Lun 30 a viz Here, niv.120
Sizhun 44 - 2006

Pellgargit ar pennadoù e stumm Word

Petra oa keleier Bremaik bloaz zo? Klikit amañ!

Evit distreiñ d'ar bajenn degemer

Brazil :

Lula e penn ar vro evit an eil gwech

Dec'h e vouezhie Brazilianed evit an eil tro, a-benn dilenn o frezidant. Luiz Inácio Lula da Silva (graet e vez Lula dioutañ peurvuiañ) zo bet trec'h, en anv ar PT (strollad al labourerien). Dec'h da noz pa oa bet kontet 91% eus ar paperennoù-votiñ en doa dastumet dija 60% eus ar muoezhioù. Pevar bloaz zo e oa bet dilennet Lula ha kroget en doa neuze liv bolitikel stadoù Suamerika da cheñch tamm-ha-tamm. N'eo ket ken taer ha kleizour komzoù Lula hiziv evit na oant pevar bloaz zo ha lod eus ar stourmerien sokialour brazilian zo dipitet. Daoust da se e chom niverus-kenañ ar re zo prest da souten Lula e-touez ar re baourañ. 61 bloaz eo Lula, ha kroget en deus da labourat evel micherour pa oa krennard. Ur stourmer sindikalour brudet e oa hag aon a rae da dud an arc'hant bras p'en doa gounezet ar post a brezidant e 2002. Abaoe en deus klasket Lula lakaat ezhommoù sokial (skoaziadoù arc'hant d'ar familhoù, kresket pae ar gopr izelañ) hag armerzhel Brazil da genglotañ (merañ ar vro en un doare aketus ha strizh a-walc'h).

Kudennoù energiezh 2

An eoul-plant

Ar sizhun dremenet hor boa gwelet ar c'hudennoù a savo a-benn nebeut pa vanko eoul-maen. Peseurt diskoulmoù a vo neuze ? Komz a reer kalzik eus implijout eoulioù-plant e-lec'h an eoulioù-maen. Kudennoù a sav gant ar re-se.
Da gentañ, ne vefe ket trawalc'h diouto evit an implijoù hon eus outo : ma paouezfemp holl da zebriñ, a-benn gouestlañ an holl parkeier da sevel eoul-plant ha n'eo ket boued pe loened, e vefemp gouest da broduiñ e-tro 40% eus ar pezh a implijomp er mare-mañ. A-dra-sur, ne baouezimp ket holl da zebriñ evit ruilhal, met posupl eo ma savfe kevezerezh etre an tachennoù implijet evit magañ an dud hag ar re implijet evit magañ ar c'hirri. Kudennoù geopolitikel bras a savfe neuze.
Da eil, an hentennoù implijetañ er mare-mañ el labour-douar a ra eo stag hemañ ouzh an eoul-maen : evit ar stlejerien, al louzoù ouzhpennet war ar parkeier, ar re roet d'al loened, an treuzborzhañ... Ma vez ezhomm 400mL eoul-maen a-benn produiñ 1L eoul-plant, ne vo ket gwall spletus !
Da drede, ur spont a vefe evit an endro. A-benn produiñ parkeier palmez e vez devet koadeier en Azia (Malezia, Sumatra, Borneo, Indonezia...), gant ul levezon spontus war loened ha plant ar vro... ha gant CO² eztaolet forzh pegement !
Dav eo soñjal e diskoulmoù teknikel all, pe neuze cheñch hon doare pemdez da vevañ...

M.M.

Evit kenderc'hel gant an tabut :
http://malomorvan.free.fr/bzh/forum/phpBB2/viewtopic.php?p=2040#2040

Erer kozh ha nevez e Kastell-Briant

E Kastell-Briant, betek ar 27 a viz Du, war dachenn ar c’hastell, e c’helloc’h gweladenniñ un diskouezadeg war istor al labour-douar e Liger Atlantel eus an 19vet kantved betek bremañ. Diazezet war benveg pennañ ar beizanted e Breizh, an diskouezadeg-mañ a vod 300 arar disheñvel, en o zouez erer da blomañ, da gignat ha mekanikoù dreistordinal evel un arar-brabant eus 1814 pe un all eus1840, met ivez binviji a vremañ.

