Lun 24 a viz Genver, niv.316
Sizhun 4 - 2011

Pellgargit ar pennadoù e stumm Word

Evit resev kemennadenn nevez Bremaik bep Lun,
kasit ho chomlec'h da: bremaik@skolanemsav.com

Petra oa keleier Bremaik bloaz zo? Klikit amañ !

Evit distreiñ d'ar bajenn degemer

Kreizennoù nukleel dindan ar mor

Diwar teknologiezh al listri-spluj nukleel emañ an DCNS, hag a sav anezho, Areva, EDF hag ar CEA, Komiseriezh an Energiezh Atomek, e soñj sevel ur c'hentpatrom a-benn 2013, ha kreizennoù o vont en-dro da vat a-benn 2016-2017. "Flex Blue" eo an anv a zo bet roet d'ar raktres goude tregont miz studi. An diviz sevel ur c'hentpatrom a vo kadarnaet e 2013. Evit poent ez eus ur skipailh 150 ijinour o labourat war ar meizad hag a goustfe un nebeud degadoù a vilionoù a euroioù. Ar c'hentañ pratik a c'hellfe bezañ EDF, dedennet-bras gant ar raktres. Bihan a-walc'h e vefe ar c'hreizennoù nevez-se, doare kranennoù etre 12 ha 15 metr a dreuzkiz. Lakaet e vefent e-tro 100 metr dindan-vor, d'un nebeud kilometradoù eus an aodoù, ha gouest e vefent da grouiñ tredan evit takadoù etre 100.000 hag ur milion a dud. Gant ar c'hreizennoù bihan pe etre o galloudegezh e teufe war wel ur c'hinnig low-cost e metoù an nukleel sivil. “Dispar e vo kaout un doare energiezh nevez dre ma vo propr-kenañ”, sed ar pezh a lavar an holl re o kemer perzh er raktres. Pa ouezer avat eo toull ar bidoñsoù dilerc’hiadoù skinoberiant kaset d’ar strad gant ar Rusianed un tregont vloaz zo bennak (hag a bado kantvedoù c’hoazh), ez eus peadra d'en em soñjal. Dreist-holl p’emeur o lidañ 30 vloaz stourm Plougoñ abaoe bloaz.

Jatropha: eoul diwar plant diefedus

Emeur o klask hentennoù nevez evit kenderc'hel da implijout ar c'hirri-tan pa vo aet an eoul-maen da hesk. E-touez ar re-se emañ an eoul o tont diwar ar plant. Klevet ez eus bet komz kalzik eus drast an eoul palmez, en Indonezia, hag e lec'h all, met hentennoù all a vez klasket, hag e-touez ar re-se emañ ar Jatropha. Daoust ma oa bet kinniget ar blantenn-se evel frouezhusoc'h eget ar re all, gouest da greskiñ war douaroù paour hag all, e krog ar studiadennoù da ziskouez n'eo ket ken gwir ha se. Ne grouont ket kement a eoul ha ma veze soñjet, ezhommoù bras a zour a zo ganto, ha dre ma vezont kizidik ouzh ar c'hleñvedoù, eo dav louzaouiñ anezho. Ha kalz taolioù arnod all o vezañ diwar-se, dilezet. Ma'z eo dedennus diskouez eo diefedus ar Jatropha, n'eo ket trawalc'h: ret eo ouzhpennañ eo ken saotrus all magañ ar c'hirri diwar eoul savet diwar plant, hag e sav kevezerezh etre ar plant gounezet evit boued an dud paour hag ar re evit kirri an dud pinvidik. Embregerezhioù bras al labour-douar an hini eo a denno splet diwar-se dreist-holl, met evit an endro ez eus hentennoù all da gaout. Ur preder zo da gas ivez war un implij bihanoc'h eus ar c'hirri-tan.

M.M.

“Mouezh” Maina Kernalegenn e Sant-Ervlan...

Arc’hoazh da noz e vo kinniget lid-digeriñ an diskouezadeg “Mouezh”, e kreizenn Yezhoù ha Sevenadur Sant-Ervlan, tal-kichen Naoned. “Mouezh. Yezh soutil ar santout, yezh hep bro na genou, yezh hep ger na ker, son ar selloù, yezh ar vuhez” sed amañ ar pezh en deus awenet an arzourez Maina Kernalegenn, gant tresadennoù, linogravadurioù, livadurioù gant pastel... He oberennoù a vo tro da welet du-se etre ar 26 a viz Genver hag ar 26 a viz C’hwevrer 2011. Digor e vo ar greizenn d’ar weladennerien etre ar Meurzh hag ar Yaou, etre 2e g.k. ha 7e noz, d’ar Gwener etre 2e g.k. ha 6e noz, ha d’ar Sadorn etre 2e ha 4e g.k.

