Lun 26 a viz C'hwevrer, niv.134
Sizhun 9 - 2007

Pellgargit ar pennadoù e stumm Word

Petra oa keleier Bremaik bloaz zo? Klikit amañ!

Evit distreiñ d'ar bajenn degemer

17 a viz Meurzh e Besièrs:

"Anem Óc! Per la lengua occitana"

D’ar 17 a viz Meurzh e vo ur vanifestadeg evit an okitaneg e Besièrs, aozet gant ar c'henstrollad "Manifestar per l'occitan". E miz Here 2005 e oa deuet a-benn stourmerien an okitaneg da vodañ 12000 den e Carcassona en unan eus an dibunadegoù brasañ bet aozet biskoazh evit difenn gwirioù an okitanegerien. Ouzhpenn lakaat war wel kudennoù an okitaneg evit kavout e blas er skolioù, er mediaoù, hag er vuhez publik dre vras, e fell da vanifestadeg Besièrs degas danvez ar yezhoù hag ar sevenadurioù minorel e tabutoù an dilennadegoù da zont er C'hwec'hkorn. Evel evit taol-kaer Carcassona, e vo laouen an Okitaned o welet Euskariz, Katalaned, Korsikiz, Galiziz ha Bretoned evel-just, o kerzhet en o c'hichen hag o huchal: "Anem! Óc! Per la lengua occitana!" ("Deomp war-raok evit an okitaneg").

Emañ Kuzul Sevenadurel Breizh e soñj aozañ ur c’harr-boutin evit kas Bretoned da vanifestiñ asambles gant an Okitaned. Ma tastum KSB 30 ragenskrivadur a-benn penn-kentañ miz Meurzh e vo aozet ur c’harr-boutin, a guitafe Breizh d'ar Gwener 16 a viz Meurzh en ur dremen dre Gemper, an Oriant, Gwened ha Naoned. Ar priz a vefe e-tro 30 euro.

Evit gouzout hiroc'h: http://manifestar.online.fr.

Evit lakaat e anv evit ar c'harr-boutin, skrivañ da:

ksb@kuzul.info pe gwenvael@kuzul.info,

pe pellgomz da : 02 99 87 17 65 pe 02 99 63 18 83.

Plant OGK:

ar gouarnamant a c'houlenn o ali digant an dud

A-raok ma rofe ar Stad an aotreoù evit an amprouadennoù a vez graet gant plant O Genoù Kemmet e vez graet studiadennoù lies. Maodiern an Endro a rank bezañ a-du ganto, hag hini al Labour-Douar ivez. Bodadoù-labour a studi an teuliadoù ivez : unan troet war ar gimiezh ("Commission du génie biomoléculaire"), ha lod all stag ouzh Ofis Rannvro al labour-douar hag ar c'hoadoù, hag hini gwarez ar plant.
Ul lodenn eus an traoù ret gant al lezenn a denn ivez da asant ar bobl. Diwar-se e vez goulennataet an dud diwar kement raktres a vefe kaset da benn e-kerzh ar bloaz. Met dav eo gouzout kement-mañ, ha gouzout e pelec'h e c'heller reiñ e ali. Ul lec'hienn a zo bet savet gant ar Stad evit an dra-se : http://ogm.gouv.fr.
Warni e c'heller kavout ar 14 raktres a vo kinniget d'ar studi evit ar bloaz-mañ. 13 diouto a denn d’ar maiz, unan d’ar patatez, ha 7 anezhe a vez kinniget gant Monsanto. Dedennus eo gallout teurel ur sell ouzh ar raktresoù, lenn alioù ar Bodadoù... ha reiñ e hini !

M.M.

