Lun 7 a viz C'hwevrer, niv.318
Sizhun 6 - 2011

Pellgargit ar pennadoù e stumm Word

Evit resev kemennadenn nevez Bremaik bep Lun,
kasit ho chomlec'h da: bremaik@skolanemsav.com

Petra oa keleier Bremaik bloaz zo? Klikit amañ !

Evit distreiñ d'ar bajenn degemer

Diaes ar jeu evit feilhañserezh HB Henriot

Unan eus embregerezhioù koshañ Breizh a zo en arvar. Feilhañserezh HB Henriot, staliet e Kemper, a zo bet lakaet digwener, d’ar 4 a viz C’hwevrer 2011, dindan "adreizhadur barnerezhel" gant lez-varn ar c’henwerzh Kemper. Abaoe 1690 e lak da badout feilhañserezh HB Henriot hengoun feilhañs Kemper graet ha livet penn-da-benn gant an dorn. Abaoe pell ez eus kudennoù arc’hant gant an embregerezh hag an hanter-kant post-labour a zo en arvar adarre. E 1983 e oa diaes ar jeu c'hoazh hag an embregerezh a oa war var d'ober freuz-stal. D’ar mare-se e oa kant den o labourat e HB Henriot ha prenet e oa bet gant an Amerikan Paul Janssens. Gwerzhet en deus ar stal seizh vloaz zo d’ur paotr eus Kemperle, Pierre Chiron. Daoust d’an dastumadegoù yaouankoc’h ha d’ar bravigoù nevez savet, n’eo ket bet posupl d’ar feilhañserezh gounit arc’hant a-walc’h. E fin ar bloavezh 2007 ez eus bet ur "steuñv sokial" hag ugent labourer a zo bet skarzhet. Ne chom ken met 51 implijad. Abaoe ar mare-se e vez klasket un den evit adkemer an afer met evit poent n'eus bet den o lakaat e anv. Kêr Kemper a zo perc'henn war ar savadur staliet e Lokmaria.

Adreizhadur barnerezhel: redressement judiciaire (diwar adreizhañ ha barnerezh)

Stankell Belo Monte

E Brazil emeur e soñj sevel ur stankell ramzel evit produiñ tredan. E Belo Monte e vefe hounnezh. Met klemmoù a sav muioc'h-mui a-enep d'ar raktres-se. Da gentañ peogwir e vije ret dismantrañ 320.000 devezh-arat a goadeier eus Amazonia, ar pezh a gasfe da goll spesadoù na vevont nemet eno. Da eil peogwir e vije ret dilec'hiañ 40.000 a dud o vevañ eno, henvroidi o vevañ diwar ar boued a gavont er c'hoadoù-se. Da drede peogwir e vefe unan eus stankelloù diefedusañ ar vro, dre ma ne c'hellfe mont en-dro nemet da 10% eus e varregezh e-pad ar prantad sec'h, hag a zo etre mizioù Gouere hag Here.

Burutellet eo ar raktres gant ar poblañsoù hag ar skiantourien, met difennerien vat a zo gantañ ivez. Dindan gwask an embregerezhioù ez eo bet roet e zilez gant prezidant Bodad Brazil evit an Endro, evel ma oa bet graet dija gant an hini a oa araozañ, ha gant ministr an Endro zoken. EletroNorte a c'houlenn e vije roet an aotre da sevel ar stankell daoust ma ne glot ket ar raktres gant al lezennadur war an endro zoken. War a seblant e c'hellfe al labourioù kregiñ adalek miz C'hwevrer. Diwar se ez eus savet sinadegoù evit talañ ouzh ar raktres: www.avaaz.org

M.M.

