8 a viz Du 2004, niv. 31

Evit distreiñ d'ar bajenn degemer

	Gounezerien kaol-fleur lakaet diaes
	Ne vez ket gwerzhet a-walc'h gant gounezerien kaol-fleur Breizh, koll zo ganto. Dibunet e oa ur1 500 produer bennak e straedoù Roazhon digwener diwezhañ. Un nebeud dileuridi a oa e Pariz d'ar memes koulz, evit komz gant kargidi eus Ministrerezh al Labour-douar. N'eo ket deuet a-benn dileuridi ar broduerien kaol-fleur da gaout sikourioù digant ar Stad, evit bezañ digollet. Gortoz a ra Ministrerezh al Labour-douar asant Bodad Europa a-raok kinnig skoazelloù. Gounezerien eus Kastell-Paol, Pempoull ha Sant-Maloù a oa dreist-holl e Roazhon. Tremenet e oa an traoù en un doare sioul e Roazhon. E Lannuon koulskoude e oa bet lakaet reuz e burevioù Ti an Tailhoù gant kouerien digwener da noz.

Marv eo Cannelle

Un nebeud deizioù zo e oa bet lazhet gant ur chaseour, Cannelle, an arzhez diwezhañ genidik eus ar Pireneoù. Gwarezet eo al loened-preizh vras diouzh lezennoù Bro-C’hall, Europa hag ar bed (emglev Berne). Rankout a ra ar Stad C’hall eta gwareziñ ha diwall an arzhed er Pireneoù, ar bleizi en Alpoù hag al linsed er Vogez, er Jura hag en Alpoù. Gallout a reer kenvevañ gant ar gouennoù loened-se pa vez ur gwir youl bolitikel : kavet zo bet e Bro-Italia hag e Bro-Spagn an tu da ziwall ar chatal dioute en un doare efedus. Arabat bezañ touellet neuze pa sav pennoù bras ar Stad o mouezhioù a-enep da seurt darvoudoù : aotreet eo bet gant ministr an ekologiezh lazhañ 4 bleiz en Alpoù nevez zo.

Ne vo tu da wareziñ an arzhed, ar bleizi hag al linsed nemet pa vo prest an dud da gompren n’haller ket sujañ ar loened gouez, n’haller ket mestroniañ o emzalc’h hag eo ret asantiñ da se. A-benn ar fin eo an aon rak un natur gouez ha dizalc’h he deus lazhet Cannelle hag an daou vleiz en Alpoù.

Kement ha goût hiroc’h : www.aspas-nature.org.

	Roger Corbeau : poltredoù
	N’eo ket alies e weler poltredoù ken brav hiziv an deiz. Fromet e vez tud zo, simudet reoù all, dirak daoulagad bamet Jean Gabin. Un diskouezadeg poltredoù o tennañ d’ar fiñvskeudennerezh a-hed ar bloavezhioù a vezo e Lannuon etre an 11 a viz Here hag an 29 a viz Du. Un doare beaj eo, kinniget gant un tenner-poltridi hollvrudet, Roger Corbeau e anv. C’hoarierien vrudet a c’hellor gwelet, kement ha bevañ en-dro 50 vloaz a fiñvskeudenniñ. En o-zouez e kavfet Jean Marais, Simone Signoret, Maria Casarès pe c’hoazh Jodie Foster… Tro en deus bet Roger Corbeau da zaremprediñ Pagnol hag etrezo e voe ur vignoniezh dibar ha padus war ar marc’had. Labouret en deus ivez gant Jean Cocteau, Claude Chabrol ha nouspet all. Ouzhpenn da aktourion vrudet int a-benn ar fin, tud vojennel ne lâran ket… Etre an 11 a viz Here hag an 29 a viz Du. Digor bemdez nemet da sul, meurzh ha devezhioù-gouel. 3e-6e30 abardaezh.

Bageal

Setu aet kuit a-benn ar fin redadeg ar Vendée Globe. Ar bloaz mañ eo 20 martolod a lakae penn da greiz, en o zouez 2 blac’h, Anne Liardet hag Karen Liibovici. Met ret eo anzav, diwar an 20 merdeer, n’eus nemet un 10 bennak a c’hell gounit. En o zouez, Mike Golding, Roland Jourdain, Jean ar C’hamm pe c’hoazh Jean-Pierre Dick a seblant kaout ar muiañ a chañsoù da c'hounit. Ar vartoloded a oa aet kuit disul da 1 eur 02 rik en endervezh evit tri miz redadeg tro-dro ar bed. Vincent Riou eo an hini kentañ evit ar mare. Chañs vat dezho !