Evit ober anaoudegezh gant labour an arzourez (ha brezhonegerez):

www.maina-krouerez.com

Evit gouzout hiroc’h:

Pgz: 02 40 85 27 22. Postel: yezhou44@yahoo.fr

...ha prezegenn e brezhoneg gant Armel ar Sec’h

D’ar Sadorn 29 a viz Genver e vo tro al livourez Armel ar Sec’h da ginnig ur brezegenn diwar-benn an arzoù e Kreizenn Dafar Sevenadurel Keltiek (KDSK), staliet e ti Yezhoù ha Sevenadur e Sant-Ervlan. “Arz Breizh, hon Identelezh digor”, sed amañ anv an abadenn. Bannet e vo skeudennoù gant an arzourez evit kas ar gaoz war-raok. Displegadennoù e galleg a vo kinniget war follennoù paper d’ar re o defe ezhomm.

Evit gouzout hiroc’h: www.kdsk-bzh.org

Pgz: 02 51 80 72 41. Postel: kdsk.bro.naoned@gmail.com

Handball : Kampionad ar bed e Sveden

Echuet o deus an "Arbennigourien" o foul kentañ gant ur c'hrogad a-enep ar Bahrein (41-27) hag unan all kalz diaesoc'h a-enep Spagn (28-28, skeudenn), padal o doa bet an handballerien c'hall betek c'hwec'h pal ouzhpenn ur c'hard-eur a-raok an dibenn. Kentañ eus o rummad daoust da se, an hanballerien c'hall o deus kroget an eil poul gant tri foent hag ur c'hrogad a-enep Hungaria, e Jönköping bremañ. Da heul e rankint c'hoari a-enep Norvegia d'ar 24 a viz Genver hag a-enep Island d'ar 26 evit echuiñ an eil lodenn a-raok an hantergourfennoù.

Frañs 37 – 24 Hungaria

Mell-droad : Kib Frañs

Dalc'het eo bet ar 16vedenn gourfennoù d'an 22 ha d'an 23 a viz Genver 2011:

Fontenay-le-Comte (CFA) 0 – 1 (goude un astenn c'hoari) an Oriant (R1)

Na pegen diaes eo bet evit dont a-benn eus skipailh Fontenay-le-Comte, graet eo avat hag adkavet e vo ar Pennoù-Merluz evit ar c'hentañ tro. Trugarez vras da Vathias Autret, 19 vloaz, hag en deus lakaet ar pal nemetañ (107').

Chambéry (CFA2) 1 (4) – (3) 1 Brest (R1)

Goude bezañ bet trec'h war Monaco eo bet tro Brestiz koll a-enep paotred Chambéry. Pemp rummad a ziforc'h etre an daou gleub, ne veze ket gwelet kement-se war an dachenn avat !

Vaulx-en-Velin (DH) 0 – 2 Roazhon (R1)

A-drugarez d'ur c'hoari kreñv ha stabil eo aet ar maout gant Roazhoniz. Amatourien Vaulx-en-Velin n'o deus ket da gaout mezh eus o c'hoari kennebeut.

Naoned (R2) 2 – 1 Raon-l'Étape (CFA)

Aesoc'h e vez atav c'hoari war e dachenn, hag eürazamant evit Naoned, dreist-holl goude ar pal bet paket gant Chouleur. Gant ur sell hollek eo normal a-walc'h an disoc'h.

