Lun 31 a viz Genver, niv.317
Sizhun 5 - 2011

Pellgargit ar pennadoù e stumm Word

Evit resev kemennadenn nevez Bremaik bep Lun,
kasit ho chomlec'h da: bremaik@skolanemsav.com

Petra oa keleier Bremaik bloaz zo? Klikit amañ !

Evit distreiñ d'ar bajenn degemer

Tenn an traoù
e kuzuliadeg Unvaniezh Afrika

Dec’h, d’ar Sul 30 a viz Genver 2011 e oa bet digoret XVIvet kuzuliadeg Unvaniezh Afrika. Labour zo evit pennoù-bras 53 bro an UA (Unvaniezh Afrika) gant ar c’hudennoù a zo er broioù evel Aodoù an Olifant, Tunizia, Egipt pe Saoudan. Prometet eo bet gant Jean Ping, prezidant komision Unvaniezh Afrika : "divizoù bras a vo kemeret". Daou viz goude dilennadegoù prezidant Aodoù an Olifant ha goude ma’z eus bet staliet daou c’halloud, hini Alassane Ouattara hag hini Laurent Gbagbo, e vo digoret ur prantad komz all evit sioulaat an enkadenn. Un teuliad all a vo lakaet war ar stern eo hini Egipt. Goude ar manifestadegoù e Tunizia evit skarzhañ renad beliek Zine El Abidine Ben Ali eo kroget ivez ar manifestadegoù e straedoù Egipt. Betek-henn ne oa ket bet komzet gant den ebet eus Unvaniezh Afrika en un doare ofisiel. Graet e vo e fin ar guzuliadeg. Un darvoud all a vo e-kreiz ar guzuliadeg eo ar fed e vo a-benn nebeut ur 54vet Stad afrikan. Votet ez eus bet dre ur referendom e teufe da vezañ Su Saoudan ur vro distag diouzh an Norzh. Bep bloaz e vez aozet div guzuliadeg gant Unvaniezh Afrika, unan e Addis Abeba e-lec’h m’emañ staliet an aozadur hag eben e-barzh ur Stad ezel, an hini diwezhañ a oa bet dalc’het e miz Gouere en Ouganda. Marteze e vo pouezusoc’h c’hoazh evit istor Afrika ar 16vet kuzuliadeg-mañ a vo dalc’het e fin miz Genver 2011.

Produoù berzet... hag aotreet memes tra!

Div afer disheñvel o deus diskouezet penaos e c'hell an embregerezhioù tremen hebiou d'al lezennoù berzañ produoù dañjerus hag ober ganto daoust da bep tra.

Da gentañ, afer al louzoù Cruiser, implijet evit lazhañ amprevaned. Diwar studiadennoù o tiskouez e oa ganto kement a efedoù dañjerus war ar gwenan hag a oa gant ar Gaucho ha Regent, eo bet difennet e-barzh an darn vrasañ eus broioù Europa. Roet e vez koulskoude bep bloaz un aotre dibar d'ober ganto evit ur bloaz, abaoe 4 bloaz, gant ministrerezh gall al labour-douar. Bep bloaz e vez difennerien ar gwenan o stourm a-enep d'an aotreoù dibar-se, dre ma n'int nemet un doare da dremen hebiou d'ar redioù. Diwar ar c'hlemmoù-se eo bet galvet ar C'huzul Stad, ha difennet e vo neuze ober gant ar Cruiser da vat moarvat.

Da eil, ez eus bet merzet e oa bet lieskementet dre bemp, etre 2007 ha 2010, implij un destennig gant Bodad Europa, sañset da aotren implij un danvez en ur vro e-pad 120 devezh. Gant an digarez-mañ: "ma c'hoarvezje un darvoud dibar, ha ma ne vije diskoulm all ebet". 59 aotre a veze roet well-wazh er penn-kentañ, 321 a zo bet roet nevez zo. Ar Stad c'hall an hini eo a ra ar muiañ gant an aotre dibar-mañ, ha koulskoude n'eus "darvoud dibar" ebet a redife d'ober gant seurt danvezioù: n'eo nemet un doare aes da chom hep doujañ d'al lezenn.