Skeudennoù labourerien-douar e Ti Breizh

Etre an 21 a viz C’hwevrer hag an 11 a viz Meurzh e vo kinniget gant Kambr Labour-douar Penn-ar-Bed un diskouezadeg anvet "Objectif agriculture". Pal an diskouezadeg-se, dalc’het da-geñver Saloñs Labour-douar Pariz, eo lakaat an dud da welet ha meizout al labour-douar dre selloù ar re a vicher. Disoc’h ul labour graet gant labourerezed-douar ha labourerien-douar Bro-Vrest diwar-benn an deskiñ luc'hskeudenniñ eo. Pedet omp da sellet en un doare nevez ouzh buhez-labour ar gouerien, ha da soñjal en-dro diwar-benn al labour-douar hag ar micherioù a vremañ war an dachenn-se: reiñ peadra da gompren gwelloc’h anezho ha penaos e vevont. Sikour a ra ivez an diskouezadeg-mañ da soñjal diwar-benn an tem "Pour une agriculture avec elles!", da lavaret eo plas ar merc’hed er metoù-se. Al labour-se a zo bet kaset da benn gant labourerezed-douar o chom e Penn-ar-Bed. Sur-mat e sikouro an diskouezadeg-luc’hskeudennoù-mañ da gompren gwelloc’h petra eo al labour-douar e Penn-ar-Bed hiziv an deiz.

Da welet e Ti Breizh e Pariz, 8 straed l'Arrivée, e karter Montparnasse. Etre al Lun hag ar Gwener etre 9e30 ha 6e. D'ar Sadorn g.m. etre 2e30 ha 6e30.

Rugbi: Tournamant ar 6 Broad

Frañs 34 – 21 Skos

Seizh esae a zo bet lakaet en holl, ur c'hoari plijus-kenañ dre m'o doa c'hoant an daou skipailh da ginnig ur c'hoari-daouarn brav. Gwelloc'h eo bet ar C'hallaoued avat, dreist-holl evit a sell ouzh ar meskadegoù.

Italia 11 – 13 Iwerzhon

Ma vije bet lakaet an taol-adlamm diwezhañ (80'), pe an drop mar karit, e dibenn ar c'hrogad gant an Italianed o dije gounezet war o douaroù a-enep unan eus skipailhoù kreñvañ an tournamant. Siwazh evito ez int tremenet e-kichen, met tenn eo bet ar c'hoari. Ret e vo diwall ouzh an Italianed en tournamant.

Kembre 19 – 26 Bro-Saoz

Stad ar Millinenium a oa leun-kouch met n'eo ket trawalc'h evit dougen skipailh Kembre betek an trec'h. Profitet-mat o deus ar Saozon eus tuioù gwan Kembreiz evit plantañ daou esae hag o deus graet poan da c'hoarierien ar Pour.

Mell-droad: R1 ha R2

Roazhon 1 - 0 PSG

Abaoe 2001 n'en doa ket gounezet ar PSG a-enep FC Roazhon, ha n'eo ket bet cheñchet penn d'ar vazh er bloaz-mañ. Digarezioù da lakaat ur pal a zo bet en daou du, met n'eus nemet ar Roazhonad Brahimi (19') hag a zo deuet a-benn. Gant an disoc'h-mañ e tistro Roazhon d'an trede plas.

Caen 0 – 2 An Oriant

A-drugarez da Amalfitano (22') ha da c'hGameiro (86') eo bet trec'h ar Pennoù-Merluz war paotred Caen. Sede ar pempvet pal e-korf tri c'hrogad evit Kevin Gameiro, hag ar pevare trec'h diouzh renk evit skipailh an Oriant, distroet d'an dekvet plas e renkamant ar Rummad 1, just a-dreñv Brest.

Brest 2 – 1 Nancy

Chañs ha dichañs a zo bet en daou du. Nancy en dije gellet lakaet un eil pal (90') just goude bezañ bet paket hini Grougi (87'), war ur brav a daol-digoll eeun. Koulskoude eo gant Brest eo aet ar maout, a-drugarez da Jonathan Ayite hag en deus c'hoariet plaen ha lakaet ur pal zoken (44').

Tennis: Tro gentañ ar Fed-Cup

Rusia 3 – 2 Frañs

Kaset war-raok gant Nicolas Escudé, kabiten skipailh ar c'hoarierezed tennis, eo kroget mat an traoù evit Virginie Razzano hag Alizée Cornet (0-2 evit Frañs). En eil devezh eo distroet ar Rusianezed avat, hag aet ar maout ganto en un doare reizh.

