5 a viz Ebrel 2004, niv. 7

Petra oa keleier Bremaik bloaz zo? Klikit amañ!
Evit distreiñ d'ar bajenn degemer

 

 

 

 

 

 

 

 

 

 

 

 

A-stroll : emgav yaouankizoù Breizh

 

 

Karaez, 8-11 a viz Ebrel

"Breizh : skeudenn ha kehentiñ" setu tem ar pevar devezh divizoù kinniget gant Kuzul Sevenadurel Breizh ar bloaz-mañ e Ti-Degemer Kerampuilh e Karaez. Piv a sav ar skeudenn o deus an dud eus Breizh ? Penaos implijout ar skeudenn-se goude-se en armerzh pe er sevenadur ? Pedet ez eus bet leun a obererien evit kejañ gant  re yaouank ar vro diwar-benn-se. Renerien festivalioù, kazetennoù, radioioù pe skinwelioù eus ar vro, tud e-karg eus an douristelezh, sokiologourien, renerien stalioù a ra un implij eus personelezh Breizh... Peadra da voueta speredoù Bretoned yaouank etre 18 ha 30 vloaz.
55 euro evit ar pevar devezh (bod ha boued).

Kement ha gouzout hiroc'h : www.kuzul.org pe 02 99 87 17 65

 

 

 

 

 

 

 

 

Sapre lastez !

 

 

Produet e vez gant pep hini ac'hanomp 434 kg/bloaz a lastez dre vras, an
hanter anezhe pakadurioù Alies-mat e vez devet an dilerc'hiadoù-se, ar pezh a brodu dioksin. Ha padal ez eus tu da dalvoudekaat an dilerc'hiadoù :  ar gwer, an aluminiom hag an dir a c'heller teuziñ en-dro nouspet gwezh. Gallout a reer adaozañ ar paper hag ar c'hartoñs. Treuzfurmet e vez ar plastik e danvezioù disheñvel-mik. Kompost a c'heller ober gant an danvez organek ( lastez eus ar gegin hag eus ar jardin). Tout an traoù-se a espern danvezioù kentañ hag an energiezh evit treuzfurmiñ anezhe. Pezh zo, evit talvoudekaat an holl lastez-se eo ret dibab hon dilerc'hiadoù. Ma ne vez ket graet ganimp er gêr, n'eus ket tu d'ober un dastum diuzel war-lerc'h. Koulskoude e vefe gwelloc'h c'hoazh produiñ nebeutoc'h a zilerc'hiadoù : klaskit prenañ produioù gant nebeut a bakadurioù tro-dro dezhe ha bevezit nebeutoc'h a broduioù da vezañ taolet kuit.


Kement ha gouzout hiroc'h : www.ecoemballages.fr

 

 

 

 

 

 

 

 

City Views gant Martin Krenn

 

 

La Passerelle - Brest
26 / 03 - 24 / 04 / 2004
Mediaoueg Pontanezen
2 / 04 - 24 / 04 / 2004
Kreiz-kêr Brest
5 / 04 - 18 / 04 / 2004

Martin Krenn, arzour a vro Aostria en deus labouret get tud karter Pontanezen e Brest evit sevel un diskouezadeg a zo City Views hec'h anv. Tro tem an "divroidi" emañ an diskouezadegoù lusc'hskeudennoù-mañ. E Vienna, Varsovia, Ljubljana, Helsinborg, Graz, Newcastle ha Brussels eh eus bet savet ur raktres "City Views" ivez. Mennozh diazez ar raktres-mañ a zo prederiañ a-zivout buhez an divroidi en Europa, an doare d'o degemer hag a-ziàr an daremprediñ etre tud a zo disheñvel o sevenadur.

Kement ha gouzout hiroc'h : www.passerelle.infini.fr ha www.cityviews.net

 

 

 

 

 

 

 

 

Bageal

 

 

Start eo evit Olivier a Gersaozon er mare-mañ. Ar skiper breizhat, hag a zo o klask tapout rekord Tro ar Bed (Arouez-trec'h Jules Vernes), a zo oc'h en em gannañ a-enep ar mor e Su ar Meurvor Habask. Ma seblant ar vag derc'hel mat, an dud a hañval bezañ un tamm digalonekaet. "War-lerc'h 8 Tro ar Bed ne'm eus morse gwelet ur mor a seurt-se" eme ar Breizhad e-pad ar gaozeadenn dre radio "ha ma'm bije dija bevet se ne vijen ket aet kuit en-dro". Peadra d'en em rentañ kont eus kreñvder ar mor. "Dav deomp mont kuit buan". Buan ez ez a c'hoazh skipailh Kersaozon koulskoude gant daou zevezh lañs war an taol dreist a oa bet graet gant Peyron. Avel vat dezho eta.