Diwar kement-se, penaos kaout fiziañs el lezennourien, pa ne vezont ket gouest da zoujañ ouzh an divizoù savet diwar studiadennoù skiantel? Dav eo krediñ eo pouezusoc'h c'hoazh ar gounidoù eget yec'hed an dud...

M.M.

Diskouezadeg Joseph Beuys e Künsthalle Zurich:
"Difesa della natura"

Adalek an 13 a viz Mae e Zurich, e vo kinniget an diskouezadeg diwar-benn beajoù Joseph Beuys en Italia, er menezoù Abruz.

Piv e oa ar paotr-se? Ganet e oa bet e Kerfeld e 1921 ha marvet e 1986 e Düsseldorf. E labour a lakae goulennoù da sevel diwar-benn Mab-den, an endro hag ar sokiologiezh bepred. Un arzour meur e oa Jospeh Beuys hag unan eus ar re bouezusañ en 20vet kantvet. E-kerzh an eil brezel bed e c’hoarvezas ur gwallzarvoud dezhañ hag an darvoud-se a cheñchas red e vuhez da viken. E Krimea e oa bet distrujet e garr-nij gant ar Rusianed. Tatared a saveteas anezhañ. Maget o doa anezhañ gant mel, ha goloet anezhañ gant druzoni ha feltr. Goude fin ar brezel, pa oa distroet ar paotr en Alamagn, en doa krouet al luskad Bewegung ("bewegung" a dalvez kement ha "luskad"), evit ar re C'hlas. Ar pal evitañ a oa krouiñ ur "c'hizelladur-sokial": evitañ kement den zo a zo un arzour. Dre an alamaneg ha dre ar bed a-bezh e kase e vennozh war-raok! Ur raktres arzel hag ekologel e oa.

E Bolognano, e kreisteiz Italia, en doa kavet an arzour beolioù maen-raz e Palez Durini a servije da zilaviñ eoul olivez. Gant ar beolioù-se en doa kavet peadra da reiñ lañs d'e raktres nevez: "Difesa della natura". Difenn an endro en ur ziskouez kaerded ekonomikel hag ekologel tud kêriadenn Bolognano. Ur bern skeudennoù, tresadennoù, kizelladurioù en doa graet e-pad e veaj eno. Chom a ra roud eus se hiziv en e oberenn anvet "Olivestone."

S.B.

Evit gouzout hiroc'h: www.kunsthaus.ch

Tennis: Kampionadoù Aostralia

Na Nadal, na Federer, met Djokovic (skeudenn) evit an eil gwezh! Warlene e oa bet gounezet an tournamant gant Roger Federer. Chom a rae Rafael Nadal trec'h war tri zournamant diwezhañ ar Schlem Bras avat, hag o kenstrivañ e oa evit gounit pevar diouzh renk, ar pezh a zo bet graet ral a-wezh. Goude an trede tro ne oa dija Gall ebet ken! Tsonga en deus kollet a-enep Dolgopolov dindan pemp set, ha Gaël Monfils a zo bet pilet gant ar Suis Wawrinka. Diouzh tu ar merc'hed eo Alizé Cornet hag a zo aet kuit an hini diwezhañ, enoret avat, a-enep Kim Clijsters hag he deus gounezet an tournamant.

Gourfenn paotred: Novak Djokovic 6-4 6-2 6-3 Andy Murray

Gourfenn merc'hed: Na Li 6-3 3-6 3-6 Kim Clijsters

Handball: Kampionad ar bed e Sveden

hag "an Arbennigourien" bepred!

Goude bezañ gounezet en un doare aes-kenañ a-enep Hungaria, eo bet tro Norvegia hag Island. Gwir eo e oa kalz aesoc'h an eil rummad, war ar paper d'an nebeutañ! Evit gellout bezañ e-touesk ar pevar skipailh diwezhañ ha c'hoari an hantergourfennoù, e ranke an "Arbennigourien" ("Les Experts") gounit ur c'hrogad diwar an daou a chome. Met n'int ket kampioned ar bed evit netra. Aet ar maout ganto evit an daou grogad, kement hag ober! 

Norvegia 26 – 31 Frañs

Island 34 – 28 Frañs

Hantergourfennoù:

Sveden 26 – 29 Frañs

Daoust d'an disoc'h bezañ tost a-walc'h, eo bet kalz gwelloc'h ar C'hallaoued eget Svediz, hag int en o bro, harpet gant an arvesterien koulskoude!