Aostralia 1 – 4 Italia

Slovakia 2 – 3 Republik Tchek

Belgia 4 – 1 Stadoù Unanet Amerika

Black Swan
Stadoù-Unanet Amerika - 2010 Seveniñ : Darren Aronofsky Golden Globe 2011 ar gwellañ aktorez en ur film dramatek a zo aet gant Natalie Portman Nina a zo dañsourez en New York City Ballet. Emañ ar strollad o prientiñ "Lenn an Elerc’h" ha kalz kevezerezh a zo etre ar merc’hed. Perzh Rouanez an Elerc’h a ya gant Nina, ret 'vo dezhi labourat start evit dont a-benn, betek re marteze. Ur sevener dedennus e labour eo Darren Aronofksy. Siwazh e film-skrij e metoù an dañs n’emañ ket a-live gant ar pezh en deus bet kinniget a-raok. Brav eo ar skeudennoù met tech implij ur c'hamera re dost d‘an tudennoù a zo poanius a-wechoù. Mont a ra Black Swan davet re a doareoù filmoù disheñvel (spont, skrij, psikologel...) ha n’eo ket gwall gendrec’hus. Mila Kunis a c’hoari perzh an alarc’h du a zo plijus he labour. A-fed istor eo re simpl un tamm, adkrouiñ a ra Nina istor “"Lenn an Elerc’h"... Ur film pompadus un tamm. G.L. Evit gouzout hiroc’h: www.blackswan-lefilm.com Barnadennoù filmoù all a c'hellit lenn e blog hor c'henskriverez: http://soubennargeek.wordpress.com "Hentoù 70" war France 3 D’an 2 a viz C’hwevrer, devezh gouel ar gouloù, eo bet kinniget gant INA-Atlantique, ensavadur broadel ar c'hleweled, ha France 3 Breizh, sellet a-raok an holl an teulfilm Hentoù 70. Kazi leun e oa sal ar Maezioù Frank, e Roazhon, evit gwelet ar film sevenet gant Mathieu Herry ha Roland Michon. Labouret o deus an daou realizatour gant dielloù an INA er bloavezhioù 70 evit kinnig ur film 52 vunutenn e brezhoneg. Ouzhpenn d’ar skeudennoù dielloù, ez eus bet aterset tud o deus bevet er bloavezhioù-se e Breizh, evel Gilles Servat, Yvon Abiven, Lena Louarn, Gérard Gwenn, Martial Ménard, Maryvonne Berthou pe c’hoazh Yann Meur. Gwelet e vez en teulfilm-mañ tout ar cheñchamantoù a zo bet e Breizh er bloavezhioù 1970 war tachennoù liesseurt: al labour-douar, an ekonomiezh, ar stourmoù sokial, ar sevenadur, ar yezh, ar politikerezh pe c’hoazh an ekologiezh. Skignet e vo Hentoù 70 war France 3 Breizh d'ar Sul 20 a viz C'hwevrer ha d'ar Sul 27 a viz C'hwevrer 2011 e-barzh abadenn Red an Amzer da 11e30. Dielloù brezhonek a zo bet lakaet ivez war lec’hienn Internet Ensavadur broadel ar c'hleweled (INA), evit gwelet anezho, mont war lec’hienn: www.ina.fr

Peter Hook and Friends play Unknown Pleasures

La Carène, Brest, d'an 9 a viz Meurzh da 8e30 noz

D'ar mare-se e oamp 17 vloaz, ha rannet e oa ar bed (hon hini bepred) e daou strollad: an hippied a blije Pink Floyd (pe strolladoù ken dic'houzañvus all) dezho hag ar re a gave gwelloc'h magañ o spleen dre selaou The Smiths pe Joy Division.

Evel-just, pe siwazh deomp, e oamp bet ganet re ziwezhat ha pa oa en em grouget Ian Curtis e oamp er skol kentañ derez. Met ouzhpenn mouezh ar c'haner e verzjomp un dra dibar er strollad: un dra bennak a rae brooom broom... Ar gitar boud an hini e oa, ha Peter Hook eo a sone gantañ.