E bro an douaroù legumaj, chatal ha gwinaouegoù ’z eus bet dalc’het kalz eus ar re-mañ, kinniget en ur rouedad mirdioù al labour-douar. Peadra da sevel an diskouezadeg "Erer ha tud". An arar zo liammet strizh gant kêr Kastell-Briant, abaoe an amzer ma oa staliet eno an embregerezh Huard e 1895, deuet da vezañ Kuhn bremañ.

An diskouezadeg-mañ zo kinniget e brezhoneg ha tu vo deoc’h profitañ evit gweladenniñ ar c’hastell ivez.

Hoel Louarn

Evit gouzout hiroc’h : 02 40 28 20 20

Aet gant Hent ar Rom

Dec' h e oa loc'het eus Sant-Maloù rederien Hent ar Rom, evit tizhout Pointe-à-Pitre. Pevar-ugent bag o doa kuitaet porzh Sant-Maloù dec'h. En o zouez daouzek bag vras, lieskouc'h, a 18,28 metr hirder. E-touez bigi koustusañ ar redadeg war vor dre lien int, betek 3 milion a euroioù. Un dek den a-vicher a ranker kaout evit prientiñ ar bigi-se, teknikourien a live uhel. Ar vartoloded wellañ a c'hell kas ar bigi d'un tizh a 35 skoulm (65 km/e). Met un deknologiezh ken uhel zo kizidikoc'h ivez : ret eo bezañ eus ar re ampartañ evit mestroniañ ar bigi lieskouc'h-se. "Merdeiñ war seurt bigi e-unan eo ar pep diaesañ en hon sport" eme ar bageer Yvan Bourgnon, ur Suisad o chom en Oriant, a-raok na grogfe gant Hent ar Rom disul war ar vag Brossard.

The Queen

Bro-Saoz, Frañs, Stadoù-Unanet - 2006
Seveniñ : Stephen Frears

An istor : Hañv 1997. Gwallzarvoud karr-tan ha marv trumm Lady Diana e Pariz. Ar Rouanez Elizabeth II hag he ziegezh a zo e kastell Balmoral o tiskuizhañ evel bep hañv. Perak e tistrofent e tousmac’h ar gêr vras ? Feuket ez eus ul lodenn vras eus an dud gant kement a ziseblanted. Tony Blair, nevez anvet da gentañ ministr a glask lakaat ar rouanez da gompren emañ he flas e Londrez.

Petra eo The Queen ? Ur film fentus gant un danvez skrijus ? Ur film brudañ ar rouantelezh hag ar rouanez pe kentoc’h evit sikour Tony Blair ? Gant Stephen Frears (sevener The van, The snapper, Hero...) emeur kaset eus kegin ti Tony Blair da gambr-gousket ar rouanez, eus lanneier Bro Skos da borzh Buckhingham Palace. Didro. Diardoù. Ha Lady Di, aet da Anaon, o plantañ reuz en tiegezh hollvrudet... Fent, plijadur. Ya. Preder war ar sistem politikel ha pouez ar mediaoù ivez. Tremen a reer aes ha brav eus dielloù da faltazi. N’eus tamm flemm drouk ebet er film (nemet gant pried ar rouanez e vefe ?), soutil ha spiswel kentoc’h. Helen Mirren a zo amañ "queen" penn kil ha troad. Ur film saoz (unan all c’hoazh) a dalv ar boan. Gwir.

A.K.

Fest-noz bedel e Kemper gant an 8vet Cyber!

Disadorn e vo aozet an 8vet Cyber fest-noz e sal ar Babell e Kemper. An nozvezh a vo kinniget gant Goulwena An Henaff ha Raymond Le Lann. Nevezenti 2006 a vo ur c’hendiviz diwar-benn an ekonomiezh hag ar sevenadur e Breizh (etre 5e30 ha 7e30). Goude-se e vo kinniget ur sonadeg gant Yann Raoul ha gant ar Goristed. Hag evel-just, adalek 10e, ar fest-noz gant ar strolladoù Red Cardell, Huiban Quartet, Breudeur Guichen, Deus’ Ta, Ozan Trio ha Bagad Penhars. Skignet e vo war skrammoù bras e Kemper skeudennoù kaset war-eeun eus ar fest-noz-se bevet ivez war Enezenn ar Reünion, e Polonia, en Aostralia hag e Kêr Lyon. Evit ar sellerien a vo ba’r gêr e vo skignet luc’hskeudennoù ha filmoù berr eus pevar c’horn ar blanedenn war lec’hienn An Tour Tan. Tro a vo ivez da gejañ war an “chat“ gant dañserien Kemper ha tud eus ar bed a-bezh. Hag a-raok kregiñ gant ar Cyber-fest-noz da vat (mont-tre adalek 5e) e vo enrollet ha skignet un abadenn gant Web-tv war-eeun eus ar Babell da 4e. E 2005 e oa bet 131000 den e 80 bro oc’h ober un tamm tro er Cyber-fest-noz dre ar genrouedad.

