18 a viz Here 2004, niv. 28

	20 000 den e straedoù Papeete
	O tibunañ e oa Polinezianed disadorn e Tahiti, evit ma vefe divodet Bodadenn Polinezia C'hall, hag aozet dilennadegoù nevez. D'an 23 a viz Mae e oa bet gounezet an dilennadegoù gant strollad dizalc'hour Oscar Temaru. Mignon da Jacques Chirac, Gaston Flosse a oa bet e penn ar vro e-pad 16 vloaz. Deuet e oa a-benn da lakaat votiñ d'an 10 a viz Here ur mennad a-benn berzañ gouarnamant nevez dilennet Temaru. Sañset eo Bodadenn Polinezia C'hall dilenn ur prezidant nevez arc'hoazh. Met n'eo ket sur tamm ebet e vefe niverus a-walc'h ar gannaded. Adkaset e vefe neuze dilennadeg ar prezidant nevez gant Bodadenn Polinezia C'hall d'an 22 a viz Du. Ma ne zisoc'h ket an traoù gant dilennadeg ur prezidant hag ur gouarnamant nevez, e c'hellfe bezañ aozet ur votadeg nevez, ar pezh a c'houlenne an 20 000 manifester, d'ar Sadorn 16 a viz Here.

	Ar chaseourien a gemm ’blam d’an OGK
	Dre forzh lakaat OGK (organoù o genoù kemmet) er boued ez eus c’hoarvezet un dra spontus : kemm a ra tud zo hag en o zouez ar chaseourien loened-dour eus 34 departamant. Gouest int a-benn bremañ da welet sklaer e-pad an noz ha pa vefe du-pod. E Breizh evit poent n’eo degouezhet an darvoud souezhus-se nemet e Penn-ar-Bed, Il-ha-Gwilen hag Aodoù-an-Arvor. Divizet ez eus bet gant hon dilennidi leun a furnez derc’hel kont eus an darvoud boemus-se ha neuze eo bet aotreet ar chaseourien da chaseal an houidi e-kreiz an noz. Difennet e oa ar chase noz abaoe 1844 pa veze ret d’ar chaseourien paouez un eur goude ar c’huzh-heol. Ouzhpenn-se eo ken barrek chaseourien Bro-C’hall en deiz a hiziv ma c’hallont tennañ war 64 spesad laboused pa ne c’hell Belgiz en ober nemet war 9 spesad ! Ar strelleged pavioù gwer, ar sourouc’haned morlereg hag ar marc’heged lakaet da “spesadoù en ur stad fall” ne vezont chaseet nemet e Bro-C’hall. E-giz ar morbiged, ha pa soñjer n’eus ket tu da zebriñ anezhe. Ur welladenn a vefe tu d’ober : reiñ OGK d’al laboused gouez ma lufrint e-kreiz an noz. E mod-se e vo aesoc’h tennañ warne ! Kement ha goût hiroc’h : http://www.lpochampagneardenne.com/chasse/index.htm. strelleg(ed) pavioù gwer : chevalier aboyeur marc’heg(ed) : barge sourouc’han(ed) morlereg : bécasseau maubèche morbig(ed) : huîtrier pie

Kuriusted er C’houerc’had

Da betra mont d' ur gêr vras evit ur sonadeg pe evit heuliañ kentelioù sonerezh, arzoù-kaer, hag all pa vez posubl ober kement-mañ…er C’houerc’had ! Ya, abaoe nebeut ez eus deus ar c’h/Quincaillerie, ul lec’h ma vez aozet abadennoù
sonerezh, stalioù skriverezh, prierezh hag all. Stalioù zo evit ar vugale zoken : kizellerezh, poltrederezh, video… Prestik e teuio ur sevener filmoù, William Karel e anv, da ginnig un diell-film a-zivout ar c’heleier er skinwel. Tud vrudet pe get a dremeno el lec’h burzhudus-se, da ginnig o donezonoù d’an arvesterien. Ar plasoù a rank bout miret en a-raok, n’eo ket re vras ar sal, hogen ur baradoz eo evit an arzourien liesseurt !

La Quincaillerie, 1 plasenn Massignon, 22420 Ar C’houerc’had. Pgz : 02 96 38 93 07. Postel : cie.papiertheatre@free.fr.