Danmark 28 – 24 Spagn

En un doare souezhus a-walc'h, e yelo paotred Danmark da c'hoari ar gourfenn, an eil evito nemeteken goude hini 1967.

Gourfenn

Danmark 35 – 37 Frañs (goude un astenn-c'hoari)

Diaes eo bet met, kampioned eo paotred skipailh Frañs evit ar pevare gwezh.

Hereafter (Au-delà)
Stadoù-Unanet – 2010 Seveniñ : Clint Eastwood Darbet eo bet d’ar gazetennerez c’hall Marie Lelay (Cécile de France) mervel p’eo bet paket en un tsunami. Trubuilhet eo bezañ gwelet an Anaon. Un donezon mediom zo gant George Lonegan (Matt Damon), pe gentoc’h ur mallozh ne oa ket evit gouzañv ken. Dilezet en deus al labour-se evit dont da vezañ micherour. Tost-kenañ ouzh e vreur gevell Jason eo Marcus (George McLaren) met mervel a ra hennezh en ur gwallzarvoud. Temoù kizidik ha denel eo a vez dibabet atav gant Eastwood. En taol-mañ e vez heuliet red-buhez tri den zo an Anaon war o spered. Trivliadeloc’h eget ar steuñvenn-se n’eus ket... war ar baper. Siwazh, pell a vezañ gwellañ film ar sevener eo Hereafter. Tudenn ar bugel eo lodenn greñv ar film e gwirionez, an div dudenn all a chom un tamm divlas. Meriadeg Vallerie

John Barry (1933-2011)

Unan eus brudetañ sonaozourien an 20vet kantved, John Barry, zo aet da Anaon dec'h, d'an 30 a viz Genver 2011, e New York. 77 vloaz e oa. Bet ganet e Breizh-Veur e 1933, e studias John Barry ar seniñ piano ha trompilh pa oa yaouank, evit mont tamm-ha-tamm war-du ar sonaozañ da vat. Adalek fin ar bloavezhioù 50 e reas berzh gant ar strollad pop-rock The John Barry Seven. Gopret ingal evit kempenn sonerezh tud all, e voe galvet e 1962 gant produerien ar film Dr No a-benn adkempenn al labour bet boulc'het gant Monty Norman ha ne oa ket evit bastañ da ezhommoù ar broduerien. Berzh bras a reas gant kentañ sonerezh James Bond, ha muioc'h c'hoazh da-heul, gant sonskridoù From Russia With Love, Goldfinger, Thunderball, You Only Live Twice… Savet en do bet sonerezh evit 12 film eus ar rummad en holl. Gant berzh sonerezh James Bond ez eas ar sonaozour goude-se da labourat evit filmaozerien liesseurt, hag evit filmoù a-galite alies. The Lion in Winter, The Ipcress File, Midnight Cowboy, Born Free, The Chase, The Last Valley, Somewhere In Time, Out Of Africa, Body Heat, Dances With Wolves... Pemp Oscar zo aet gantañ evit e labour evit ar sonerezh sinema.

Etre jazz, pop, rock ha sinfonienn, e sonerezh zo anavezet alies evit bezañ ec'hon, romantel-tre, flour betek bezañ lik gwechoù zo zoken, ha gant tonioù kreñv peurliesañ. Levezonet en deus e genseurted kalz. Enoret eo bet meur a wech gant e genvroad ha kenseurt David Arnold, aet war roudoù Barry evit sevel sonerezh filmoù nevez James Bond. Klañv-bras e oa John Barry abaoe pell, ha ne laboure ket kalz ken abaoe un dek vloaz bennak en abeg d'e yec'hed.