Un diviz evit kas da benn ar preder war ar c’hoariva e brezhoneg

“Peseurt c’hoariva brezhonek warc’hoazh” a vo danvez ur brezegenn-diviz divyezhek a vo aozet d’an 3 a viz Meurzh e Forest-Fouenant. Kinniget eo gant Tud Bro-Konk (Kenvodad sevenadurel bro Konk-Kerne) e-kerzh ar “Gouel C’hoariva e Kerne” ha “Mizvezh sevenadur Breizh”, ha kenaozet gant Skol-Uhel ar Vro ha Ti ar Vro Kemper. Tro-dro d’an daol e vo bodet c’hoarierien, skrivagnerien, klaskerien ha dilennidi da gendivizout diwar-benn meur a obererezh a bouez evit diorren ar c'hoariva : skrivañ testennoù, leurenniñ ha rikoù, met ivez pelec’h c’hoari pe c'hoazh skignañ ha kelaouiñ. Klasket vo gwelet an hent bet graet abaoe krouidigezh ar gevredigezh C’hoariva e miz Meurzh 2003, diwar atiz Bob Simon, gant ar pal stummañ ar c’hoarierien hag an deknikourien, ha sikour an aozerien abadennoù, a-benn kinnig aliesoc’h ar pezhioù hag embann testennoù: “Un hent digoret a-nevez d’ul lodenn un tamm lakaet a-gostez pa geñverier gant an dañs hag ar muzik” eme an aozourien. Da-heul an diviz e vo kinniget ar pezh-c'hoari “Fest ar pemoc'h” gant Strollad Ar Vro Bagan. Tu zo deoc’h kemer perzh ma lakait hoc’h anv en a-raok.

H.L.

D’ar Sadorn 3 a viz Meurzh e Kreizenn sokiosevenadurel ar Forest-Fouenant.

2e diviz - 5e pezh-c’hoari “ Fest ar pemoc’h”.

Evit lakaat e anv (dre skrid pe dre bellgomz): Tud Bro Konk, Ti-feurm ar Moros, 29900 Konk-Kerne. Pgz: 06 78 06 49 31.

Evit gouzout hiroc'h: www.teatr-brezhonek.org

C'hoariva brezhonek e Redon

Dont a raio Strollad Kallag d’ar Gwener 23 a viz Meurzh e Redon e Ti ar gouelioù da 9e noz. C’hoari a raint ur pezh c’hoari fentus: Salokras, ar seizh pec'hed kapital. 5 ha 8 euro.

Evit gouzout hiroc'h:  02 99 72 20 62 pe www.teatr-brezhonek.org

Tournamant rugbi "ar c'hwec'h broad":

Breizhveuriz lakaet diaes

Disadorn noz e oa echuet trede devezh tournamant rubgi ar "c'hwec'h broad". Tristik e oa disoc'hoù an devezh-se evit ar strolladoù breizhveuriat, hag er c'hontrol ez eus bet dastumet poentoù gant skipailhoù Frañs (1añ), Iwerzhon (2vet) hag Italia (4re).

Skipailhoù Kembre (6vet) ha Skos (5vet) zo er saviad diaesañ. Trec'het eo bet paotred Kembre gant Frañs disadorn (32-21), ha kollet o deus o holl grogadoù betek-henn. Skosiz zo bet trec'het, int, gant Italia (37-17) ; ar c'hrogad kentañ gounezet gant Italia e-maez o douaroù e oa abaoe 2000, bloavezh m'eo erruet an Italianed en tournamant. Flastret eo bet ar Saozon gant Iwerzhoniz (43-13). Iwerzhoniz (skeudenn) zo kalonekaet en-dro gant krogad disadorn, goude ar c'hwitadenn a-enep Frañs (20-17).

Ar c'hrogadoù a zeu a vo d'an 10 a viz Meurzh gant Iwerzhon-Skos hag Italia-Kembre, ha d'an 11 gant Frañs-Bro-Saoz.

La Môme

Frañs – 2006

Senario ha seveniñ : Olivier Dahan

Ganet en dienez e oa bet Edith Giovanna Gassion e Belleville e deroù ar C’hentañ Brezel Bed. Dilezet e oa bet gant he mamm, c’hoant ganti mont da ganerez a-vicher. Hejet-dihejet e oa bet ar plac’hig etre bordel he mamm-gozh ha buhez termaji he zad. Kement-se a vago ijin an hini a zeuio da vezañ ar ganerez hollvrudet Edith Piaf hec’h anv.

