11 a viz Here 2004, niv. 27

Evit distreiñ d'ar bajenn degemer

Ur mennad evit Breizh 5 departamant

D'ar Gwener 8 a viz Here e oa bet kinniget ur mennad da Guzul-rannvro Breizh gant ar besprezidant Kristian Guyonvarc'h, diwar-benn adunaniñ departamant al Liger-Atlantel gant ar peurrest eus Breizh. Degemeret eo bet ar mennad gant kannaded Kuzul-rannvro Breizh. Kinnigoù ar mennad a dalvez evit Kuzul-departamant al Liger-Atlantel ha Kuzul-rannvro Broioù-al-Liger.
Kinnig a ra ar mennad da Guzul-rannvro Broioù-al-Liger prederiañ gantañ war an adaozañ melestradurel hag ar c'henlabour etre an div rannvro.
Goulenn a ra ar mennad digant Kuzul-departamant al Liger-Atlantel kregiñ diouzhtu gant ar c'henlabour etrezañ ha Kuzul-rannvro Breizh, war an holl tachennoù, ret pe diret. Goulenn a ra ivez ar mennad digant Kuzul-departamant al Liger-Atlantel rakwelet aozadur ur votadeg pobl diwar-benn adunaniñ ar vro (goude bezañ goulennet ali Kuzul-rannvro Broioù-al-Liger). Kinnig a ra ivez ar mennad krouidigezh ur bodad kenlabour war an unaniezh melestradurel ha kadarnaat ar c'henlabourioù, bodad a vefe boutin da Guzul-departamant al Liger-Atlantel ha Kuzul-rannvro Breizh.

Bravik ez eo bale… met pas re

E koadoù ar Jura hag an Alpoù emañ ar skilgegi o vevañ. Pa vez kriz ar goañv e tebront delioù pin hag e chomont sioul hep fiñval re. Ma vezont direnket e-kerzh seurt prantadoù e nijont kuit hag e tispignont o nerzh ken prizius.
Ma vez ret dezhe nijal kuit meur a wezh e varvont. Neuze, a-benn ar fin, ne vezont ket lazhet gant chaseourien met gant baleerien a blij an natur gouez dezhe hag a ya pell er menezioù da gaout lec’hioù dizarempred ! War torgennoù Breizh emañ ar marc’hvrini o neizhiañ. Ha ne blij ket dezhe bezañ direnket kennebeut. Abaoe m’eo bet digoret da tout an dud an hentoù-aod e vez muioc’h-mui a gantreerien war an aod pezh a laka ar marc’hvrini en arvar. Da skouer e oa tec’het an 8 koublad a veve er C’hab goude ma oa bet digoret un hent-aod eno.
Gallout a reer kompren e plij d’ar valeerien lec’hioù naturel ha didud. Met ma vez c’hoant e chomfent didud justamant eo ret ne vefe den ebet enno ! N’eus nemet dre derc’hel tachennoù gouez ha dizarempredet gant mab-den e vo tu da virout an natur hag al loened a vev enni.

Skilgog (skilgegi) meur : Grand tétras pe Grand Coq de bruyère
Marc’hvran (marc’hvrini) : Grand Corbeau

Arzoù Afrika e Breizh

E Naoned e vo aozet gant al Lieu Unique (15 a viz Here- 9 a viz Genver) un diskouezadeg anvet beautés.afriques@nantes. He fal a zo brudañ pinvidigezh ha buhezegezh arzoù Afrika, brudet eno dre daou zegouezh arz a vremañ : biennale Dakar hag Emgavioù al Luc'hskeudennerezh Afrikan e Bamako.
18 arzour a zo pedet, o tont eus a bep seurt broioù (Aljeria, Benin, Cameroun, Nijeria, Togo, Mali…) hag o kinnig teknikoù liesseurt : kizellañ, livañ, skrivañ, luc'hskeudenniñ, video. Ur sell war ar bed a vremañ, met stag ivez ouzh hengounioù ha temz-spered sevenadurioù an arzourien.
Kement ha gouzout hiroc'h :

www.beautes-afriques.net. Pgz : 02 40 12 14 34.

"Ur c'hevrin eo an den", titl un diskouezadeg a ginnig arzourien afrikan a vremañ e Sant-Brieg, e Gwengamp hag e Langaeg etre an 8 a viz Here betek ar 4 a viz Kerzu.
Kement ha gouzout hiroc'h : 02 96 60 86 10.

Mell-droad

Tro skarzhañ Kib ar Bed 2006 (en Alamagn) a c'hoarier er mizioù-mañ. Eizh strollad a zo bet tennet d’ar sord, en o zouez ar re vrasañ evel Bro-Saoz, an Izelvroioù, Republik Tchekia, pe c’hoazh Portugal ha skipailhoù kalz gwanoc’h evel Sant-Marin pe Andorra. Met, goude tri pe bevar match c’hoariet (hervez ar strolladoù), n'eus deuet skipailh ebet a-benn da gemeret tout ar poentoù (3 foent evit un trec’h, unan evit ur match rampo ha mann evit ur match kollet). Bro-C’hall, da skouer, ne zeu ket a-benn da zibradañ gant pemp poent hepken goude tri match. An trec’h a-enep skipailh Kiprenez zo a-bouez-bras neuze, evito da chom e redadeg ar perzhegañ. Met dija e c’hellomp lavaret emañ skeul-renk ar skipailhoù o cheñch en Europa.

