Lun 15 a viz Genver, niv.128
Sizhun 3 - 2007

Pellgargit ar pennadoù e stumm Word

Petra oa keleier Bremaik warlene? Klikit amañ!
Evit distreiñ d'ar bajenn degemer

Ur prezidant nevez e penn Ecuador

Hiziv en deus Rafael Correa (e-kreiz war ar skeudenn) kemeret e garg a brezidant e Republik Ecuador. 43 bloaz eo an den, un armerzhour bet stummet en Europa hag er Stadoù-Unanet. En em disklêriañ a ra Rafael Correa eus ar gostezenn gleizour suamerikan a glask en em zizober eus levezon ar Stadoù-Unanet. Pedet e oa bet neuze prezidanted sokialourien Suamerika da g-Quito hiziv: Hugo Chavez (Venezuela, a-gleiz war ar skeudenn), Evo Morales (Bolivia, a-zehou war ar skeudenn), Michelle Bachelet (Chile), Luiz Inacio Lula da Silva (Brazil) ha Daniel Ortega (Nicaragua). Eno e oa bet ivez prezidant Iran, Mahmoud Ahmadinejad, zo o klask harp Stadoù zo e Suamerika.

Start e vo an traoù evit Rafael Correa: prezidant ebet n'en deus gellet mont betek penn e brantad ren a bevar bloaz en e vro. Correa zo neuze an eizhvet prezidant ekouadorad e dek vloaz. C'hoant en deus kemm Bonreizh ar vro a-benn stabilaat ar renad politikel, met rankout a raio enebiñ ouzh ar Parlamant, lec'h m'eo kreñv ar gostezenn dehou.

D'ar 1^añ a viz C'hwevrer:

gouleier lazhet evit ar vrasañ oberenn a-enep da gresk ar wrez

An "unvaniezh evit ar blanedenn" (ur strollad kevredigezhioù evit an endro) a c'halv an dud da lazhañ o gouleier hag ar binviji a ra gant tredan, e-pad pemp munutenn, etre 7e55 hag 8e noz, d'ar c'hentañ a viz C'hwevrer 2007.
Ar pal n'eo ket kement-se espern pemp munutenn tredan an devezh-se, met lakaat an dud (keodedourien, mediaoù, ha divizourien) da deurel evezh ouzh ar foraniñ tredan, hag adlavarout pegen mallus eo ober un dra bennak buan.
Ne c'houlenn ket kalz amzer, ne goust netra, ha diskouez a raio d'ar re en em ginnig evit bezañ prezidant e rank afer ar c'hresk gwrez bezañ unan eus danvezioù pennañ an tabutoù evit an dilennadegoù da zont.
D'ar c'hentañ a viz C'hwevrer e vo embannet un danevell diwar-benn an danvez-mañ gant skiantourien a labour evit ar Broadoù Unanet. Dre ma vo embannet e Frañs eo arabat deomp c'hwitout un digarez evel-se da reiñ da c'houzout d’ar bed a-bezh pegen mallus eo ar goulennoù-mañ.

M.M.

Muioc'h a ditouroù amañ:

http://www.amisdelaterre.org/Participez-a-la-plus-grande.html

Dañvad ramzel Marc Morvan douaret e Kemper

D’ar 6 a viz Genver ’z eus bet ur c’hant bennak a dud deuet da lâret kenavo d’an dañvad bras savet gant Marc Morvan. An delwenn e dir zo bet douaret en un doare arouezel war leurgêr C’hoariva Kerne. Ar "c’hizeller-barzh-pesketour", boas da ginnig e loened dir e korn an hentoù, en deus lennet e skridoù da zisplegañ e santimantoù, etre kounnar ha tristidigezh. Loen divent an arzour a oa bet berzet gant servijoù ti-kêr Gemper e-kreiz miz Kerzu. Dirak un nebeud loened kizellet all, staliet tro-dro d’an dañvad ramzel, ’z eus bet degaset da soñj e oa bet bet rakjedet lakaat an dañvad da bourmen e straedoù kêr-benn Bro-Gerne e-kerzh ar gouel "Très tot théâtre". Ar pezh a oa bet nac’het, o tisplegañ e oa ur gudenn surentez. "Souezhet bras e oamp bet o welet an ti-kêr o nac’h ur seurt raktres" eme rener ar gevredigezh c’hoariva, Bernard Le Noac’h. "N’omp ket bet evit kompren an abegoù, pa vez gwelet seurt raktresoù arzel aozet e pep lec’h. Nac’h hor raktres a oa ober tud ac’hanomp n’int ket kiriek! Dipitet-bras omp, dreist-holl pa soñjer en niver a eurvezhioù labour zo bet ret evit mont betek penn al labour-mañ!"

