27 a viz Gwengolo 2004, niv. 25

Evit distreiñ d'ar bajenn degemer

Tremen-hent e kembraeg

Adalek ar bloaz a zeu e vo tu da welet kembraeg war paseporzhioù Breizh-Veur.
Embannet eo bet ar c'heloù gant Alan Pugh, ar ministr e karg eus ar c'hembraeg e gouarnamant emren Kembre. Adalek dibenn 2005 e vo menegoù e kembraeg war ar paseporzhioù, e-kichen ar re e saozneg hag ar re e galleg. Dont a ra an diviz-se da-heul kaozeadennoù zo bet etre gouarnamant emren Kembre ha ministrerezh an Diabarzh e Londrez. Ne ouzer ket c'hoazh peseurt menegoù a vo troet e kembraeg na penaos e vint kinniget, met sur eo e vo kembraeg war ar bajenn gentañ. Pouezus eo, eme ar ministr Alan Pugh, e vefe implijet ar c'hembraeg war ar paperioù ofisiel zo gant an dud, evit diskouez dezho ez eo kevatal an div yezh zo e Kembre.

Yec’hed mat d’an holl,
Ni zo ‘vont da goll

Krog eo ar gouarnamant da stourm ouzh ar c’hrign-bev ha troet eo an holl strivoù war-zu ar prederiañ hag an diguzhat. E-giz gant surentez an hentoù n’eus anv gante nemet eus kiriegezh an hiniennoù : ar butun hag an alkol a vefe pennkaozioù d’ar c’hrign-bev d’o soñj. Koulskoude e krog un nebeud tud da sevel o mouezh a-enep d’ur sell ken simpl war an traoù : da soñj ar mezeg war ar c’hrign-bev Dominique Belpomme ha d’e genseurted e penn "Galv Pariz", eo pennkaoz d’ar c’hignoù-bev ar c’hudennoù stag ouzh an endro. Daoust ma'z a an diguzhat hag ar prederiañ war efedusaat ez a an niver a glañvidi war greskiñ : deut eo ar c’hrignoù-bev da drede kaoz da varv ar re yaouank dindan ugent vloaz.
An traoù a zo kiriek da gement-se zo gwall anavezet : an danvezioù saotrañ kimiek a bep seurt. Ouzhpenn degas krign-bev a reont. War a seblant e vefent kaoz ez eus muioc’h-mui a vugale tapet gant ar berranal hag an alergiezhioù. Bevañ a raio ho pugale ken pell ha c’hwi ? N’eo ket sur...

Kement ha goût hiroc’h diwar-benn Galv Pariz : http://appel.artac.info/

prederiañ : thérapie(s)
diguzhat : dépistage
danvez saotrañ kimiek : polluant chimique

Oberenn Loeiz Bloñs digor d’an holl

A-benn bloaz e vo kinniget oberenn Loeiz Bloñs d’ar Vretoned. Aet e oa da Anaon en diskar-amzer tremenet, goude bezañ bet o luc’hskeudenniñ a bep seurt darvoudoù e Breizh e-pad 30 vloaz. E-kerzh un abadenn en enor d’an arzour e miz Genver en doa embannet Pierre Maille, maer kozh Brest, e youl da welet oberenn Loeiz Bloñs da chom unvan hag er vro. Miliadoù a fotoioù (diapoioù, luc’hskeudennoù war baper ha filmoù) zo bet adprenet gant an ti-kêr eta evit kinnig anezho d’an holl hag enoriñ labour an den. Abaoe 6 miz emañ neuze
servij an dielloù o renabliñ an oberenn ramzel. Ur bloaz labour a vo ret c’hoazh a-raok dizoleiñ sell an arzour war darvoudoù ha tudennoù zo bet o kemer perzh en istor Breizh a vremañ. Tri danvez tost da galon al luc’hskeudenner a vo kinniget er CRBC hag en dielloù-kêr : manifestadegoù ha darvoudoù Breizh, kêr Vrest ha buhez ar blasenn Guerin, hag ur rummad poltredoù eus ar strollad c’hoariva Ar Vro Bagan.