E 2005 e teujomp a-benn da welout New Order en Erer Kozh. Ma, ne oa ket Joy Division ha ret e oa d'ar c'haner sellout ouzh ur skramm ma tremene pozioù tonioù e strollad kent...

Hiziv an deiz ez eo divodet New Order, hag emañ Peter Hook o treiñ er bed a-bezh da ginnig seniñ holl donioù Unknown Pleasures, pladenn vras kentañ Joy Division.

En ur sal sonerezh nemetken e Breizh e teuio, ha la Carène an hini eo. Digarez neuze da advagañ hor spleen, ha da glevout She's Lost Control pe New Dawn Fades en-dro. Kregiñ a raio gant ur meskaj sonerezh post-punk, indus ha new wave kinniget gant DJ Gilles Le Guen.

Ha ma teuit, grit ur striv: bezit gwisket e du penn-da-benn.

R.M.

Tikidi : 15€ pe 18€, 18/20€ war al lec'h.

Muioc'h a Unknown Pleasures: www.lacarene.fr

Danevelloù "Noir de Taule"

"Diskouezit stad ho toulloù-bach din hag e lavarin deoc’h piv oc’h !" Setu ar frazenn a c’hell diverrañ preder Alexis de Tocqueville, goude bezañ beajet er Stadoù-Unanet, nevez-krouet e 1835. Tremenet eo an amzer ha ne c’hellomp ket lavarout e ya an traoù war wellaat e Frañs. Evit ober anaoudegezh gant ul lec’h damguzh ez eus bet savet un dastumad danevelloù Noir de Taule. Kavet e vez istorioù berr ennañ, lod anezho ijinet gant skrivagnerien a vicher (Jonquet, Winckler...) awenet gant ar c’hudennoù sokial, lod all skrivet gant prizonidi (Battisti). Dedennus-tre eo an danevelloù a glask prederiañ diwar-benn emdroadur an toulloù-bac’h er bloavezhioù da zont: perzh an embregezhioù prevez, implij ar binvioù elektronek, enklaskoù genetek... N’emaomp ket pell alies diouzh tachenn ar skiant-faltazi.

Danevelloù all a ro an digarez deomp d'ober anaoudegezh gant danvez skrivagnerien o deus kroget en o fluenn da rannañ o skiant-prenet gant tud dianav.

Pal al levr-mañ zo tostaat al lennerien ouzh un ensavadur eus ar Republik a ya war ziskar. Dre ar munudoù, bamus a-wechoù, e c’hell pep hini derc’hel soñj ez eo ar brizonidi hor c’henvroidi, keodedourien evel an holl.

Tangi Legavre

Noir de Taule, dastumad danevelloù embannet gant Éditions Manitoba Les Belles Lettres (2001)