Met evel-just n’eo ket echu da vat buhez an dañvad peogwir e vo degemeret adalek an 18 a viz Kerzu e Mousterlin e-lec’h ma vo krouet ur raktres arzoù a vremañ. Ur sinadeg a zo bet lakaet enlinenn evit an dañvad asambles gant ar barzhoneg en deus savet Marc Morvan evit kontañ istor degemer an delwenn e Kemper: http://marc.morvan.quimper.free.fr.

H.L.

Snowboardcross: Xavier de Le Rue kampion ar Bed

Dec'h e oa bet aozet Kampionad Snowboardcross ar Bed en Arosa (Alpoù Suis). An eil tro eo da Xavier de Le Rue bezañ kampion ar bed e Snowboardcross. E 2003 e Kreischberg (Aostria) e oa ar wech kentañ. En taol-mañ eo bet trec'h el lodenn diwezhañ dirak an norzamerikan Seth Wescott, ur c’hampion olimpek. Xavier de Le Rue, 27 vloaz, en deus gounezet dre deir gwech Kib Snowboardcross ar Bed, e 2003, 2004 ha 2005, met c'hwitet en doa c'hoarioù Olimpek Turin warlene (18vet e oa bet). Un afer familh eo ar snowboardcross, p'emañ Xavier er plas kentañ, e kaver e vreur Paul-Henri de le Rue er pempvet plas.

Kampionez ar bed eo Lindsey Jacobellis, eus Stadoù-Unanet Amerika, hag a oa bet kampionez e 2005 ha beskampionez olimpek warlene.

Arthur et les Minimoys

Frañs - 2006

Seveniñ : Luc Besson

Arthur a zo ur paotrig dek vloaz dilezet gant e dud. O chom e ti e vamm-gozh emañ ha houmañ a gont ur bern istorioù dezhañ. Siwazh ez eus kudennoù arc’hant gant ar plac’h kozh ha ret e vo dezho kuitaat an ti hag an dachenn vras el lec’h ma vevont. Arthur a fell dezhañ neuze kavout un teñzor a vefe bet profet d’e dad- kozh pa oa en Afrika. Evit se e rank mont e bed ar Minimoys e-lec’h ma’z eus brezel o ren...

Ur rummad levrioù brudet skrivet gant Luc Besson eo Arthur et les Minimoys. Deuet brav eo ar film e-keñver skeudennoù. Kendrec’husoc’h eo al lodenn vevaat eget an hini “live” zoken. An eilmouezhiañ a zo plijus ivez gant Mylène Farmer, Alain Bashung hag ar re all. Ur film moutig-tre, gant fent ha daveoù a bep seurt. Siwazh n’eo ket trawalc’h evit chom hep enaouiñ, un disterañ, ar re vras...

G.L.

Evit gouzout hiroc’h: http://www.arthuretlesminimoys.com/

Digor eo kenstrivadeg an "An erer yaouank war al leurenn"

Ar genstrivadeg, krouet e 1996, a ginnig bep bloaz 50 strollad a c’hoari dirak 8000 den. 10 nozvezh abadennoù a vo kinniget etre an 3 a viz Meurzh hag an 28 a viz Ebrel e broioù Treger-Goueloù, Kerne, Leon, Naoned, Kreiz-Breizh, Sant-Brieg, Roazhon, Dinan, Gwened ha Normandi-Izel. Pep strollad zo aet ar maout gantañ er genstrivadegoù lec’hel en do tro da c’hoari e Gouel an Erer Kozh, eus an 19 d’an 22 a viz Gouere 2007, hag a enrollo un ton war pladenn kinnig an Erer Yaouank. Ouzhpenn se e vint sikouret war veur a dachenn evit gellout lañsañ ar strollad da vat en un doare micherel.

An holl doareoù sonerezh a zo degemeret ha krouidigezhioù e rank bezañ an darn vrasañ eus tonioù ar strolladoù. An arzourien a vefe kontradet gant tiez-embann pladennoù a live broadel pe etrevroadel n’int ket aotreet da lakaat o anv.

