Lun 30 a viz Genver, niv. 85
Sizhun 5 - 2006

Pellgargit ar pennadoù e stumm Word

Petra oa keleier Bremaik bloaz zo? Klikit amañ!

Evit distreiñ d'ar bajenn degemer

Un devezh erc'h... e pep lec'h

Souezhet an holl disadorn : gwenn-kann ar vro. Ar vugale a oa laouen-holl evel-just, peadra da c'hoari e-kerzh ar sadornvezh ! Boulomoù-erc'h, emgannioù bouloù... Siwazh, gant an erc'h e c'hoarvez ur bern gwallzarvoudoù (bihan a-walc'h alies a wech, eüruzamant), labour zo bet evit ar bomperien hag an añbulañsoù... koulz war an hentoù ha war ar straedoù.

Eizh kantimetrad erc'h zo kouezhet el Liger-Atlantel dre vras ha chomet eo yen-sklas an douar (-2°). E Sant-Nazer ha Naoned e oa bet harzet ar busoù disadorn goude merenn. Gwashoc'h c'hoazh e oa an traoù en Il-ha-Gwilen. Ruzañ a rae ar rodoù war an hentoù skornet ha divizet e oa bet gant ar prefeti berzañ ouzh ar c'hirri-samm hag ar busoù da ruilhañ. Un hanter-kant den bennak zo bet gloazet en holl dre faot an amzer fall. En Aodoù-an-Arvor ez eo kouezhet an erc'h etre fin ar beurevezh ha fin an abardevezh. Un toullad gwallzarvoud kirri-tan a zo bet. Er Mor-Bihan ivez e oa dañjerus an hentoù. 15 cm erc'h zo bet e Baod. Siouloc'h eo bet an traoù war hentoù Penn-ar-Bed. Kalz moanoc'h e oa ar gwiskad erc'h dre chañs, ha ne oa ket ken skornet al leur hag er peurrest eus ar vro... Ne chome tamm erc'h ebet pe dost dec'h da greisteiz, hag hiziv eo diaes krediñ e oa bet tapet ar skeudennoù-mañ eus Bro-Gwened daou devezh zo hepken !

Skeudennoù gant Jean-Luc Le Floc'h

Pompoko, un dresadenn vev ekolo

Evit ur wezh ’c’h eomp da laerezh un tamm labour digant hor c’heneil a ra ar rubrikenn “sinema”, evit kinnig deoc’h un dresadenn-vev a vro Japan, Pompoko ! Ur film plijus da welet hag ivez un doare da ginnig d’ar vugale (ha d’ar re vras ivez) kudennoù stag ouzh an endro. E fin ar bloavezhioù 60 ne chom ket trawalc’h a blas e Tokyo da reiñ lojeiz da tout an dud. Neuze ez eus bet divizet krouiñ buan ur bern karterioù nevez ha lodennaouegoù war un dro. Evit ober kement-se ha sevel kêr nevez Tama e krog an dud da ziskar koadoù, da blaenaat menezioù, ’fin da dreuzfeurmiñ tout ar vro hag an natur tro-dro. Pezh na blij ket tamm ebet d’an tanukied, ur seurt loened burzhudus eus mojennoù hengounel Japan, a vev er c’hoadoù. Tamm-ha-tamm ez a o lec’hioù chaseal ha bevañ war goazhañ, n’hallont ket kaout trawalc’h a voued ken, ha neuze n’hallont ket ober bugale ivez. Klask a reont stourm ouzh an dud, dre implijout o galloudoù kuzh : gallout a reont cheñch stumm ha dont da vezañ ar pezh o deus c’hoant. Plantañ a reont reuz ha cheu er chanterioù. Met koulskoude e kendalc’h an dud da vezan niverusoc’h-niverusañ war o zachenn... Peseurt dazont o deus al loened gouez pa vez muioc’h-mui a dier e pep lec’h ha nebeutoc’h-nebeutañ a lec’hioù dizarempred, pa vez savet lodennaouegoù buan-tre el lec’h ma ne oa bet nemet koadoù pe parkeier abaoe kantvedoù ? Peseurt dazont o deus al loened n’hallont ket en em ober ouzh ar c’hêrioù ha bevañ e-kichen mab-den ? Sed aze un nebeud goulennoù a sav ar film-se.

Evit gouzout hiroc’h : http://www.buta-connection.net/pompoko/

Malachap story e Karaez
d'an 9 a viz C'hwevrer

Paotred-saout hag Indianed a vo e Karaez d'ar Yaou 9 a viz C'hwevrer da 8e30 noz er sal Glenmor. Malachap story zo ur western tennet ag ur pezh-c'hoari fentus skrivet e galleg get René de Obaldia, Du vent dans les branches de sassafras. Lakaet eo bet e brezhoneg istor ar familh Gourvenneg, labourerion-douar o vevañ e-tal Malachap City, er C’hentuky, e penn-kentañ an 19^vet kantved. Met n'eo ket sioul ar vuhez get an Indianed war hent ar brezel... Bec'h ha trouz a vo er vro, tudoù, e-pad un euriad hanter. Tost echu eo troiad Malachap Story gant ar strollad C'hoarivari. Kinniget vo e Ploue d'ar Sul 12 a viz Meurzh evit ar wezh diwezhañ.