C’hoarioù paralimpek

Abaoe un nebeud bloavezhioù, war-lerc’h ar C’hoarioù Olimpek "reizh", e vez tu da welet ar C’hoarioù Paralimpek. Perzh dibar ar C’hoarioù-se eo an atletourien zo mac’hagnet pe dall, pe seizet un tamm eus o c’horf.
Evel-just, ma n’eo ket heñvel ar c'hurioù, ne cheñch netra da vravder ar sport, kement a c’hoant dont a-benn zo gant ar sportourien-se ha ken fromus e vez ivez a-wechoù evit an arvesterien. Aze e vez komprenet perak e vez lavaret "kemer perzh eo ar pouezusañ"… Ha dont a ra Frañs mat a-benn evit ar mare gant ur 7vet plas e-keñver an niver a vedalennoù (25/09), meur a hini anezho en aour. Dimeurzh ez echuo ar C’hoarioù Paralimpek-se en Aten, met ar re a zeu zo gortozet dija. Gant ma c’hellfent bezañ gwelet war ar skinwel evit lakaat an dud da zizoleiñ un doare all d’ober sport…

Mell-droad

8vet devezh (R1)/ 10vet devezh (R2)
Niça (16vet) 2-0 Roazhon (9vet)
Naoned (15vet) – Lens (10vet)

Gwengamp (18vet) 3-2 Nancy (2vet)
An Havr-Nevez (11vet) 0–0 Brest (1añ)
Niort (16vet) 4-0 An Oriant (12vet)

9vet devezh (R1) / 11vet devezh (R2)
Strassburg (20vet) – Naoned (17vet)
Roazhon (10vet) – Lille (2vet)

Brest (1añ) – Grenoble (2vet)
An Oriant (13vet) – Amiens (4e)
Laval (14vet) – Gwengamp (11vet)

The terminal

Stadoù-Unanet (2004)
Seveniñ : Steven Spielberg

Da weladenniñ New York e oa deut Viktor Navorski (Tom Hanks) eus Krakozhia er reter pellañ. Siwazh dezhañ e voe diskaret e vammvro gant un taol-reveulzi e-ser ma oa an den oc’h en em gavout en aerborzh JFK.
N'hall ket ar paotr bezañ degemeret er Stadoù-Unanet keit ha n’eus paseporzh ebet gantañ hag a vefe anavezet gant ur stad bennak. Tapet en ur skoilh eus ar sistem n’hall ket Viktor mont er-maez eus tachad etrebroadel an aerborzh. Gortoz pell, gortoz gwell.
Danvez un istor a feson a oa aze gant ma vefe bet dibunet drocherezhioù mont en-dro stad Bush da-heul an "11 a viz Gwengolo". Siwazh, kentoc’h eget goapaat ur velestradurezh kafkaian e klask ar film adkavout spered fentc’hoarioù karantez a veze savet er bloavezhioù 50 er Stadoù-Unanet. Anat eo n’eo ket deut a-benn Spielberg da dizhout ar pal-mañ. Perzhioù mat a zo e The terminal memes tra ; met ur film jentil eo, netra ken.

Kement ha gouzout muioc'h : http://www.theterminal-themovie.com/

Two Lone Swordsmen : From The Double Gone Chapel

A-dreñv an anv-se e kaver Keith Tenniswood hag Andrew Weatherall. An eil a zo brudet-mat evit bezañ mesket ar rock hag ar sonerezh elektronek e penn kentañ ar bloavezhioù 1990. Sonerezh Two Lone Swordsmen a blijo d’an holl dud a selaou ar sonerezh post-punk saoz ijinet e penn kentañ ar bloavezhioù 1980 : gant "From The Double Gone Chapel" e adkaver aergelc’h pladennoù Joy Divison, Gang of Four pe Wire. Da lavaret eo : gitar boud kreñv, sonioù yen, lusk iskis dalc’het gant ar gitar, ha pep tra produet gant teknikoù a vremañ. Sed aze doare Two Lone Swordsmen. Adkemer a reont ivez Sex Beat, un ton bet savet gant Gun Club.

Embannet gant Warp/Pias

Tajin kig-yar

4 den : 10 mun. / 1e15.
Danvezioù : 1 penn-yar troc'het a dammoù, 3 fenn-sitroñs koñfizet en holen, 2 zornad olivez glas, 2 benn-onion, 2 loaiad vihan a baprika, 1 loaiad vihan a gurkuma, 3 loaiad vras a goriandrez kizellet, eoul, holen ha pebr.

Skejennit ar pennoù-onion ha troc'hit ar pennoù-sitroñs etre pevar c'hard.
Lakait an tammoù onion hag an temzoù da rouzañ asambles gant ur bannig eoul en ur gokelenn.
Ouzhpennit an tammoù kig-yar, an olivez hag ar palefarzhioù sitroñs koñfizet.
Pebrit, holenit ha glebit gant ur werennad dour. Laoskit da boazhañ war an tan bihan e-pad 1e15.
A-raok servijout, lakait ar c'hig en ur plad-forn pe en ur plad-tajin ha laoskit anezhañ da veleniñ dindan grilh ar forn e-pad 5 mn. Servijit tomm gant semoul.