Diouzh ar c’hiz eo er mare-mañ tresañ poltred ur c’haner brudet-mat o lakaat un aktour da wiskañ e chupenn. Goude Jamie Foxx e Ray (2004), eo tro ar C’hallez Marion Cotillard. Ur pezh mell labour he deus graet evit dont a-benn anezhi, splann eo. Betek re marteze? N’eo ket sur, met ober a ra kement da dreveziñ mouezh, taol-mouezh Titi Pariz, dalc’hioù korf Piaf eus 20 vloaz da fin he buhez ma n’eo ket an aktourien all evit heuliañ ken. Bras-kenañ eo an troc’h etre Cotillard hag ar re all, ha kudennek eo un tamm (n’eus nemet Sylvie Testud a zeu a-benn da gavout un tamm plas en he c’hichen). Hogen reizh eo memes tra e kouezhfe pouez ar film war he chouk, ha n’eo ket dre zegouezh ne vez ket diskouezet tudennoù ken ramzel all evel Montand pe Aznavour. Ur film mat, sur, nemet eo un tamm re eeun darempredoù Piaf gant hec’h arvestourien : kredet e vefe e oa atav an dud o c’hortoz anezhi gant mall, ar pezh n’eo ket gwir. Diskouez Piaf e-maez ar c'hiz a vefe bet talvoudusoc’h eget he diskouez diskaret a gorf. Filmañ evel ur bouch emgav kentañ Edith gant an arvestourien, ma teu La Môme da vezañ Piaf, zo ur mennozh brav-kenañ.

Meriadeg Vallerie

Evit gouzout muioc’h: http://www.tfmdistribution.com/lamome/lamome.htm

Husky Rescue – Ghost Is Not Real

Embannet gant Catskills

Diwallit : pennoberenn. Gant o eil pladenn ez eo deuet a-benn sonerien Husky Rescue d’ober ur sapre kammed en a-raok, memes ma oa dija dispar o fladenn gentañ (Country Falls, 2005) . Dav eo lavarout e teu ar strollad eus Finland: pa vez yen an amzer, e ranker sevel tonioù tomm, neketa?

Evit a sell ouzh ar rekipe ez eo aes a-walc’h: ur meskaj sonerezh folk ha sonioù elektro eo, gant mouezh brav-eston ar ganerez ouzhpenn. A-wechoù emaint tost, zoken, eus sonerezh easy listening, met kenaozet en un doare digredus, ha leun a dristidigezh. Kregiñ a ra brav-tre ar bladenn gant My Home Ghost, an trede ton, Nightless Night, a zo ur seurt rock-folk-elektro a bad 7 munutenn, hag ez eus ivez, e-kreiz ar bladenn un heuliad teir c’hanaouenn anvet Blueberry Tree. Ma selaouer Hurricane (Don’t Come Knocking) ez eus chañsoù ho pefe c’hoant selaou ha selaou en-dro, hag en-dro c’hoazh. Ur barrad spleen a zo ivez, Silent Woods eo anvet. Da gaout en ho pladennaoueg. Dre ret.

R.M.

http://www.husky-rescue.com/

http://www.myspace.com/huskyrescue

Flanez gant parmesan

Danvez evit 6 den: 180 g parmesan drailhet – 6 vi & 2 velen-vi – 30 cl dienn liñvek – 15 g amann –etre 6 hag 8 penn-ognon bihan gwenn – 2 zelienn saoj – 2 loaiad vras gwinêgr balzamek – 1 loaiad vras eoul olivez – 1 loaiad vras flour-holen – 1 loaiad vihan sukr poultr – pebr hag holen

Raktommit ar forn (therm 4 – 120° C) goude bezañ lakaet enni ur plad bras leuniet gant dour. Amanennit ur plad da greienañ. Terriñ ar vioù; ouzhpennit an 2 melen-vi, meskit gant an dienn hag ar parmesan, pebr hag holen.

Diskennit an aozad e-barzh ar plad, lakait er forn e-pad 40 mn. Difornit ha lezit da yenaat. Kreskit an tan (6/7 – therm 190°).

Dibluskit an ognon. Strimpit ur banne eoul ha gwinêgr balzamek warno. Poultrennit gant ar sukr hag ar flour-holen. Ouzhpennit an delioù saoj. Lakait er forn 25 mm ha meskit an aozad bep an amzer. Troc'hit a dammoù bihan hag kinnigit war pep a asied. Ouzhpennit an ognon konfizet, ha servijit hep dale.

Doare kinnig mod-all : da zebriñ yen gant saladenn

Mari Lubrano