe dañjerus evit an dud all. Ar re o deus ezhomm groñs eus ur c'harr-saout (4x4) evit o micher (labour-douar, labour er c'hoadoù) a vefe aotreet da gaout unan. Kirri-tan bras, re sport, pe kirri-saout a vefe tizhet ar muiañ, hag en holl eo tro 9% eus ar c'hirri e gwerzh a vefe nac'het reiñ ur blakenn dezho. Evit ar c'hirri all e vefe bevennet an tizh da 100 km/e.

Ne vefe lakaet den ebet diaes e gwirionez gant seurt diviz, dre ma'z eo kentoc'h evit poufal ez eer gant seurt kirri, ha n'eo ket dre redi. Evit ma vefe lakaet an dra-mañ e pleustr eo dav ma vefe sinet gant 100 000 a dud d'an nebeutañ. Hervez ar re o deus boulc'het ar raktres e vefe posupl tizhout an niver-se, dre ma'z eus bet graet dija ul labour bruderezh evit ar c'hinnig-mañ.

M.M.

Evit gouzout hiroc'h :
www.univers-nature.com

"Eus Armenia" : diskouezadeg nevez Le Quartier

Kreizenn arzoù arnevez Kemper Le Quartier a ginnig  "D’Arménie" betek ar 1añ a viz Ebrel 2007. Seizh arzour eus daou rummad-oad disheñvel a zo bet pedet: lod zo kroget e penn-kentañ ar bloavezhioù 80 hag ar re all 15 vloaz goude. An diskouezadeg a vod pezhioù liesstumm a zo bet krouet holl diwar obererezhioù kaset da-benn en Armenia a vremañ. Oberenn Karen Andreassian ne vez kavet nemet war ar genrouedad, ul liamm a vo staliet eta: e bal zo kelaouiñ war saviad geopolitikel ar gêriadenn Voghchaberd, tost da Erevan. Mher Azatian a ziskouez frapadoù buhez, ordinal pe dic’hortoz, dre e luc’hskeudennoù hag e skridoù. Al livour Arman Grigorian a implij video ha testennoù evit stourm a-enep ar raksoñjoù hag ar c’hlichedoù a veuz hor buhez pemdeziek. Gant Hamlet Hovsepian e vo tu da zizoleiñ video, livadennoù ha delwennoù awenet gant menezioù Armenia, ha Grigor Katchatrian, filmaozour, a implij objedoù, video, fotoioù ha skridoù evit luadenniñ ar reizhiadoù a veul hag a ganmeul an hiniennoù. Evit echuiñ e vo tu da welet ur film savet gant Anna Barseghian ha Stefan Kristensen, "Arménographie", diwar-benn an darempredoù etre an Armenianed hag o zachennad.

Hoel Louarn

Ur weladenn vrezhonek a vo d'ar Sadorn 24 a viz Meurzh.

Le Quartier, digor etre 10e ha12e hag etre 13e ha 18e d’ar Meurzh  ha d’ar Sadorn (betek 19e30 d’ar Yaou) hag etre 14e ha 18e d’ar Sul.

Evit gouzout hiroc’h: www.le-quartier.net

Livoudurioù Serge Doceul
e Skol Diwan Roazhon

Gwagennoù divent, morioù teñval pe leun a nerzh. Santout a reer avelioù kreñv o c'hwezhañ, spoum ar mor o tarzhañ war ar reier... Gant livaj-eoul, dre ar gontell e klask Serge Doceul lakaat ar muiañ a efed ma c'hell en e livadurioù, holl droet war-du ar mor: abaoe m'en deus graet anaoudegezh gant mojenn Kêr Iz eo bet maget e awen gant istor ar gêr distrujet gant ar mor. Daoust da nerzh ar mor a seblant bezañ bepred war var da zistruj pep tra e klask al livour diskouez spi an amzer da zont dre livioù flamm ha splann en oabl, sklaerijenn domm an heol. Emañ al livour o chom e Roc'h-an-Argoed, hag ingal e c'heller gwelet e livadurioù diskouezet e gouelioù Celtomania, el Liger-Atlantel, da skouer.