H.L.

Mont-tre : 8 euro (war al lec’h pe war lec’hienn An Tour Tan)

Digoust dindan 12 vloaz.

Evit gwelet ar Cyber-fest-noz war ar genrouedad (gant Real Player, digoust da bellgargañ) ha gouzout hiroc’h :

www.antourtan.org

www.cyberfestnoz.com

28vet Transmusicales e Roazhon , etre ar 7 hag an 9 a viz Kerzu

Evel ma oar an holl e krog ar bloavezh sonerezh e miz Kerzu, da vare an Trans e Roazhon. Evel bep bloaz, e c’haller kaout fiziañs en aozerien evit kinnig deomp a bep seurt traoù, hag evit lakaat ac’hanomp da zizoleiñ arzourien nevez. Meur a lec’h a ginnigont deomp ivez : sal ar Cité, palez an diskouezadegoù pe c’hoazh les Champs Libres.

Kregiñ a ray an traoù d’ar Yaou 7 gant Cat Power (Judah Bauer, gitarour ar strollad Jon Spencer Blues Explosion a sono asambles ganti), Razorlight, The Horrors, Viva Voce. Emgav an deiz war-lerc’h gant The Long Blondes, DJ Morpheus, The Books, Cassius, Klaxons pe c’hoazh Albert Hammond Jr (gitarour The Strokes). Hag evit echuiñ, d’ar Sadorn 9 : Kaiser Chiefs, Digitalism, Justice ha MSTRKRFT (bet anavezet a-raok dindan an anv Death From Above 1979).

Hag evel-just, abadennoù liesseurt e tavarnioù Roazhon (Bars en Trans), hag ivez, evit kaout un tañva : La tournée des Trans (adalek an 9 a viz Du en Olympic e Naoned betek an 2 a viz Kerzu er Run ar Puñs e Kastellin).

R.M.

Prizioù, programm klok hag all :

http://www.lestrans.com/

http://www.myspace.com/transmusicales

81 vaouez

Nann, n’eo ket titl ur film nevez gant François Ozon. Petra eo an dra-mañ neuze ? Ganet m’int bet er bloavezh 1981, Yuki ha Sandra o deus bet c’hoant da zizoleiñ peseurt raktresoù buhez a oa gant maouezed eus ar bed a-bezh a-oad ganto. Perak o deus choazet an oad-se ? Rak diouzh o soñj eo an oad ma kroger da sevel da vat ur raktres buhez en Europa. War-dro 25 e kroger da labourat, da zimeziñ, da gaout bugale… E broioù all ar bed e krog an traoù abretoc’h evit ar merc’hed alies. Fellet en deus da Yuki ha Sandra keñveriañ an doareoù bevañ evit lakaat war-wel ar pezh a ya mat en-dro, an diforc’hioù etrezo ha krouiñ ur rouedad. Kroget o doa gant o bloavezh beaj e miz Mezheven. Un dro e kreisteiz Afrika o doa graet er penn-kentañ (Afrika ar Su, Mozambik, Botswana, Namibia). Eno o doa kejet gant ur bern merc’hed disheñvel, pep a raktres dibar ganti : krouiñ ur gompagnunezh dañs, gourdoniñ ur skipailh mell-droad merc’hed, gwiañ dilhad, ren ur stal pe labourat war dachenn ar yec’hed hag an dachenn sokial… Choazet o deus en em gavout gant merc’hed hepken peogwir eo ken disheñvel o stuz eus an eil bro d’eben ma’z eo ret klask o c’hompren gwelloc’h hag o lakaat war-wel.

E Bolivia emaint evit an deizioù. Goude treuziñ Amerika ar Su ez aint da Okeania hag Azia !