Er bloaz-mañ e vo kinniget d’an dud en em enskrivañ gant ur blog krouet evit an Erer Yaouank war WAT TV: http://www.wat.tv/jeunescharrues07/. Ar vuzisianed a fell dezho kemer perzh a rank kinnig : ur blog war WAT TV, d’an nebeutañ 2 don krouet ganto, ar strollad hag e raktres arzel, ur skeudenn ha peadra da vont e darempred gantañ (chomlec’h post, postel ha pellgomz). Evit gellout kemer perzh e rank an arzourien bezañ o chom e bro ar genstrivadeg el-lec’h m’en em enskrivont.

H.L.

Rock, Pop, un itinéraire bis en 140 albums essentiels

gant Philippe Robert

Alies-tre e teu er-maez levrioù enno listennadoù ar pladennoù a ranker selaou. Peurliesañ ez eo ar memes kinnigoù a gaver, mod pe vod.

Disheñvel an traoù ’vat gant Philippe Robert. Dilezel a ra gourhentoù ar sonerezh, ha gwelloc’h eo dezhañ an hentoù treuz, evel ma’z embann e titl e levr. Personel eo e zibaboù, hag evit kement pladenn dibabet gantañ e kinnig un tamm testenn, hag ul listennad pladennoù all damheñvel. Da lavaret eo n’eo ket 140 pladenn a veneg, met kalz muioc’h e gwirionez.

Ma’z eo treut an dibab evit a sell ouzh ar bloavezhioù 1980, ez eo gwall zedennus an oberenn dre ma kinnig a bep seurt traoù bet embannet etre 1965 ha 1979. Dibaboù Philippe Robert a zo diazezet war ar sonerezh rock, folk ha pop dreist-holl, ha n’eus anv ebet eus soul, funk pe rap, rak soñjal a ra dezhañ e vefe dav sevel ul levr a-ratozh-kaer evit a sell ouzh ar seurtoù sonerezh-se. E-touez an arzourien o deus sachet evezh Philippe Robert, menegomp: Sonic Youth, A Certain Ratio, Young Marble Giants, The Clash, My Bloody Valentine pe c’hoazh Captain Beefheart.

R.M.

Embannet gant Le Mot et le Reste – 336 pajennad – Rakskrid gant Gilles Tordjman

(19 euro an tamm)

http://atheles.org/lemotetlereste/formes/rockpop/

Avoka kreienet

Evit 4 den : 4 avoka azv – 125 g keuz (Cheddar) – 1 loaiad vras eoul olivez – kraoñ-kelvez pilet – 1 boked beler – 1 boked perisilh plaen – 2 sitroñsenn – pebr.

Raktommit grilh ar forn. Gwalc’hit, dizourit ha diskolpit ar boked beler hag ar boked perisilh. Didailhit ar c’heuz dre drañchennou moan.

Didroc’hit 4 zrañchenn eus ar sitroñs ha gwaskit ar peurrest. Didroc’hit an 2 avoka, tennit an askorn, diskargit ar chug sitroñs war ar gorre. Meskit an hanter eus ar c’heuz gant ar c’hraoñ-kelvez pilet hag an eoul. Pebrit pep hanter avoka ha diskargit ar meskaj keuz ha kraoñ-kelvez e-barzh. Lakait war gorre pep avoka un drañchenn Cheddar. Lakait er forn etre 3 ha 4 mm dindan ar grilh. Servijit diouzhtu goude bezañ lakaet beler ha perisilh war an avoka.

Mari Lubrano

Planedennoù 2007

An tourz (21/03 – 19/04)

Evit tennañ gounit eus ar bloavezh-mañ e vo ret deoc’h harpañ ouzh ahel an Aerouant. Evit ho sin e vo liammet gant ar studioù, ar preder hag ar beajoù… Dreist-holl n’en em santit ket kablus o vezañ eürus hag en ho pleud. Grit ho mad eus pep tra, mod-all ho po kudennoù da vat!

An tarv (20/04 – 20/05)

Ahel an Aerouant en devez ul levezon vras war ho sin. Kemer a reoc’h divizoù bras evit lakaat ho puhez da cheñch. Talvezout a raint war an holl dachennoù, met kaoz a vo eus ho puhez kalon da gentañ. Ur ger stur evit ar bloavezh: grit ho mad eus hoc’h amzer!

Ar c’hevelled (21/05 – 21/06)

Ho pet pasianted! Cheñchamantoù bras a vo evidoc’h, met ne vint ket graet trumm. Poan ho po da badout hag en arvar emaoc’h da lakaat pep tra da vezañ c’hwitet dre re a vall. Klaskit chom e peoc’h.