Livadurioù Serge Doceul a c'heller mont da welet betek ar 17 a viz Meurzh e Skol Diwan Roazhon, 31 bali Portugal e Roazhon.

Evit gouzout hiroc'h: www.igroupart.com/SergeDoceul

Naoned : klask chom er C'hevre 1

Dec'h e oa bet c'hoariet gant Naoned ur c'hrogad daleet eus 27vet devezhiad bloavezh ar C'hevre 1. War dachenn Sochaux e oa aet ar Ganaried. Ha distroet int laouen bras: daou boent ganto, unan lakaet gant Sochaux. Ar c'hrogad kentañ gounezet gant Naonediz (19vet) er C'hevre 1 abaoe seizh devezhiad e oa: peadra da dostaat er renkamant eus ar skipailh diwezhañ o vezañ sur da chom er C'hevre 1, Valenciennes (17vet).

Se eo nec'hamant kentañ tud an FC Naoned: dont a-benn da chom er C'hevre 1 kousto pe gousto. Ambrougerien ar Ganaried o deus disklêriet goude abadenn dec'h e oa bet ur gounid a bouez evit temz-spered ar c'hoarierien. Ur c'hoari efedusoc'h eget a-enep Sedan o deus gellet ober, hag ar gward hollvrudet Fabien Barthez en deus diskouezet e talveze ar boan en em gannañ... met embannet en deus ne gendalc'hfe ket gant ar Ganaried ma tiskennent er C'hevre 2 er bloaz a zeu. Gwelet e vo disadorn petra ’vo an disoc'h a-enep Nancy evit an 28vet devezhiad.

Letters from Iwo Jima (Lettres d’Iwo Jima)

Stadoù-Unanet Amerika - 2006

Seveniñ : Clint Eastwood

E 2005, e kav ur skipailh klaskerien ur sac’had lizhiri war enezenn Iwo Jima. El lizheroù-se e tizoloer eñvorennoù soudarded japanat an emgann a reas e reuz war an enezenn e-kerzh an eil brezel-bed. E-touez ar soudarded-se e oa ar jeneral Kuribayashi, deuet a-benn da dennañ splet eus douar soufr al lec’h.

Setu, goude Flag of our Fathers, an eil tamm eus istor emgann Iwo Jima sevenet gant Clint Eastwood. Eus tu soudarded Bro-Japan ar wech-mañ. Pa oa ar film kentañ o tiskouez implij politikel an emgann-se evit brudañ ar brezel er Stadoù-Unanet e tiskouez hemañ penaos e voe prientet an dachenn gant ar Japaned ha plegoù fall an arme hag he reolennoù. Brav-spontus ar skeudennoù, dedennus an tudennoù. Disheñvel-mat eo diouzh al lodenn gentañ, hag ur perzh mat all eo ivez. Kreñvoc’h eo c’hoazh Letters from Iwo Jima dre ma kont e vage forzh pehini eus soudarded an emgann-se ar memes c’hoant ha spi. Chom bev ha distreiñ d’ar gêr...

G.L.

Evit gouzout hiroc’h : http://wwws.warnerbros.fr/lettersfromiwojima/

Kaiser Chiefs – Yours Truly, Angry Mob

Embannet gant AZ / Universal

Ar re a oa e Roazhon da vare an Transmusicales a anavez dija un nebeud tonioù eus eil pladenn Kaiser Chiefs. Ar re o deus bourret en ur selaou o fladenn gentañ a anavez ar wezenn familh: kroget eo an traoù gant The Kinks, ha goude-se Madness, The Jam, pe c’hoazh pladennoù kentañ Blur. Aze emaomp e-kreizig-kreiz ar sonerezh pop saoz: lakait pladenn nevez Kaiser Chiefs da dreiñ hag ho po ar santimant ez eus ur stal fish and chips e traoñ ho straed, gwelout a rit paotred oc’h en em soñjal dirak ur banne bier klouar e foñs ur pub (bet) mogedet.