Evit heuliañ o zroioù-kaer hag ober anaoudegezh gant raktresoù ar merc’hed o deus gwelet, n’hoc’h eus nemet mont war o lec’hienn internet http://www.81femmes.org.

Katell Leon

Kirinad konikl gant frouezh sec'h

Danvez (evit 10 den) : 500 g kig konikl mui 2 spilhenn gonikl – 500 g kig moc’h – 200 g kig leue – 1 avu konikl – 5 vi – 10 santilitr Armagnac – 10 g holen – 4 g pebr – 50 g kraoñ-kelvez – 50 g pistachez

Raktommit ar forn (6/7 thermostat).

Grilhit ar c’hraoñ ha ar pistachez a-benn lemel kuit ar c’hrochen.

Drailhit ar c’hig konikl (nemet ar spilhennoù gonikl), ar c’hig moc’h, hag ar c’hi leue. Meskit pep tra. Ouzpennit ar vioù, ar banne Armagnac, ar pistachez hag ar c’hraoñ-kelvez pilet gros.

Meskit ur wech all ; sasunit gant holen ha pebr.

Gwiskañ ur girin gant larjez ha leuniañ anezhi betek an hanter.

Diskargit ar spilhennoù konikl, hag ouzhpennit ar peurrest eus ar meskaj. Goloit gant larjez. Lakait er forn e-pad 1e30.

Mari Lubrano

Ar Skorpion

(24 a viz Here – 22 a viz Du)

Ar pep pouezusañ evit ar re zo bet ganet dindan sin ar Skorpion a vo adkavout fiziañs ha gwellwelusted. Perzhioù o deus manket dezho abaoe bloavezhioù. Gallout a raio ar meskaj planedennoù zo en ho sin (Loar du, Ouran, Yaou ha Ploudon) degas trubuilhoù – ha danvez tarzh – en ho puhez kalon ! Deoc’h-c’hwi e vo da c’hoari neuze. C’hwi e vo mestr-ez ar jeu. Diouzhoc’h ez aio ho tarempredoù war-raok pe get. Ma vezit evezhiek ha fur e teuoc’h a-benn da seveniñ ho c’hoantoù. Ma vezit emgar ho po keuz. Netra logikoc’h ! Diwallit memestra ma vevit gant unan all. Ne vo ket pardonet kalz a dra deoc’h.

Alies e c’hoarvez deoc’h ober van da chom hep merzout tra ebet. Dreist-holl pa vez jeu en ho koublad. E fin ar bloaz aze e vo disheñvel an traoù. Klask a reoc’h kompren da vat petra a zo kaoz ez eus kudennoù etrezoc’h. Komz a reoc’h eus se didro. Diaes pe boanius e c’hello bezañ. Met talvoudus e vo deoc’h an onestiz-se. Stabiloc’h e vo ho koublad goude se. Ma vezit hoc’h-unan e kavo deoc’h n’eo ket ken dreist-se ! Bezit frealzet, rak ar wezh-mañ ho po tro da gejañ gant un den a cheñcho ho puhez en un doare plijus-tre.

Evit a sell ouzh al labour emañ Yaou, mestr ar chañs, ganeoc’h. Dindan e ren e vioc’h furoc’h. Palioù tizhapl a vo lakaet ganeoc’h. Al Loar du a vroudo ac’hanoc’h da beurlipat ho labour.

Katell Leon

Ar Skorpion: ar Grug.

Deiziataer hollvrezhonek 2007

An deiziataer 2007 zo deuet er-maez ! Kavet e vo er stalioù levrioù breizhek hag e Skol an Emsav, e Roazhon, evel-just. Un doare nevez zo gant deiziataer 2007. Bihanoc'h eo evit mont gwelloc'h er chakodoù hag er seier-dorn. An Deiziataer hollvrezhonek zo ur benveg bepred talvoudus : leun a chomlec'hioù (ouzhpenn 200) hag a ditouroù vo kavet diwar-benn Breizh hag ar brezhoneg, un daolenn kemmadurioù, kodoù-post kumunioù Breizh... 13 euro an tamm.

Skol an Emsav, 25 straed Pierre Martin, 35000 Roazhon:
Pgz: 02 99 38 75 83. sae.bzh@wanadoo.fr.  http://perso.wanadoo.fr/skol.an.emsav.