Kartenn ar gwallreuzioù hag ar gwallzarvoudoù er bed a-bezh
	Krenoù-douar, korventennoù, tsunamioù, dourioù-beuz, kleñvedoù-red zoken, met ivez gwallzarvoudoù greanterezhel ha kimikel, takadoù ar grip hag ar gwallzarvoudoù war an hentoù... Kement tra zo a vez merket war ar gartenn-ved-mañ, ha diouzhtu-dak ouzhpenn (in real-time). A-drugarez da RSOE, ur servij keleier hungarat war ar gwallreuzioù, ar freuzioù hag ar reuzioù, e c'heller heuliañ a-dost ar pezh a zo o c'hoari er bed. N'eus nemet klikañ war ar skeudennoùigoù d'ober hag e teu war wel un deskrivadur pizh eus an darvoud. Gallout a rafemp tremen eurvezhioù hag eurvezhioù war ar gartenn-mañ, neuze eo gwelloc'h diwall. A-drugarez d'ar gartenn-mañ koulskoude e vez komprenet en un doare splann e c'hoarvez a bep seurt traoù fall war hon tamm douar patatez. Traoù fall evit Mab-den, fall evit an endro. Evit gwelet ar gartenn : http://hisz.rsoe.hu Deiziataer 2011 Adkavet e vo er bloaz-mañ ar stumm klasel a blij d'an dud: 17cm uhelder ha 9cm ledander, gant ar skrid a-led. En ur golo kartoñs e liv e vo kavet an deiziataer, en taol-mañ, pevar liv penn-da-benn. Kantadoù a chomlec'hioù a gaver ivez er fin, gant roll pouezusañ aozadurioù sevenadurel ar vro (kelenn, embann, mediaoù...). Nevez er bloaz-mañ: "Ar brezhoneg war ar Genrouedad" renabl al lec'hiennoù pouezusañ e brezhoneg war ar Genrouedad renket e 6 rumm. E gwerzh emañ Deiziataer 2011, 10€ an tamm. Gellout a reer gourc'hemenn anezhañ dre ar Post ivez evel-just. Dont e darempred gant Skol an Emsav (12€ an tamm gant ar mizoù-kas). Evit gouzout hiroc'h: Skol an Emsav, 25 straed Pierre Martin, 35000 Roazhon. Pgz: 02.99.38.75.83. Plr 02.99.63.82.28. Postel: sae.bzh@wanadoo.fr Internet: www.skolanemsav.com Bremaik: klask zo war-lerc'h kenskriverien! Plijet oc'h o lenn ar pennadoù embannet a-hed ar bloaz war Bremaik? Sot oc'h gant ar sonerezh, ar sportoù, an arzoù, ar sinema, pe me ’oar-me? Gallout a rit degas ho sell war an danvezioù-se ingal, dre ar brezhoneg, gant Bremaik! Ur skipailh tud a youl vat a sav ar pennadoù bep sizhun abaoe ouzhpenn 6 vloaz, ha bepred emaomp o klask "pluennoù" nevez, evit reiñ un ton liesseurt d'ar gelaouennig (digoust!) war internet, hag e brezhoneg-tout, embannet bep Lun. Evit gouzout hiroch war an doare da vont en-dro, ha penaos kemer perzh e buhez Bremaik, n'eus mann ebet aesoc'h: kasit ur gerig deomp d'ar chomlec'h postel-mañ: bremaik@free.fr! Lennit Bremañ C'hwevrer 2011! Dispac'h ar Jasmin e Tunizia, Atlas broadoù distad Europa, ar merk "Bretagne", reuz kraou-moc'h Trabrivan, afer ar vag La Boudeuse, distro Stourm ar Brezhoneg, Prizioù 2011 France 3, Naoned kêr-benn ar babyfoot, ar c'hoari "Roue Breizh"... Kaoz zo eus an holl draoù-se hag eus traoù all c'hoazh e niverenn Bremañ C'hwevrer 2011. An teuliadig a ra anv er miz-mañ eus an dilennadegoù da zont evit ar guzulierien-departamant. An dro diwezhañ e vo da votiñ er mod ma vo graet a-benn an 20 hag ar 27 a viz Meurzh. Daou zilennad o vont da zilezel emvodoù ar c'huzulioù-departamant a ro o soñj: Andre ar Gag (Penn-ar-Bed) ha Patrick Mareschal (al Liger-Atlantel)... Kinnig a ra ivez Bremañ div bajennad anvet "Lennomp!". Savet e vezont a-ratozh evit ar re zo o teskiñ brezhoneg gant skipailh Skol An Emsav. M’ho pez plijadurig o lenn Bremaik, plijadur ho po o lenn Bremañ, sur! Bep miz, abaoe 1980, e kinnig kelaouenn Bremañ pennadoù brezhonek a bep seurt, diwar-benn Breizh hag ar bed, kinniget brav, e doare ur magazin. Embannet gant Skol an Emsav (4,50€ an tamm) Koumanant: 50€ evit ur bloaz, 60€ evit an estrenvro, 4€ bep miz dre lamadenn E gwerzh er stalioù-levrioù a ginnig danvez Breizh, pe dre goumanant. Evit gouzout hiroc'h: www.breman.org