Rekipe klasel neuze evit a sell ouzh an tonioù, met rekipe a-feson. Tamm amzer ebet evit distardañ pa grog ar bladenn gant div fuc’hell evel Ruby hag Angry Mob. Hag evel-se betek fin ar bladenn, rak leun a ganaouennoù a chom stanket en ho penn eo, evel Thank You Very Much pe c’hoazh Everything Is Average Nowadays.

R.M.

http://www.kaiserchiefs.co.uk/

Christian Vander ha Ricky Ford e Pont-’n-Abad

Disul e vo ar gevredigezh Aprem’ Jazz eus Kemper o kinnig un abadenn enor da Coltrane gant Christian Vander Trio ha Ricky Ford en Triskell e Pont Abad.

Christian Vander en deus krouet ur strollad gant Emmanuel Borghi ouzh ar piano hag Emmanuel Grimonprez ouzh ar gourrebed. Hemañ zo bet kazimant savet evit c’hoari tonioù John Coltrane, ur muzisian azeulet a-viskoazh gant Christian Vander, evit bezañ bet e penn an Jazz modern e derou ar bloavezhioù 60. War o fladenn Sunset ec’h adkemeront oberenn an arzour meur en ur vont pelloc’h ganti, evel ma kar ober krouer ha c’hoarier binvioù-stekiñ Magma. Ur strollad digredus, etre free jazz ha rock nerzhus, awenet war un dro gant Stravinsky, Wagner ha Coltrane, doare Rhythm and blues, kement ha Rock, spered "The Wall" gantañ, etre tsunami ha kren-douar, evel deuet eus ur bed all.

Gant Christian Vander hag e vuzisianed e vo Ricky Ford, ar "sax-teno" eus Boston, bet o c’hoari gant Charles Mingus, Abdullah Ibrahim, Lionel Hampton pe c’hoazh Duke Ellignton. Un arzour evezhiek, gouest da seniñ mod Sonny Rollins, Hawkins pe Getz, hervez an degouezh, hanter-hent etre harmoniezhioù sutil ar be-bop hag un anaoudegezh vras eus ar c’hoari war ar prim.

Son don Ricky Ford mesket gant nerzh Christian Vander Trio a gaso ar selaouerien en ur bed Swing eus ar re binvidikañ : un enor a-feson evit Coltrane.

H.L.

Evit gouzout hiroc’h : www.apremjazz.com

Tartezenn skañv gant legumaj

Danvez evit 6 den : 6 tomatez troc’het e pevar – 1 penn-ognon ruz troc’het gros – 2 bimant dous melen – 2 bimant dous ruz – 100 g feta – 1 loaiad vras bazilik fresk troc’het e lavnennigoù moan – 9 follenn toaz filo – ur banne eoul

Raktommit ar forn (etre). Meskit an tomatez hag ar penn-ognon en ur blad da rostañ e-pad 30 mn. E keit-se, troc’hit ar pimantoù dous e pevar. Tennit ar greun. Lakait anezho dindan kael ar forn, betek ma vo klogorennet kroc’hen ar pimantoù. Goloit anezho 5 mn a-raok dibluskañ anezho. Troc’hit anezho a-dammoù. Lakait ar pimant dous, ar c’heuz hag ar bazilik e-barzh ar plad gant an tomatez. Meskit an aozad aketus. Berniañ ar follennoù toaz filo an eil war eben, gwisponit gant eoul ur follenn diwar deir. Plegit ar ribloù. Lakait war-c’horre ar meskaj legumaj. Laakit er forn 15 mn (forn tomm) betek ma vo alaouret an toaz un tammig.

Mari Lubrano