Comme une image

Frañs - 2004
Seveniñ : Agnès Jaoui
Priz ar senario gwellañ da Agnès Jaoui ha Jean-Pierre Bacri – Festival Cannes 2004

Start eo ar vuhez gant Lolita (Marilou Berry) : bec’h a zo warni gant brud mougus he zad (Jean-Pierre Bacri), e ziouer a evezh outi, hag ur c’horf a gav dezhi re zisheñvel diouzh re merc’hed ar c’hazetennoù. Klask a ra kavout ur c’hempouez dre ar c’han avat.
Ha kempouezet mat eo oberenn Agnès Jaoui. O vezañ anavezet ar filmoù bet savet (pe kensavet) gant ar c’houblad Bacri-Jaoui e c’hortozer tudennoù kizellet pizh ha gwirheñvel-tre o zemz-spered. Kavout er film-mañ ar pezh emeur o c’hortoz hepken a vefe dipitus avat… Ha den ebet na vo dipitet gant "Comme une image" da'm meno.

Eternal sunshine of the spotless mind

Stadoù-Unanet - 2003
Seveniñ : Michel Gondry

Ha c’hoarvezet eo deoc’h c’hoazh bezañ diskaret ho kalon gant dibenn un istor karantez ? Ha c’hoarvezet eo deoc’h d’ar mare-se kaout c’hoant e vefe gwalc’het hoc’h empenn ha skarzhet ho koun eus an afer-se ? Kement-se a ra Joel (Jim Carrey) ha Clementine (Kate Winslet) e gwirionez gant sikour an embregerezh Lacuna inc.
Setu eil film Michel Gondry a ya da heul “Human Nature” (2001), ha ken dic’hortoz ha flamm e spered eo “Eternal sunshine”. Disheñvel mat eo danvez ar gomedienn dramaek-mañ a bled kentoc’h gant talvoudegezh santimantoù mab-den.
Winslet ha Carey (diardoù evel ma vez en e filmoù gwellañ) a gas buhez ha from d’ar redadenn dizesper-mañ. Daoust hag-eñ e c’hall an nen bezañ distrujet e eñvorioù ha chom hep bezañ distrujet e-unan ? Eno emañ an dalc’h.

Kement ha gouzout muioc'h :
http://www.eternalsunshine.com/
http://www.uipfrance.com/sites/eternalsunshine/

Fest-deiz, Fest-noz, evit 10 vloaz Dalc’h soñj

Disadorn e vo lidet 10 vloaz Dalc’h soñj e Pleskop. Ur fest-deiz hag ur fest-noz bras evit enoriñ al labour krouiñ bet graet gant ar strollad ganet e stumm un daouad boest an diaoul-bombard. Met buan eo bet pinvidikaet Dalc’h soñj gant ar c’han, an dreujenn-gaol, ar saksell, ar biniou hag ar gitar. Awenet don gant sonerezh Bro Wened, ar c’han hengounel ’vez kempennet ivez gant sonennoù a vremañ : peadra da c’hoari er festoù-noz evel-just met ivez e sonadegoù ha war leurennigoù tost. War o hent o deus ar vuzisianed gounezet priz kentañ ar strolladoù e kenstrivadeg Kan ar bobl ha pedet arzourien da zegas a bep seurt arlivioù d’ar sonerezh aozet ganto. Hag etre meur a dro en Italia o deus enrollet ar bladenn Lusk ar Galon. Ur pemzek bennak a strolladoù hag a goubladoù a gemero perzh er gouel : tro a vo da glevet Yudal Combo ha Rhadouff Brothers ha dañsal gant Loeroù Ruz, Korriganed pe c’hoazh Skolvan.

Adalek 17e e Pleskop d’ar sadorn 16 a viz Here

Blev !

"I’d reather go naked than wear fur" : mont a rin en noazh kentoc’h eget gwiskañ feur ! 10 vloaz zo e c’helled gwelet ur strollad modeled a-dreñv ur giton, ar gerioù-mañ skrivet ledan outañ. Cheñchet eo ar jeu abaoe. Splann eo eo distro giz ar feur war al leurennoù, gwisket gant ar re a nac’he en ober gwezhall, Naomi Campbell en o zouez. An holl grouerien-mod a vremañ pe dost o deus dibabet ober gant an danvez-se. Hini gwir. C’hoari a reont kalz gant meskañ danvez ha feur, a douchennoù bihan : e beg divrec’h ur vantell, evit kinklañ botoù pe ur sac’h. An danvez a vez labouret en ur mod disheñvel. Kavout a reer pezhioù bet azlivet pe brodet evit pinvidikaat o neuz. Evel-just eo bet adtapet an doareoù-se gant ar stalioù bras. Gallout a reer kavout pezhioù marc’hadmat gant feur faos. Daoust d’ar muiañ-niver gwiskañ feur faos eo adsavet ar prederiadennoù a denn da genwerzh krec’hin al loened gouez. Ha kemend-all a zo evit pezh a denn da zoareoù desevel al loened a vez implijet evit krouiñ an dilhad luks. Tud zo a zifenn kenwerzh ar feur, a welont evel un doare-bevañ evit poblañsoù zo, an Inuited da skouer. Tud all evel Stella Mac Cartney a zo a-enep implijout danvezioù a seurt-se. Testez eo war lec’hienn ar PETA, ar re oa doa krouet an taol-brudañ "mont a rin en noazh kentoc’h eget gwiskañ feur !"

Kement ha gouzout hiroc’h :
Re a-enep ar c’henwerzh  http://www.peta.org pe http://www.furisdead.com
Re a zifenn un ali disheñvel http://www.brok.be/recht06_fr.html