29 a viz Meurzh 2004, niv. 6

	Cheñch tu gant Kuzul-rannvro Breizh
	Adalek dec'h da noz, 8 eur, e oa bet embannet e oa tost da holl rannvroioù Frañs o vezañ gounezet gant ar gostezenn gleiz. N'eo ket bet disheñvel an traoù e Rannvro Breizh, 58,8 % eus ar mouezhioù zo aet gant listenn Jean-Yves an Drian (PS-PC-PRG-Ar Re C'hlas-UDB). Rankout a ra Josselin de Rohan (UMP-UDF) kuitaat renerezh ar C'huzul-rannvro gant 41,2 % eus ar mouezhioù. Ar rannvro lec'h m'emañ al Liger-Atlantel zo bet kollet ivez gant François Fillon, ministr an Aferioù Sokial koulskoude. An dilennadegoù kanton o deus lakaet 4 departamant breton diwar 5 da vezañ renet gant an tu kleiz. N'eus nemet departamant ar Mor-Bihan a vefe bet miret gant ar gostezenn zehou.

	Prizius eo an dour, espernomp anezhañ
	Spontus eo kalite an dourioù e Breizh ken ez eo : emañ ar stêrioù hag ar gwazhioù-dour o vervel ken leun int a nitratoù hag broduioù chimik a bep seurt, aliesoc’h-aliesañ e vez lanvioù glas war an aod. A-benn ma vo dour a galite diwar ar c’hog eo ret postañ muioc’h-mui a arc’hant e-barzh louzaouiñ anezhañ, pezh ne zegas gounid nemet da embregerezhioù etrebroadel an dour. Petra zo moaien d’ober evit dispign nebeutoc’h a arc’hant a-benn kaout dour mat da evañ ? Espern an dour a c’heller ober. Beveziñ a reer e-tro 300 litrad dour an deiz dre benn ha n’eo ket start digreskiñ ar c’hementad-se. Da skouer e c’heller ober ur strinkadenn e-lec’h ur gibelladenn (eus 3 betek 8 gwezh nebeutoc’h a zour dispignet), chom hep lezel an dour da redek pa vezer o vroustañ e zent, staliañ ur skarzh-dour daou-dizh, stankañ an dar pa vezer o skaotañ al listri ha kement zo… Ma vezomp holl war evezh e c’hellomp beveziñ nebeutoc’h a zour ha neuze digreskiñ koust al louzaouiñ anezhañ. Dour ha stêrioù e Breizh : http://assoc.wanadoo.fr/erb/

	Rémi Blanchard
	Mirdi an Arzoù Kaer Kemper ag ar 24 a viz Meurzh d'an 31 a viz Mae 2004 Pep hini en deus soñj ag ar grafitioù kentañ a zo bet livet doc'h murioù ar c'hêrioù, an trenoù... pep hini en deus soñj ag ar pladennoù vinil 33 zro, get o goloenn lan a faltazi... Diàr an arz pobl-mañ zo ganet un emsav livourion yaouank er blezadoù 80 a zo bet Combas an hini brudetañ anezhe. Ar re-mañ eus emsav ar skeudennaouiñ libr (figuration libre) a zo un tamm laosket a-gostez d'ar mare-mañ. E-touez al livourion-mañ e oa Remi Blanchard a zo bet berr e vuhez siwazh. Ganet eo bet e 1958 e Naoned ha marv e Pariz e 1993. Laosket en deus oberennoù birvidik, lan a vegon a zo enoret mat e diskouezadeg Kemper.