También la lluvia (Même la pluie)
Frañs, Mec’hiko, Spagn - 2010 Seveniñ : Icíar Bollaín Sebastian, sevener spagnol yaouank a erru e Bolivia evit sevel ur film diwar-benn Cristobal Colon. En soñj emañ, diouzh ali e broduer, implijout tud ar vro evit espern arc’hant. Er bloavezh 2000 e c’hoarvez an traoù, dres p’emañ Indianed Cochabamba o stourm evit an dour. Pempvet film ar sevenourez eo También la lluvia. N’eo ket gwall anavezet er C’hwec’hkorn met kenlabouret he deus bet kalz gant Ken Loach. Santet e vez kement-mañ er film abalamour m’eo bet skrivet an istor gant senariour Ken Loach! Meur a live a zo gant ar film: hini ar filmañ, kudennoù arc’hant ar skipailh hag all, live ar film, gwelet e vez tammoù a-bezh eus ar pezh a fell da Sebastian sevel ha live stourm an Indianed. N’eo ket start da gompren avat ha simpl a-walc’h eo mennozh ar film: diskouez pegen heñvel e oa sklavelezh an Indianed da vare dizoloadenn kevandir Amerika gant ar pezh a c’hoarvez c’hoazh hirie an deiz. Ur film eeun met dedennus, kaset d’an Oscar en anv Bro-Spagn. G.L. Barnadennoù filmoù all a c'hellit lenn e blog hor c'henskriverez: http://soubennargeek.wordpress.com Festival Cinémaghreb e Brest Ar 5vet festival sinema “Cinémaghreb” a vo aozet e Brest, hag e kumunioù trowardro, etre ar 24 a viz Genver hag an 9 a viz C’hwevrer 2011. Kenaozet e vez ar festival gant div c’hevredigezh, ADeLCA hag AAPRI. Fellout a ra daaozerien Cinémaghreb reiñ tro d’an dud a vev e Bro-Vrest d’ober anaoudegezh gant sinema broioù Hanternozh Afrika, gant filmoù hir ha berr, faltazi pe teulfimoù, nevez-krouet alies. A-benn diriaou da noz da skouer (27 a viz Genver) e vo kinniget un nozvezh e krezienn Bellevue, gouestlet d’ar sevener breizhat René Vautier, gant e film Afrique 50 ha Le petit blanc à la caméra rouge, gant Richard Hamon. Un digarez eo ivez evit reiñ un tañva d’an dud eus daoreoù bevañ pobloù ar broioù-se: boued hag evajoù, yezhoù, istor... Emgavioù a vo aozet e kêr Brest a-hed ar festival, gant kontadennoù, kendivizoù, diskouezadegoù. Tud hag arzourien ar c’horn-bro a ro tro ingal da ginnig o labour ivez, goude bezañ beajet en Afrika da skouer (skeudennoù, livadurioù). Er bloaz-mañ eo bet “pedet” ur vro eus Kornôg Afrika: Mali. Meur a abadenn a vo kinniget neuze diwar-benn ar vro-mañ. Evit gouzout hiroc'h: www.cinemaghreb.org

Daouzekvet planedenn Zecharia Sitchin

An holl a oar eo bet krouet Mab-den gant ezdouaridi (d.le. boudoù o tont eus diavaez an Douar). Diwanet eo ar mennozh-mañ en ijin Zecharia Sitchin (1920-2010), ha lakaet war baper el levr The 12th Planet. E-pad lodenn gentañ e vuhez e oa brudet ar skiantour-mañ evit e ouiziegezh war ar yezhoù marv mezopotamat: sumerieg, babyloneg… Gant studial hieroglifoù an impalaeriezhioù-se e oa kendrec’het Zecharia Sitchin da vezañ diskoachet istor kuzh Mab-den.

Souezhus eo an doare m’eo savet al levr peogwir eo diazezet an displegadenn war dresadennoù niverus, ar re a veze kavet war dalbennoù an temploù. Neuz un enklask skiantel zo war e arguzennoù, daoust ma’z eo dic’hortoz an disoc’h.

Tu a vo d’al lennerien huñvreal pe vousc’hoarzhin pa lennint deskrivadur saeoù-egor an ezdouaridi, kizellet ouzh mogerioù ar Ziggouratoù (temploù sumerat).

Ur wech echu al levr ganeoc’h ho po ar blijadur da c’houzout ez eus ur perzhig ezdouarat en ho TDN*, an darn vrasañ anezho o tont eus hini ar marmouzien.

Adimplijet eo bet (hag e vez bepred) ijin Zaccharias Sitchin gant kredennoù a bep seurt, o deus c’hoant da welet Luke Skywalker e-lec’h Jezuz Krist, ha planedenn Tatooïne e-lerc’h ar baradoz.

Tangi Legavre

The 12th Planet gant Zecharia Sitchin. Embannet gant Harper (1976)

TDN: trenkenn dezoksiribonukleek (DNA e saozneg, ADN e galleg)