Mell-droad

13vet devezh R1

Bastia (16vet) 1-1 Roazhon (13vet)

Naoned (9vet) 1–1 Auxerre (3vet)

15vet devezh R2

Gwengamp(20vet) 2-0 Créteil (17vet)

An Oriant (13vet) 1-2 Le Mans (8vet)

Montpelhier (7vet) 1-0 Brest (2vet)

14vet devezh R1

Roazhon (12vet) – Tolosa (10vet)

Lyon (1añ) – Naoned (9vet)

16vet devezh R2

Brest (2vet) – Dijon (12vet)

Gueugnon (4e) – An Oriant (15vet)

Reims (16vet) – Gwengamp (14vet)

Un long dimanche de fiançailles

Frañs - 2004

Seveniñ : Jean-Pierre Jeunet

Da vare ar c’hentañ brezel bed e veze techet ar soudarded d’en em c'hloazañ o-unan gant ar spi e vijent skarzhet deus ar fozioù-difenn. Arvarus e oa en ober avat pa veze kondaonet an darn vrasañ anezho da gastiz ar marv a-benn ar fin. Kement-se a oa c’hoarvezet gant Manech (Gaspard Ulliel) e 1917 : kaset e oa bet d’an “no man’s land” gant pevar faotr all. Ne zegemer ket e vestrez Mathilde (Audrey Tautou) ar soñj-se da wir koulskoude. Ma vije marv Manech e ouije ! Gant feiz ha kalon e kas ar plac’h yaouank hec’h enklask, a-benn adkavout he danvez-pried.

N’haller ket lavaret ne oa ket gortozet film nevez Jean-Pierre Jeunet goude ar berzh en doa graet "Le fabuleux destin d’Amélie Poulain". N’eo ket ken fresk ha tener e film nevez, met tem ar c’hentañ brezel bed a zo kaoz. Meskañ a ra Jeunet ar sukr gant an holen ar wech-mañ ha temzañ a ra ganto un istor (pe istorioù) denel-tre, kinniget gant ur skeudennouriezh dreistampart. A-drugarez da "Amélie Poulain" ez eus deuet un tolpad aktourien a-feson da zerc’hel an eilrolloù, zo kaeroc’h (Clovis Cornillac a ziskouez e varregezh adarre).

Kement ha gouzout muioc'h : http://wwws.warnerbros.fr/movies/unlongdimanche/

The Go ! Team – Thunder, Lightning, Strike

Embannet gant Memphis Industries

Forzh piv a c’hall ober taolioù-arnod. Evit pezh a sell ouzh an disoc’h, n’eus nemet ar re varrekañ a zeu a-benn da gaout un dra nevez pe dereat. The Go! Team a zo deuet a-benn da grouiñ ur seurt sonerezh nevez-flamm, diazezet war an holl zoareoù bet ijinet abaoe un 30 vloaz bennak. Ijinit 'ta : kemerit sonerezh rock trouzus, pop, easy listening, country, hip-hop, an holl anezho sonet gant 6 den (2 blac’h en o zouez) o tont eus Brighton : setu ho peus “Thunder, Lightning, Strike”, da lavaret eo 35 munutenn a sonerezh dibar.

A-benn un nebeud sizhunvezhioù e vo poent ober renta-kont pladennoù rock ar bloaz : anat eo e vo “Thunder, Lightning, Strike” e-touez ar re gentañ.

Kement ha gouzout hiroc'h : www.thegoteam.co.uk.

Kig-moc'h gant avaloù-ananaz

Evit pevar den

Danvez : 400g kig-moc'h (mell-kein pe bruched), ur pezh mell skilbebrenn c'hlas, ur wrizienn jinjebr fresk, ur pimant teod-lapous flastret, 1 voestad vras avaloù-ananaz skejet, un domatezenn vras, 2 loaiad vras a vleud maiz, 2 loaiad vras a win gwenn sec'h, 3 loaiad vras a hilienn soja, 3 loaiad vras a eoul, ur penn-onion skejennet.

Troc'hit ar c'hig-moc'h e diñsoù bihan.

E barzh ur bodez, meskit 1 loaiad vras a vleud maiz gant ar gwin gwenn ha 2 loaiad vras a hilienn soja. Goloit an tammoù kig-moc'h gant ar meskaj-se.

Leuskit anezho da c'hlec'hiañ e-pad ur c'hardeur.

Sec'hit anezho ha lakait an tammoù kig-moc'h da boazhañ en ur baelon gant 2 loaiad vras a eoul. Ur wech poazhet, lakait ar c'hig a-gostez.

Lakait ar skilbebrenn, skejennet e laonennigoù, ur meudad a jinjebr rasklet hag ar penn onion skejennet da boazhañ er baelon, gant an eoul bet implijet dija. Lakait al legumaj da vitoniñ e-pad 10 munutenn.

Ouzhpennit un domatezenn diblusket ha troc'het a dammoù. Leuskit da vitoniñ e-pad 5-8 munutenn.

En ur volenn, meskit ar peurrest eus ar bleud maiz gant an hilienn soja, ar gwinegr ha chug ar voestad avaloù-ananaz. Diskennit war al legumaj, holenit. Ouzhpennit ar pimant flastret ha leuskit da vitoniñ e-pad 5 munutenn. Ouzhpennit ar c'hig-moc'h hag ar skejennoù avaloù-ananaz troc'het a dammoù. Servijit gant riz kreolek.

!! Arabat touchañ ouzh ho taoulagad
goude bezañ touchet ouzh ar pimant !!