Rugby

Echuet eo bet tournamant ar 6 broad en dibenn-sizhun-mañ. Bro-C'hall, evit an 8vet gwech eus he istor, zo deuet a-benn d'ober ar "chelem bras". Goude un heuliad matchoù difazi ez eo bet trec'h ar c'hilhog gall war 15 c'hoarier ar rozenn eus Bro-Saoz disadorn paseet (24-21). Koulskoude, e selle tout an dud ouzh Bro-Saoz evel an hini a oa da c'hounit goude o flas kentañ e kampionad ar bed un nebeud mizioù zo. War-lerc'h bezañ kollet ur wech kentañ a-enep Iwerzhon (13-19), o chañsoù a oa deuet da vezañ bihanoc'h en un taol. Er c'hontrol, Bro-C'hall gant kement a grogadoù gounezet hag a vatchoù c'hoariet he deus diskouezet d'an holl e oa ret kontañ ganti bremañ.
Renkadur : 1. Bro-C'hall : 10 poent ; 2. Iwerzhon : 8 poent ; 3. Bro-Saoz : 6 poent ; 4. Kembre : 4 foent ; 5. Italia : 2 boent ; 6. Bro-Skos.

Mell-droad

30vet devezh

Gwengamp (17vet) 2-1 Lille (10vet)
Naoned (8vet) 3-2 Montpelhier (19vet)
Strassburg (14vet) 0-3 Roazhon (12vet)

An Oriant (5vet) 2-3 Caen (3vet)

Wasquehal (14vet) 0-1 Brest (4vet)

31vet devezh

Lille (10vet) – Roazhon (12vet)
PSG (3vet) – Naoned (6vet)
Gwengamp (15vet) – Auxerre (5vet)

Rouen (20vet) – An Oriant (5vet)

Brest (3vet) – Tours FC (13vet)

	Hentoù treuz (Chemins de traverse)
	Bro Frañs (2004) Seveniñ : Manuel Poirier Aet eo un tammig a-dreuz buhez Victor (Sergi Lopez). Kas a ra e vab Félix (Kevin Miranda) gantañ war hentoù Breizh diouzh emdroadur e istorioù karantez hag e ziaesterioù micherel. Lakaet en deus Manuel Poirier ul lusk ispisial e-barzh e film. Krediñ a ra mont goustad ganti ha lezel bommoù digomz a skeudenn mat tre an darempredoù etre ur c'hrennard hag e dad kizidik e galon (Sergi Lopez a fonnusa ar film dre e c'hoari). Un tem denel kenañ zo amañ, ha setu boaz Manuel Poirier. Un dra all a chom da venegiñ eo ar fed ral a-walc'h ez eus bet moullet skritelloù gant an titl e brezhoneg evit ar film-mañ.

	"Un darvoud dister"
	Penaos e vehe ar vuhez mard e kouezhehe ur vombezenn nukleel war gourenez Kiberen ? Youll Hetilan en deus skrivet un istoer berr àr an tem se. An den a gomz a zo é chom e karter Kerwenaneg, en Oriant. Ne c’hell ket mont er-maez, peogwir emañ difennet get ar polis hag an arme... “Un darvoud dister” zo un danevell divyezhek skrivet e brezhoneg e penn kentañ ha troet e galleg get an oberour. Embannet eo bet get “Oranges nouvelles”, 27 allée des Acacias, 56850 Kaodan. Koustañ a ra daou euro mui ar frejoù post.

	Ar c’hoarezed Olsen
	Ha soñj hoc’h eus eus an abadenn Ar fest er gêr ? Enni e c’hoarie ur plac’hig rol Michelle. Gevellezed en c’hoarie e gwirionez : Ashley ha Mary-Kate Olsen. Aet eo ar re-se war goshaat, ha ma kendalc’hont da gas o micher aktorezed o deus roet lañs ivez d’ul linenn dilhad klok : dilhad-dindan, dilhad-sport, botoù, seier, togoù, produioù kened. Pep tra a vez kinniget d’ar c’hrennardezed diwar stil an div c’hoar. En Time, en un enklask diwar-benn galloud ar merc’hed e bed ar c’hiz, e teuont d’ar pevare plas (goude Rose-Marie Bravo, renerez Burberry, Miuccu Prada, hag Anna Wintour, renerez Vogue) aloubet ganto marc’had ar c’hrennardezed. Hag int hag a dapo 18 vloaz e miz Even, a zo pep a 150 million $ o c’hortoz anezho evit o deiz-ha-bloaz… Kement ha gouzout hiroc'h : www.marykateandashley.com/