Divskouarn: lid ar 5 bloaz...
	A-benn ar Sadorn 29 a viz Genver e vo lidet 5 bloaz krouidigezh ar gevredigezh Divskouarn. Labourat a ra tud Divskouarn evit diorren ha kreskiñ ar c’hinnig brezhoneg d’ar bugaligoù n’int ket en oad da vont d’ar skol c’hoazh. 16 magouri a ra hiziv an deiz gant ar brezhoneg e mod pe vod, ha savet ez eus bet ur Garta gant Divksouarn evit aozañ an traoù eus ar gwellañ. Raktresoù gant Europa zo war ar stern gant skipailh Divskouarn ivez. Emgav zo bet roet neuze da vignoned Divskouarn da 4e e Ti Bugaligoù Gouenoù (Bro-Leon o vezañ kavell ar gevredigezh). Gwastell ar Rouaned a vo kinniget gant skipailh Enfantillages, ha lusket e vo an abadenn gant ar c’haner Jakez ar Borgn. Evit lakaat e anv: divskouarn403@orange.fr ...hag emgavioù evit ar brezhoneg er vuhez familh Emgavioù a ginnig skipailh Divskouarn ingal d’an tadoù, mammoù ha bugale yaouank (etre 0 ha 5 bloaz). Abadennoù evit ober anaoudegezh gant ar yezh eo, hag implij ar brezhoneg er vuhez familh. Kanaouennoù, kontadennoù, rimadelloù a vo distaget gant animatourez Divskouarn. An dalc’h a zo silañ brezhoneg e divskouarn ar vugale hag o zud war memes tro. Digor eo d’an holl. Daou emgav a vo e kêrioù bras reter Breizh a-benn nebeut. Sadorn 29 a viz Genver da gentañ, e kreizenn Yezhoù ha Sevenadur, e Sant-Ervlan (Naoned), da 11e00. An eil a vo aozet e Roazhon, e sal Dizolo e kreizenn Skol an Emsav, d’ar Sadorn 5 a viz C’hwevrer, da 11e. Evit lakaat e anv: divskouarn.diorroer@hotmail.com Evit gouzout hiroc’h: http://divskouarn.free.fr/ Deiziataer 2011 Adkavet e vo er bloaz-mañ ar stumm klasel a blij d'an dud: 17cm uhelder ha 9cm ledander, gant ar skrid a-led. En ur golo kartoñs e liv e vo kavet an deiziataer, en taol-mañ, pevar liv penn-da-benn. Kantadoù a chomlec'hioù a gaver ivez er fin, gant roll pouezusañ aozadurioù sevenadurel ar vro (kelenn, embann, mediaoù...). Nevez er bloaz-mañ: "Ar brezhoneg war ar Genrouedad" renabl al lec'hiennoù pouezusañ e brezhoneg war ar Genrouedad renket e 6 rumm. E gwerzh emañ Deiziataer 2011, 10€ an tamm. Gellout a reer gourc'hemenn anezhañ dre ar Post ivez evel-just. Dont e darempred gant Skol an Emsav (12€ an tamm gant ar mizoù-kas). Evit gouzout hiroc'h: Skol an Emsav, 25 straed Pierre Martin, 35000 Roazhon. Pgz: 02.99.38.75.83. Plr 02.99.63.82.28. Postel: sae.bzh@wanadoo.fr Internet: www.skolanemsav.com Bremaik: klask zo war-lerc'h kenskriverien! Plijet oc'h o lenn ar pennadoù embannet a-hed ar bloaz war Bremaik? Sot oc'h gant ar sonerezh, ar sportoù, an arzoù, ar sinema, pe me ’oar-me? Gallout a rit degas ho sell war an danvezioù-se ingal, dre ar brezhoneg, gant Bremaik! Ur skipailh tud a youl vat a sav ar pennadoù bep sizhun abaoe ouzhpenn 6 vloaz, ha bepred emaomp o klask "pluennoù" nevez, evit reiñ un ton liesseurt d'ar gelaouennig (digoust!) war internet, hag e brezhoneg-tout, embannet bep Lun. Evit gouzout hiroch war an doare da vont en-dro, ha penaos kemer perzh e buhez Bremaik, n'eus mann ebet aesoc'h: kasit ur gerig deomp d'ar chomlec'h postel-mañ: bremaik@free.fr! Lennit Bremañ Genver 2011! Enkadenn bankoù Iwerzhon, yalc'hadoù Europa evit ar rannvroioù, raktres dibar an Aocher, abadennoù sonerezh liesseurt Radio Kerne, troioù-kaer Hersel Layton... Kaoz zo eus an holl draoù-se hag eus traoù all c'hoazh e niverenn Bremañ Genver 2011. An teuliadig a ra anv er miz-mañ eus keleier kanerien zo liammet gant Breizh e mod pe vod. Kentañ albom solo Gweltaz Adeux, pladenn nevez Nolwenn Leroy, troiad da zont Yvan Le Bolloc'h er vro ha keleier all a bep seurt... Kenderc'hel a ra Bremañ da ginnig div bajennad "Lennomp!". Savet e vezont a-ratozh evit ar re zo o teskiñ brezhoneg gant skipailh Skol An Emsav. M’ho pez plijadurig o lenn Bremaik, plijadur ho po o lenn Bremañ, sur! Bep miz, abaoe 1980, e kinnig kelaouenn Bremañ pennadoù brezhonek a bep seurt, diwar-benn Breizh hag ar bed, kinniget brav, e doare ur magazin. Embannet gant Skol an Emsav (4,50€ an tamm) Koumanant: 50€ evit ur bloaz, 60€ evit an estrenvro, 4€ bep miz dre lamadenn E gwerzh er stalioù-levrioù a ginnig danvez Breizh, pe dre goumanant. Evit gouzout hiroc'h: www.breman.org