Mell-droad

 


31añ devezh

Lille (11vet) 1-0 Roazhon (12vet)
PSG (3vet) 3-2 Naoned (7vet)
Gwengamp (15vet)2 -2 Auxerre (5vet)

Rouen (20vet) 0-1 An Oriant (6vet)

Brest (3vet) 1-0 Tours FC (13vet)

32vet devezh

Naoned (7vet) - Bastia (13vet)
Sochaux (4vet) - Gwengamp (15vet)
Roazhon (12vet) - Bourdel (10vet)

An Oriant (6vet) - Clermont Foot (13vet)

Dijon (3vet) - Brest (2vet)

 

 

 

 

 

 

 

 

"La vie comme elle va"

 

 

Frañs, 2003
Seveniñ : Jean-Henri Meunier

E Najac eo bet graet ar film-se. Ur gumun eus Okitania eo, en Aveyron, get 1400 annezad. Un den 50 vloaz a Bariz, Jean-Henri Meunier, zo aet da chom du-se 10 vloaz zo. Kavet en doa brav al lec'h ha kroget da filmañ an dud a zo é chom du-hont. Ur vamm-gozh, ouzhpenn da 100 vloaz, a vez berped é kanañ an "Etrebroadel". Un intañv kozh, a vez berped é kempenn un "daou jao", pe é sevel ur viñsaskell, ur poull-neuial... an aotroù maer a son saksofon evit ar re gozh, hag all.
Un diell eo ar film met n'eo ket pal Jean-Henri Meunier diskouez razh an traoù. Gwelet ha santout ul lusk kentoc'h. Buhez tud Najac, o deus amzer da bourmen, d´en em gavout d'ober bourrapl... Evel ur stêr sioul. An dra-se eo e gwirionez : "Amzer zo, get ma pado !"

 

 

 

 

 

 

 

 

Audio Bullys - Ego War

 

 

Embannet gant Source

Setu ur strollad nevez-flamm a zo deuet a-benn da gendrec'hiñ an holl gant e bladenn gentañ, ar pezh a zo ral a-walc'h er mare-mañ. Burutellerien kelaouennoù evel Les Inrockuptibles pe c'hoazh Technikart o deus lakaet ar bladenn-se e-touez ar re wellañ  bet embannet e 2003. Dav eo anzav e oar paotred Audio Bullys sevel tonioù ken plijus ken ur wech selaouet eo dibosupl disoñjal anezho. Selaouit ouzh 'The Snow' hag ho po c'hoant diblas an arrebeuri ha kregiñ da zañsal e-kreiz ho saloñs. Lakait 'Real Life' hag e vo evel ma vefec'h o vleniañ e bannlevioù Manchester. Forzh peseurt ton a vefe ho po c'hoant da fiñval. Kenkoulz profitañ !

Kement ha gouzout hiroc'h : www.audiobullys.co.uk

 

 

 

 

 

 

 

 

Tartezennoù chokolad gant temz Espeletta

 

 

Danvez : un toaz 'greunennek', 200 gram a chokolad (70% a gakao),  25 kantilitrad a zienn, ½ loaiad bihan a demz Espeletta.

Raktommit ar forn (180°). Dispakit an toaz e pevar moull-tartezenn, pikit gant ur fourchetez. Goloit gant ur follennad paper-poazhañ, ha lakait un dornad legumaj sec'h warni da zerc'hel ar paper. Lakait da boazhañ e-pad 15 mn. Lakait an dienn hag an temz en ur gastelodenn, lakait da virviñ. Er-maez eus an tan, ouzhpennit ar chokolad troc'het a dammoù bihan ha meskit mat.
Laoskit da glouaraat, ouzhpennit neuze ar vioù ho po baset gant ur fourchetez. Bannit war an toazoù. Lakait da boazañ e-pad 20 mn. Leuskit da glouaraat a-raok tennañ an tartezennoù diouzh o moull.