17 a viz Here 2005, niv. 71

Pellgargit ar pennadoù e stumm Word

Petra oa keleier Bremaik bloaz zo? Klikit amañ!

Evit distreiñ d'ar bajenn degemer

Manifestadeg evit an okitaneg
d'ar Sadorn 22 e Carcassona

Disadorn e vo aozet ur vanifestadeg vras gant ur c'hevread kevredigezhioù eus Okitania.

Statud, mediaoù, deskadurezh... Evel evit holl yezhoù minorelaet all ar C'hwec'hkorn ez eus diaesterioù bras gant an okitaneg.

War skouer manifestadeg Roazhon miz Meurzh 2003 evit ar brezhoneg e vo aozet hini Carcassona. Bodañ ar muiañ ar gwellañ a dud evit diskouez d'an dilennidi ez eo bev-mat yezh ha sevenadur Okitania c'hoazh hag e c'hell an neb a gar ober un dra bennak evit gwellaat an traoù.

Etre 2 ha 3 milion a okitanegerien a vefe, strewet war un dachennad 30 departamant er C'hwec'hkorn... hag ouzhpenn, en tu all da harzoù Spagn pe Italia. En-ofisiel eo bet anavezet an okitaneg er sizhun dremenet gant Parlamant Katalonia.

Kirri-boutin a loc'ho eus Breizh, aozet gant ar C'huzul Sevenadurel. 30 euro ar plas. Evit lakaat e anv (an abretañ ar gwellañ), pgz : 02 99 87 17 65.

An Asháninka en arvar abalamour d’ar c’hoad-akajou

Marteze ho peus klevet komz eus Jéromine Pasteur, ur veajourez echu, a zo deuet da vezañ ur gwir Indianez eus ur meuriad Asháninka, ur bobl indian zo o chom e koadeier Amazonia, e Perou. Kenderc’hel a ra-hi da veajiñ dre ar bed a-bezh met klask a ra profitañ eus he brud evit reiñ skoazell d’he meuriad.

Evit gwir, ar re-se o deus peadra da gaout doan : hiziv an deiz e teu ur bern koadourien war o douaroù da bilat pezhioù melloù gwez-akajou. Ouzhpenn an diskar-gwez-se a zistruj ar c’hoadeier hag endro an Asháninka, e vez chaseet forzh pegement a jiboez gant ar goadourien, pezh zo arvarus evit an Asháninka a vev diwar ar chase. Gwashoc’h c’hoazh, e c’hell armoù an diskarerien gwez-akajou-se servijout a-enep ar re o defe c’hoant da glemm a vouezh uhel diwar-benn an drougoberioù-se.

Ret eo goût memestra...

Eo difennet diskar ar gwez-akajou e Perou hep aotre ofisiel (ha n’eus hini ebet gant ar goadourien-se) abaoe bloavezhioù.

Eo e-maez lezenn mont war douaroù an Asháshinka

Ez a ar goadourien-se betek diskar gwez er mirva broadel Otishi, da lâret eo e tiskaront gwez a zo ul lodenn eus glad ar Stad.

Met, ma ne vefe den ebet evit prenañ ar prenn akajou-se ne vefe ket kement a dud o tistrujañ ar c’hoadeier evit tennañ gounid dioute. Neuze, m’ho peus c’hoant da brenañ taolioù ha kadorioù jardin, soñjit e koadeier Amazonia hag en Asháninka ha na brenit ket arrebeuri akajou.

Evit gouzout hiroc’h :

http://jerominepasteur.over-blog.com/article-792866.html

www.chaveta.org

Diskouezadeg Fañch an Henaff e Kemper

Petra nevez gant Fañch an Henaff ? Ul levr (Graferezh, embannet gant Kloatr) hag un diskouezadeg e Kemper. Enni e kaver taolennoù ha skritelloù dreist-holl, dre ma’z eo brudet Fañch an Henaff evit e labour war an dachenn-se. E-giz-se e c’haller gwelout ar pezh en deus graet evit Diwan, Ar Vro Bagan pe c’hoazh festoù-noz a bep seurt e bro Gemper. Diazezet eo e zoare war arouezioù boutin, hag eñ a implij anezho en ur gendestenn disheñvel (gwelout da skouer skritell Breizh Aktu gant teod ar Rolling Stones). An oberennoù diskouezet e Kemper a zo ivez un digarez evitañ da ziskouez al labour en deus boulc’het evit pezh a sell ar skrivañ : implijout a ra ar Brito, ur skritur "kelt" ha modern, savet gantañ.

An daou levr (Skritur ha Graferezh) embannet diwar-benn e labour a c’haller gwelout ivez.

Diskouezadeg e Kelenn, 3 straed Vande, 29000 Kemper (karter Penharz)

Digor Lun-Gwener : 9e –12e30 hag 1e30 – 5e30

Betek ar 4 a viz Du

"Skipailh" ar merc’hed

Ur gazetenn-sport evit ar merc’hed, biskoazh c’hoazh ! Hunvreet hoc’h eus anavezout sekredoù tud brudet ar sport. Graet eo ! L'Équipe zo o paouez embann ur stagadenn nevez d’e embannadurioù d’ar Sadorn. An holl ac’hanoc’h (paotred ha merc’hed) a c’hello kaozeal diwar-benn an danvez…

Er gazetenn-se e c’helloc’h dizoleiñ ar sport gant ur sell nevez. Giz, keginañ, sportoù nevez, enklaskoù hag atersadennoù zo e-leizh. Degaset gant un ton plijus. Bec’h dezhi !