Tiger Woods bepred e penn ar jeu

Ar bloavezh golf nevez zo o paouez kregiñ gant tournamant La Jolla (Kalifornia), ul lodenn eus roll tournamantoù golf Norzhamerika. An trede gwech eo d’ar golfer brudet-holl, Tiger Woods, gounit an tournamant-se. Daoust d'e drec'h, e oa bet efedus-tre ar Spagnol Jose Maria Olazabal ha Nathan Grenn, ur c'hoarier eus ar Stadoù-Unanet, evel Tiger Woods. An tri-se o deus echuet an tournamant gant 278 taol.

Ur Gall a oa war ar renk, Thomas Levet. Plaset mat e oa en dro gentañ, met kollet en deus e lañs tamm-ha-tamm evit erruout er 56vet plas.

Ur c’heriaoueg vrezhonek diwar-benn ar golf a c'heller pellgargañ war lec'hienn Ofis ar Brezhoneg : http://ofis-bzh.org/bzh/services/terminologie/travaux.php?travail_id=68

Un ticket pour l’espace

Frañs - 2005
Seveniñ : Eric Lartigau

N’eo ket keodedourien Frañs evit kompren perak e vez gouestlet kement a arc’hant d’an enklask en egor. En abeg d’an dra-se en deus divizet ar gouarnamant reiñ lañs d’ur mell koulzad brudañ : aozet ez eus ur seurt lotiri da gas daou zen da heuliañ ur skipailh egoraerien en o c’hefridi. Ur c’homedian war an diskar (Kad) hag un itriker daonet (Guillaume Canet) a yelo ar maout ganto er c’hoari-se.

Anavezet eo Kad hag Olivier evit o fent droch. O eil film a zrevez ar filmoù amerikan e-giz ma rae an hini kentañ (Mais qui a tué Pamela Rose ?, 2003). Brav eo an aozañ e gwirionez met kerse eo n’eo ket bet brasoc’h ar striv war ar skrid. Hoalus e oa ar filmig brudañ koulskoude met ar film e-unan n’eo ket ken leun a ijin hag a fent siwazh. Ne c’heller ket lavaret ne c’hoarzher ket, met ma fell deoc’h dirollañ da c’hoarzhin e vefe kalz gwelloc’h adwelet filmoù evel The Party eget koll amzer gant Un ticket pour l’espace.

Evit gouzout muioc’h : http://www.unticketpourlespace.com/

We Are Scientists – With Love and Squalor

Embannet gant Virgin

A-wechoù e soñj din on distro e 1982. Ma, post-punk neuze. Setu tri den eus Kalifornia, hag int degouezhet e New York ha splujet en "aval bras" evel ma lavarer. Setu n’eus liamm ebet etre o sonerezh ha hini ar Beach Boys. Amañ emaomp er gêr vras, tudoù.

Evit ar mont en-dro, netra nevez, an diazez : gitar, gitar boud ha taboulinoù. Hag an disoc’h ? Eil derez da vat pa seller ouzh o videoklipoù (al lec’hienn ivez), luskoù dance evel 99% eus ar strolladoù a vremañ, gitar tagusoc’h, gitar boud un tu bennak etre ar funk hag ar punk. Netra nevez ivez evit pezh a sell ouzh ar son, neuze. Memestra eo diaes chom diseblant pa glever The Great Escape, The Scene Is Dead pe c’hoazh Nobody Move, Nobody Get Hurt.

Muioc’h a ditouroù : http://www.wearescientists.com/

Pred giz Azia, lodenn 2

Riz giz Kanton

Aozañ (20 mn) – poazhañ (15 mn)

Danvezioù evit 7 – 10 den :
1 c’hilo riz, 500 g chifretez, 8 vi, 20 ognonenn c’hlas, 10 jelkenn kig-moc’h pe kig yar-Indez, soubilh soja, Ve-Tsin (glutamate), eoul.

Aozañ :

Lakait ar riz da boazhañ, laoskit a-gostez e-pad 5 pe 6 eurvezh d’ar muiañ.

En ur baelon eoulet mat, lakait ar vioù da fritañ en ur veskañ anezho mat.

Ouzhpennit ar sifretez (tennet o c’hroc’hen diganto) hag ar jelkennoù kig (troc’het a dammoù).

Laoskit da boazhañ war an tan bihan e-pad 5 pe 6 mn. Goude-se, ouzhpennit ur banne mat a soubilh soja, an ognon glas hag ul loaiad vihan a Ve-Tsin.

Laoskit da vitonañ e-pad 10 mn ha meskit gant ar riz.

NB: gallout a rit cheñch an danvezioù-mañ diouzh ar pezh a blij deoc’h : tennañ ar chifretez ha/pe ar c’hig, ouzhpennañ piz-bihan…