	C’hoariou Olimpek
	An holl a oar ez eo ar C’hoarioù Olimpek, ma lakaer a-gostez ar sportoù, un istor a arc’hant hag a vediaoù. Hag evel-just ar sportoù hag a blij ar muiañ d’an dud a vez adskignet ar muiañ. Setu perak e vez sellet pizh ouzh an "audimat" evit kavout pelec’h e vije tu da wellaat an traoù ha pelec’h ez eus bet bizet just gant ar mediaoù. Evel-just, ar sport a erru da gentañ well-wazh eo an atleterezh, met ur sport all zo lakaet en a-raok er studiadenn zo bet graet. Sport kentañ e-keñver amzer skignañ (47 eur 39 munutenn), sport a-stroll kentañ heuliet e-pad an deiz (gant 2 048 960 pellarvester dre vras) hag eil sport sellet gant ar Frañsizien (31,8 milion a dud, nemet se…), ar vell-dorn a seblant bezañ gounezer bras C’hoarioù Olimpek 2004. Peadra d’en em c’houlenn perak ne vez ket gwelet aliesoc’h war ar skinwel… Dreist-holl pa vez gwelet emañ ar vell-droad da eil diwezhañ e renkadur sportoù ar C’hoarioù Olimpek. Mell-droad 10vet devezh (R1) Naoned (9vet) 1–0 Pariz SG (16vet) Sochaux (14vet) 3–0 Roazhon (15vet) 12vet devezh (R2) Brest (3e) 2–1 Laval (13vet) Niort (16vet) 1–0 Gwengamp (18vet) Clermont Foot (14vet) 2–0 An Oriant 19(vet) 11vet devezh (R1) Roazhon (15vet) – Metz (10vet) Caen (14vet) – Naoned (7vet) 13vet devezh (R2) An Oriant (20vet) – Créteil (18vet) Sedan (4vet) – Brest (2vet) Gwengamp (19vet) – Amiens (6vet)

Resident evil : apocalypse

Stadoù-Unanet - 2004
Seveniñ : Alexander Witt

Iiiiik… Ploum ! C’ha ! C’ha ! C’ha ! Laoskit ac’hanomp da vont. A !! Grouaaa ! Ma Doue benniget, petra eo an afer-se ? Dao. Dao. Dao. Met piv oc’h ’ta ? Grouaaa ! Troulouloum. Re niverus int. Vrooo. Dispartiomp kentoc’h. Arrrrg ! DRAVVVV !!!

E-touesk traoù all eo ret kaout un nebeud daveennoù a-benn gellet priziañ ur film ha muzuliañ e sioù mat kenkoulz hag e sioù fall. En abeg d’an dra-se eo talvoudus gwelet “Resident evil : apocalypse” a-benn ar fin rak ur film da lakaat war live mann skeul priziañ ar filmoù eo.

Kement ha gouzout hiroc'h : http://www.re2lefilm.com/

	Breizh , Keltia ha BT (Pevare lodenn)
	E touez ar re glasel setu unan a dalvoudegezh : Le vaisseau de pierre, testenn gant Christin, tresadennoù gant Bilal, embannet gant Dargaud ("Histoires fantastiques, légendes d'aujourd'hui") e 1976. Barnet eo bet e niverenn 181 Al Liamm (Meurzh-Ebrel 1977, pp 166-167). N'eus netra da lâret ouzhpenn. Stourm tud ur porzhig a Vreizh enep galloudoù ar Stad hag an arc'hant. Nerzhioù hud, diskoulm fantastek (dave da Gembreiz Patagonia ?). Tudennoù liesseurt : labourerien ar vro, ar beleg "ruz", ar "Breiz-atao" kozh, mezvier ha "na ruz na gwenn", ar c'hastell hag e annezad... Un nebeud a vrezhoneg ha fent alies, dreist-holl diwar-goust kargidi ha mondianed, betek ar fin...

Tajin kig-oan gant abrikez sec’h

Fardañ : 30 munutenn
Glec’hiañ : 45 munutenn
Poazhañ : 10 munutenn
Evit 6 den.

Ret eo kaout : 1,5 c’hilo kig-oan (skoaz) troc’het a dammoù, 300 gramm abrikez sec’h, 2 benn-onion a vent krenn, 3 fenn-kignen, 2 vazhig kanell, 1 loaiad vihan a jinjebr e poultr, 2 glosenn safron, 1 loaid vihan a c'hreun sezam, 2 loaiad vras a vel, 2 loaiad vras a eoul, koriandrez, holen ha pebr.

Lakait ar c’hig troc’het a dammoù en ur plad bras, ouzhpennit an holen, an eoul, an temzoù, ur penn-onion hag ar pennoù-kignen skejennet. Meskit mat.
Goloit ha laoskit da c’hlec’hiañ e-pad tri-c’hard eurvezh (45 mn).
Lakait ar c’hig en ur gokelenn, goloit gant dour. Lakait da boazhañ e-pad ugent (20) munutenn.
En ur gastelodenn, bannit an abrikotez hag ouzhpennit div loaiad-pod a
chug-poazhañ. Lakait da boazhañ e-pad dek (10) munutenn.
Ouzhpennit an eil penn-onion skejennet, bannit ar mel ha laoskit war an tan ur c’hard eurvezh c’hoazh (15 mn)
Kinnigit ar c’hig gant an abrikez, ar soubilh, greun sezam ha koriandrez troc’het munud. Semoul a c’hellit kinnig ouzhpen