E 2,50 euro e vo d’ar Sadorn : L'Équipe (boutin), ar magazin, ha L'Équipe ar merc’hed !

The Brothers Grimm
(Les frères Grimm)

Stadoù-Unanet – 2005

Seveniñ : Terry Gilliam

Ouzhpenn gant arme Napoleon eo spontet Alamagn e deroù an 19vet kantved gant strobinelloù a-vil-vern : tasmantoù, sorserezed, trolled, tud-vleiz, h.a. Dre chañs ez a ar baotred Grimm a geriadenn da geriadenn evit gwerzhañ o skiant da stourm ouzh ar strobinelloù-se. N’int nemet touellerien evel-just, met ouzh ur c’hoadig milliget evit gwir o deus afer en taol-mañ.

N’eo ket The Brothers Grimm film gwellañ Terry Gilliam, pell alese. Setu un dastumad tudennoù o fistoullat dizehan gant red un istor disouezh diazezet war ur patchwork eus elfennoù boutin ar marvailhoù. N’eo ket displijus avat, ha doare Gilliam a vez anavezet memes tra (kadarnaet eo gant ar film-mañ pegen tost e c’hell bezañ e sinema ouzh hini Tim Burton a-wechoù). Frealzus eo dreist-holl gouzout ez embann Terry Gilliam d’ar pevar avel bezañ troet ur film kenwerzhel evit rastellat arc’hant da adsevel raktres dilezet e Don Quixote. Plijet e vo an holl re o deus gwelet an teul-film mantrus Lost in la Mancha gant ar c’heloù-se.

Evit gouzout muioc’h : http://www.lesfreresgrimm.com/

The Fall – Fall Heads Roll
embannet gant Sanctuary / PIAS

Franz Ferdinand – You Could Have It So Much Better
embannet gant Domino / PIAS

Div bladenn a zo deuet er-maez d’an 3 a viz Here. Hini nevez Franz Ferdinand ha hini nevez The Fall (evel bep bloaz). Evit pezh a sell ouzh Franz Ferdinand ez aio buan an traoù : an ton kentañ (Fallen) a zo mat (a-walc’h). An tonioù all, avat, n’int ket kenkoulz : kredet’ vefe en doa gwisket produour ar bladenn manegoù tev pa oa oc’h enrollañ ar bladenn, ken divalav eo ar son. Evit pezh a sell ouzh awen ar strollad, e c’haller bezañ prederiet : met pelec’h eo tremenet ?

Ha kaer ho po selaou ar bladenn e vo diposupl deoc’h kaout soñj eus an tonioù. Penaos ober neuze ? kenderc’hel da selaou pladenn gentañ ar strollad ha disoñjal homañ ar buanañ ar gwellañ !

E-keit-se e kendalc’h The Fall gant e hent, hag evel bep bloaz (pe dost) e teu er-maez ur bladenn nevez savet ganto. P’emañ an holl re yaouank (ha Franz Ferdinand en o zouez) o klask seniñ evel strolladoù post-punk ez a ar maout gant The Fall : tonioù nerzhusañ an albom (Blindness, What About Us, Claps Hands, Ya Wanner hag all) a c’hallfe bezañ studiet gant an holl re a fell dezho bezañ post-punk. Evel boaz eo diaes kompren ar pezh a vez distaget gant ar c’haner, met istor al lapin eus Alamagn ar Reter divroet da Vro-Saoz a zo fentus-tre. Menegomp ivez ur ganaouenn gozh, adkemeret ganto en un doare dispar : I Can Hear The Grass Grow. Gourc’hemennoù, neuze. Da c’hortoz o c’hentañ pladenn.

http://www.visi.com/fall/

http://www.franzferdinand.co.uk/

Steredouriezh : ar balañsoù

(23 a viz Gwengolo – 22 a viz Here)

Ho sin

Brokus oc’h ha frankiz pep hini zo a bouez evidoc’h. Ho stourm(où) a c’hell kas ac’hanoc’h davet bed ar politikerezh zoken. An arzoù a zo diouzh ho toare ivez, dañsal ha kanañ a rit ken aes ha tra. Boazet e vezit da gemer amzer da studiañ an arguzennoù a-raok tapout un diviz.

Ar bloavezh
Yaou zo bet ganeoc’h betek ar miz-mañ. Chañs hoc’h eus bet dija a-drugarez dezhañ. E levezon a vo santet betek fin ar bloaz. Ar re zo bet ganet etre an 2 hag an 12 a viz Here eo ar re chañsusañ !

Evit re an degad kentañ eus ar sin e vo sioul an traoù. Muioc’h a draoù a zlefe c’hoarvezout en eil lodenn eus ar bloavezh. Evit a sell ouzh al labour, na vezit ket re a vall warnoc’h, dont a reoc’h a-benn eus ho raktresoù ma tiskouezit pasianted. Evit re an eil degad, splann e vo ho puhez kalon. El labour e kavoc’h sikourioù hag ho raktresoù a vo diorroet en un doare efedus-tre. Kredit en ho hunvreoù. Re an degad diwezhañ a vevo traoù startoc’h. Mankoù ha dalc’hoù a santoc’h e-pad al lodenn gentañ eus ar bloavezh. Diaes e vo deoc’h ezteuler ho santimantoù. Klaskit chom hep duañ an traoù betek re. El labour ivez ne vo ket splann ar jeu. Disfiz ho po diouzh pep tra. Arabat koll kalon, rak aesoc’h e vo an eil lodenn eus ar bloavezh. Cheñchamantoù yac’h a sikouro ac’hanoc’h da welet sklaeroc’h.