Ar c’hrank (22/06 – 22/07)

Pasianted ivez! Tarzhañ ne zegaso mann ebet deoc’h. Un emzalc’h doujus ha spis a zereo kalz gwelloc’h. Diwallit diouzh hoc’h anien, neuze. Ha savit an traoù a zeiz da zeiz hep klask mont re bell en un tenn.

Al leon (23/07 – 22/08)

Kavout ur c’hempouez etre ho puhez sokial ha prevez a vo diaester ar bloavezh. Leun a levenez e vo an div dachenn-mañ… Ne vo nemet un diskoulm: klask merañ hoc’h implij-amzer eus an doare sederañ posupl.

Ar werc’hez (23/08 - 22/09)

Gwarezet e vioc’h a-fet yec’hed. Hag ezhomm ho po startijenn evit ober ho mad eus an holl chañsoù a zegouzeho war ho hent. Ma taolit evezh ouzhoc’h e vioc’h gouest d’ober pep tra. Diwallit memes tra: chomit hep emellout en aferioù ar re all, mod-all e kousto ker deoc’h.

Ar balañsoù (23/09 – 23/10)

Penaos bihanaat efedoù fall ar planedennoù ha kreskiñ o levezon vat? Teurel evezh ouzh ar re all, diehan, e vo ar respont. Gwelout a reoc’h un tammig re vras kement evit ar garantez hag evit al labour. Diwallit da vezañ dipitet a-benn ar fin.

Ar skorpion (24/10 – 22/11)

Evidoc’h e vo liammet levezon ahel an Aerouant gant tachennoù ar yec’hed hag ar servij. Deoc’h-c’hwi da vezañ dous ganeoc’h hoc’h-unan ha da voumounañ ar re all. Ho prokusted a c’hounezo kalonoù deoc’h. Daoust da se e vioc’h techet da vouzañ un tamm. Met petra a vank deoc’h?

Ar saezhataer (23/11 – 21/12)

Tachennoù pouezus ar bloavezh a vo ar garantez, ar re all hag ar fed embann piv oc’h da vat. Pep tra a yelo mat ma teuoc’h a-benn da gavout ho plas deoc’h ha gouzout ar pezh hoc’h eus c’hoant da gaout da vat. Prest e vioc’h da sikour tud all ha d’en em ouestlañ d’un oberenn sokial pe speredel.

Ar c’havr (22/12 – 20/01)

Ar familh hag ar vicher a vo lakaet war-wel gant ahel an Aerouant. Ma chom hoc’h evezh war an daou dra-mañ e teuoc’h a-benn da gaout disoc’hoù eus ar c’hentañ! Kredit difenn ho sav-poent hep tagañ ar re all evel-just ha priziet e vo hoc’h alioù.

Ar skuilher-dour (21/01 – 18/02)

Ur bloavezh stourm! C’hwi a soñje deoc’h e chomfec’h trankil er gêr er bloaz-mañ? Ne vo ket e giz-se. Ret e vo deoc’h kemer divizioù, en em zifenn, fiñval ha cheñch. Ret e vo derc’hel mat. Tachennoù an arc’hant hag ar familh a vo gwarezet.

Ar pesked (19/02 – 20/03)

Aesoc’h e vo an traoù deoc’h. Un nebeud diaesterioù a c’hellfe c’hoarvezout en ho puhez kalon pe en ho labour. Met ne c’hoarvezo netra grevus, bez’ e vo un doare da vont war-raok. Arabat deoc’h en em santout re gablus ma rit fazioù. Ho youl da eeunaat an traoù a vo a-walc’h evit bezañ digarezet.

Katell Leon

Deiziataer hollvrezhonek 2007

Kavet e vo er stalioù levrioù breizhek hag e Skol an Emsav, e Roazhon, evel-just. Un doare nevez zo gant deiziataer 2007. Bihanoc'h eo evit mont gwelloc'h er chakodoù hag er seier-dorn. An Deiziataer hollvrezhonek zo ur benveg bepred talvoudus : leun a chomlec'hioù (ouzhpenn 200) hag a ditouroù vo kavet diwar-benn Breizh hag ar brezhoneg, un daolenn kemmadurioù, kodoù-post kumunioù Breizh...

13 euro an tamm (gant ar mizoù kas).

Skol an Emsav, 25 straed Pierre Martin, 35000 Roazhon:
Pgz: 02 99 38 75 83. sae.bzh@wanadoo.fr.  http://perso.wanadoo.fr/skol.an.emsav.