Fest-noz evit Palestina e Kawan
	Aozañ a raio ar gevredigezh AFPS-Treger (Association France-Palestine Solidarité) ur fest-noz dreistordinal d'ar Sadorn 5 a viz C'hwevrer e sal gouelioù Kawan, da 8e noz. Gant ar gwenenien dastumet er fest e vo sikouret da arc'hantaouiñ un eil "strollad-listri evit ar Peoc'h". Kevredigezhioù eus ar bed a-bezh zo o prientiñ un eil beaj evit harpañ Gazaiz. Pignat a raio war al leurenn: Loened Fall, An Disez-ar Barzh-Foll, An Disez- Bodros, Peron-Roudil, An Tri C’hotri, ar Rouz-David, Baud-Bordas-Briand, Besco-Adelen, Foll-Robin, Ifig-Nanda, Kastell-Gorju, Kerdoncuff-Ar Floc’h-Volant, Konnan-Robin-Pistiaux, Launay-Savidan, Moal-Chaplain, Ollivier-Thomas, Robin-Lintanf-Suignard… Evit gouzout hiroc'h: afpstregor@free.fr Deiziataer 2011 Adkavet e vo er bloaz-mañ ar stumm klasel a blij d'an dud: 17cm uhelder ha 9cm ledander, gant ar skrid a-led. En ur golo kartoñs e liv e vo kavet an deiziataer, en taol-mañ, pevar liv penn-da-benn. Kantadoù a chomlec'hioù a gaver ivez er fin, gant roll pouezusañ aozadurioù sevenadurel ar vro (kelenn, embann, mediaoù...). Nevez er bloaz-mañ: "Ar brezhoneg war ar Genrouedad" renabl al lec'hiennoù pouezusañ e brezhoneg war ar Genrouedad renket e 6 rumm. E gwerzh emañ Deiziataer 2011, 10€ an tamm. Gellout a reer gourc'hemenn anezhañ dre ar Post ivez evel-just. Dont e darempred gant Skol an Emsav (12€ an tamm gant ar mizoù-kas). Evit gouzout hiroc'h: Skol an Emsav, 25 straed Pierre Martin, 35000 Roazhon. Pgz: 02.99.38.75.83. Plr 02.99.63.82.28. Postel: sae.bzh@wanadoo.fr Internet: www.skolanemsav.com Bremaik: klask zo war-lerc'h kenskriverien! Plijet oc'h o lenn ar pennadoù embannet a-hed ar bloaz war Bremaik? Sot oc'h gant ar sonerezh, ar sportoù, an arzoù, ar sinema, pe me ’oar-me? Gallout a rit degas ho sell war an danvezioù-se ingal, dre ar brezhoneg, gant Bremaik! Ur skipailh tud a youl vat a sav ar pennadoù bep sizhun abaoe ouzhpenn 6 vloaz, ha bepred emaomp o klask "pluennoù" nevez, evit reiñ un ton liesseurt d'ar gelaouennig (digoust!) war internet, hag e brezhoneg-tout, embannet bep Lun. Evit gouzout hiroch war an doare da vont en-dro, ha penaos kemer perzh e buhez Bremaik, n'eus mann ebet aesoc'h: kasit ur gerig deomp d'ar chomlec'h postel-mañ: bremaik@free.fr! Lennit Bremañ Genver 2011! Enkadenn bankoù Iwerzhon, yalc'hadoù Europa evit ar rannvroioù, raktres dibar an Aocher, abadennoù sonerezh liesseurt Radio Kerne, troioù-kaer Hersel Layton... Kaoz zo eus an holl draoù-se hag eus traoù all c'hoazh e niverenn Bremañ Genver 2011. An teuliadig a ra anv er miz-mañ eus keleier kanerien zo liammet gant Breizh e mod pe vod. Kentañ albom solo Gweltaz Adeux, pladenn nevez Nolwenn Leroy, troiad da zont Yvan Le Bolloc'h er vro ha keleier all a bep seurt... Kenderc'hel a ra Bremañ da ginnig div bajennad "Lennomp!". Savet e vezont a-ratozh evit ar re zo o teskiñ brezhoneg gant skipailh Skol An Emsav. M’ho pez plijadurig o lenn Bremaik, plijadur ho po o lenn Bremañ, sur! Bep miz, abaoe 1980, e kinnig kelaouenn Bremañ pennadoù brezhonek a bep seurt, diwar-benn Breizh hag ar bed, kinniget brav, e doare ur magazin. Embannet gant Skol an Emsav (4,50€ an tamm) Koumanant: 50€ evit ur bloaz, 60€ evit an estrenvro, 4€ bep miz dre lamadenn E gwerzh er stalioù-levrioù a ginnig danvez Breizh, pe dre goumanant. Evit gouzout hiroc'h: www.breman.org